जनता समाजवादी पार्टी (जसपा) नेपालं सरकारय् ब्बति काइपि मन्त्रीपिनिगु नां क्वछिउगु दु।

थौ बिहीवाः नकतिनि क्वचाःगु पार्टीया केन्द्रीय कार्यकारिणी समितिया बैठकं उपप्रधानमन्त्रीनाप स्वास्थ्य लिसे जनसंख्या मन्त्रीइ पार्टीया अध्यक्ष उपेन्द्र यादवयात छ्वइगु निर्णय जूगु दु।

अथेहे वन लिसे वातावरण मन्त्री सप्तरी–१ पाखे निर्वाचित नवलकिशोर साह व स्वास्थ्य राज्यमन्त्रीइ धनुषा–१ पाखे निर्वाचित दीपक कार्कीयात छ्वयेगु निर्णय याःगु दु।

शिलाचह्रे पशुुपतिइ जुइगु मेलाय् गुठी संस्थान यायेमाःगु ज्या क्वचाःगु दु धका थौ छगु पत्रकार सम्मलेन याना जानकारी बिःगु दु

संस्थानया अध्यक्ष डा.शिवराज पडिण्तं नेपाःया थीथी जात्रा हनेगु झ्वलय् गुठी संस्थान हरेक जात्रा पर्वय् थःपिन्स बालक्क ज्या याना वयाच्वनागु दु धका धयादीगु दु। वयकलं गुठी संस्थानया १५ करोड बजेट मध्ये करिव ४० लाख बजेट शिलाचह्रेया इलय् खर्च यायेगु यानाच्वनागु दु धका धयादीगु खः।

वयकलं पशुपतिइ मेलाय् वइपि साधु सन्तपिन्त नयेगु त्वनेगु न संस्थान खर्च यानाच्वंगु दु धका धयादीसे वयकःपिन्त लिहावनिइगु इलय् दक्षिणतक बियाछ्वयेगु यानागु दु धका धयादीगु खः।

अथेहे संस्थानया प्रशासकिय प्रमुख किरणं शाक्यं साधु सन्त गुलि वइ धका धायेफुगु अवस्था मदु। संस्थानं म्हिगःनिसे साधु सन्तपिन्त माःगु नकेगु, उमित माःगु सिँ च्याकेत सिँया ब्यवस्था न संस्थान न्हापानिसे याना वयाच्वनागु दु। पशुपतिइ दुने पुजा जुइगु दक्को खर्च संस्थानय् याना वयाच्वनागु दु। तर अन फोटो कायेमदइगु जुगुलि संस्थान यानागु ज्या खने मदु धका न धयादीगु खः।

शिलाचह्रैया इलय् संस्थानं पशुपतिइ जक मखु गोरखनाथ मृगस्थली, भष्मेश्वर अखडा, निर्मल अखडा, कालमोचनया बैरागी अखडा, सन्यासी अखडा, नाथ अखडाय् साधु सन्तपिन्त च्वनेगु ब्यवस्था नापं अन मिँ च्याकेत सिँया गुठी संस्थान ब्यवस्था न्हापानिसे याना वयाच्वनागु खँ धका धयादीगु खः।

नेकपा एमालेया उपाध्यक्ष विष्णु पौडेलं कांग्रेसनाप गठबन्धनय् समस्या वयेवं संविधानसम्मत कथं मेगु विकल्प मालेगु ज्या जुगु खँ धका धयादीगु खः।

प्रतिनिधिसभाया बैठकय् थौ बिहीवाः ई कया न्ववायेगु झ्वलय् वयकलं छु समस्या वया हे संविधानसम्मत मेगु विकल्प मालेगु ज्या जुगुलि मेगु कथं कायेमज्यु धका धयादीगु खः।

‘म्हिगः गठबन्धनय् समस्या वःगुलि, सहकार्य यानाच्वंगु दल दथुइ समस्या वंगुलि संविधानसम्मत ढंगें विकल्प मालेमाः’, धका वयकलं धयादीगु खः।

प्रधानमन्त्री पुष्पकमल दाहाल प्रचण्डं न्हुगु समीकरणबारे प्रतिनिधि सभाया बैठकय् जानकारी बिउगु दु। बिहीवाः प्रतिनिधि सभाया बैठकय् न्ववायेगु झ्वलय् प्रधानमन्त्री प्रचण्डं कांग्रेसनाप सम्बन्ध स्यंगू थीथी कारण धाःगु खः।

गठबन्धनय् न्यागु कारणं स्यंगु खः धका धयादीगु खः।

निर्वाचन आयोगं नागरिक उन्मुक्ति पार्टी (नाउपा) या अध्यक्षय् रेशमलाल चौधरीया नामय् अद्यावधिक यायेत अस्वीकार याःगु दु।

नागरिक उन्मुक्ति पार्टी न पुस २७ गते कैलालीया टीकापुरय् जूगु महाधिवेशनपाखे चौधरीयात सर्वसम्मत कथं अध्यक्ष ल्यःगु खः। व हे कथं नाउपां दलया अभिलेख अद्यावधिक यायेत निर्वाचन आयोगय् माघ २९ गते निवेदन बिःगु खः।

उगु निवेदनय् निर्वाचन आयोगं बिहीवाः निर्णय यासे रेशमयात नाउपाया अध्यक्ष मानेयायेत अस्वीकार याःगु दु। आयोगया प्रवक्ता शालिग्राम शर्मा पौडेलया कथं राजनीतिक दलसम्बन्धी ऐनया व्यवस्था कथं नाउपाया निर्वाचन आयोगय् थ्व स्वया न्ह्यः जुयाच्वंगु अभिलेख अद्यावधिक यायेफइ मखु धका निर्णय याःगु दु।

निर्वाचन आयोगय् दुगु अभिलेखय् नाउपाया अध्यक्षय् रञ्जिता श्रेष्ठ चौधरी जुयाच्वंगु दु।