ख्वपःदेयया नांजागु साहित्यिक संस्था नेपाल साहित्य मन्दिरया ग्वसालय् दँयदसं बियावया च्वंगु सिरपा जरिमैंया साखः लुमन्ति सिरपा थुगुसिइ सुलोचना मानन्धर धितालयात बिइगु जूगु दु।

नेपालभाषाया साहित्यख्यलय् ज्वमदुगु योगदान बियावया च्वंम्ह छम्ह मिसा साहित्यकारयात बिइगु थ्व सिरपाया नापनापं मेम्हं साहित्यकारयात बिइगु कुमार साखः हःपाः सिरपा थुगुसिइ विजयरत्न असंबरेयात बिइगु जूगु दु।

आः वइगु गुंलाथ्व द्वितिया, साउन १० गते शनिबार ख्वपया भार्भाचोय् तिसा रेस्टुरेन्टय् जुइगु छगू ज्याझ्वलय् वयकपिन्त नगद दांलिसें हना पौ देछासे सिरपा बिइगु खँ ग्वसाः खलःया नायः त्रैलोक्यमान बनेपाली अगिबं जानकारी बियादीगु दु। वहे ज्याझ्वलय् यल देयया नांजाम्ह भाषाह्यःमि वरिष्ठ भाषिक अभियन्ता छत्र बहादुर कायस्थयात विशिष्ट साहित्य सम्मान ११४५ नं देछाइगु जूगु दु।

ग्वसाः खलकं उगु ज्याझ्वलय् ब्वति कया ज्याझ्वः झःझः धायेकादिइत सकल भाषाह्यःमि पिन्त इनाप नं याःगु दु।

गीतसंगीत कला व मनोरन्जन ख्यलय् ज्वमदुगु योगदान बियावंम्ह स्वतन्त्र संसार महर्जनयातस्वतन्त्र संसार महर्जनयात अमर स्रष्टा कथं लुमंका छगू लुमन्ति ज्याझ्वः जुगु दु।

मदुम्ह महर्जनं स्थापना याना थकुगु संसार्स ग्रुपया ग्वसालय् संसार्स क्रियशन्स नेपाल, संसार्स अनलाइन टिभि, संसार फाउण्डेशन नेपाल व संसार संगीतालयया मंकाः ग्वसालय् थौ शुक्रवाः किपूया किर्तिपुर सिनेप्लेक्स हलय् जूगु उगु लुमन्ति ज्याझ्वलय् ख्यालिजुजु मदनकृष्ण श्रेष्ठ, यल खोना वडा २१ या वडा अध्यक्ष रबिन्द्र महर्जन, सरिता महर्जन, न्ह्यलुवाः पत्रकार विजयरत्न असंबरे, पवन जोशींं स्वतन्त्र संसार महर्जनयात लुमंका नुगःखँ तयादिल।

अमर स्रस्टा स्वतन्त्र संसार महर्जनयात लुमंका छगू मिनेट मौन धारण याना शुरु याःगु उगु ज्याझ्वलय् स्वतंत्र संसार महर्जनं संसारया हे दकलय् ताहाकःगु म्युजिक अवार्ड या ग्वसाः ग्वया नेपाःया नां गिनिज बुक अफ वल्र्ड रेकर्ड तयेगु कुतः याःगु खँ लुमंकल।

सन्चारकःमि बिराजकाजी राजोपाध्यायं उगु ज्याझ्वलय् युवा निर्देशक योवन शाक्यं दयेकादीगु स्वतन्त्र संसार महर्जन बारेया डकुमेन्ट्रीं नं क्यनेज्या जुगु खः। उजय शाहीया संयोजनय् दयेकुगु उगु डकुमेन्ट्रीइ सुनिल बज्राचार्यं सः बियादीगु खः।

प्रधानमन्त्री केपी शर्मा ओलीं आःया सरकारं देशय् विकासया लहर हःगु धयादीगु दु।महोत्तरी जिल्लाया मटिहानीइ ग्वसाः ग्वःगु ज्याझ्वःयात संबोधन यानाः प्रधानमन्त्री ओलीं नेपाली कांग्रेस व नेकपा (एमाले) थेंजाःगु मुलुकया निगू तःधंगु राजनीतिक पार्टी मिले जुयाः दयेकूगु आःया सरकार विकास व सुशासनया पक्षय् चांन्हि मधाःसे जुयाच्वंगु धयादिल।

वय्कलं एमाले, कांग्रेस, लोसपा, जनमतलिसेंया आःया मंकाः सरकारं स्पष्ट नीति व ज्याझ्वःलिसें देय्या तराई–मधेस, गुँ, च्वापुगुँ फुक्क लागायात कःघानाः विकास निर्माणलिसें देय् व जनताया पक्षय् ज्या यानाच्वंगु खँ ध्वाथुइकादिल। प्रधानमन्त्री ओलीं राजनीतिक स्थिरतालिसें विकास व सुशासनया निंतिं दयेकूगु आःया सरकारं शिक्षा, स्वास्थ्य, सतकलिसें आमजनतालिसे तप्यंक स्वापू तइगु ख्यःयात विशेष प्राथमिकता बिइ धुंकाः विकास निर्माणया ज्या तःगतिं भतिचा अप्वः खनेदयेक उपलब्धि जूगु धयादिल।

एमालेया अध्यक्ष नापं प्रधानमन्त्री ओलीं वइगु निर्वाचन तक निगू तःधंगु राजनीतिक दल दुथ्याःगु सरकारया विकल्प मदूगु धका धयादीगु खः।वय्कलं महोत्तरी मटिहानीया विग्ही खुसिइ दयेकूगु ताँ उलेज्या जुइ धुंकाः थ्व थासय् च्वंपिं जनतातय्त जनकपुरलिसे स्वायेत लिसें स्थानीय व्यापार व्यवसाय, उद्योग, कलकारखाना, शिक्षा, स्वास्थ्य फुक्क ख्यः लाभान्वित जुइगु भलसा प्वंकादिल।

ज्याझ्वलय् लोसपा अध्यक्ष महन्थ ठाकुर व वरिष्ठ नेता लिसें श्रम, रोजगार व सामाजिक सुरक्षामन्त्री शरतसिंह भण्डारी, भौतिक पूर्वाधार नापं यातायातमन्त्री देवेन्द्र दाहाललिसें वक्तातय्सं मधेस प्रदेशय् दयाच्वंगु लःया समस्या दिगो जुइक ज्यंकेत मंकाः कुतः यायेमाःगुलिइ बः बियादिल।

वय्कःपिंसं स्वंगुलिं तहया सरकार, राजनीतिक पार्टी, नागरिक समाज व स्थानीय जनताया ग्वाहालि व समन्वयय् मधेस प्रदेशया मुक्कं समस्या ज्यंकेगु पक्षय् थःथःगु थासं फक्व भूमिका म्हितेगु प्रतिबद्धता प्वंकादिल।

पूर्वराष्ट्रपति विद्यादेवी भण्डारीं थः पार्टी त्वतां राष्ट्रपति जुयागु मखु धयादीसे हाकन पार्टीया जिम्मेवारी कया सदस्यता नवीकरण यानागु धका स्पष्टीकरण बियादीगु दु।

थौ शुक्रवाः छगु पत्रकार सम्मेलनयासे  सञ्चारकःमि नाप खँ ल्हासे वयकलं धयादस्गु दु सू ना न चाहे जूया न थःगु दुजः नये फइ मखु धका  प्रतिक्रिया बियादीगु दु।‘आः सुयात न माल धया जिगु दुजः नये फइ मखु थे च्वः,’ धका भण्डारीं धयादीगु दु।

वयकलं विधि कथं हे पार्टी परिवारया सदस्य नाप स्वागू दु धका स्पष्ट यानादीगु दु।

‘जि नेकपा एमाले पार्टी जीवनय् हाकन वइगु दु। जि ४५ दँ पार्टी सदस्य जुइ धुका राष्ट्रपतिया शपथ नयागु खः। मैले पार्टी त्यागे यानागु मखु,’ वयकलं धयादीगु दु, ‘पार्टीया जिम्मेवारी कया वनागु खः। वये धुका विधि कथं हे यानागु खः। जि नेकपा एमालेया परिवार कथं आः न दुथ्याना च्वनागु दु।’

नेपाली कांग्रेस बागमती प्रदेश संसदीय दलया नेता बहादुरसिंह लामायात दल याःगु नेतापाखे चिइकेत संसदीय दलय् अविश्वासया प्रस्ताव दर्ता याःगु दु।

लामायात नेपाली कांग्रेस संसदीय दलया नेतां चिइकेगु निति सांसद तय्स अविश्वासया प्रस्ताव दर्ता याःगु दु। छु ई न्ह्यः जक नेपाली कांग्रेस बागमती प्रदेश संसदीय दलया कार्यालयय् लामाविरूद्ध अविश्वासया प्रस्ताव दर्ता याःगु दु।अविश्वासया प्रस्तावय् नेपाली कांग्रेसपाखे आः प्रतिनिधित्व यानाच्वपि प्यम्ह मन्त्री नाप २१ म्ह सांसद तय्स ल्हाःचिं तःगु दु।

संसदीय दलया कार्यालयय् कांग्रेस बागमती प्रदेश सभापति तक जुयादीम्ह सांसद इन्द्रबहादुर बानियाँया नेतृत्वय् सांसद तयेगु बैठक च्वंगु खःसा बैठक लिपा अविश्वास प्रस्ताव दर्ता याःगु खः। मुख्यमन्त्री लामाया नेतृत्वय् सरकारं आव २०८२÷८३ या निति उगु बजेटय् कांग्रेस दुने विवाद जुगु खः। अविश्वास प्रस्ताव दर्ता याये न्ह्यः कांग्रेसपाखे प्रतिनिधित्व यानाच्वपि प्यम्ह मन्त्रीतय्स राजीनामा ब्यूगु खः।

सरकारया प्रवक्ता नाप आन्तरिक मामिला लिसे कानुन मन्त्री सुरजचन्द्र लामिछाने, संस्कृति पर्यटन मन्त्री बिमल ठकुरी, सहकारी लिसे गरिबी निवारण मन्त्री मधु श्रेष्ठ व युवा लिसे खेलकुद मन्त्री मीनकृष्ण महर्जनपिन्स मुख्यमन्त्री बहादुरसिं लामायात राजीनामा पौ ह्वाट्सएपपाखे छ्वःगु खः।