जिल्ला प्रशासन ज्याकुथिं गौर नगर लागा दुने हाकनं निषेधाज्ञा जारी याःगु दु। स्थानीय प्रशासन ऐन, २०२८ या दफा ६ (क) कथं गौर नगरपालिकाया पूर्व मुडबलवा गेट, पश्चिम लालबकैया बाँध, उत्तरय् बम नहर व दक्षिणय् गौर भन्सार ज्याकुथि दुने थौं सुथसिया ८ः३० ताः इलंनिसें हाकनं निषेधाज्ञा जारी याःगु खः।

प्रमुख जिल्ला अधिकारी दिनेश सागर भुसालं आइतबाः सुथसिया ८ः३० ताः ईनिसें मेगु आदेश मवःतकया निंतिं हाकनं निषेधाज्ञा जारी यानागु धयादिल। गौर–६ सवगढा गामय् शनिबाःसुथय् निगू समुदाय दथुइ विवाद तच्वनाः वने धुंकाः शनिबाः न्हिनसिया १ः०० ताः इलं निसें थौं सुथसिया ६ः३० ताःई तक निषेधाज्ञा जारी याना तःगु खः।

सुथसिया ६ः३० ताः इलं निसें ८ः३० ताः ईतक निषेधाज्ञायात चायेका ब्यूगु खः।

निर्वाचनयात फयां फक्वः अप्वःसिनं ब्वति कायेकेत व बदर मतया ल्याः म्हो यायेगु तातुनाः निर्वाचन आयोगं देय्न्यंकं मतदाता शिक्षा ज्याझ्वःयात तःच्वकं न्ह्याकाच्वंगु दु।

आमनागरिकयात मताधिकारया महत्व व मतदानया प्रक्रियाया विषयय् जानकारी बिइगु तातुना आयोगपाखें स्वीकृत ज्याझ्वः मतदाता शिक्षा ज्याझ्वः न्ह्याकूगु दु। आयोगं थ्वहे फागुन ३ गतेनिसें १७ गतेतक देय्न्यंकंया ७५३ स्थानीय तगिंया खुद्वः व ७४३ वडाय् छम्ह छम्ह मतदाता शिक्षा स्वयंसेवक परिचालित जूगु धाःगु दु।

आममतदाताया छेँ त्वालय् वनाः नमूना मतपत्रया माध्यमं निर्वाचनया महत्व व मतदान प्रक्रियाबारेय् मतदातायात जानकारी बिइगु ज्या खटेजूपिं स्वयंसेवकत पाखें जुयाच्वंगु आयोगं धाःगु दु। मतदाता शिक्षा कार्यक्रम प्रयोजनया निंतिं आयोगं स्थानीय तगिंमय् थ्व सिबें न्हयः क्वःछिनातःम्ह सम्पर्क व्यक्तियात हे निर्वाचन मतदाता शिक्षा ज्याझ्वःया अनुगमनकर्ता क्वःछिनाः अभिमुखीकरण ज्याझ्वः नापं यायेधुंकूगु दु। अथे हे, निर्वाचन आचारसंहिता हाचां गाइगु कथं मिथ्या लिसें भ्रमपूर्ण सुचं व घृणास्पद अभिव्यक्ति बिइपिनिगु निगरानी यायेत नापनापं गैरकानुनी ज्या याइपिं व्यक्ति व संस्थायात नियामक निकायलिसेया मंकाः ज्याय् कानुनया दायराय् हयेत आयोगं पूmगु कुतः यानाच्वंगु दु।

आयोगय् नीस्वनातःगु निर्वाचन सूचना सम्प्रेषण लिसें  समन्वय केन्द्र अन्तर्गत सुचं सदाचार प्रवद्र्धन एकाइ पूवंकं क्रियाशील दूगु धाःगु दु। हानिकारक सुचं उत्पादन लिसें सम्प्रेषण याःपिं २९० कन्टेन्ट उत्पादक व सम्प्रेषकयात विद्युतीय कारोबार ऐन, २०६३ कथं कारबाहीया निंतिं नेपाल प्रहरीया साइबर ब्यूरोय् उजुरी याःगु दु।

अथे हे, ११ गूयात दूरसञ्चार प्राधिकरण ऐन, २०५२ कथं कारबाही यायेत नेपाल दूरसञ्चार प्राधिकरणय् छ्वःगु दुसा ६५ गूयात प्रेस काउन्सिल ऐन, २०४८ कथं कारबाहीया निंतिं प्रेस काउन्सिल, नेपालय् व छगूयात विज्ञापन (नियमन याइगु) ऐन, २०७६ कथं कारबाहीया निंतिं छ्वयागु आयोगं धाःगु दु।

थौं अन्तरराष्ट्रिय मातृभाषा दिवस खः। ‘बहुभाषिक शिक्षाय् युवातय्गु सः’ नारा ज्वनाः विश्वया थी थी देशय् थ्व दिवस हनाच्वंगु दु।बहुभाषिकता व बहुसांस्कृतिकताया माध्यमं विविधताय् एकता व अन्तरराष्ट्रिय समझदारी प्रवद्र्धन यायेगु थ्व दिवसया तातुना खः।

थ्व दिवस सन् २००० निसें संयुक्त राष्ट्रसङ्घीय शैक्षिक, वैज्ञानिक लिसें सांस्कृतिक सङ्गठन (युनेस्को) महासभाया आह्वानय् दँय् दसं फेब्रुवरी २१ य् हनेगु यानावया च्वंंगु खः। सन् १९९९ य् बङ्गलादेशया कुतलं युनेस्कों मातृभाषा दिवस हनेगु प्रस्ताव न्ह्यःने हःगु खः। थ्व प्रस्तावयात राष्ट्रसङ्घीय महासभां सन् २००८ अनुमोदन यानाः थुकियात अन्तरराष्ट्रिय भाषा वर्ष घोषणा याःगु खः।

थ्व हे दथुइ, अन्तरराष्ट्रिय भाषा दिवसया झ्वल् थनया बङ्गलादेशया राजदूतावासं सहिद स्मृति दिवसया लिसें छगू ज्याझ्वः ग्वसाः ग्वयेगु धाःगु खः। शुक्रबाः थ्व हे झ्वलय् भाषा आयोगं उद्योग, वाणिज्य लिसें आपूर्ति व संस्कृति, पर्यटन लिसें नागरिक उड्डयनमन्त्री अनिलकुमार सिन्हाया उपस्थितिइ छगू ज्याझ्वः ग्वसाः ग्वःगु खः। उगु झ्वलय् उगु मन्त्रालयया सचिव मुकुन्दप्रसाद निरौलाया लिसें नेपाःया निंतिं बङ्गलादेशया राजदूत शफीकुर रहमान उपस्थित जुयादिगु खः।

युनेस्कोया कथं भाषाया माध्यमं विकासय्, सांस्कृतिक विविधता व अन्तरसांस्कृतिक संवाद सुनिश्चित यायेत, सहकार्य सुदृढ यायेत व फुक्कसिगु निंतिं गुणस्तरीय शिक्षा हासिल यायेत महत्वपूर्ण भूमिका म्हितूगु धाःगु खः।

गृहमन्त्री ओमप्रकाश अर्याल व सहरी विकासमन्त्री कुमार इङ्नामं थौं सुन्धाराया धरहरा लागाया स्थलगत अनुगमन यानादीगु दु।

वय्कःपिंसं धरहराया अन्डरग्राउन्ड पार्किङ लागाया नं स्थलगत निरीक्षण यानादिल। अनुगमनया झ्वलय् येँ महानगरपालिकाया कार्यवाहक नगरप्रमुख सुनिता डङ्गोल, गृहसचिव, सहरी विकास मन्त्रालयया सचिव व येँ महानगरपालिकाया प्रमुख प्रशासकीय अधिकृतया न ब्बति दुगु खः।

उगु पुचलं सुन्धाराया धरहराय् अन्डरग्राउन्ड पार्किङया मंकाः अनुगमन निरीक्षण यानाः निर्माण जूगु पार्किङयात निःशुल्क रूपं सञ्चालनय् हयेगु विषय सहलह जूगु खः।

येँया ट्राफिकयात अःपुइगु कथं पार्किङ सौन्दर्य कायम यायेगु विषय सहलहय् बः ब्यूगु गृहमन्त्रीया सचिवालयं धाःगु खः।

प्रधानमन्त्री सुशीला कार्कीं थ्व हे फागुन २१ गते जुइगु निर्वाचनया सम्बन्धय् गण्डकी प्रदेशया सुरक्षा व्यवस्थालिसेंया विषय जानकारी कयादीगु दु।

प्रधानमन्त्री कार्कीयात प्रदेश प्रमुख सचिव डण्डुराज घिमिरे, प्रदेशस्तरीय सुरक्षा निकायया प्रमुख, कास्की जिल्लाया प्रमुख जिल्ला अधिकारी रुद्रादेवी शर्मा, मुख्य निर्वाचन अधिकृत हिमलाल बेलबासे, प्रदेश निर्वाचन अधिकारी नारायण ढकाललिसे सुरक्षा व्यवस्थालिसें विषय जानकारी बियादिल।

न्ह्यःने वयाच्वंगु प्रतिनिधिसभा दुजःया निर्वाचन सम्बन्धय् जुयाच्वंगु तयारीलिसें विषय प्रधामन्त्रीं जानकारी कयादीगु प्रदेश प्रमुख सचिव डण्डुराज घिमिरें जानकारी बियादिल। “प्रदेशय्  सुरक्षा संयन्त्रलिसेंया निर्वाचन सेल दु, थ्व हे सेलपाखें जुयाच्वंगु ज्या खँय जानकारी बिइगु नाप वय्कःयापाखें निर्देशन कायेगु ज्या जूगु दु”, प्रमुख सचिव घिमिरें धयादिल। पोखरा विश्वविद्यलायया २१ क्वःगु दीक्षान्त समारोहया झ्वलय् लाकाः प्रधानमन्त्री पोखरा झायादीगु खः।