इलाम क्षेत्र नम्बर २ या प्रारम्भिक मतगणना कथं नेकपा एमाले व श्रम संस्कृति पार्टीया उम्मेदवार दथुइ तसकं प्रतिस्पर्धा जुयाच्वंगु दु।

नेपाली कांग्रेसया उम्मेदवार भेषराज आचार्यं २१०, रास्वपा उम्मेदवार गोकुल राई न १७१ मत व नेपाली कम्युनिस्ट पार्टीया उम्मेदवार ओम गुरुङं ५१ मत हःगु दु।

पूर्वपत्रकार ऋषि धमला रौतहट–४ य् तसकं लिउने लागु दु। प्राइम टीभीया सञ्चालक तक जुयादीम्ह धमला आम जनता पार्टीया उम्मेदवार खः।

आः तक रौतहट–४ य् धमलां १० मत जक काउगु दु। अन ५ हजार ९२ मत ल्याःखाय् धुकुगु दु।रौतहट–४ य् रास्वपाया गणेश पौडेल २ हजार २ सय ५ मत हया न्ह्यने लानाच्वंगु दु सा कांग्रेसया देवप्रसाद तिमल्सेना ६ सय ९२ मत व नेकपाया रामकुमार भट्टराई ६ सय ३६ मत काये धुकुगु दु।

प्रतिनिधिसभा निर्वाचनय् मुस्ताङं नेपाली कांग्रेसया उम्मेदवार योगेश गौचन थकाली त्यागु दु। योगेशं ३३०७ मत हया बिजयी जुगु खः।

वयकःया निकटतम प्रतिद्वन्द्वी नेकपा एमालेया उम्मेदवार इन्द्रधारा विष्टं १८०६ मत हःगु खः। अथेहे रास्वपाया उम्मेदवार अधितीय चन्द्र थकालीें ७५९ मत हःगु खः।

प्रतिनिधिसभा सदस्य निर्वाचनय् येँ निर्वाचन क्षेत्र नं १ पाखें राष्ट्रिय स्वतन्त्र पार्टी (रास्वपा)या रञ्जु दर्शना न्यौपाने १५ हजार ४५५ मत हयाः त्याउगु दु।

नेपाली कांग्रेसया उम्मेदवार प्रवल थापा क्षेत्री यात ९ हजार ९१ मतान्तर बूकुगु खः। कांग्रेसया थापा क्षेत्रीं ६ हजार ३६४ मत हःगु खः।

येँ क्षेत्र नम्बर ८ य् राष्ट्रिय स्वतन्त्र पार्टीया उम्मेदवार विराजभक्त श्रेष्ठं १७२४ मत हया न्ह्यने लानाच्वंगु दु।

अथेहे कांग्रेस उम्मेदवार सपनाराज भण्डारीं २०७, नेपाली कम्युनिस्ट पार्टीया सुमन सायमीं १५४ व नेकपा एमालेया राजेश शाक्यं ११५ मत काउगु दु।