नेकपा एमालेया युवा संघ व मेडिकल व्यवसायी दुर्गा प्रसाईं नेतृत्वय् नागरिक बचाउ महाअभियानं थौं येँ प्रदर्शनयात लक्षितयासे स्वनिगलय् विशेष सुरक्षा प्रबन्ध मिले याःगु दु।

प्रदर्शनय् घुसपैठ जुइफइगु व अप्रिय घटना जुइगु सम्भावनायात कया विश्लेषणयासे स्वनिगलय् एकीकृत विशेष सुरक्षा योजना लागू याःगु दु। सुरक्षाकर्मीतय्त परिचालन याइगु उपत्यका प्रहरी कार्यालयया डिआईजी लालमणि आचार्यया नेतृत्वय् कमाण्ड सेन्टर खडा याःगु दु।

कमाण्ड सेन्टरय् नेपाली सेनाया सैनिक गुप्तचर महानिर्देशनालय (डीजीएमआई) या छम्ह अधिकृतसहित सशस्त्र प्रहरी, नेपाल प्रहरी व राष्ट्रिय अनुसन्धान विभागया टोली दुथ्याकूगु दु। युवा संघं तिनकुनेय् व प्रसाईं समूहं बल्खु क्षेत्रय् केन्द्रित जूया प्रदर्शन यायेत्यःगु खः।

प्रसाईं समूहं ख्वपया सानोठिमीस्थित परीक्षा नियन्त्रण कार्यालय न्ह्यने चौर, गोंगबु चोक, स्वयम्भु, कलंकी, जावख्यः, सातदोबाटो, किपूया त्रिभुवन विश्वविद्यालय प्रवेशद्वार व चाबहिल चोकपाखे ¥याली पिकाइगु जूगु दु।

अथेहे युवा संघया जुलुस ख्वपया सल्लाघारीपाखे तिनकुनेय् वइगु जुगु दु।

मकवानपुर केन्द्रविन्दु जूया थौं चान्ह्यः भुखाय् ब्बःगु दु।

मकवानपुरया चित्लाङ जःखः केन्द्रविन्दु जुया थौं चान्ह्यः १ बजे जूया १९ मिनेटय् ४.५ म्याग्निच्युडया भुखाय् ब्बःगु दु धका राष्ट्रिय भूकम्प मापन लिसे अनुसन्धान केन्द्रं धाःगु दु।

भुखाय् ब्बःगु स्वनिगलय् तक महसुस जूगु दु। राष्ट्रिय भूकम्प मापन केन्द्रं थुकिया सम्बन्धी थप विवरण अद्यावधिक जुगु मदुनि।

थौं शंखधर दिवसया लसताय् थीथी थासय् हने ज्या जुगु दु।

नेपाल संवतया प्रवर्तक शंखधर साख्वाःयात तत्कालीन प्रधानमन्त्री कृष्णप्रसाद भट्टराईया सरकारया ने.सं. ११२० कछलाथ्व दशमी कुन्हु राष्ट्रिय विभूति घोषणा याःगु लसताय् थौं कछलाथ्व दसमी बुधवाः शंखधरया झ्वाताः पलिस्था यानातःगु थीथी लागाय् शंखधर दिवस हंनेगु ज्या जुगु दु।

थौं सुथय् झोछेँ सामुदायिक समाजया ग्वसालय् झोछेँँँ न छगु ज्याझ्वःयासे शंखधर दिवस हनेगु ज्या जुगु दु।

राष्ट्रपति रामचन्द्र पौडेलनाप प्रधानमन्त्री पुष्पकमल दाहाल प्रचण्डं भेटवार्ता याःगु दु।

बुधवाः सुथय् शितल निवासय् राष्ट्रपति पौडेल व प्रधानमन्त्री प्रचण्ड दथुइ देय् या समसामयिक विषय सहलह याःगु दु धका राष्ट्रपति पौडेलया प्रेस सल्लाहकार किरण पोखरेलं जानकारी बिःगु दु।

पोखरेलया कथं राष्ट्रपति पौडेलं भूकम्प प्रभावित जिल्लाय् राहत नापं पुनर्स्थापनाया ज्याय् थप प्रभावकारी दयकेत ध्यानाकर्षण याःगु धका धाःगु दु।

बीबीसीं नकतिनि सार्वजनिक याःगु विश्वया १०० म्ह प्रभावशाली मिसापिनि धलखय् नेवाः अभियन्ता रुक्साना कपाली नं दुथ्याःगु दु ।कपाली नेपालभाषाया च्वमि लिसें नेवाः आन्दोलनया छम्ह अभियन्ता नं खः ।

सडक विस्तार, सम्पदा संरक्षण, भाषा अभियान आदि थेंज्याःगु थीथी नेवाः मुद्दाया आन्दोलनय् नं वय्कः सहभागी जुयाच्वम्ह खः। वय्कःया नेपाःया पारलैंगिक मिसाया रुपय् उगु धलखय् दुथ्याकूगु खः ।

कपालीं त्रिभुवन विश्वविद्यालयय् थःगु नां व लिंग हिलाः न्हूगु म्हसीकाया माग याःबलय् बीत अस्वीकार याःगु खःसा उकिया विरुद्ध अदालतय् कानुनी लडाइँ ल्वानादीगु खः । अथे हे परम्परांनिसें च्वना वयाच्वंगु छेँपाखें पूर्जा मदु धइगु आधारय् पितिना हःगु विरुद्ध नं वय्कलं कानुनी लडाईं ल्वानादीगु खः ।

नेवाः समुदायय् कपाली (जोगी) समुदाय गुगु छेँय् च्वनीगु खः उकियात सःतः खः धासें पूर्जा मबीगु चलन दु । थज्याःगु थीथी कानुनी लडाईं ल्वाये माःगु कारणं वय्कलं उच्चशिक्षाय् कानुन हे विषय कयाः ब्वनादीगु खः । वय्कः आः कानुन विषयय् अध्ययन याना च्वनादीगु दु।