वाग्मती प्रदेशया नवनियुक्त मुख्यमन्त्री इन्द्रबहादुर बानियाँ न पद व गोपनीयताया शपथ काःगु दु।

थौ मंगलवाः सनिलय् प्रदेश प्रमुख दीपकप्रसाद देवकोटां बानियाँयात पद व गोपनीयताया शपथ याकूगु खः।शपथ याये धुका प्रदेशया मुख्यमन्त्रीया कार्यभार कःघाःगु दु।

वाग्मती प्रदेशसभाया कुल ११० सदस्यमध्ये बानियाँयात कांग्रेसया ३७ व एमालेया २७ याना ६४ म्ह सांसद तयेगु समर्थन दु।

विश्वया सर्वोच्च शिखर सगरमाथा सफल जुइक आरोहण याःपिं निम्ह नेपाःया मिसातय्त टेक्ससया ड्यालसय् हंगु दु।

न्याक्वः सगरमाथा आरोहण यायेत सफल फोटो पत्रकार पूर्णिमा श्रेष्ठ व निक्वः सगरमाथा आरोहण यानादीम्ह उषा बिष्टयात ड्यालसया नेपाली सांस्कृतिक नापं आध्यात्मिक केन्द्रया सभाकक्षय् छगू ज्याझ्वः दथुइ हंगु खः।

नेपाली समाज टेक्सस, नेपाली सांस्कृतिक नापं आध्यात्मिक केन्द्र, टेक्सस, नेपलिज् मेडिकल एसोसिएसनलिसे सङ्घसंस्थातय् मंकाः ग्वसालय् ग्वसाः ग्वःगु उगु ज्याझ्वलय् सगरमाथा आरोही श्रेष्ठ व बिष्टं च्वापुगुँ आरोहणया झ्वलय् फयेमाःगु अनुभव न्ह्यब्वयादिल।ज्याझ्वलय् उपस्थित नेपाःया समुदायं वय्कःपिनिगु अनुभव न्यने धुंकाः भावुक जुयाः च्वापुगुँ आरोही निम्हेसितं हंगु खः।

उगु झ्वलय् फोटोपत्रकार नापं च्वापुगुँ आरोही श्रेष्ठं विश्वया च्याद्वः मिटर स्वयां तःजाःगु च्यागू च्वापुगुँ तकं आरोहण याना व १३ दिं दुने स्वक्वः सगरमाथाया च्वकाय् थ्यंका धइगु न्ह्यइपूगु अनुभव कनादिल।अथे हे, आरोही उषा बिष्टं थःम्हं निक्वः सगरमाथा आरोहण लिसें नेपाः, संयुक्तराज्य अमेरिका, रुस व अष्ट्रेलियाया थी थी च्वापुगुँत सफल जुइक आरोहण याना धकाः जानकारी बियादिल।

च्वापुगुँ आरोही बिष्ट सगरमाथा आरोहण याःम्ह सुदूरपश्चिमया न्हापांम्ह मिसा खः। ज्याझ्वलय् ड्यालस लागाया नेपाःमितय्सं च्वापुगुँ आरोही श्रेष्ठ व बिष्टं क्यनादीगु ज्वःमदूगु साहस, सङ्कल्प व राष्ट्रिय गौरवयात च्वछानादिल।

ऊर्जा, जलस्रोत नापं सिँचाइमन्त्री दीपक खड्कां सरकारया ऊर्जा विकासया आज्जु पूवंकेत सौर्य ऊर्जा उत्पादकतय् भूमिका महत्त्वपूर्ण जूगु धयादीगु दु।

थौं थन नेपाल सौर्य ऊर्जा उत्पादक सङ्घया २५ क्वःगु रजत जयन्ती समारोह उलेज्या यानादिसें वय्कलं सरकारं सन् २०३५ तक २८ द्वः व ५०० मेगावाट विद्युत् उत्पादन यायेगु आज्जु पूवंकेत सौर्य ऊर्जा उत्पादकतय् भूमिका महत्त्वपूर्ण जूगु धयादिल। सरकारं मत थ्यंकेगु मफूगु थासय् सौर्य विद्युत् उत्पादनपाखें सङ्घं भूमिका म्हितूगु मन्त्री खड्कां धयादिल।

सिँचाइ याये मफूगु थासय् सौर्य उर्जा प्रणालीपाखें सिञ्चित यानाः सङ्घं योगदान ब्यूगुलिं वय्कलं आभार प्वंकादिल। सरकारं कयातःगु १० दँया दिगो ऊर्जा आज्जुइ सङ्घया मद्दिक ग्वाहालि व सहकार्य मजिमगाइगु वय्कःया धापू खः। दिगो ऊर्जा विकास यायेत निजी ख्यःया लगानी व साझेदारीयात अझ प्रभावकारी जुइकेत सरकारं नीतिगत सहजीकरण यानाच्वंगु मन्त्री खड्कां ध्वाथुइकादिल।

“स्वच्छ व भर दूगु ऊर्जाया विकल्पकथं सौर्य ऊर्जा रणनीतिक रूपं महत्त्वपूर्ण जू, झीपिं जलविद्युतय् गुलि न्ह्याःवनाच्वना, सौर्य ऊर्जा उलि हे महत्वया विषय खः, जलवायु ह्यूपाःया हाथ्यायात स्वयाः आःया ऊर्जा योजना बहुआयामिक व नवीकरणीय स्रोतय् हे केन्द्रित जुइमाःगु आवश्यकता जू,” वय्कलं धयादिल।

ऊर्जामन्त्री खड्कां सरकारं सौर्य ऊर्जा ख्यःया लगानीकर्तातय्त हःपाः बिइगु ताःतयाः सौर्य विद्युत् खरिद दर पुनरावलोकन, प्रसारण लाइनया पहुँच तब्याकेगु व बैङ्किङया व्यवस्था थें जाःगु विषययात प्राथमिकताय् तयातःगु धयादिल।

सङ्घया नायः कृष्णप्रसाद पराजुलीं सौर्य ऊर्जा उत्पादनय् जनताया ब्वति अप्वयेकेगु आवश्यक जूग धयादिल। विसं २०५७ सालय् स्थापना जूगु उगु सङ्घय् थौंकन्हय् १३५ गू कम्पनीत दुथ्याः।

प्रधानमन्त्री केपी शर्मा ओलीं १२गू तगिंमय् उत्तीर्ण  जूपिं सकल विद्यार्थीपिंत भिंतुना बियादीगु दु।

वय्कलं म्हिगः बहनी लिबाक्क च्वनाः थःगु सामाजिक सञ्जालपाखें १२गू तगिंमय् उत्तीर्ण जूपिं सकसितं भिंतुना बियादीगु खः। “भुपरिवेष्टित विकासशील देय् तयेगु अन्तरराष्ट्रिय सम्मेलनय् ब्वति कायेत जि तुर्कमेनिस्तानय् दु।

नेपालय् १२गू तगिंयां लिच्वः वल धकाः सिइका। भितुना दु सकल नानी बाबुपिंत!”, प्रधानमन्त्री ओलीं च्वयादीगु दु। वय्कलं विद्यार्थी तयेगु मेहनत ताःलाःगु धयादिसें आः स्वदेशय् हे ब्वनेगु व छुं न्हूगु यात्रा न्ह्याकेत सकसितं इनाप यानादिल।

“छिकपिनिगु मेहनत सुथांलात, आः नेपालय् हे ब्वनेगु व छुं न्हूगु यात्रा न्ह्याके। हाकनं छक सकसितं यक्वः यक्वः भिंतुना”, प्रधानमन्त्री ओलीं च्वयादीगु दु।

म्हिगः सनिलय् राष्ट्रिय परीक्षा बोर्डं १२ तगिंया पिथंगु लिच्वः कथं नियमितपाखे ६१.१७ प्रतिशत व आशिंकपाखें ३६.४९ प्रतिशत विद्यार्थी ताःलागु दु।

बागमती प्रदेश सरकारया मुख्यमन्त्रीइ नेपाली कांग्रेस संसदीय दलया नेता इन्द्रबहादुर बानियाँ नियुक्त जुइगु दु।

कांग्रेस बागमती प्रदेश सभापति तक जुयादीम्ह बानियाँ न म्हिगः सोमवाः प्रदेश प्रमुखया कार्यालय न्हुगु सरकार गठनया निति मुख्यमन्त्रीइ दाबी पेश याये धुकुगु दु।

बहादुर सिंह लामाया राजीनामा स्वीकृत जुइवं प्रदेश प्रमुख दीपकप्रसाद देवकोटां थौ मंगलवाः न्हिनय् २ बजे दुने मुख्यमन्त्री नियुक्तिया निति दाबी पेश यायेत आह्वान याःगु खः।बानियाँ न कांग्रेसया ३७ सांसद व सत्ता साझेदार दल नेकपा एमालेया २७ याना ६४ म्हेसिगु समर्थन ज्वना सोमवाः हे दाबी पेश याये धुकुगु दु।

११० म्ह सदस्यीय प्रदेशसभा सरकार गठनया निति ५६ म्ह सांसदया समर्थन माः। प्रदेश प्रमुख देवकोटां सरकार गठनया निति न्हिनय् २ बजे लिपा बानियाँयात मुख्यमन्त्रीइ नियुक्त याइ। प्रदेश प्रमुख कार्यालयं न्हिनय् ४ बजे बानियाँया पद लिसे गोपनीयताया सपथ ग्रहण याकेगु ज्याझ्वः दु।