नेपाःया आदिवासी जनजाति सम्बद्ध संघसंस्था तय्सं सामाजिक सद्भाव कायम यासें ऐतिहासिक ह्यूपाःया रक्षा यायेत इनाप याःगु दु।

नेपाल आदिवासी जनजाति महासंघया नेतृत्वय् थीथी १७ गु आदिवासी जनजाति सम्वद्ध संघसंस्थातय्सं पत्रकार सम्मेलन यासे धर्मनिरपेक्षता, संघीयता, गणतन्त्र व लोकतन्त्रया रक्षा यायेगु निति इनापयासे उकिया विरुद्ध जुयाच्वंगु अवान्छित गतिविधियात दिकेत न माग याःगु दु।

नेपाली जनतां बलिदानी पूर्ण संघर्षपाखे वंगु उपलब्धि स्यकेत लिपागु इलय् छु देशी विदेशी शक्तित लगें जुयाच्वंगु धका धासे उमिसं संघर्षपूर्ण उपलब्धि रक्षाया नितिं इलय् हे सचेतपूर्ण ढंगं न्ह्यावनेत इनाप याःगु दु। जनजाति महासंघया अध्यक्ष गेल्जे लामा शेर्पां गणतन्त्रय् सूयात न न्ववाय् दइमखु धका धयादीसे तधःगु बलिदानी बिया वःगु ह्यूपाःयात स्यकेगु ज्याया विरुद्ध आदिवासी जनजाति सम्बद्ध न्यायप्रेमी शक्तित छथाय् च्वनेमाः धका धयादीगु खः।

उगु ज्याझ्वलय् मंकाः कथं पिकागु विज्ञप्ति वाचन यासे नेपाल मगर संघया अध्यक्ष ज्ञानेन्द्र पुन मगरं पहिचान राष्ट्रिय संघर्ष समिति गठन यासे प्रदेशस्तरीय ज्याझ्वः यायेगु धका धयादीगु खः। न्हापागु चरणय् मगरात–थरुहटया मंकाः ग्वसालय् वइगु मंसिर २३ गते दाङय् व तामाङ घेदुङ व नेवाः देय दबूया ग्वसालय् वइगु मंसिर ३० गते येँ बृहत् सभाया ज्याझ्वः दु धका जानकारी बिःगु दु। 

ज्याझ्वलय् किरात याक्थुम चुम्लुङया प्रेम एक्तेन, तामाङ घेदुङया अध्यक्ष मोहन गोले व नेवाः देय दवूया उपाध्यक्ष उमेश स्थापितं नेपाली जनतापिनिगु संघर्षपूर्ण इतिहासं वःगु उपलब्धिया रक्षाया निति आदिवासी जनजाति समुदाय छप्प जुया न्ह्या वनेमाः धका धयादीगु खः।

न्यायपरिषदं उच्च अदालतय् खुम्ह न्यायाधीशयात मुख्य न्यायाधीशय् सिफारिस याःगु दु।

परिषदया मंगलवाः च्वंगु बैठकं लोहितचन्द्र शाह, माधव पोखरेल, रमेश राजभण्डारी, श्रीकान्त पौडेल, नित्यानन्द पाण्डे व शान्तिसिंह थापायात मुख्य न्यायाधीशय् सिफारिस याःगु खः।

आर्य मञ्जुश्री नामसंगीति स्तोत्र पाठ खलः २०७५ पाखें मुखः अष्टमीया दिन कुन्हु सुथय् पशुपतिइ नामसंगीति स्तोत्र पाठ ज्याझ्वः याःगु दु।

पशुपतिया पश्चिमद्वारया दुने उत्तर पश्चिमय् सुथनिसे थिथि स्तोत्र नापं नामसंगीति स्तोत्रपाठ याये ज्या जुगु दु। स्तोत्रपाठ गुरुजु ललेन्द्र बज्राचार्यपाखे न्ह्याकूगु उगु स्तोत्र पाठ याये धुन्का पशुपतिया दक्षिणभागय् खलया नायः गौतम बज्राचार्यं थुगु नामसंगीति पाठयानागु पुण्यफलवारे कना विज्यागु खः।

बज्रयान महाविहार संघया नायः बौद्ध विज्ञ राजेन्द्र मान बज्राचार्यपाखे मुखः असष्टमीया महत्ववारे कना विज्याना मुख अष्टमी कुन्हु पशुपतिइ पञ्चबुद्धया मुखः पुइकिगुवारे कना विज्यात ।

पशुपति विकास कोषया भूतपूर्व सचिव नरोत्तम बैद्यजुपाखें थुगु क्षेत्रय् नामसंगीति स्तोत्रपाठयायेगु ह्वता चुलाकादिगुलिं वय्कःयात स्तोत्र पाठ खलःपाखें सुभाय देछागु दु।

नेपाल संवत् ११४४ न्हूदँया भिंतुना ज्याझ्वः नेपाः पासा पुचः अमेरिकाय् (एनपिपिएं) न तःजिक हःगु दु । नाप थःगु स्थापनाया ३२ दँ उत्सव तःजिक हंगु खः।

वंगु शनिवाः मेरिल्यान्डया गेथर्सबर्गय् जूगु ३२ क्वःगु दँमुँज्यां मनोहर श्रेष्ठया अध्यक्षताय् न्हूगु कार्यसमिति नं ल्यःगु दु । भाजु श्रेष्ठ निक्वःगुखुसी एनपिपिएया अध्यक्ष जुयादीगु खः । उगु न्हूदँया लसताय् जूगु ज्याझ्वलय् न्हापांखुसी शंखधरया मूर्ति नं न्ह्यब्वःगु खः।

थ्वयां न्ह्यः शंखधरया किपाय् स्वांमाः देछायेगु याना वयाच्वंगु खःसा थुगुसी निसें शंखधरया मूर्तिइ स्वांमाः देछासें ज्याझ्वः न्ह्याकूगु खः । उगु ज्याझ्वलय् नेपाःया राष्ट्रिय म्ये व अमेरिकाया राष्ट्रिय म्ये न्यंकूगु खः । ज्याझ्वलय् लाखे प्याखं, धिमे बाजं, बाँसुरी न्ह्यब्वःगु खः । अथेहे ज्याझ्वलय् एनपिपिएपाखें पिथना वयाच्वंगु दबू पत्रिकाया न्हूगु ल्याः विमोचन नं जूगु खः।

अध्यक्ष श्रेष्ठं लसकुस यानादीगु ज्याझ्वलय् मू वक्ता कविना सिंहं शंखधर साख्वाः व नेपाल संवत् बारे न्ववानादीगु खः। अथेहे न्हापांम्ह उपाध्यक्ष शान्ति श्रेष्ठं सुभाय् देछायादीगु खः।

एनपिपिएया न्हूगु कार्यसमितिइ मनोहर श्रेष्ठया नेतृत्वय् शान्ति श्रेष्ठ न्हापांम्ह उपाध्यक्ष, एलन महर्जन उपाध्यक्ष, सुमन तुलाधर महासचिव, रोहिना श्रेष्ठ कोषाध्यक्ष, समिप श्रेष्ठ सचिव व सगुन ताम्राकार उपकोषाध्यक्ष निर्वाचित जूगु खः।

अथेहे डा. राजु तमोट, निति माथेमा, रमिता महर्जन व जयस्वोर श्रेष्ठयात मनोनयन याःगु दु। अथेहे प्रबन्धकपिं प्रविन ताम्राकार, अनघ श्रेष्ठ व सन्ध्या महर्जनंयात नं हाकनं मनोनित याःगु दुसा कार्यसमिति दुजलय् कञ्चन ख्वाउँजु, रुशन डंगोल व सविना श्रेष्ठ सुवाल मनोनित जूगु दु।