बागमती प्रदेशया प्रमुख दीपकप्रसाद देवकोटा मफयादीगु दु। वय्कःया उसाँय्लय् छत्थुं समस्या वःगुलिं थौं सनिलय्या निंतिं क्वःछिनातःगु नवनियुक्त जुयादीपिं मन्त्रीपिनिगु शपथ ज्याझ्वः लिज्यागु दु।

प्रदेशया प्रमुख देवकोटा थौं सुथय् वासः याकेत येँय् झायादीगुलिं मेगु सुचं पिहांमवः तक निंतिं शपथया ज्याझ्वः लिज्यागु प्रदेश प्रमुखया ज्याकुथिं धाःगु दु।

मुख्यमन्त्री बहादुरसिंह लामां बुधबाः प्रदेशसभा दुजःपिं गोविन्द लम्सालयात आन्तरिक मामिला लिसें कानुनमन्त्री, माया श्रेष्ठयात युवा लिसें खेलकुदमन्त्री व गीता गुरुङयात सहकारी लिसें गरिबी निवारणमन्त्रीइ नियुक्त यानाः शपथया निंतिं प्रदेशप्रमुखया न्ह्यने सिफारिस यानादीग खः।

महेन्द्रेश्वर महाद्यः अथे धइग ‘मखं महाद्यः’ थाय् थौ रुद्राभिषेक याःगु दु।दँय् दँसं साउन १५ गते मखनय् महाद्यःयात म्वो ल्हुकेगु व पूजा यायेगु चलन दु।

थौ सुथय् महाद्यःया पूर्णकदया मूर्तिइ दुरु, धौ, मह मिश्रि  पञ्चामृत तया म्वो ल्हुकिइगु याइ।जुजु महिन्द्र मल्लं नेपाल सम्बत ६७४ य् पशुपति महाद्यः थे दयेका ‘महेन्द्रेश्वर महाद्यः ’ प्रतिस्थापन याःगु खः।

किंवदन्ती कथं जुगु महिन्द्र मल्लं न्हिन्हि पशुपति महाद्यः थाय् वना भक्ति याःगु खना महाद्यः लय्ताया जुजु धाः थाय् हे च्वनिइगु वरदान बिउगु कथं ‘महेन्द्रेश्वर महाद्यः’ या देगः दयेकूगु खः।

थौं सङ्घीय संसदय् थी थी न्यागू संसदीय समितिया बैठक च्वनेत्यंगु दु। प्रतिनिधिसभा अन्तर्गतया कृषि, सहकारी लिसें प्राकृतिक स्रोत समितिया बैठक सुथसिया ११ः३० ताः इलय् च्वनेत्यंगु दु।

बैठकय् भूमिसम्बन्धी छुं नेपालयात संशोधन यायेत दयेकूगु विधेयक, २०८२ खय् सहलह जुइगु ज्याधलः दु। थन भूमि व्यवस्था, सहकारी लिसें गरिबी निवारणमन्त्री बलराम अधिकारी, भूमि आयोगया पदाधिकारी, भूमि वन लिसें कानुन ख्यःया विज्ञनाप सहलह जुइत्यंगु दु।

अथे हे, कानुन, न्याय लिसें मानवअधिकार समिति नापं कृषि, सहकारी लिसें प्राकृतिक स्रोत समितिया बैठक न्हिनसिया १ ताः इलय् च्वनेत्यंगु दु। मानवअधिकार समितिइ मानव अधिकारसम्बन्धी खुक्वःगु राष्ट्रिय कार्ययोजनासम्बन्धी सुझाःया मस्यौदा व नेपाल कानुन व्यवसायी परिषद् (निक्वःगु संशोधन) विधेयक, २०८१ खय् नापं सहलह जुइगु ज्याधलः दु। अथे हे, राष्ट्रियसभा अन्तर्गतया विधान व्यवस्थापन समिति, विकास, आर्थिक मामिला लिसें सुशासन समिति व सङ्घीयता सबलीकरण लिसें राष्ट्रिय सरोकार समितिया बैठक च्वनेत्यंगु दु।

सुथसिया ११ः३० ताः इलय् च्वनीगु सुशसान समितिया बैठकय् मधेस प्रदेशलिसें देय्न्यंकंया थी थी थासय् खनेदया च्वंगु त्वनेगु लःया समस्या ज्यंकेया निंतिं मन्त्रालयपाखें जूगु ज्याया बारे सहलह जुइत्यंगु दु। न्हिनसिया १ ताः इलय् च्वनीगु विधायन व्यवस्थापन समितिया बैठकय् जलस्रोत विधेयक, २०८१ खय् दफावार सहलह याइगु ज्याधलः दु।

सुथसिया ११ ताः इलय् च्वनीगु राष्ट्रिय सरोकार समितिया बैठकय् संस्कृति, पर्यटन लिसें नागरिक उड्डयन मन्त्रालयनाप सहलह जुइत्यंगु दु। उगु बैठकय् उगु मन्त्रालय अन्तर्गतया राष्ट्रिय गौरवया आयोजनाया प्रगति अवस्था, समस्या व समस्या ज्यंकेया निंतिं जूगु कुतः नापं समितिनापया अपेक्षाया विषयकय् सहलह जुइत्यंगु दु।

बागमती प्रदेशसभा, नेपाली कांग्रेस संसदीय दलया नेताय् इन्द्रबहादुर बानियाँ चयन जुयादीगु दु। थौं थन क्वचाःगु निर्वाचनय् वय्कलं २२ मत हयाः मुख्यमन्त्री बहादुरसिंह लामायात बुकादीगु खः।

निर्वाचन समितिया कथं मुख्यमन्त्री लामाया १४ मत वःगु खः। निर्वाचनय् छगू मत बदर जूगु धाःगु दु। निर्वाचनय् ३७ प्रदेशसभा दुजःतय्सं मतदानय् ब्वति काःगु खः। थ्व स्वयां न्ह्यःया दलया नेतातय् निर्वाचनय् नं बानियाँ व लामा दथुइ हे धेंधेंबल्ला जूगु खः।

उगु इलय् लामां २१ मत हयाः दलया नेताय् जुयादीगु खः धाःसा बानियां १६ मत हयादीगु खः । थौंया निर्वाचनय् कांग्रेसया ३७ म्ह प्रदेशसभा दुजःतय्सं मतदान याःगु खः।

उद्योग, वाणिज्य नापं आपूर्ति मन्त्रालयं स्वम्ह ‘बोर्ड अफ ट्रेड’य् विज्ञ दुजः नियुक्त याःगु दु।

निजी ख्यःया स्वम्ह प्रतिनिधित कुशकुमार जोशी, विदुसी राणा व ज्योत्सना श्रेष्ठयात ‘बोर्ड अफ ट्रेड’या विज्ञ दुजलय् नियुक्त याःगु मन्त्रालयं धाःगु दु। मन्त्रालयया व्यापार नीति नापं व्यापार ग्वाहालि शाखां जारी याःगु नियुक्तिपत्र कथं स्वम्हेसित हे वाणिज्य नीति २०८१ या बुँदा १३ या व्यवस्था कथं बोर्ड अफ ट्रेडय् नियुक्त याःगु मन्त्री दामोदर भण्डारीया स्वकीय सचिवालयं धाःगु खः।

सचिवालयया कथं थ्व नियुक्ति २०८२ साउन १३ गतेया मन्त्रिस्तरीय निर्णय कथं जूगु खः। दयाच्वंगु वाणिज्य नीतिइ व्यापार सुधार यायेगु, निजी ख्यःया सक्रियता, नीतिनिर्माणय् समन्वय व सरकारी नापं निजी ख्यःदथुइ सहकार्य क्वातुकेगु बोर्ड अफ ट्रेडया भूमिकायात महत्त्वपूर्ण आधारकथं कयातःगु मन्त्रालयं धाःगु दु।