नेपाल प्रहरीया केन्द्रीय अनुसन्धान ब्युरो (सीआईबी) नं ललिता निवासया सरकारी जग्गा हिनामिना प्रकरणय् यानाच्वंगु अनुसन्धान प्रतिवेदन लःल्हागु दु।

मंगलवाः सीआईबी पुचलं जिल्ला सरकारी वकिल कार्यालय येँ प्रतिवेदन लःल्हागु खः । प्रतिवेदन सोमवाः हे लःल्हायेगु तयारी याःगु खःसा, ‘लिपागु इलय् ’ हाकन पूर्वमन्त्रीपि चन्द्रदेव जोशी, विजयकुमार गच्छदार व सञ्जय साहया बयान कायेवं लिवागु खः।

आइतवाः बहनि सीआईबी पुचलं पूर्वप्रधानमन्त्री डा. बाबुराम भट्टराई व सोमवाः सुथय् मेम्ह पूर्वप्रधानमन्त्री मावधकुमार नेपालया ‘बयान’ काःगु खः। वंगु असार १२ गते निसे सीआईबी न संगठित किर्ते मुद्दाय् अनुसन्धान याःगु खः।

५६ दिं लिपा अनुसन्धान क्वचायेका सीआईबी न प्रतिवेदन सरकारी वकिल कार्यालयय् लःल्हाःगु खः।

येँ महानगरपालिकां लक्षित वर्गयात निःशुल्क उपचारयात व्यवस्थित, प्रभावकारी व पारदर्शी यायेगु ल्याखं कार्यविधि मस्यौदा तयार याःगु खः ।

येँ महानगरया उपप्रमुख सुनिता डंगोलं स्वास्थ्य संस्था सञ्चालन मापदण्ड–२०७७ कथं लक्षित वर्गया निःशुल्क उपचारया निंतिं कुलमध्ये १० प्रतिशत शैया उपलब्ध याकेगु व्यवस्था कार्यान्वयनया निंतिं विधि, प्रक्रिया व दायित्वयात नं मस्यौदाय् दुथ्याकागु जानकारी बियादीगु दु ।

अस्पतालय् उपचारया निंतिं समन्वय व सहजीकरण यायेत येँ महानगरय् चिकित्सासहितया निःशुल्क उपचार एकाई दइ । एकाईलय् दक्वं अस्पतालय् उपलब्ध निःशुल्क श्ययाया ल्याः उपयोग, ल्वय्कथंया चिकित्सासेवा सम्बन्धी विवरण नं दइ ।

तथ्यांक व सेवाया आधारय् उपचारया निंतिं अस्पताल व ल्वगिया दथुइ समन्वय व सहजीकरण यायेगु एकाईया मुख्य जिम्मेवारी जुइगु उपप्रमुख डंगोलं कनादिल । थुुगु प्रक्रियाया निंतिं ल्वगिं वडायात सिफारिसया निंतिं निवेदन बीगु, स्थानीय तहं उपचारया निंतिं सिफारिस यायेगु, वडां हे सर्जमिन यायेगु, ल्वगियात उपचार बीगु इलय् जायेकेमाःगु फाराम, दैनिकी विवरण, रजिष्टर, उपचार सेवा काइम्ह ल्वगि वा वया थःथितिपाखें प्राप्त यायेमाःगु विवरण प्रतिवेदनलिसें मेमेगु आवश्यक प्रक्रियाया निंतिं माःगु ढाँचा अनुसूचिइ दुथ्याकागु नं उपप्रमुख डंगोलं कनादिल ।

राष्ट्रपति रामचन्द्र पौडेलं आह्वान याःगु शीतल निवासय् सर्वदलीय बैठक जारी जुयाच्वंगु ।

समसामयिक राजनीतियात कया राष्ट्रपति पौडेलं सःतूगु बैठकय् प्रमुख प्रतिपक्षी दल नेकपा एमालेया नेतापिन्स ब्बति मकाःगु दु।

राष्ट्रपति राजनीतिक रुपं सक्रिय खनेदुगु थे च्वजुगुलि बैठकय् ब्बति मकायागु धका नेकपा एमालेया प्रमुख सचेतक पदम गिरीं धाःगु दु।

लुँ तस्करीया विषय यात कया प्रमुख प्रतिपक्षी दल नेकपा एमाले न वंगु साउन १० गतेनिसे संसद अवरुद्ध याना वयाच्वंगुलि राष्ट्रपतिं उकियात कया सहलह यायेगु निति बैठक सःतूगु खः।

बालुवाटारस्थित ललिता निवासया सरकारी जग्गा हिनामिना प्रकरणय् नेपाल प्रहरीया केन्द्रीय अनुसन्धान ब्युरो (सीआईबी) न नेपाली कांग्रेसया नेता नाप पूर्वमन्त्री विजयकुमार गच्छदार व पूर्वराज्यमन्त्री सञ्जय साहयागु बयान कःगु दु।

पक्राउ पूर्जी जारी जुया पूर्वमन्त्री चन्द्रदेव जोशीनाप न सीआईबी न म्हिगः बहनि बयान काःगु खः। वया न्ह्यः न आइतवाः चान्ह्यः पूर्वप्रधानमन्त्री माधवकुमार नेपाल व सोमवाः सुथय् डा. बाबुराम भट्टराई यात सीआईबी न बयान भ्वँ याकूगु खः।

बालुवाटारया सरकारी जग्गा हिनामिना प्रकरणय् संलग्न जूगु धासे सीआईबी न पूर्वमन्त्रीपि विजय कुमार गच्छदार, चन्द्रदेव जोशी, डम्बर श्रेष्ठ नाप राज्यमन्त्री सञ्जय साहविरुद्ध पक्राउ पुर्जी जारी याःगु खः।

अथेहे थुगु प्रकरणय् पक्राउ पुर्जी जारी जूपि पूर्वमन्त्री डम्बर श्रेष्ठ व तत्कालीन सहसचिव नारायण गोपाल मलेगो लगायतया कर्मचारीपि धासा बिस्यू वनाच्वंगु दु।

प्रमुख प्रतिपक्षी नेकपा एमालेया सांसदपिन्स नाराबाजी याःगु दथुइ कोशी प्रदेशया मुख्यमन्त्री उद्धव थापां सोमवाः विश्वासया मत काःगु दु।

विपक्षपिन्स मत बिइ धुका सांसदपिन्स नाराबाजी यानाच्वसा कार्यकारी प्रमुखं विश्वासया मत काःगु संभवतः संसदीय अभ्यासय् हे दुर्लभ घटना जूगु खः । मुख्यमन्त्रीया विश्वास यागु मत सम्बन्धी प्रस्तावय् प्रदेशसभा सदस्यपिन्स मत बिइ धुका अध्यक्षता याना च्वम्ह इस्राइल मन्सुरीं मत भिइकेगु ई बिःगु खः।

वया लिपा ई क्वचाये धुकुगुसा माओवादी केन्द्रया प्रदेशसभा सदस्य गीता तिम्सिनायात सभाया अध्यक्षता याका मत बिइगु खः। वयालिपा एमाले सांसदपिन्स हो–हल्ला व नाराबाजी याःगु खः। तर नाराबाजी जुयाच्वंसा थःगु मत तक जोडे याना मन्सुरी थापां पक्षय् ४७ व विपक्षय् ३० मत कुहावःगु लिच्वः न्यकूगु खः। बैठक न्ह्याना च्वंगु पृष्ठभूमि व दृष्य, संसदीय गणित, राजनीतिक समीकरण लिच्वः स्वयेगु खःसा मन्सुरीं थापाया पक्षय् मत बिइगु खनेदु।

९३ सदस्यीय प्रदेशसभाय् सत्ता गठबन्धनया दलपि नेपाली कांग्रेसनाप २९, माओवादी केन्द्रयाके १३, एकीकृत समाजवादीयाके प्यम्ह व जसपानाप छम्ह सांसदपि दु । अथे जुगुलि थापायात वःगु मत गठबन्धनय् आवद्ध जूपि सकसिगु  सांसदपिनिगु ल्याः दुथ्याःगु दु।

अध्यक्षता यानाच्वम्ह मन्सुरी बाहेक ल्याःखायेगु खःसा मुख्यमन्त्रीया पक्षय् ४६ म्ह सांसद जक दुगु खः। तर सत्ता च्वनेगु छगु हे उद्देश्य धइगु गठबन्धनं बैठकया अध्यक्षता यानाच्वम्ह मन्सुरीयाःगु मत बिइका बहुमत थ्यकूगु खः।