पनौती नगरपालिकाया ग्वसालय् भदौ १ गते पन्तिइ जूगु ज्याझ्वलय् नगरपालिकाया मेयर रामशरण भण्डारीं पन्तिइ सांस्कृतिक संरक्षित क्षेत्र घोषणा यायेगु बचं बियादीगु दु ।

ज्याझ्वलय् प्रमुख वक्ताया हैसियतं श्रीकृष्ण महर्जनं स्थानीय सरकार संचालन ऐन कथं पन्तिइ सांस्कृतिक संरक्षित क्षेत्र घोषणा यायेत गुगु कथं वनेगु? उकिया निती ऐन दयेमेगु बारे न्वंवानादिगु खः।

हलिं नेवाः गुथि पनौती नगर समन्वय समितिया ब्यवस्थापनय् जूगु उगु ज्याझ्वलय् विश्व सम्पदा सुचिइ पन्तिइ न सुचिकृत यायेगु सन्दर्भय् समुदाय स्तरय् अन्तक्ररिया ज्याझ्वः जूगु खः ।

ज्याझ्वलय् विदुर कायष्ठं विश्व सम्पदा सुचिकृतया बारे न्वंवानादीगु खः ।

स्वनिगःया थीथी नेवाः वस्तीयात सांस्कृतिक संरक्षित क्षेत्र घोषणा याकेगु अभियान न्ह्याकेगु ज्या जुयाच्वंगु दु। नेवाः मिसा दबू व नेवाः देय् दबू स्वनिगः विशेष प्रदेश समितिया मंकाः ग्वसालय् शनिवाः अभिमुखिकरण ज्याझ्वः जुगु दु।\

जलय् थीथी गुथि नापं जात्रा व परम्पारगत संस्थाय् च्वना ज्या यानाच्वनादीपिंन्त सांस्कृतिक संरक्षित क्षेत्र घोषणाया सवलायात कया थुइकेगु ज्या जूगु खः ।

उगु इलय् देय दबूया केन्द्रीय न्वकू नापं नेवाः मिसा दबूया संस्थापक नायः रश्मीला प्रजापतिं आदिवासी नेवाःतय्गु अधिकारया बारे खँ कनादीगु खः । नेपाःया संविधानंनिसें अन्तर्राष्ट्रिय कानुनया खँ तकं कनादीगु खः ।

अथे हे देय् दबू स्वनिगः विशेष प्रदेशया नायः श्रीकृष्ण महर्जनं सांस्कृतिक संरक्षित क्षेत्र घोषणा यायेमाःगु खँ नापं उकिया नितिं वनेगु लँपु व कानुन दयेकेगु नापं कार्यान्वयनया बारे कनादीगु खः।

सांस्कृतिक संरक्षित क्षेत्र घोषणाया निति सहलह किपू नगर सांस्कृतिक संरक्षित क्षेत्र घोषणा याना ऐन तकं जारी याये धुंकूगु किपुलिइ ऐन कार्यान्वयया सवालयात कया सहलह यायेगु ज्या थौं जूगु दु ।

नेवाः देय् दबू किपू नगर समिति, ज्यापु महागुथि किपू नगर समिति, आदिवासी नेवाः राजनीतिक अभियान किपू नगर समिति, हलिं नेवाः गुथि किपू लगायत थीथी खलः पुचः जाना मंकाः कथं उगु सहलह मुँज्या ग्वसाः ग्वःगु खः ।

पुलिइ दुगु परम्परागत प्रथाजन्य संस्था सी गुथि, दाफा गुथि, जात्रा गुथि, बाजं गुथि नापं थीथी गुथिपाखें सच्छिम्हं मल्याक प्रतिनिधिपिनिगु सहभागीता दुगु खः । 

दबू किपू नगर समितिया नायः बुद्धिलाल ज्यापुया सभाध्यक्षताय् जूगु उगु ज्याझ्वलय् ज्यापु महागुथिया कमला महर्जनं लसकुस न्वचू बियादीगु खः । ऐन व नियमावली निर्माणया नितिं कार्यदलया दुजः उज्ज्ल महर्जनं किपू नगरपालिकापाखें प्रथाजन्य संस्थायात सुचकिरणया नितिं फारम भरेयाकूगु बारे खँ कनादीगु खः ।

अथे हे कार्यदलया मेम्ह दुजः अधिवक्ता नरेश श्रेष्ठं सांस्कृतिक संरक्षित क्षेत्र ऐन व नियमावलीया कानुनी खँ कनादीगु खः । अनं लिपा ब्वति कयादीपिं गुथिया प्रतिनिधिपिन्सं न्ह्यसः तयादीगु खः । अन वःगु न्ह्यसःया लिसः सांस्कृतिक संरक्षित क्षेत्र घोषणाया ऐन व नियमावली निर्माण कार्यदलया कजि श्रीकृष्ण महर्जनं लिसः बियादीगु खः ।

आःया अवस्थाय् नियमावली दुथ्याःगु कथंया फारम भरेयायेगु ज्या सकलें छप्पँ जुया यायेमाःगु नापं ऐन कार्यान्वयनया नितिं नं मंकाः कथं पहल यायेमाःगु खँ तयादिल ।

प्रस्तावित प्रधानन्यायाधीश विश्वम्भर प्रसाद श्रेष्ठयाःगु संसदीय सुनुवाइ कन्ह्यः सोमवाः निसे सुरु जुइगु दु।

संसदीय सुनुवाइ समितिं सोमवाः उजुरीकर्तापि नाप सहलह याना व वयालिपा श्रेष्ठनाप सहलह याइगु जुगु दु।

समितिया थौ च्वंग बैठकं प्रस्तावित प्रधानन्यायाधीश श्रेष्ठविरुद्ध उजुरी बिइपिन्त कन्ह्य सोमवाः सुथय् १०ः३० बजे सहलह याइ व ११ः३० बजे प्रस्तावित प्रधानन्यायाधीशनाप सहलह यायेगु निर्णय जूगु दु धका समितिया ज्येष्ठ सदस्य पशुपति शमशेर जबरां जानकारी बिःगु दु।

प्रस्तावित प्रधानन्यायाधीश श्रेष्ठविरुद्ध इमेलपाखे निगु व पौपाखे छगु उजुरी वःगु खः। इमेलपाखे वःगु उजुरी याःम्ह मनू सम्पर्कय् मवगुलि छम्ह उजुरीकर्तानाप जक सहहल यायेगु समितिं तयारी याःगु दु ।

संसद अवरोधबारे सहलह यायेत प्रधानमन्त्री पुष्पकमल दाहाल प्रचण्डं राष्ट्रिय मान्यताप्राप्त दलया नेतापिन्त सःतूगु दु। सहलह यायेगु निति थौ सिंहदरबारस्थित प्रधानमन्त्री कार्यालयय् सःतूगु खः।

संसदया पंगः चिइकेगु निति प्रधानमन्त्री प्रचण्डं राष्ट्रिय मान्यताप्राप्त दलया शीर्ष नेतापि नाप सहलह याइगु धका प्रधानमन्त्रीया प्रेस सल्लाहकार गोविन्द आचार्यं जानकारी बिःगु दु।

वंगु निर्वाचनय् नेकपा एमाले, नेपाली कांग्रेस, नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी व जनमत पार्टीं थ्रेसहोल्ड कटे याना राष्ट्रिय मान्यताप्राप्त पार्टी जूगु खः।

लुँ तस्करी प्रकरणयात उच्चस्तरीय छानबिन समिति गठन याये माःगु माग यासे प्रमुख प्रतिपक्षी दल नेकपा एमालें साउन १० गतेनिसे संसद अवरुद्ध याना वयाच्वंगु खः।