प्रधानमन्त्री केपी शर्मा ओलीं भारतया उत्तराखण्डय् खुसिबाः वया तनाच्वपि नेपाःमि तय्त उद्धारया निति कूटनीतिक कुतः जुगु दु धका धयादीगु दु।

नेपाली न खुसिवाः वया तना च्वंगु आशंका जुया तत्काल कूटनीतिक कुतः जुयाच्वंगु दु धका धयादीगु खः। खुसिबाः वया म्हति १७ म्ह स्वया अप्पो नेपाःमिपि तनाच्वंगु ओलीं धयादीगु दु ।

गाउँपालिकाया अध्यक्ष हरिचन्द्र बस्नेतं बिहीवाः छगू विज्ञप्तिपिकया कुशे गाउँपालिका–२ या १३ म्ह स्वया अप्पो तनाच्वंगु धका जानकारी बियादीगु खः।

भारतया उत्तराखण्ड राज्यय् मंगलवाः व बुधवाः वःगु खुसिबाः व चलः लिपा जाजरकोटया १२ म्ह, बर्दियाया ५ म्ह व जुम्लाया १ म्ह यानाः १८ म्ह तनाच्वंगु दु।

मंगलवाः तच्वकं वा वःगु हुनिं उत्तरकाशीया धरालीबजारय् खुसिबाः वःगु खःसा बुधवाः पौरीगढवालय् चलः वंगु खः।उगु लागाय् मजदुर जुयाः स्याउ लयेत वंपिं नेपाःमित खुसिबाः व चलखय् लानाः सम्पर्क त्वाःदःगु धासें येँ पालिका संघयात समन्वय यायेत इनाप याःगु दु।

जाजरकोटय् च्वंगु कुशे गाउँपालिकाया नायः हरिचन्द्र बस्नेतं छगू विज्ञप्ति जारी यासें १३ म्हसिबें अप्वः बेपत्ता जूगु जानकारी ब्यूगु दु।विज्ञप्तिइ कुशे गाउँपालिकाया वडा ल्याः २ या १३ म्हसिबें अप्वः व मेमेगु वडाया सुं सुं मनूत सम्पर्कय् मदुगुलिं बेपत्ता जूगु जुइफुगु जानकारी सामाजिक संजालपाखें वःगु खँ न्ह्यथनातःगु दु।

बेपत्तापिनिगु मालेगु व उद्धारया नितिं नेपाल सरकार व परराष्ट्र मन्त्रालय मार्फत कूटनीतिक पहल यायेत प्रादेशिक व संघीय सरकारया ध्यानाकर्षण याकूगु दु।अथे हे बुधवाः सुथय् उत्तराखण्डया पौड़ी गढवाल लिक्क सिन्धु खुसिया सिथय् चलः वनाः बर्दियाया प्यम्ह नेपाःमि बेपत्ता जूगु दु।न्हू दिल्लीइ च्वंगु नेपाली दूतावासं मालेगु व उद्धारया नितिं भारतीय पक्षलिसे समन्वय यानाच्वनागु जानकारी ब्यूगु दु।

खुसिबाः प्रभावित क्षेत्रय् उद्धारया ज्या जुयाच्वंगु भारतीय सञ्चारमाध्यमं न्ह्यथंगु दु।

सेयर बजाः लिपागु दिं थौ दक्कों थहावःगु दु। नेप्से परिसूचक म्हिगः स्वया १८.३० ल्याखं थहावंना २८५० य् थ्यःगु दु। थौं १८७ गु कम्पनीया भाः थहावःगु दु सा ६२ गु कम्पनीया भाः कुहावःगु दु।

कारोबार रकम सामान्य थहावःगु दु। लिपागु दिं ७ अर्ब ६३ करोडया कारोबार जुगुलि थौ ८ अर्ब ५३ करोडया भाः थहावःगु दु। फाइनान्स समूहया सूचक दकलय् अप्पो १.३८ प्रतिशतं थहावःगु दु।बैंकिङ ०.४३, विकास बैंक ०.४२, होटल नाप पर्यटन ०.६०, हाइड्रोपावर ०.७५, लगानी ०.३०, जीवन बीमा ०.७६, उत्पादन नाप प्रशोधन १.१२, माइक्रोफाइनान्स ०.३६, निर्जीवन बीमा ०.४२, मेमेगु १.०३ नाप व्यापार ०.९९ प्रतिशतं थहावःगु दु।

थौ सिक्लेस हाइड्रोपावरया भाः दकलय् अप्पो थहावना ९.८१ प्रतिशतं थहावःगु दु सा अथेहे बरुण हाइड्रोपावर ९.७८, मकर जितुमाया सुरी हाइड्रोपावरक ७.५६, खानीखोला हाइड्रोपावर ६.१९, लिबर्टी इनर्जी ५.७२, आईसीएफसी फाइनान्स ४.४२ प्रतिशतं थहावंगु दु।

उन्नति सहकार्य लघुवित्तया भाः दकलय् अप्पो ८.२६ प्रतिशतं कुहावःगु दु सा समाज लघुवित्तया ५.४२, सान्भी इनर्जी २.७१ नाप मैलुङखोला जलविद्युत २.६९ प्रतिशतं कुहावःगु दु। थौ दकलय् अप्पो कारोबार जूगु कम्पनीइ लिबर्टी इनर्जी, शिवम् सिमेन्ट, हिमालयन रिइन्स्योरेन्स, नेपाल पुनर्बीमा नाप युनाइटेड मोदी हाइड्रोपावर न्ह्यने लागु दु

प्रधानमन्त्री केपी शर्मा ओलीं आर्थिक ग्वाहालि, क्षेत्रीय एकीकरण व मंकाः प्रगतिया भावनाय् नेपाः थः जःला खःला व मेमेगु देय्तलिसेया साझेदारीयात क्वातुकेत प्रतिबद्ध जूगु धयादीगु दु।

भूपरिवेष्टित विकासशील देय्या स्वक्वःगु संयुक्त राष्ट्रसङ्घीय सम्मेलनया झ्वलय् थौं ग्वसाः ग्वःगु ‘भूपरिवेष्टित मुलुकया दिगो पूर्वाधार, सम्पर्क सञ्जालया सबलीकरण व पंगः मदूगु पारवहन प्रणाली’ विषयया उच्चस्तरीय विषयगत राउण्ड टेबलयात संबोधन यासें वय्कलं उगु प्रतिबद्धता प्वंकादीगु खः।

प्रधानमन्त्री ओलीं ‘समृद्ध नेपाः, सुखी नेपाःमि’या नेपाःया जनताया राष्ट्रिय आकाङ्क्षा पूवंकेत नेपालं दिगो व तःगतिं आर्थिक वृद्धि यायेत दिगो पूर्वाधार, सबल कनेक्टिभिटी व निर्वाध पारबहन प्रणालीयात प्राथमिकता बियातःगु ध्वाथुइकादिल। “झीसं सहज व निर्वाध पारबहन व व्यापार सुनिश्चित यायेत सीमापार सम्पर्कयात सक्रिय रूपं तब्याकेगु नापं सुदृढ यायेत्यनागु दु।”, प्रधाननन्त्री ओलीं धयादिल, “आवाजा कार्ययोजनाय् पारित दिगो पूर्वाधार, सबल कनेक्टिभिटी व निर्वाध पारबहन नीति, भूपरिवेष्टित मुलुकतय् विकास, लचिलोपन थेंजाःगु ज्याझ्वः झी आशाया थां खः।

थुगु प्रावधानलिसेंया कार्यढाँचायात भौतिक, डिजिटल व आर्थिक रूपं विश्वव्यापी स्वाइगु झीगु सामूहिक दृढ सङ्कल्पयात नवीकरण यायेत जिं इनाप यानाच्वना।” वय्कलं समता, समावेशीकरण व मंकाः प्रगतिया निंतिं मजिमगाःगु आवश्यकताकथं दूगु पूर्वाधार, कनेक्टिभिटी व ट्रान्जिटय् ध्यान केन्द्रित यायेत इनाप यासें छुं नं देय् थुगु खँय् ल्यूने मलाइगु कथं बांलाःगु भविष्य निर्माणया निंतिं आह्वान यानादिल।

भूपरिवेष्टित विकासशील देय्तय् स्वक्वःगु संयुक्त राष्ट्रसङ्घीय सम्मेलनलिसे सम्बन्धित ज्याझ्वः थौं क्वचायेत्यंगु दु।

प्रधानमन्त्री केपी शर्मा ओलीलिसे एसियन पूर्वाधार लगानी बैंकया अध्यक्ष जिन लिम्बुननं थौं नापलानादीगु दु।

तुर्कमेनिस्तानया आवाजाय् न्ह्यानाच्वंगु भूपरिवेष्टित विकाशील देय् तय्गु स्वक्वःगु संयुक्त राष्ट्रसङ्घीय सम्मलेनया झ्वलय् वय्कःपिं ‘साइडलाइन’ नापलानादीगु खः।