लुम्बिनीइ थ्व हे वइगु फागुन २६ गते ५ सय म्ह अस्थायी भिक्षु (अल्पकालीन प्रबज्या) याइगु जुगु दु।अखिल नेपाल भिक्षु महासंघ, थाई इन्डिया–नेपाल धर्मदूत व प्रबज्या नेपालं थाइल्यान्डया धम्मकाय फाउन्डेसन याःगु ग्वहालिं अल्पकालीन कलपुत्र प्रबज्या कार्यक्रमअन्तर्गत भिक्षु दयकेगु ज्याझ्वः यायेत्यःगु खः।

थाई राजकीय विहार सहआयोजक व प्रबज्या नेपालं व्यवस्थापन यायेच्यःगु खः। लुम्बिनी विकास कोष, नेपाल पर्यटन बोर्ड, धर्मोदय सभालगायत संघसंस्था न ग्वहालि याइगु जुगु दु। लुम्बिनीयात हलिमय शान्ति नाप आध्यात्मिक केन्द्रया कथं प्रचारप्रसार यायेगु, मनू तयेत आध्यात्मिक ज्ञान नाप चेतना वृद्धि यायेगु लुम्बिनी चाःहिका पर्यटक तय्त अप्पाकेगु आज्जु कथं उगु ज्या जुइत्यःगु धका थाई इन्डिया – नेपाल धर्मदूतया अध्यक्ष भिक्षु थावरं छगु पत्रकार सम्मेलन याना जानकारी बियादीगु खः।

भिक्षु थावरया कथं प्रबज्या जुइपि थ्व हे वइगु फागुण २८ गते तक नागबहालय् श्रामणेरपिन्त पात्र दान बिइगु चैत्र २ गते लुम्बिनीइ भिक्षु अर्थात् श्रामणेर याइगु जुगु दु। १५ दिं तक भिक्षु जुया च्वनेमाः। थाइल्यान्डया लोकह्वाम्ह भिक्षु फ्रा फ्रोमसिनावादीया उपाध्याय व अखिल नेपाल भिक्षु महासंघया अध्यक्ष धम्मशोभन महास्थविरपिनिगु उपस्थितिइ भिक्षु (प्रबजित) ज्याझ्वः जुइगु खः। उगु ज्याझ्वलय् नेपाः नापं थाइल्यान्डया नागरिक तयेगु न ब्बति दइ।

अथेहे चैत्र १४ गते गते बुटवल, देवदह व लुम्बिनी धर्मयात्रा याइगु खःसा चैत्र १६ व १७ गते हनुमानध्वाका दरबार क्षेत्र व अक्षेश्वर महाविहारय् भिक्षाटन याइ।

नेपाल कम्युनिष्ट पार्टी (एमालें) न्ह्यःने वयाच्वंगु प्रतिनिधिसभा दुजः निर्वाचनया निंतिं थःगु घोषणापत्र पितब्वःगु दु।

एमालेया केन्द्रीय निर्वाचन परिचालन कमिटीं ग्वसाःग्वःगु चुनावी घोषणापत्रय् आधारित बहस ‘देश पहिला’ ज्याझ्वलय् नायः केपी शर्मा ओलीं संबोधन यानाः आज्जु क्वःछीगुलिसें प्रतिबद्धता पितब्वयादिल।एमालें ‘समृद्ध नेपाः, सुखी नेपाःमि : राष्ट्रिय आकाङ्क्षा झीगु गन्तव्य’ या नारा ज्वनाः उकियात पूवंकेत थःगु पार्टीयात त्याकेमाःगुलिइ बः ब्यूगु खः।

न्हापा थःगु पार्टी सरकारय् दुबलय् न्ह्याकूगु व पूवंके मखंगु सुशासन, विकास, रोजगारी व सामाजिक न्यायया ख्यःयात एमालें मुख्य प्राथमिकता ब्यूगु खः।घोषणापत्रय् थत्थें यायेगु ११ गू ज्या, न्यागू आधारभूत ज्या व २५ गू सङ्कल्प पितब्वःगु खः। नायः ओलीं थुनेगु व च्याकेगु मखुसे दयेकेगु सङ्कल्प ज्वनाः एमालें न्हापाया अनुभव व अभ्यासया कारणं देय्या ख्वाः हिलेगु ज्याया नेतृत्व यायेगु दाबी यानादिल।

वय्कलं स्वाधीनता व राष्ट्रियताया पक्षय् एमाले न्ह्याबलें दृढ दूगु ध्वाथुइकाः थःपिं छुं नं लोकप्रितावाद वा स्टन्टय् केन्द्रित मजुइगु धयादिल।

निर्वाचन आयोगं प्रतिनिधिसभा सभा सदस्य निर्वाचनअन्तर्गत समानुपातिक निर्वाचन प्रणालीकथं जुइगु निर्वाचनया निंतिं माःगु अस्थायी मतदाता नामावाली सङ्कलन लिसें स्थायी मतदान प्रक्रियायात व्यवस्थित दयेकेत ‘अस्थायी मतदाता नामावलीसम्बन्धी कार्यविधि २०८२’ जारी याःगु दु।

आयोगं मतदाता नामावली सम्बन्धी ऐन, २०७३ या दफा ४४ नं बियातःगु अधिकार छ्यलाः कार्यविधि दयेकाः जारी याःगु खः। कार्यविधि कथं आयोगं स्थायी मतदाता नां धलः सङ्कलन यायेगु ज्या लिसेंया सुचं पिथनीगु जूगु दु। उगु सुचं आयोगं माःगु कथं राष्ट्रियस्तरया सञ्चारमाध्यमया पाखें नापं प्रकाशन लिसें प्रसारण याये फइगु व्यवस्था कार्यविधिइ यानातःगु दु।

नेपाल सरकार, प्रदेश सरकार, स्थानीय तगिं, सरकारया स्वामित्व बाय् नियन्त्रणय् दूगु संस्थाय् ज्या याइपिं कर्मचारी, सेना, प्रहरी, कारागारय् दुपिं थुनुवा व कैदी, निर्वाचन ज्याय् खटे जुइपिं कर्मचारी व सुरक्षाकःमि, संवैधानिक निकायया प्रमुख लिसें पदाधिकारया नां अस्थायी मतदाता नामावलीइ दुथ्याइगु जूगु दु।

निर्वाचन आयोगं जारी याःगु उगु कार्यविधिकथं सुयागुं नां त्वःफ्यूगु बाय् सुं मतदाताया नां बाय् विवरणय् छुं कथं द्वंगु जुसा सम्बन्धित मतदातां थःगु नां दुथ्याकेत बाय् द्वनाच्वंगु भिंकेत दसि लिसें प्रमुख नां दर्ता अधिकारीया न्ह्यने निवेदन बिइमाःगु आयोगं धाःगु दु। 

नेपाल पत्रकार महासङ्घ, रासस प्रतिष्ठान शाखां थुगुसीया ‘रासस पत्रकारिता पुरस्कार’ अङ्ग्रेजी समाचार सहसम्पादक पवित्रा गुरागाईं व वरिष्ठ समाचार सम्पादन सहायक रेशमा शाक्ययात लःल्हाइगु जूगु दु।

शाखाया थौं च्वंगु बैठकं राससया ६५ क्वःगु वार्षिकोत्सवया झ्वलय् म्हतिं १० द्वः दां व हनिइगु निर्णय याःगु धका शाखा अध्यक्ष कृष्णप्रसाद सापकोटां जानकारी बियादिल। सहसम्पादक गुरागाई राससय् आबद्ध जुयाः वंगु १८ दंनिसें अङ्ग्रेजी समाचार सम्पादन यानाच्वनादीगु खः। शाक्य थ्यंमथ्यं स्वगू दशकंनिसें समाचार उत्पादन सहयोगी भूमिका यानाच्वनादीगु खः। अथेहे, शाखां पूर्वमहाप्रबन्धक श्रीरामसिंह बस्नेतयात ‘पूर्वकर्मचारी सम्मान’ लःल्हाइगु जूगु द।

वय्कलं वंगु स्वगू दशक राससय् आबद्ध जुयाः पत्रकारिताया ख्यलय् योगदान बियादीगु खः। थुगुसीया ‘उमाकान्त गीतादेवी चन्द्रमणि स्मृति पुरस्कार’ नवलपुरया स्थानीय समाचारदाता टेकराज पोखरेलयात लःल्हाइगु जूगु दु। रासस दाङया ज्याकुथिया प्रमुख नारायणी रजौरें थः मां, बौ व किजाया नामय् स्थापना यानादीगु उगु पुरस्कार न्याद्वः दांया खः।

पोखरेल वंगु खुदंनिसें एजेन्सी पत्रकारिताय् सक्रिय जुयाच्वनादीगु खः। शाखां राससया थ्व हे फागुन ७ गते ग्वसाः ग्वइगु वार्षिकोत्सव ज्याझ्वः याइ।

थ्व हे वइगु फागुन २१ गते जुइगु प्रतिनिधिसभा सदस्य निर्वाचनया निंतिं माःगु फुक्क मतपत्र छापे याये सिधःगु दु।

जनक शिक्षा सामग्री केन्द्र लिमिटेडया प्रबन्ध निर्देशक यदुनाथ पौडेल निर्वाचन आयोगं ब्यूगु मतपत्र छापे यायेगु भाला सोमबाः सनिलय् तकया दुने क्वचाःगु धयादीगु दु। थनिनिसें फुक्क मतपत्र ‘प्याकेजिङ’ सिधयेकाः सम्बन्धित प्रदेशय् ढुवानी यायेगु वयकलं धयादिल। प्रबन्ध निर्देशक पौडेलं धयादिल, “प्रत्यक्षपाखे निगू क्वति स्वंगू लख मतपत्र छापे यायेगु ज्या सोमबाः सनिलय् तकया दुने क्वचागु दु।

४२ न्हुया ज्याधलः तयाः छापे यायेगु ज्या न्ह्याकागुलिइ ४० न्हुं हे ज्या सिधयेकेत ताःलाःगु दु। आः झिन्हुया दुने फुक्क जिल्लाय् मतपत्र थ्यंकेत्यनाःगु दु।” केन्द्रं न्हिया न्हिथं १३ निसें १५ लख मतपत्र छापे यायेगु याना वयाच्वंगु खः। थ्व स्वया न्ह्यः १० लख छापे याये सिधयेकाः आयोगं थी थी थासय् थ्यंके धुंकूगु दुसा निगू क्वति च्यागू लख स्विद्वः पाः समानुपातिकपाखे मतपत्र छापे यानाः जिल्ला जिल्लाय् छ्वयेगु ज्या जुया च्वंगु केन्द्रं धाःगु दु।

प्रबन्ध निर्देशक पौडेलं कर्णाली व सुदुरपश्चिमय् फुक्क कथंया मतपत्र थ्यनेधुंकूगु व ल्यंगु थासय् नापं झिन्हुया दुने मतपत्र थ्यंकेगु यानाः ज्या जुयाच्वंगु धयादिल।