नेपाल आयल निगमं पेट्रोलियम पदार्थया भाः थकाउगु दु। निगमया कथं पेट्रोलय् १५ व डिजल, मचिकनय् झीतका थकाउगु दु।

थौ चान्ह्यः १२ बजेनिसे लागू जुइ धका निगमं धाःगु दु।निगमया कथं, आः स्वनिगलय्, पोखरा व दिपायलय् पेट्रोलया भाः १७२ रुपैयाँ कायम जुइसा डिजल व मचिकं १५२ तका कायम जुइ।

राष्ट्रिय प्रकृति संरक्षण कोषया अध्यक्षय् आदर्शकुमार श्रेष्ठ मनोनीत जुयादीगु दु। प्रधानमन्त्री लिसें कोषया संरक्षक सुशीला कार्कीं श्रेष्ठयात वइगु न्यादँया निंतिं उगु पदय् मनोनयन यानादीगु प्रधानमन्त्रीया प्रेस सल्लाहकार रामबहादुर रावलं जानकारी बियादिल।

थ्व स्वयां न्ह्यःया नायः ऐनबहादुर शाहीं पदं राजीनामा बिइ धुंकाः खालि जुयाच्वंगु पदय् सिन्धुलीया श्रेष्ठयात मनोनित याःगु खः। राष्ट्रिय प्रकृति संरक्षण कोष ऐन, २०३९ य् कोषया संरक्षक प्रधानमन्त्री जुइगु व संरक्षकं नायः मनोनयन यायेगु व्यवस्था दूगु खः। सिन्धुलीया श्रेष्ठं समाजशास्त्रय् स्नातकोत्तर व कानुनय् स्नातक यानादीगु खः। वय्कः कानुन व्यवसायी खः।

नेपाल सरकारं राष्ट्रियसभाया खालिगु दुजलय् गृहमन्त्री ओमप्रकाश अर्यालयात सिफारिस याःगु दु।

प्रधानमन्त्री निवास बालुवाटारय् थौं च्वंगु मन्त्रिपरिषद् बैठकं गुल्मीया अर्यालयात राष्ट्रियसभाया खालिगु दुजः पदय् मनोनीत यायेत राष्ट्रपति न्ह्यःने सिफारिस यायेगु निर्णय याःगु खः।

राष्ट्रियसभाय् थौंकन्हय् खालि जुयाच्वंगु छगू विज्ञ दुजलय् वय्कःया नां सिफारिस जूगु खः। स्थायी सदनया रुपं दूगु ५९ दुजःया राष्ट्रिय सभाय् स्वम्हेसित मन्त्रिपरिषदया सिफारिस कथं राष्ट्रपतिपाखें मनोनीत याइगु संवैधानिक प्रावधान दु।

सङ्घीय संसदय् च्वय्या सदन कथं दूगु राष्ट्रियसभा दुजःया कार्यकाल खुदँया जुइगु संवैधानिक व्यवस्था दु। राष्ट्रियसभाया स्वब्वय् छब्व दुजःतय्गु वंगु माघ ११ गते निर्वाचन जूगु खः।