प्रधानमन्त्री केपी शर्मा ओलीं चि चिधःगु पुजीपाखे उत्पादन अप्पोका यक्को उद्योग स्थापना यायेमा धका धयादीगु दु।

स्टार्ट अप नेसन २०३० ज्याझ्वलय् थौ सम्बोधन यायेगु झ्वलय् प्रधानमन्त्री ओलीं न्हुगु व सृजनशील बिचाः याना ल्याय्म्पि व मिसापिन्त ज्या यायेगु निति विदेश मवसे स्वदेशय् रोजगारी व आयया अवसर मालेफइ धका धयादीगु दु।

वयकलं आन्तरिक उत्पादनपाखे आयात विस्थापन यायेत, गरिबी क्वकायेगु, राष्ट्रिय आत्मविश्वास अप्पोकेगु व बालाक्क विकासया आज्जु ज्वना ल्याय्म्हत उधमशीलताय् वयेमाः धका धयादीगु खः। थःपिनिगु सम्पत्ति तया मखु परियोजनाका आधारय् बैंकं ऋण बिइमाः धका वयकलं इनाप यानादीसे छु ठग तत्वतय्स सहकारीइ दुहावना सहकारीयात बदनाम यायेत स्वःसा न सरकारं सहकारीयात बालाक्क न्ह्याकेगु स्पष्ट यानादीगु खः।

“जिमिसं प्रविधि, सीप व पुजीया आधारय् दक्को देशयात उत्पादनय् लिच्वः खनेदइगु कथं उधमशीलता अप्पोकेमाः धका धयादीगु खः। सरकारं लगानी याःगु छु न ज्या न असफल जुइ मज्यु। थुकियात अभियान कथं न्ह्याकेमाः। देशयात समृद्धि यायेगु निति सरकारं निजी क्षेत्रयात यायेमाःगु सहजीकरणय् म्हो याइमखु।“, वयकलं धयादीगु दु, “जिमिसं सरकारय् ध्वाँय् सन्केत जक वयागु मखु। थुगु दँय् जि हाकन प्रधानमन्त्री जुइ मखुम्ह खः। छु यायेगु निति जिम्मेवारीइ वःगु दु।

“उगु ज्याझ्वलय् उपप्रधानमन्त्री लिसे अर्थमन्त्री विश्नुप्रसाद पौडेल, उद्योगमन्त्री  दामोदर भण्डारी, श्रममन्त्री शरतसिंह भण्डारी, नेपाल उद्योग वाणिज्य महाङ्घया अध्यक्ष चन्द्र ढकालपिनिगु ब्बति दुगुलि ज्याझ्वः निन्हु तक न्ह्याइ।

लुँया भाः थौ न्हुगु रेकर्ड तःगु दु। लुँया भाः आःतक हे दकलय् अप्पो १ लाख ५३ हजार तका न कारोबार जुुगु दु धका नेपाल सुनचाँदी व्यवसायी महासङ्घं धाःगु दु।

अथे हे वहःया भाः न थौ झीन्यातका थहावंगु दु।वहः तोलां झीन्यातका थहावना थौ १ हजार ८ सय ३५ तका न कारोबार जूगु दु धका महासङ्घं धाःगु दु।

नगदेशय् थौनिसे मौलिक महाकाली प्याखँ पिहा वइगु जूगु दु।

प्याखँ ताःलागु निति, व्यवस्थित कथं न्ह्याकेत मूल व्यवस्थापन समिति, नँसा व्यवस्थापन समिति, अर्थ संकलन समिति, ख्वापा, तिसाः, वसः समिति, प्रचारप्रसार समिति याना न्यागु समिति दय्काःगु दु धका महाकाली गण नाच २०८१ मूल व्यवस्थापन समितिया नायः कृष्णबहादुर घःजु न धयादीगु दु।

पौराणिक बाखं कथं मनू तयेत भूत, दैत्य, प्रेत पिचास, दैत्य दानवतय्स दुःख बिगुलि थुगु प्याखँ पिहावःगु धका धायेगु याइ। थुगु महाकाली पिहा वये धुका अथे तयेत भूत, दैत्य, प्रेत पिचासपाखे दुःख बिइमखु धका धायेगु याइ।

थीथी १६ म्ह द्यःपिनिगु ख्वापा व लं पुना तान्त्रिक विधि पूरायाना महाकाली प्याखँ कन्ह्यनिसे न्ह्याइगु जुगु दु। मुहाली पुया, नायखिँ, धाँ बाजा, तः, मृदङ, भुस्याय्, छुस्याय् बाजं थाना प्याखँ हुलेगु याइ।

उगु प्याखँनय् महाकाली, महादेवी, महालक्ष्मी, देवी, वेताः प्यम्ह, भूत भैरव निम्ह, कवः निम्ह, ख्याः निम्ह, माकः निम्ह, सिंह छम्ह याना झींखुम्ह द्यःपि प्याखँ हुलेगु याइ।थुगु प्याखँ न्हिं प्यघौ नगदेशया थीथी थासय् प्याखँ हुलेगु याइ।

१४ सय दँ पुलागु न्यकू जात्रा मतयाः (दीपयात्रा) यलय् थौ तःजिक हंगु दु

दँय् दँसं भदौ कृष्ण द्वितीया साया जात्राया कन्ह्य कुन्हु थुगु जात्रा हनिइगु याइ। थुगु जात्राय् बौद्ध नाप हिन्दु धर्मावलम्बीपिन्स यलया प्यंगू अशोक स्तूपनाप थीथी विहार, महाविहार, चैत्य, नाप द्यःया चाःहिलिइगु याइ। द्यःया थाय् धूप, मत, कपूर, ध्यवा, मह्रि छायेगु याइ।

न्यकू जात्रा–मतयालय् गुलि थः मदुपिनिगु नामय् मत च्याकिइगु याइ। थुगु जात्राया निति यलय् झीगु थासय् च्वंपिन्स पालंपाः यायेगु याइसा थुगु दँय् नकबहीःया पाः लागु दु।नकबहीः, मंगः, चक्रबहीः, इखाछे, नागबहाः बुबहाः, हौगः, वकुबहाः, इखालखु, कोबहाः व सौगः याना झीगु त्वाः मिले जूया जात्रा व्यवस्थापन व बाजं प्रशिक्षण बिइगु याइ। यलया जुगु सिद्धिनरसिंह मल्लया पालं निसे थथे जात्रा जुया वयाच्वंगु धका धायेगु याइ।

थुगु जात्राय् नवबाजा धिमे, नाय्खिं, क्वँचाखिं, मगःखिं, नगरा, ढोलक, मृदङ, झाँक्री बाजं, जोरानगरा, दह ब्याबाजं, खँजरी, दबदत, धाः, दमोखिं, नेकू, तिक्ली व पय्ताखिं बाजं थायेगु याइ। थुगु बाजं मध्ये धाः, न्यकू, दमोखिं, प्रमुख खःसा न्यकू बाजं थाइगुलि न्यकू जात्रा धायेगु न याः।

लैङ्गिक व यौनिक अल्पसंख्यक समुदायपिन्स बिस्क कथं हन साया  जात्रा।थौ मंगलवाः न्हिनय् ठमेलस्थित सञ्चय कोष भवन न्ह्यने मुना तेस्रोलिंगी, अन्तरलिंगी, समलिंगी समुदायया मनू तय्स गौरव दिवस (प्राइड डे) या कथं साया जात्रा हंगु दु।

उमिस सांस्कृतिक लँ व बाजं थाना हने ज्या याःगु खः। यौनिक लिसे लैङ्गिक अल्पसंख्यक समुदायया मनू तय्स हंगु जात्रा स्वयेगु निति पर्यटक वःगु दु। ब्बनि कापि स्वसः स्वया अप्पो मनूत स्वनिगः पिने वःगु दु धका व्लु डाइमण्ड सोसाइटीं धाःगु दु।

साया स्वयेगु निति महिला, बालबालिका लिसे जेष्ठ नागरिक मन्त्री नवलकिशोर साह सुडीलगायत नर्वेजियन व अमेरिकी प्रतिनिधिपिनिगु न ब्बति दुगु खः।