प्रधानमन्त्री केपी शर्मा आलीं सापारु (गाईजात्रा) नखःया भिंतुना देछानादीगु दु। प्रधानमन्त्री ओलीं थौं सामाजिक सञ्जालपाखें सापारु (गाईजात्रा) न्यायेका च्वंपिंनिगु छेँजः याकनं दुःख क्वलायेमा धकाः नापं मनं तुनादीगु दु।

प्रधानमन्त्री ओलीं न्ह्यथनादीगु दु, “सापारु (गाईजात्रा)यात सांस्कृतिक कथं न्यायेका च्वंपिनिगु छेँजः याकंन दुःख क्वलानावनेमा। थ्व नखःयात ख्यालःया कथं हनीपिंत नं स्वस्थ मनोरञ्जन दयेमा। सकसितं सापारु (गाईजात्रा)या यक्व यक्व भिंतुना!’ प्रधानमन्त्री ओलीं मध्यकालीन इलय् नेवाः परम्परा कथं न्ह्याःगु सायाः (सापारु) नखःयात प्रताप मल्लया इलय् निसें देय्न्यंकं न्यायेका हःगु न्ह्यथनादिल।

“छेँजःपिं मदया दुःखय् लानाच्वंपिंसं थःथःगु छेँनं सायाः पिकायेमाःगु यानाः मनूत न्ह्याक्वः हे तमि÷चिमि बाय् न्ह्याथाय् च्वनिपिं जुसां सकसियागु छेँजःखय् छन्हु थुजाःगु दुःख वइगुयात हःपाः बिइगु मनोवैज्ञानिक सन्देश बिइगु कथं थ्व नखः न्ह्याःगु तायेकातःगु दु”,

प्रधानमन्त्री ओलीं भिंतुना सन्देशय् धयादीगु दु, “सामाजिक मनोविज्ञानयात सीगु ग्याचिकुपाखें हःपाः बियाः दुःख म्हो यायेत न्ह्याःगु नखः ई हिलावंलिसें ख्यालिन्हिलिपाखें नापं हिलावंगु खनेदु।”

दँय् दसं भाद्र कृष्ण पारु (गुँलागा पारु)निसें च्यान्हु यंकं न्ह्याइगु परम्परागत सांस्कृतिक नखः सापारु (गाईजात्रा) थौं स्वनिगः नापनापं देय्या थीथी थासय् थीथी ज्याझ्वः याना न्यायेका च्वंगु दु।

प्रतिनिधिसभाया सभामुख देवराज घिमिरें नेपाःयात धार्मिक पर्यटकीय लागाया कथं विकास यायेमाः धकाः धयादीगु दु।ख्वपया डोलेश्वर महाद्यःया देगलय् म्हिगः श्रावणी मेलाया २४ क्वःगु डोलेश्वर महाद्यःया पुजा लिसें विमला गङ्गा आरतीइ ब्वति कयादिसें सभामुख घिमिरें डोलेश्वर महाद्यः हिन्दूतय्गु आस्थाया धरोहर जूगु धयादिल।

वय्कलं नेपाःयात धार्मिक पर्यटनया केन्द्रविन्दु दयेकाः हलिंन्यंक पर्यटकतय्त सालाकायेमाःगु धयादिल। ज्याझ्वलय् बागमती प्रदेशया स्वास्थ्यमन्त्री किरण थापां डोलेश्वर महाद्यः हिन्दू तय्गु आस्थाया केन्द्र जुयाः वया च्वंगुलिं थन नेपाःमि जक मखुसें हलिंन्यंक पर्यटक वयेगु यानावया च्वंगु दु धयादिल।

सभामुख घिमिरे व मन्त्री थापां डोलेश्वरय् च्वंगु मानव सेवा आश्रमया अवलोकन यानादिसें थन च्वनाच्वंपिं अनाथ नागरिकया अवस्था व नयेगु त्वनेगुया बारेय् जानकारी कयादीगु खः।

नेपाली कांग्रेस बागमती प्रदेश संसदी दलया नेता लिसें मुख्यमन्त्री इन्द्रबहादुर बानियाँया अध्यक्षताय् शनिबाः येँय् च्वंगु बैठकं थीथी निर्णय याःगु दु।

उगु संसदीय दलया बैठकं नेपाःया संविधानया धारा १६८ या उपधारा (४) लिसें प्रदेश सभा नियमावली २०७४ या नियम १४३ या उपनियम (१)कथं बागमती प्रदेशसभाया बैठकय् विश्वासया मत कायेगु प्रस्ताव न्ह्यब्वयेत प्रदेश सभाय् थ्व हे साउन २७ गते मङ्गलवाः सनिलया ४ ताः इलय् च्वनेगु कथं आह्वान याःगु दु। उगु बैठकय् थः दुजःपिंत अनिवार्य उपस्थित जुइत, तटस्थ मच्वनेत व विश्वासया मतया पक्षय् मतदान यायेत नेपाली कांग्रेसया संसदीय दलया विधान २०७४या धारा १२ या उपधारा ६ कथं ह्वीप जारी याःगु दु।

अथे हे, उगु बैठकं संसदीय दल कार्यसमिति नीस्वंगु दु। प्रदेश दुजःपिं श्रीराम लामिछाने, सुना परियार, मीनकृष्ण महर्जन, सुरजचन्द्र लामिछानेलिसें नेपाली कांग्रेस बागमती प्रदेश समितिया महामन्त्रीपिं राजु श्रेष्ठ व कन्चनचन्द्र बादे दुजःपिं च्वनादीगु दु। अथे हे, उगु बैठकं स्वम्ह दुजःत दूगु अनुशासन समिति नं नीस्वंगु दु। उगु समितिइ छिरिङदोर्जे लामा, बिनु रायमाझी व सुरजचन्द्र लामिछाने च्वनादीगु दु।

प्रधानमन्त्री केपी शर्मा ओलीं गुँपुन्हि नापं रक्षा बन्धनया झ्वलय् थौं राखी ग्रहण यानादीगु दु।

वय्कलं सामाजिक सञ्जालय् थःम्हं ब्रह्माकुमारी राजयोग सेवा केन्द्रया तताकेहेँपिनि ल्हातं राखी ग्रहण याना धकाः जानकारी बियादिल।

प्रधानमन्त्री ओलीं च्वयादीगु दु, “थौं रक्षा बन्धन कुन्हु सुथंनिसें ब्रह्माकुमारी राजयोग सेवा केन्द्रया तताकेहेँपिनि ल्हातं राखी चिना। तताकेहेँपिंत सुभाय्!”

श्रावण शुक्ल पुन्हि कुन्हु न्यायेकीगु रक्षाबन्धन, गुंपुन्हि (ऋषि तर्पणी) नखः थौं देय् न्यंकं रक्षाबन्धन धारण यानाः न्यायेकल।

प्रधानमन्त्री केपी शर्मा ओलीं विद्युत् व्यापारय् नेपाःयात प्यगूत्या अर्ब फाइदा जूगु धयादीगु दु। प्रधानमन्त्री ओलीं थौं सामाजिक सञ्जालय् नेपालं विद्युतय् थुगुसी प्यगूत्याः अर्ब फाइदा याःगु धयादीगु खः।

“झीसं थुगुसी प्यगूत्याः अर्ब फाइदा –आयात स्वयां प्यगूत्याः अर्ब ध्यबा अप्वःया बिजुली विदेश निर्यात यायेगु सफलता चूलाकूगु दु। झीसं विद्युत् आयात परिमाण पाः यानायंका च्वनागु दु”, प्रधानमन्त्री ओलीं धयादीगु खः।

प्रधानमन्त्री ओलीं न्हापा बिजुलीया छ्यलाबुलाय् विद्युत् भार कटौती मयाःसां नं उद्योगय् विद्युत् कटौती यानावया च्वंगुलिइ आः उद्योगय् नं विद्युत् प्रवाह अप्वयेके धुंकूगु धयादिल।