पत्रकारलिसें स्वास्थ्यकःमि पूर्णिमा शाक्यया मां शुभद्रा डंगोल आकाझाकां मन्त। ७२ दँ दुम्ह वय्कः स्ववाः निसे बीर अस्पतालय् वासः याकेगु झ्वलय् म्हिगः मदुगु खः।

डंगोल ताः ई न्ह्यःनिसें क्यान्सर ल्वय्लिसे ल्वाना वयाच्वनादीगु खः। लिपांगु इलय् वय्कःया उसाँचय् समस्या वयेवं निवाः न्ह्यः अस्पताल भर्ना याःगु खः।

मदुम्ह डंगोलया म्ह्याय् तःधिम्ह म्ह्याय् पूर्णिमा शाक्य नेवाः पत्रकार दबू यलया छ्याञ्जे खःसा कान्छिम्ह म्ह्याय् पौभा डंगोल राससया नेपालभाषा बुलेटिनय् संवाददाताकथं ज्या यानाच्वंगु दु। मदुम्ह डंगोलया काय् छम्ह व म्ह्याय् प्यम्ह दु।

नेपालभाषा साहित्य ख्यःया आधुनिक कवि, बरिष्ठ पत्रकार, भाषासेवी, नेवाः आन्दोलनया अभियन्ता, भाषा आयोगया दुजः नेवाः पत्रकार राष्ट्रिय दबूया केन्द्रिय सल्लाहकार माननीय सुरेश किरण मानन्धरया अन्तिम दाहसंस्कार म्हिगः लुँतिइ क्वचाःगु दु।

नेपालभाषा मंकाः खलःया छेँय् म्हिगः बुधवाः सुथय् ९ ता ईनिसें १२ ता ईतक अन्तिम श्रद्धाञ्जलि देछायेगु नितिं मदुम्ह मानन्धरया सीम्ह तःगु खः। मदुम्ह मानन्धरयात अन्तिम श्रद्धाञ्जलि देछायेगु झ्वलय् नेवाः न्ह्यलुवा मल्ल के सुन्दरं नेवाः ध्वाँय् फायेकूगु खःसा नेपाल सरकार संस्कृति पर्यटन व नागरिक उड्डयनमन्त्री अनिल कुमार सिन्हां नेपाःया ध्वाँय् फायेकूगु खः।

भाषा आयोगया दुजः माननीय मानन्धरयात अन्तिम श्रद्धाञ्जलि देछायेगु ज्याझ्वलय् भाषा आयोगया नायः डा. गोपाल ठाकुरया नं उपस्थिति दूगु खः।मदुम्ह मानन्धरयात अन्तिम श्रद्धाञ्जलि लिपा राजकीय सम्मानया लिसें शवयात्रा यानाः शोभाभगवती कर्णदीपय् थ्यंकूगु खः।मदुम्ह मानन्धरया अन्तिम श्रद्धाञ्जलि देछायेगु व शवयात्राय् थीथी ख्यःया आपालं व्यक्तित्वपिनिगु उपस्थिति दूगु खः।

मदुम्ह मानन्धरया निम्ह काय् व जहान दी।

वंगु शनिबाः वीरेन्द्रनगर–४ सहिदपार्क लिक्क च्वंगु जनजागरण सामुदायिक वनय् १६ दँया मचाल्यासे इनिषा विकयात बलात्कारलिपा हत्या यानातःगु घटनाया दोषीयात कारबाहीया माग यानाः दलित युवां थौं माइतीघर मण्डलाय् प्रदर्शन याःगु दु।

प्रदर्शनय् सहभागीतय्सं ‘जस्टिस् फर इनिषा विक’, ‘दलिततय्त बलात्कार व हिंसा बन्द या’, ‘मिसा अधिकार सुनिश्चित या’ ‘वि वान्ट जस्टिस्’ व ‘मिसा शोषणविरुद्ध छधी जुइनु’ च्वयातःगु ‘प्ले कार्ड’ ज्वनाच्वंगु खः।गुर्भाकोट नगरपालिका–६, बडाखोली स्थायी छेँ जुयाः थौंकन्हय् वीरेन्द्रनगर–१ य् च्वनावयाच्वंम्ह १६ दँया इनिषा फागुन २३ गते सुथय् वीरेन्द्रनगर–४, सहिदपार्क लिक्कया जनजागरण सामुदायिक वनय् बेहोस अवस्थाय् लुयावःगु खः ।

वयात प्रहरीं प्रदेश अस्पताल कालागाउँ थ्यंकूगुलिइ चिकित्सकतय्सं मदूगु घोषणा याःगु खः। मदुम्हेसिया थःथितिपिंसं सामूहिक बलात्कार याःगु धासें २५ गते जिल्ला प्रहरी ज्याकुथि सुर्खेतय् उजुरी ब्यूगु खः।प्रहरीतय्गु न्हापांगु अनुसन्धानं इनिषा बलात्कारलिपा मदूगु पुष्टि जूगु धाःगु खः। उगु घटनाय् सुर्खेत प्रहरीं प्यम्हेसित ज्वने नं धुंकूगु धाःगु खः। 

नेपाल भाषा, संस्कृति, कला साहित्यय् महत्वपूर्ण योगदान ब्यूगुलिं ख्वप थिमी निवासी गणेशराम लाछीयात निगू लख दांया सुदर्शन–कपिला सिरपाः लःल्हाइगु जूगु दु।

झी पुचः (नेपाल भाषा लिसें सांस्कृतिक सङ्घ) विराटनगरं विराटनगरय् ग्वसाः ग्वःगु पत्रकार सम्मेलनय् निदँय् छकः लःल्हाना वयाच्वंगु उगु सिरपाः थुगुसी थ्व हे फागुन २९ गते विराटनगरय् छगू विशेष समारोहय् लाछीयात लःल्हायेगु जानकारी ब्यूगु खः।पुरस्कृत जुयादीत्यंम्ह लाछी वंगु न्यागू दशकनिसें देय् दुने व देशं पिने नेपाल भाषाया साहित्य, नाटक व नेवाः नसा त्वँसाया म्हसीका कायम यायेत मद्दिक जुयाच्वनादीगु धाःगु खः।

थ्व स्वयां न्ह्यः उगु सम्मानपाखें शताव्दी पुरुष सत्यमोहन जोशी, भारत सिक्किमया नेवाः गुठी, पोखराया नेवाः खलः कास्कीयात लःल्हाये धुंकूगु खः।उगु सिरपाः नेपाल भाषा, संस्कृति, साहित्य, नसात्वँसाय् योगदान ब्यूगु संस्था वा मनूतय्त निदँय् छकः लःल्हायेगु कथं विराटनगर–१० निवासी सुर्दशनबहादुर श्रेष्ठं विसं २०७६ य् २० लखया अक्षय कोष स्थापना यानादीगु खः।

नेवाः पत्रकार राष्ट्रिय दबूया केन्द्रीय सल्लाहकार, नेपालभाषा साहित्य व पत्रकारिता ख्यलय् ज्वःमदुम्ह व्यक्तित्व सुरेश किरण मानन्धर मन्त।

थौंकन्हय् भाषा आयोगया दुजःकथं ज्या यानाच्वनादीम्ह मानन्धर थ्व हे फागुन २५ गते सोमवाः आकाझाकां मदुगु छेँजःपिसं धाःगु दु।लिपांगु इलय् नेपालभाषा टाइम्सया सम्पादक कथं ज्या याना च्वनादीम्ह वय्कः भाषा आयोगय् मनोनित जुइवं सम्पादक पदं राजीनामा बियादीगु खः।

नेपालभाषा साहित्यय् आधुनिक कवि कथं नांजाःम्ह मानन्धरया च्वखँ, ख्यालः, नाटक विधाय् नं उतिकं हे ल्हाःच्वःम्ह व्यक्तित्व खः ।मानन्धरया घण्टाघरं जिके इ न्यनाच्वन चिनाखँ संग्रह तसकं चर्चित चिनाखँ मुना खः। वय्कलं छगू इलय् मह संचारया निंतिं नं टेलिप्याखं च्वयेगु ज्या यानादीगु खः।

मदुम्ह मानन्धरयात अन्तिम श्रद्धाञ्जली देछाकथं कन्हय् सुथसिया ९ बजेनिसें १२ ताः ईतक नेपालभाषा मंकाः खलःया छेँ बिज्यासलय् तइगु जूगु दुसा अन्तिम श्रद्धाञ्जली देछा लिपा मंकाः खलकं बिज्यासः, धलक्व, छत्रपाटी, त्यंगः, थाय्मदु, असं, बालकुमारी, जनबहाः, किलाघः, न्यत, त्यंगः, कुलांभुलु, ताम्सिपाः जुयाः लुतिइ तक शव यात्रा याइगु जानकारी ब्यूगु दु।

ने.सं. १०८६ कौलागाः १० स जन्म जुयादीम्ह मानन्धरया जहान व निम्ह काय्पिं दु।