प्रधानमन्त्री सुशीला कार्कीयात थौ नर्वेया राजदूत ड्याग्नी मियोसं नापलागु दु। प्रधानमन्त्रीया कार्यालय सिंहदरबारय् निगु देय् दथुइ हित जुइगु विषय खँ ल्हानादीगु खः।

उगु ज्याझ्वलय् राजदूत मियोसं नेपाःया न्हापाम्ह मिसा प्रधानमन्त्री कार्की जुयादीगुलि भिंतुना देछानादीसे वयकःया नेतृत्वय् थ्व हे वइगु फागुन २१ गते निर्वाचन बालाक्क क्वचाःगु भलसा कयादीगु खः।

प्रधानमन्त्री कार्कीं असामान्य परिस्थितिइ थःगु सरकार जुगु धका धयादीसे आः विस्तारं देय् सामान्य अवस्थाय् लिहावनिइ नापं चुनाव बालक्क क्वचाइ धका धयादीगु खः।

येँ महानगरपालिकाया कार्यवाहक प्रमुख सुनिता डंगोलं देय्् यागु आर्थिक आत्मनिर्भरता हासिल याये मफुतले सशक्तीकरणया नारा व्यवहारय् कार्यान्वयन जुइ फइ मखु धक धाःगु दु।

थौ बुधवाः ‘काठमाडौं बिजनेस एक्स्पो–२०८२’ या उलेज्या यानादीसे कार्यवाहक प्रमुख डंगोलं नागरिक तय्गु सिपयात आय नाप स्वाये मफुतले आर्थिक सुदृढीकरण सम्भव जुइ मखु धका धयादीगु खः।

कार्यवाहक प्रमुख सुनिता डंगोलं दक्को नागरिक तय्त आर्थिक रूपं आत्मनिर्भर दयकेत व्यवसायिक मेला महोत्सव ज्याझ्वः याना वनेमाः धका धयादीसे दक्को प्रकारया तालिम उत्पादन, रोजगारी व मनू तयेगु आयनाप प्रत्यक्ष रूपं स्वाना यकेमाःगुलि बः बियादीगु खः।

नेपाल पत्रकार महासङ्घं ‘नेपाल रिपब्लिक मिडिया लिमिटेड’या पिथना नागरिक दैनिक पत्रिकाय् ज्या यानाच्वंपिं श्रमजीवी पत्रकारतय्त सेवा सुविधा मदूगुलिं चिन्ता प्वंकादिसें तलबया सुनिश्चितता जुइमाःगुलिइ बः ब्यूगु दु।

महासङ्घया वरिष्ठ उपाध्यक्ष दीपक आचार्यलिसेंया टोलीं थौं नागरिक दैनिकया प्रबन्ध निर्देशक लिसें प्रमुख कार्यकारीया कार्यकक्षय् तालं ग्वयाः थत्थें पत्रकारतय्त दयेमाःगु सेवासुविधा उपलब्ध याकेगु सुनिश्चितता जुइमाःगुलिइ बः ब्यूगु खः।

तालं ग्वःगु छुं घौलिपा उगु पिथना गृहं नेपाल प्रहरी, स्थानीय तह व सम्बन्धित पक्ष तयाः ताः चायेकूगु खः। श्रमजीवी पत्रकार ऐनं क्वःछिनातःगु न्यूनतम पारिश्रमिक व सेवासुविधापाखें वञ्चित जुइमाःगु गुनासालिसेंया उजुरी वःगुलिं पत्रकारतय्गु पक्षय् दंगु महासङ्घं ध्वाथुइकूगु खः।

नेपाल पत्रकार महासङ्घ, नागरिक प्रतिष्ठान शाखाया नायः रघुनाथ लामिछानेया कथं ताःइलंनिसें क्वःछिनातःगुसेवा सुविधा कायेमखंगुलिं विरोध, धर्ना, प्रदर्शनलिसेंया ज्याझ्वःलिसें व्यवस्थापनया विरुद्धय् दनेमाःगु खः। वय्कलं संस्थां सरकारपाखें क्वःछिनातःगु न्यूनतम पारिश्रमिक मब्यूगु, कोभिड–१९ या बहानाय् थ्यंमथ्यं ४३ महिना तक ५० निसें ७५ प्रतिशत तक तलब पाः याःगु गुनासो यानादिल।रिपब्लिक मिडिया लिमिटेडया नायः शोभा ज्ञवालीं संस्थाय् थ्यंमथ्यं ३०० म्ह पत्रकार लिसें कर्मचारीत ज्या यानाच्वंगु जानकारी बियादिसें क्वःछिनातःगु भाला स्वयां नं विरोधया ज्याझ्वलय् छुं छुं पत्रकार लिसें कर्मचारी दुथ्याःगुलिं दुःख प्वंकुसें सम्बद्ध पक्षलिसे सहलह यानाः समस्या ज्यंकेत व्यवस्थापन तयार दूगु धयादिल।

वय्कलं देय्या मुक्कं अर्थतन्त्रय् खनेदूगु आर्थिक मन्दीया प्रभाव सञ्चार गृहय् नं लाःगु ध्वाथुइकादिसें स्रोत अभावं यानाः पारिश्रमिक बिइत छुं भतिचा लिबाःगु जूसां नं धात्थेंपिं लिसें पीडित श्रमजीवी पत्रकारनापं कर्मचारीतय्त नं न्याय दइ धयादिल।

राष्ट्रपति रामचन्द्र पौडेलया न्ह्यने थ्वहे माघ ११ गते जूगु राष्ट्रियसभा सदस्य निर्वाचनया प्रतिवेदन पेस जूगु दु।

राष्ट्रपति भवन शीतल निवासय् थौं ग्वसाः ग्वःगु ज्याझ्वलय् कार्यवाहक प्रमुख निर्वाचन आयुक्त रामप्रसाद भण्डारीं उगु प्रतिवेदन पेस यानादीगु खः।

उगु ज्याझ्वलय् आयोगया आयुक्तपिं सगुनशमशेर जबरा व डा जानकीकुमारी तुलाधर, सचिव कृष्णबहादुर राउत नाप उच्च पदाधिकारी पिनिगु उपस्थिति दूगु खः।

गुठी संस्थानं निर्वाचन आचारसंहिता अःखः श्री बौद्ध लिसें मेलम्ची घ्याङ गुठीया प्रमुख लामायात पदं चिइकूगु धकाः निर्वाचन आयोगय् उजुरी लाःगु दु।

संस्थानं निर्वाचन आचारसंहिता अःखः ज्या याःगु धकाः उजुरी दर्ता जूगुलिं थनिनिसें थ्व विषय छु जूगु खः धकाः माःगु छानबिन लिसें न्यनेकने प्रक्रिया न्ह्याकेगु आयोगया सहायक प्रवक्ता कुलबहादुर जिसीं धयादिल। आयोगं माघ माघ ४ गते चान्हय् १२ः०० ताः इलय् निसें निर्वाचन आचारसंहिता, २०८२ लागू याःगु खः।

आचारसंहिताया दफा ३या (ज) य् सरकारी, अर्धसरकारी लिसें सार्वजनिक संस्थाया ज्याकुथि व कर्मचारीयात नापं आचारसंहिता लागू जुइगु न्ह्यथनातःगु दु। संस्थानं माघ ९ गते श्री बौद्ध लिसें मेलम्ची घ्याङ गुठीया प्रमुख लामा भूपतिबज्र लामायात पदपाखें चिइकेगु निर्णय याःगु वय्कःया सचिवालयया हरिश गोले तामाङं धयादिल।

संस्थानं निर्वाचन आचारसंहिता लागू जूगु हे दिं माघ ४ गते हे प्रमुख लामा भूपतिबज्र लामालिसे स्पष्टीकरण न्यंगु खः।आचारसंहिता उल्लङ्घन याःगु धकाः आयोगय् लाःगु उजुरीया छानबिन यानाः आः थीथी राजनीतिक दल, उम्मेदवार, सार्वजनिक निकाय व संस्था यानाः आःतक आयोगं १५ गू स्पष्टीकरण न्यनेधुकूगु सहायक प्रवक्ता जिसीं धयादिल।