सापारु कुन्हु देय्न्यंकं थौ सायाः पिकायेगु ज्या जुयाच्वंगु दु। येँय् हनुमानध्वाखा लागायात केन्द्र दयेकाः सायाः पिकायेगु याइसा ख्वपय् ताहामचा पिकायेगु याइ।

थुकिया नापं हे घिन्तांघिसि ट्वाक धकाः कथि ल्वाकाः प्याखं नं पिकायेगु याइ।दान बीगु ज्वलं लुटालुट याइपिंत नियन्त्रण यायेगु लागिं नेपाल प्रहरी, नगर प्रहरी व हनुमानध्वाखाया नेपाली सेनाया शार्दुलजंग गुल्मपाखें समेत विशेष पहल याइगु जूगु दु।

परराष्ट्रमन्त्री आरजु राणा देउवा भारतीय विदेशमन्त्री एस जयशंकरयात नापलागु दु। मन्त्री राणां थौ भारतीय प्रधानमन्त्री नरेन्द्र मोदीयात नापलाइगु ज्याझ्वः दु।

प्यन्हुया निति भ्रमणय् वनाच्वंम्ह परराष्ट्र मन्त्री राणा आइतवाः दिल्ली थ्यकूगु खः। राणां भ्रमणया झ्वलय् स्वास्थ्य उपचार यायेगु ज्याझ्वः न दु धका वयकःया सचिवालयं जानकारी बिउगु दु।

प्रधानमन्त्री केपी शर्मा ओलीं सोलुखुम्बुया खुम्बु पासाङल्हामु गाउँपालिका—५, थामेखोलाय् वंगु साउन ३२ गते हिमताल बिस्फोट जूगु बारे जानकारी कयादीगु दु।

घटनास्थलय् थ्यका लिहावम्ह रक्षामन्त्री मानवीर राई, जनप्रतिनिधि व सम्बन्धित निकायया उच्चाधिकारीपाखे प्रधानमन्त्री लिसे मन्त्रिपरिषदया कार्यालय, सिहंदरबारय् प्रधानमन्त्री ओलीयात उगु विवरणया जानकारी बियादीगु खः। अन जूगु अवस्थाबारे बालाक्क न्यने धुका प्रधानमन्त्री ओलीं केन्द्र सरकारया पाखे याये माःगु ज्या व निर्णय यायेगु प्रतिबद्धता प्वकादील।

उगु ज्याझ्वलय् रक्षामन्त्री राई, सङ्घीय सांसद सोनाम गेल्जेन शेर्पा, कोसी प्रदेशसभा सदस्य बुद्धिबहादुर राजभण्डारी, मुख्यसचिव लीलादेवी गड्तौला, राष्ट्रिय विपद् जोखिम न्यूनीकरण लिसे व्यवस्थापन प्राधिकरणया कार्यकारी प्रमुख अनिल पोखरेल, गाउँपालिकाया अध्यक्ष मिङ्मा छिरी शेर्पा, उपाध्यक्ष टासी ल्हामु शेर्पापिनिगु ब्बति दुगु खः।

स्थलगत प्रतिवेदनय् आःया निति खाद्यान्नलगायतया राहत व क्षतिपूर्ति नाप मत, टेलिफोन नाप मदयेक मगागु सेवा सञ्चालन याये माःगु उल्लेख दु। क्षतिया विस्तृत विवरण अध्ययन याना मेमेगु हिमतालय् न जोखिमया अवस्थाबारे थीथी थासय् विज्ञपि यंका अध्ययन यायेमाःगु व हाकन निर्माणया कार्ययोजना दयका कार्यान्वयन यायेमाः धका धयादीगु दु।

विस्फोट लिपा अन चलं वया १७ छेँ व छगु विद्यालय ध्वस्त जूगु खः। न्हिनय् उगु घटना जुगु व पूर्व सूचना प्रणाली छ्यगुलि मानवीय क्षति जुइपाखे बचे जुगु धका प्रतिवेदनय् उल्लेख याःगु दु।

यलया क्वन्तिइ छेँय् मिँ न्वःगु दु। मिँ न्वःगु थाय् २५ म्ह नगर प्रहरी, स्वगः दमकल व छगः लः ट्यांकरया ग्वहालि छु ई लिपा नियन्त्रणय् काःगु खः।

यल महानगरपालिकाया नगर प्रहरी प्रमुख सीताराम हाछेथुया कथं मिँ च्यागु छेँय् मनूत च्वकिइगु मया। थौ जात्राया झ्वलय् छेलिइ जेरी, स्वारी दयका च्वंगु खः।ग्यास लिक जूया मिँ च्याःगु अनुमान याना तःगु दु।

विस्तृत विवरण धाःसा मवनि।

राष्ट्रपति रामचन्द्र पौडेलं नेपाल बहुजातीय, बहुभाषिक व बहुसांस्कृतिक देय् जुगुलि दक्को जातजाति, भाषाभाषी व संस्कृतिया उत्थान व विकास जुइगु कथं सञ्चार माध्यमय् बुँख वयेमाः धका धयादीगु दु।

नेवाः पत्रकार राष्ट्रिय दबूया पदाधिकारी नाप पत्रकारपि नाप राष्ट्रपति भवन शीतल निवासय् थौ आइतवाः नापलायेगु ज्याझ्वलय् राष्ट्रपति पौडेलं अथे धयादीगु खः। उगु ज्याझ्वलय् राष्ट्रपति पौडेलं विविध भाषाभाषी, संस्कृति व समुदायया विकास नाप अधिकारं राष्ट्रिय एकता बल्लाइ धका धयादीगु खः।

वयकलं नेपालभाषा लगायतया थीथी मातृभाषामा पत्रपत्रिकाया प्रकाशन व विकासं सम्बन्धित भाषा, साहित्य, संस्कृतिया विकासय् योगदान दइ धका भलसा कयादीगु खः। राष्ट्रपति पौडेलं पत्रकारिताय् समावेशीकरण, नेपालय् मातृभाषा पत्रकारिताया विकास यायेगु निति थःगु बालाक्क ग्वहालि व समर्थन दइ धका धयादीगु खः।

उगु ज्याझ्वलय् नेवाः पत्रकार राष्ट्रिय दबूया अध्यक्ष नृपेन्द्रलाल श्रेष्ठं राष्ट्रपति पौडेलसमक्ष ध्यानाकर्षण पौ लःल्हानादीगु खः। पत्रकार दबूया वरिष्ठ उपाध्यक्ष सुनील महर्जनं सञ्चारमाध्यमयात समावेशीकरण व मातृभाषाया पत्रकारिताया विकास यायेत इनाप यानादीगु खः। राज्यया चरित्र समावेशी दयकेगु निति सञ्चारमाध्यम न समावेशी जुइमाः धका महर्जनं इनाप यानादीगु खः।

नेपाल भाषाया पत्रकारिता शुरु जूगु सच्छि दँ थ्यःगु लसताय् नेवाः पत्रकार राष्ट्रिय दबू न थीथी ज्याझ्वः याना दच्छियक मातृभाषा पत्रकारिता शत्ताब्दी दँ कथं हनेत्यःगु खः। थौ उगु ज्याझ्वलय् पत्रकार दबूया सल्लहाकार बिजयरत्न असंबरे, किरण शाक्य नाप दबू पदाधिकारी नाप येँ, यल व ख्वप जिल्लाया प्रतिनिधिपि राष्ट्रपति कार्यालय शीतल निवासय् वःगु खः।