बल्खुइ दुर्गा प्रसाईं समूह व प्रहरी दथुइ झडप जूगु दु। बल्खु चक्रपथय् प्रदर्शन यानाच्वंपि प्रहरी घेरा तोडेयाना कालीमाटीपाखे वनेत स्वयेवं प्रहरीं बल प्रयोग याःगु खः।

प्रदर्शनस्थलय् दुर्गा प्रसाई न सम्बोधन यायेवं छम्ह मनू न मञ्चं निषेधित क्षेत्र तोडेयाना त्रिपुरेश्वरपाखे वनेगु घोषणा याःगु खः।

वयालिपा प्रदर्शनकारीया समूह बल्खुचोकपाखे कालीमाटी जूया त्रिपुरेश्वर वनेत स्वयेवं प्रहरी न बल प्रयोग याःगु खः। प्रदर्शनकारीतय्त प्रहरीं अश्रुग्यास व लःया फोहोरां क्यकूगु खः।

प्रदर्शनकारीतय्सं प्रहरीयात अप्पां क्यकूगु खः।

बल्खुइ दुर्गा प्रसाईया नेतृत्वया समूह न प्रदर्शन याःगु दु। राष्ट्र, राष्ट्रियता, धर्म, संस्कृति व नागरिक बचाउया लागि धासे प्रसाई समूह न प्रदर्शन याःगु खः।

येँया थीथी थासं वया बल्खुइ प्रदर्शनकारी तय्संण् चक्रपथय् यातायात अवरुद्ध याःगु खः।चक्रपथय् युवा संघया कार्यकर्ता व प्रसाईया समर्थक दथुइ छु भचा सामान्य झडप जूगु खः।

नेकपा एमालेया युवा नापं विद्यार्थी तय्सं थौं बिहीवाः येँया तिनकुनेय् प्रदर्शन याःगु दु।

राष्ट्रिय युवा संघ नेपाल व अनेरास्ववियुया ग्वसालय् जूगु उगु प्रदर्शनय् एमालेया नेता, थीथी जनवर्गीय संगठनया सदस्यपिन्स ब्बति काःगु खः।

एमालेया ज्याझ्वःया नां सरकार व अराजकतावादीविरुद्ध युवा विद्यार्थी प्रदर्शन याःगु खः। युवा संघं माइतीघरय् प्रदर्शनया ज्याझ्वः तगुलि सरकारं निषेधाज्ञा घोषणा यायेवं तिनकुनेय् प्रदर्शन याःगु खः।

थौं बिहीवाः हे दुर्गाप्रसाई नेतृत्वया समूह न येँया बल्खुइ प्रदर्शन याःगु खः।

स्वनिगःया हिति प्रविधि सम्बन्धी विज्ञ पद्मसुन्दर जोशी मदन भण्डारी विज्ञान तथा प्रविधि विश्वविद्यालयया उपाध्यक्षय् नियुक्त जूगु दु ।

विश्वविद्यालय संरक्षक समितिं अन्तर्राष्ट्रिय प्रतिस्पर्धाया आधारय् जोशीयात प्रशासन व वित्त स्वयेगु कथं उपाध्यक्षय् नियुक्त याःगु खः ।

नेपाःया निंतिं युएन हाबिटाटया प्रतिनिधि व कार्यक्रम प्रबन्धक जुयाः ज्या यानादीधुंकूम्ह वय्कलं जर्मनीया काल्र्सरुहे विश्वविद्यालयं रिसोर्सेज इन्जिनियरिङय् स्नातकोत्तर यानादीगु दु ।

नेपाल संवत् न्हूदँ राष्ट्रिय समारोह समिति व थीथी खलः पुचःया मंकाः ग्वसालय् म्हिगः तजिक छगु ज्याझ्वः जूगु दु । नेपाल संवतयात सरकारी ज्याखँय् नं छ्यलाबुला यायेगु धकाः सरकारं आः नकतिनि याःगु ऐतिहासिक निर्णयया लागिं वय्कः लगायत वय्कः मन्त्रिमण्डलयात सुझाय् देछायेगु ज्या जुगु खः। उगु ज्याझ्वलय् वय्कःयात बेतालिं चिकाः ख्येँ सगं बिसें हनेगु ज्या जूगु खः ।

प्रधानमन्त्री पुष्पकमल दाहालं थौंकन्हय् विश्वय् अन्तर्राष्ट्रिय प्रयोजनया लागिं इस्वी संवत् छ्यलेगु व आन्तरिक प्रयोजनया लागिं थःगु हे देशया मौलिक संवत् छ्यलेगु चलन न्ह्यःने वयाच्वंगु खँ कँसें आः नेपाः नं थ्वहे दिशापाखे वनेमाःगु ई वयाच्वंगु दु धका धयादिगु दु । नेपाल संवतयात सरकारी दस्तावेजय् नं छ्यलेगु निर्णय थःपिंसं यानागु दुसां आः नेपाल संवतयात छ्यलाबुला जक यानां मगाः, थुकियात आः नेपाःया छगूयां छगू जक संवत् दयेके फइ ला धइगु खँय् नं चिन्तन यायेमाःगु बिचाः वय्कलं तयादिल । नेपाल संवतयात सरकारी ज्याखँय् नं छ्यलाबुला यायेगु धकाः सरकारं आः नकतिनि याःगु ऐतिहासिक निर्णयया लागिं वय्कः लगायत वय्कः मन्त्रिमण्डलयात सुझाय् देछायेत म्हिगः ग्वसाः ग्वःगु ज्याझ्वःयात सम्बोधन यासें वय्कलं उगु खँ कनादीगु खः ।

ज्याझ्वलय् न्ववासें नेवाः न्ह्यलुवा मल्ल के. सुन्दर न्हापा नेपाल संवत्या न्हूदँया लसताय् यानागु थीथी ज्याझ्वलय् तत्कालीन जुजुया शासनं दमन याःगु खँ कँसें आः वहे जुजु हयेमाः धकाः छुं मनूत लगे जुयाच्वंगु दु, उकियात स्वनिगःया नेवाःतय्सं गबलें स्वीकार याइ मखु धयादिल । अथे खःसां थौं परिवर्तन लिपा सत्ताय् थ्यंपिं राजनीतिक दल व उकिया नेतातय्सं जनताया आवश्यकतायात पूरा याये मफुगु कारणं यानाः दुर्गा प्रसाईं थेंज्याःपिं तत्वत सक्रिय जुइ फुगु खः, उकिं दलतय्सं थुकी नं ध्यान बीत वय्कलं इनाप यानादिल ।

नेपाली कांग्रेसया नेता प्रकाशमान सिंहं नेपाःया पार्टीत आन्दोलन यायेगु इलय् छप्पँ जूसां आन्दोलनपाखें चूलाःगु उपलब्धी सुरक्षित यायेगु सवालय् धाःसा छप्पँ जुइ मफुगु खँ कनादिल । जसपाया न्वकु राजेन्द्र श्रेष्ठं धुँ द्यनाच्वन धाःसा ध्वंचात तिंतिं न्हू वइ धाःथें गणतन्त्रवादीत द्यनाच्वन धाःसा दुर्गा प्रसाईं थेंज्याःपिं राजतन्त्रवादीत तिंतिं न्हू वइगु जुयाः गणतन्त्रवादीत सजग जुइमाःगु खँ कनादिल ।

कांग्रेस नेता भिमसेनदास प्रधानं नेपाल संवत्यात राष्ट्रिय संवत् दयेकेगु ज्या बहुदल वयेधुंकाःया उपलब्धी जूगुलिं थ्व व्यवस्था दुसा जक थज्याःगु उपलब्धी ल्यनाच्वनी धयादिल । नेकपा (एस) या सचिव जीवनराम श्रेष्ठं गणतन्त्र व संघीयताया विरोधय् येँय् जुइगु छुं नं आन्दोलनयात थनया नेवाःतय्सं स्वीकार याइ मखु धयादिल ।

ज्याझ्वःया सभाध्यक्ष लिसें न्हूदँ समारोह समितिया नायः प्रा.डा. नरेशमान वज्राचार्यं गणतन्त्र व संघीय व्यवस्था वःगुलिं जक नेपाल संवत्यात राष्ट्रिय संवत् धायेके फुगु जुयाः थ्व व्यवस्थायात संरक्षण नेवाःतय्सं यायेमाःगु खँय् बः बियादिल ।