विराट नेपालभाषा साहित्य सम्मेलन गुथिया ग्वसालय् ख्वपया थीथी थाय् स्वयेगु व अनया खँ न्यनेगु नापं साहित्य ब्वनेगु न्हूगु अवधारणा ज्वनाः शनिवाः खुन्हु “विराट साहित्य पदयात्रा” ज्याझ्वः क्वचाःगु दु।

ख्वपः देयया तःपुखू सिद्धपुखुलिइ सुथय् ७ः३० ता इलय् मुनाः न्ह्याकुगु उगु पद यात्राय् स्वनिगःया ख्वीम्हं मल्याक्क साहित्यकारपिन्सं ब्वति काःगु खः।

विराटया नायः महेन्द्र गोपाल कर्माचार्यं सकसितं खादा न्येयकाः लसकुस यानादीगु उगु पद यात्रा ऐतिहासिक भाज्यापुखुलिइ कौला याना खौमाया जगतसुन्दर झ्वाता, लायकू व तलेजु दुने, तःमारी व प्रसन्नशील दिपंकर विहार लगायतया थीथी थासय् चाःहिलाः क्वचायेकुगु खः।उगु यात्राय् लोककवि राजभाई जकःमि, स्नेह सायमि, रिता महर्जन रितु, सजना बज्राचार्य, विमल प्रभा बज्राचार्य व विराटया नायः महेन्द्र गोपाल कर्माचार्य लगायतया साहित्यकारपिन्सं थीथी थासय् साहित्य वाचन यानादीगु खः।

अथेहे, उगु यात्राया झ्वलय् ख्वप देयया थीथी ऐतिहासिक, धार्मिक व सांस्कृतिक महत्वं जाःगु थाय् अवलोकन यानाः चाःहुलेगुया नापनापं उकिया बारे नं जानकारी बिइगु ज्याझ्वः नं जूगु खः।उगु ज्यझ्वलय् ब्वतिकाःपिं साहित्यकारपिन्सं थ्व पदयात्रायात छगू उल्लेखनीय यात्रा कथं काःगु दु।

थ्व यात्रा ज्याझ्वःया संयोजन विराटया पुलांम्ह नायः कृष्णभक्त बोडें थुके ब्वतिकाःपिन्त सुभाय् देछासें ख्वप देयया मेमेगु थासय् नं थजाःगु हे पदयात्रा ग्वसाः ग्वयेगु योजना दु धकाः धयादीगु दु।

येँया नारायणचौरय् थौं जूगु प्रदर्शनया झ्वलय् राष्ट्रिय प्रजातन्त्र पार्टी (राप्रपा) नेपालया नायः कमल थापालिसें खुम्हेसित प्रहरीं ज्वंगु दु।

निषेधित लागा त्वाःथलेत स्वःबले उमित ज्वनागु धकाः प्रहरी परिसर येँया प्रवक्ता, प्रहरी उपरीक्षक अपिलराज बोहरां धयादिगु दु।

ज्वनातःपिंत आः प्रहरी परिसरय् तयातःगु वय्कलं धयादिल। थापानापं यलया शिला राणा, ख्वप थिमीया राकेश बस्नेत, नुवाकोटया रामचन्द्र लामिछाने, टोखाया विनोद कपाली व ख्वपया सरोज तिमिल्सिनायात ज्वनातःगु दु।

राजतन्त्रया पक्षय् राप्रपा, राप्रपा नेपाल लिसें नं छुं न्हि न्ह्यःनिसें थन प्रदर्शन यानाच्वंगु दु।

प्रधानमन्त्री केपी शर्मा ओलीं मधेस प्रदेश सरकारया महत्वाकाङ्क्षी लिसें तःधंगु लाय्या ६४ गू पक्की सतक योजना शिलान्यास यानादीगु दु।

प्रधानमन्त्री ओलीं मधेस प्रदेशअन्तर्गत भौतिक पूर्वाधार विकास मन्त्रालयपाखें थौं जनकपुरधामय् ग्वसाः ग्वःगु विशेष समारोहय् डिजिटल प्रविधिपाखें छक्वलं ६४ गू आयोजनाया शिलान्यास यानादीगु खः। थथे ६४ गू महत्वपूर्ण लिसें तःधंगु सतक आयोजना तब्याकेगु नापं स्तरोन्नतिया झ्वलय् शिलान्यास जूगु ई यात मधेस प्रदेश सरकारं ऐतिहासिक लिसें गौरवया कथं लुमंकुसें प्रधानमन्त्री ओलीयात सुभाय् देछागु दु।

भौतिक पूर्वाधार मन्त्रालयया कथं आः मधेस प्रदेशअन्तर्गत च्यागू जिल्लाया ६४ गू प्रादेशिक निर्वाचन लागाय् न्यागू किलोमिटरया ल्याखं ३२० किलोमिटर हाकःया पक्की सतक निर्माण जुइत्यंगु दु। स्वदँया दुने क्वचायेकेगु पिच लिसेंया उगु पक्की सतक निर्माणया निंतिं मुक्कं १२ अर्ब ७० क्वःति धेबा खर्च जुइगु प्रदेश सरकारं धाःगु दु।

मधेस प्रदेश सरकारया भौतिक पूर्वाधार विकासमन्त्री सरोजकुमार यादवं धयादिल, “स्रोत क्वछिइधुंकाः पूर्वाधार ज्याकुथिपाखें ठेक्का प्रक्रिया क्वचायेधुंकूगु दु, थौं शिलान्यासलिपा सतक निर्माणया ज्या न्ह्याइगु जूगु दु।”वय्कःया कथं थ्वःसिबें न्ह्यः न्हापांगु चरणय् न्ह्याकूगु ३२० किलोमिटर सतक योजनामध्ये २०० किलोमिटरसिबें अप्वः सतक निर्माण जुइधुंकूगु दु, ल्यंगु ब्वय् सतक निर्माण तःगतिं न्ह्याना च्वंगु दु। निर्माण जुइगु सतक ५.५ निसें न्हय्गु मिटर ब्या तकया जुइ। सतकनापं प्रदेशया ६४ गूलिं निर्वाचन लागाय् छगू छगू पक्की तां निर्माणया निंतिं प्रक्रिया न्ह्याके धुंकूगु मन्त्रालयं धाःगु दु।

लिसें, जलवायु ह्यूपाःया लिच्वःयात म्हो यासें पूर्वाधार निर्माणय् वातावरणमैत्री प्रविधि व उपाययात छ्यलीगु जूगु दु। थ्व योजनां मधेस प्रदेशय् सतक पहुँच अभावय् लानाच्वंगु गांयात यातायात सञ्जालय् स्वायेगु, व्यापार–व्यवसाय प्रवद्र्धन यायेगु व स्थानीय उत्पादनयात बजाःतक यंकेत ग्वाहालि जुइगु मन्त्री यादवं धयादिल।

वरिष्ठ सर्जक गणेश रसिक थौं ७८ दँया वैशय् मन्त।यलया हरिसिद्धिइ च्वंगु नेपाल क्यान्सर अस्पतालय् प्रोस्टेट क्यान्सरया उपचार याका च्वनादीम्ह वय्कः थौं सुथसिया ११ ताः इलय् मदूगु सङ्गीतकार बुलु मुकारुङं जानकारी बियादीगु दु।

वय्कःया कथं रसिकया म्ह्याय् बेलायतं लिहां वयेधुंकाः रसिकया सिथं यंकेगु ज्या याइगु दु। वय्कःया सीम्ह आः महाराजगञ्जया शिक्षण अस्पतालय् तयातःगु दु। भोजपुर छिनामाखुइ विसं २००४ असोज ४ गते जन्मय् जुयादीम्ह खः। थ्यंमथ्यं न्यागू दसक न्ह्यः ‘लेकाली’ समूहपाखें म्ये हालेगु ख्यलय् दुहां झायादीम्ह रसिकं चिनाखँमि, म्येच्वमि, लय्चिनामि, च्वमि, ह्वनाखँमि व नियात्राकारया कथं म्हसिका दयेकादीगु खः।

वय्कःया ‘सारङ्गीभित्र’ बाखंमुना, ‘गणेश रसिकका गीतहरू’, ‘आकाश गंगाको ओतमुनि’, ‘दशगजामा उभिएर’, ‘जब सिस्नोहरू टेक्दै हिँडे’लिसेंया बाखं, चिनाखँ, च्वखँ, नियात्रा व लुमन्तिलिसें छगू दर्जनसिबें अप्वो कृति पिहांवये धुंकूगु दु। वय्कःया तिरी मय्जु व काय् न्हापा हे मदये धुंकूगु दु।

वय्कलं ‘हटेर होइन, डटेर लड्ने नेपालीको बानी हुन्छ’, ‘तराई हेर कति राम्रो हरियो वन हुनाले’, ‘मेरो टाउको सानो छ, यो टाउकोमा विशाल देश छ’, ‘रातो भाले क्वाएँ क्वाएँ’ थेँ जागु राष्ट्रिय व लोकम्ये हालादीगु दु। वय्कःया छुं रचना ब्वनेकुथिया सफुतिइ दुथ्यानाच्वंगु दु।

साहित्यकार रसिकं रत्न रेकर्डिङ सस्थान व साझा प्रकाशनया नायः लिसें महाप्रबन्धक, सांस्कृतिक संस्थानया महाप्रबन्धक, नेपाल नाट्य लिसें सङ्गीत प्रतिष्ठानया सदस्य सचिवया भाला नापं क्वबीनादीगु खः।

परराष्ट्रमन्त्री डा आरजु राणा देउवा जनवादी गणतन्त्र चीनया विशेष प्रशासकीय क्षेत्र हङकङय् चीन सरकारपाखें थ्वहे जेठ १६ गते ग्वसाः ग्वःगु अन्तरराष्ट्रिय मध्यस्थता सङ्गठन निस्वनेगु महासन्धिया ल्हाःचिं समारोहय् ब्वति कयाः म्हिगः बहनी स्वदेश लिहांझाःगु दु।

चिनियाँ विदेशमन्त्री वाङ यीया ब्वनाय् उगु समारोहय् ब्वति कयादीत मन्त्री डा राणा बुधबाः हङकङ झायादीगु खः। नेपाः उगु सङ्गठन निस्वनेगु सम्बन्धी महासन्धीया ल्हाःचिं ज्याझ्वलय् पर्यवेक्षकया कथं ब्वति कयादीगु परराष्ट्र मन्त्रालयं धाःगु दु।उगु महासन्धिइ ३२ गू देसं ल्हाःचिं तःगु खःसा उगु समारोहय् ५० गू सिबें अप्वः देय् व २०गू सिबें अप्वो अन्तरराष्ट्रिय सङ्घसंस्थां ब्वति काःगु खः।

उगु सङ्गठनं थीथी देय् दथुइ, छगू देय् व मेगु देय्या कम्पनी बाय् नागरिक दथुइ लिसें थीथी देय्या निजी बनेज्यामिपिं दथुया विवादयात मध्यस्थतापाखें समाधान यायेगु तातुनां तःगु दु। अथे हे, ज्याझ्वःया दथुइ मन्त्री डा राणां चिनियाँ विदेशमन्त्री वाङ यीनाप नापलानादीगु खः। उगु नापलायेगु झ्वलय् नेपाः व चीन दथुया मैत्रीपूर्ण स्वापू अझं सुदृढ यानाः यंकेगु विषय खँल्हाबल्हा जूगु मन्त्री डा राणां धयादिल।

वय्कलं नापलायेगु झ्वलय् नेपाः व चीन दथुइ आर्थिक, प्राविधिक लिसें व्यावसायिक स्वापू तब्याकेगु नापं चिनियाँ ग्वाहालिइ नेपालय् निर्माणाधीन परियोजनात इलय् हे क्वचायेकेगु विषयस खँल्हाबल्हा जूगु धयादिल। मन्त्री डा राणां धयादिल, “थुगुसी सन् २०२५ नेपाः व चीन दथुइ कूटनीतिक स्वापू पलिस्थाया ७० क्वःगु वर्षगाँठ लाःगुलिं थ्व ई यात विशेष ज्याझ्वःलिसें न्यायेकेगु व निगू देय् दथुइ उच्चस्तरीय भ्रमणत कालबिल यायेगु ज्यायात निरन्तरता बिइगु विषयस नं खँल्हाबल्हा जूगु दु।”

मन्त्री डा राणां नेतृत्व यानादीगु थुगु नेपाली प्रतिनिधिमण्डलय् परराष्ट्र मन्त्रालयया उत्तरपूर्वी एसिया महाशाखाया प्रमुख भृगु ढुङ्गाना व हङकङय् च्वनादीम्ह नेपाःया महावाणिज्यदूत डा विन्देश्वरप्रसाद लेखकलिसें परराष्ट्र मन्त्रालय व महावाणिज्य दूतावास हङकङया प्रतिनिधितय्सं ब्वति कयादीगु खः।