गैरआवासीय नेपाली संघ (एनआरएनए) या ११ क्वःगु विश्व सम्मेलन लिसे अन्तर्राष्ट्रिय महाधिवेशन थौनिसे सुरु जुइत्यःगु दु ।

सोल्टी होटलय् जुइगु उगु ज्याझ्वःया उलेज्या राष्ट्रपति रामचन्द्र पौडेलं उलेज्या याइगु जूगु दु । न्हुगु नेतृत्वया लागि जुइत्यःगु उगु अधिवेशनय् अध्यक्षय् न्याम्हेसिया दाबी यानाच्वंगु दु ।

आः  दुगु कार्यसमितिया अध्यक्षपि बद्री केसी व रविना थापा नापं उपाध्यक्ष आरके शर्मा, महेश श्रेष्ठ व उपमहासचिव विनय अधिकारी तय्सं अध्यक्षय् दाबी यानाच्वंगु दु । केसी, श्रेष्ठ व शर्मां प्यानलनापं उम्मेदवारी घोषणा याये धुकुगु दु ।

उमिसं एमाले, कांग्रेस व माओवादीया समर्थन कयाच्वंगु दु । हलियकं संघय् सूचीकृत सदस्यतय्गु ल्याः ९६ हजार ८ सय ५० म्ह दु ।

नेपालभाषा व नेपाली साहित्यया साहित्यकार, नेपालभाषा एकेदेमिया पुलांम्ह भाईस चान्सलर, चित्तरञ्जन नेपाली मन्त।

९२ दँया नेपाली थौं सोमवाः न्हिनय् २ ता इलय् चाबहिलय् च्वंगु ओम हस्पितलय् मदुगु खः। मदुम्ह नेपाली नेपाल सरकारया थीथी मन्त्रालयस सचिव जुयाः ज्या यानादीधुंकूम्ह व्यक्ति खः

मदुम्ह नेपालीया छम्ह काय् व निम्ह म्ह्याय् लिसें जहान दी।

दुम्ह नेपालीया अन्तिम संस्कार थौं सोमवाः सनिलय् हे पशुपति आर्यघाटय् जुइगु जूगु दु।

थौंनिसे मोहनिया लसताय् न्हुगु नोट हिलिइगु दइगु जुगु दु। थुगु मोहनिया लागि जक १० अर्ब स्वया अप्पो न्हुगु नोट दयकूगु खः।

राष्ट्रबैंकं छम्हेसिया लागि १८ हजार ५ सय रूपैयाँ तक हिलिइगु सुविधा बिःगु दु। सर्वसाधारण तयेसं न्यातका निसे सच्छि तक न्हुगु नोट हिलेफइगु जुगु दु।

वंगु दँय् न्ह्यय्गु च्यागु अर्ब रुपैयाँ बराबरया न्हुगु नोट बजारय् वःगु खः।

नेपाल आयल निगमं पेट्रोलियम पर्दाथया भाः क्वःकाःगु दु। आइतवाः चान्ह्यः १२ बजेनिसे लागु जुइगु कथं निगमं पेट्रोल लिटरं झींछतका व डिजल लिटरय् न्यातका कुकाःगु दु।

भारतीय आयल कर्पोरेसन (आईओसी) पाखे घटे जूया न्हुगु भाः वयेवं भाः समायोजन यानागु धका निगमं धाःगु दु। न्हुगु भाः कथं आः स्वनिगलय् पेट्रोल लिटरं १७३ रुपैयाँय् कुहावःगु दु सा डिजल लिटरं १६८ रुपैयाँ जूगु दु।

नेपालभाषा केन्द्रीय विभागया ब्वमिपिनिगु ‘लुमन्ति दबू’या झिंछक्वःगु ज्यासना पुचःया पदस्थापन जूगु दु ।

न्हूगु ज्यासना पुचलय् नायः– रामेश्वर श्रेष्ठ ‘ह्याउँनिभाः’, न्वकू सकुन्तला महर्जन, छ्याञ्जे– पञ्चलाल महर्जन, दांभरी–संगीता महर्जन च्वनादीगु दुसा मू दुजलय् प्रकाश प्रधान, सुदिप महर्जन, हसना महर्जन, पुण्यकुमारी शाक्य, एलिना शाक्य, रमिना शाक्य व राजेन्द्रकुमार महर्जन च्वनादीगु दु । ज्याझ्वलय् शैक्षिक सत्र २०७६÷७७ दँया नेपालभाषा एम.ए. ब्वँमिपिंत बिदाइ नापं मोहनी, स्वन्ति व न्हूदँ ११४४ या लसताय् भिन्तुना कालबिल ज्याझ्वः नं जुल ।

ज्याझ्वलय् ब्वमि जेष्ठ नागरिक श्रीकृष्ण महर्जनपाखें सिन्हः तिकाः निवर्तमान नायः अनिल स्थापितपाखें कोखाबियाः न्हू ज्यासना पुचःयात लसकुस याःगु खःसा मूपाहां कथं झायादीम्ह नेपालभाषा केन्द्रीय विभागया प्रमुख सह प्राध्यापक डा. राजनलाल जोशीं शैक्षिक सत्र २०७६।७७ या ब्वमिपिंत लुमन्ति चिं लःल्हानादीगु खः ।

भिंतुना बीगु झ्वलय् वय्कलं लुमन्ति दबूपाखें निरन्तर रुपं ज्याझ्वः न्ह्याकाः वने फयेमा नापं भाषा साहित्य ख्यलय् नं सृजनशील जुयाः न्ह्याः वनेफयेमा धकाः मनंतुंसे थज्याःगु ज्याय् विभागं माःकथं ग्वाहालि यायेगु बचं नं बियादिल । लुमन्ति दबूया दांभरी संगिता महर्जनं लसकुस यानाः न्ह्याःगु ज्याझ्वलय् निगूगु सेमेष्टरपाखें देवानन्द महर्जन, प्यंगूगु सेमेष्टरपाखें श्रीकृष्ण महर्जन, एम.फिल.या ब्वमिपाखें दानदास श्रेष्ठं थःथःगु भिंतुना न्वचु तयादीगु खः ।

ज्याझ्वः ताःलाकेत ग्वाहाली यानादीपिं सकसितं दबूया न्वकू सकुन्तला महर्जनं सुभाय् देछाःगु खःसा ज्याझ्वः लुमन्ति दबूया छ्याञ्जे पञ्चलाल महर्जनं न्ह्याकादीगु खः ।