प्रधानमन्त्री केपी शर्मा ओलीं छु न मन्त्रालयय् च्वंगु निर्णय यायेमाःगु फाइलबारे स्वन्हुया दुने लिसः बिइगु प्रणाली विकास यायेगु प्रतिबद्धता यानादीगु दु।

प्रतिनिधिसभाय् थौ च्वंगु बैठकय् सांसद तय्स याःगु न्ह्यसःया लिसः बिइगु झ्वलय वयकलं स्वन्हुया दुने बिइमाः व छु न फाइल गन दु धका जानकारी अनलाइनपाखे जुइगु कथं नागरिक एपय् राष्ट्रिय परिचयपत्र व चालक अनुमतिपत्रयात आबद्धताया प्रक्रिया न्ह्याये धुकुगु दु धका जानकारी बियादीगु दु।

चन्द्रागिरि नगरपालिका–१२, बलम्बुइ स्कुल नापा छखाः छेँय् संकास्पद वस्तु खाली कुकर जक जुगु लुगु दु। शंकास्पद वस्तु खनेवं स्थानीयतय्स प्रहरीयात सुचं ब्यूगु खः।

उगु सुचं वयेवं नेपाली सेनाया बम डिस्पोज पुचः वःगुलि अन खाली कुकर जक लुगु खः धका जिल्ला प्रहरी परिसर यलया एसपी नाप प्रवक्ता नवराज अधिकारीं धयादीगु खः।

ख्यायेगु निति जक वांगु प्लाष्टिक दुने कुकर भचा पिने खने दुगुलि स्थानीयत ग्याना प्रहरीयात सुचं ब्यूगु खः। शंकास्पद वस्तु नेपाली सेनाया बम डिस्पोजल पुचलं निष्क्रिय याये धुकुगु दु।

उगु वस्तु बुधवाः न्हिनय् २ः१५ ति छम्ह मनूखं तयावःगु सीसीटीभी फुटेजय् खनेदुगु खः।

प्रधानमन्त्री केपी शर्मा ओलीयात नेपाःया निति दक्षिण कोरियाया राजदूत पार्क ताइयोङं थौ नापलागु दु।

सिंहदरबारय् प्रधानमन्त्री लिसे मन्त्रिपरिषदया कार्यालय वना नापलायेगु झ्वलय् आर्थिक, व्यापार लगानी, पर्यटन नाप निगु पक्षय् दथुइ थीथी विषय ग्वहालि यायेगुलि सहलह जूगु खः।

प्रधानमन्त्री ओलीं नेपाःया थीथी थासय् विकास यायेगु निति दक्षिण कोरियाया ग्वहालि मदिक्क दइ धका भलसा कयादीगु खः। राजदूत पार्क न प्रधानमन्त्री ओलीया कार्यकाल सुथा लाक्क न्ह्याय् फय्मा धका कामना यानादीगु खः।

नापलायेगु झ्वलय् प्रधानमन्त्री लिसे मन्त्रिपरिषदया कार्यालय व परराष्ट्र मन्त्रालयया उच्चाधिकारीपिनिगु न ब्बति दुगु खः।

शेयर बजाः थौ भचा थहावःगु दु। न्हिच्छियक थहाकुहा वंगुलि शेयर बजाः परिसूचक नेप्से २ दशमलव ११ ल्याखं थहावना २ हजार ९ सय ६८ दशमलव ४४ विन्दुइ थ्यःगु दु।

थौ बजाः चाःगु ४ मिनेटय् नेप्से ३ हजार २ विन्दुइ थ्यना बन्द जुइगु इलय् तक भचा कुहावःगु खः। बैंकिङ, विकास बैंक, फाइनान्स, लगानी व मेमेगु बाहेक दक्को समूहया शेयर कुहावःगुलि बीमा, व्यापार, होटल समूहया शेयर तसकं थहावःगु दु।

कर्पाेरेट विकास बैंक, सिन्धु विकास बैंक, रिलायन्स फाइनान्स, दोल्ती पावर कम्पनी व मल्टिपर्पाेज फाइनान्स कम्पनीया शेयर १० प्रतिशतं थहावःगु दु। बजाः सामान्य थहावःगु दिं कर्णाली विकास बैंक समूहया शेयर धाःसा १० प्रतिशतं कुहावःगु दु।

थौ कारोबार रकम धाःसा कुहावःगु दु। वंगु आइतपाः झन्डै २९ अर्ब रुपैयाँ बराबरया कारोबार जूगुलि थौ ३ सय ३७ गु कम्पनीया ४ करोड १४ लाख कित्ता शेयर १८ अर्ब ९० करोड तकाया शेयर न्यायेगु मिइगु जूगु दु।

प्रधानमन्त्री केपी शर्मा ओलीं सरकारं चले याउगु छु न उद्योग व संस्थानत घाटाय् वनेमज्यु धका धयादीगु खः।

सिंहदरबारय् प्रधानमन्त्री नाप मन्त्रिपरिषदया कार्यालयय् उद्योग, वाणिज्य लिसे आपूूर्ति मन्त्रालय व मातहतया निकायनाप सम्बन्धित विषय थौ जुगु ब्रिफिङय् प्रधानमन्त्री ओलीें उद्योगया निति सतक, मत लगायतया पूर्वाधारय् वातावरण तयार जुइ धुकुगुलि आः औद्योगिकीकरणय् वनेत इनाप यानादीगु दु।

“चिचि धःगु लगानीइ यक्को कृषिइ आधुनिकीकरण व स्टार्टअप उद्योग चाय्का बेरोजगारीयात रोजगारीइ हिलेमाः धका धयादीगु खः। उत्पादन अप्पोका आयात विस्थापन याये फइ।”, प्रधानमन्त्री ओलीं धयादीगु दु, “चले मजुगु व घाटाय् वनिइगु उद्योग न्ह्याकेत बः मबिइ। डुुब्बे जुइगु व लिच्वः मवइगु उद्योग चले मयाये।’’

वयकलं मद्यमान व धूमपाननाप सम्बन्धित उद्योग स्वया रोजगारी दयके फइगु व समाजयात सभ्य लिसे स्वस्थ्य दयकेगु कथं उत्पादनय् बः बिइत इनाप यानादीसे उद्योगया नामय् म्वाः मदुगु दिकेगु व बालागु ज्या याइपिन्त संरक्षण यायेत निर्देशन बिउगु दु।

उद्योगमन्त्री दामोदर भण्डारी, नेपाल सरकारया मुख्यसचिव लीलादेवी गड्तौला, प्रधानमन्त्री लिसे मन्त्रिपरिषदया कार्यालयया सचिव राजकुमार श्रेष्ठ, उद्योग मन्त्रालयया सचिव कृष्णबहादुर राउतपि नाप सहलहय् प्रधानमन्त्री ओलीं खनिज व पेट्रोलियम पदार्थया अन्वेषण व उत्खनन् ज्याय् निरन्तरता बिया थुगु आधारय् विकास याये फइगुलि उद्योगया योजना हयेत इनाप यानादीगु खः।

थ्व स्वया न्ह्यः प्रधानमन्त्री ओलीं शिक्षा, सञ्चार, पर्यटन, स्वास्थ्य, कृषि मन्त्रालयनाप सम्बन्धित विषय व सुधारया योजना याःगु विषय सम्बन्धित मन्त्री व सचिवनाप बिस्क बिस्क ब्रिफिङ काउगु खः।