पवित्र तीर्थस्थल सिलुइ (गोसाइँकुण्ड) म्वःल्हुइगु झ्वलय् निम्ह तीर्थालुत बेपत्ता जूगु दु। जिल्ला प्रहरी प्रमुख हेमबहादुर शाहीया कथं मोरङ जिल्ला विराटनगरया नीच्यादँ दुम्ह सुजन ढकाल व मोरङ बेलवारीया मनोज न्यौपाने बेपत्ता जुयाच्वंगु खः।

तःजाःथासं म्वःल्हुइत कुण्डय् दुहांवंगुलिं दबे जूगु जुइपूm धयातःगु दु। बेपत्ता जूपिंत मालेत नेपाली सेनाया श्रीनाथ गण, नेपाल प्रहरी व सशस्त्र प्रहरी बलया अधिकृत लिसें जवानपिंत आइतबाः हे सिलु छ्वये धुंकूगु दु।

प्रधानमन्त्री केपी शर्मा ओलीं येँ–तराई÷मधेस द्रूतमार्ग सतक आयोजना अन्तर्गतया प्रवेश विन्दु खोना लागाय् खनेदया च्वंगु समस्या समाधानया निंतिं कुतः यानादीगु दु।

वय्कलं म्हिगः उगु विषय सम्बन्धित मन्त्रीलिसें उच्च अधिकारीनाप जानकारी कयाः समस्या ज्यंकेगु बारे सहलह ब्याकादीगु खः। प्रधानमन्त्री निवास, बालुवाटारय् जूगु सहलहय् उगु आयोजनाया आःया प्रवेश विन्दु दयेकातःगु यल महानगरपालिका–२१ खोनाया फुडोलय् खनेदूगु समस्या ज्यंकेया निंतिं आःतक जूगु अध्ययन व विकल्पया सुझाःबारे न्यनेकने यानादीगु दु। खोना लागाय् नेवाः तय्गु धार्मिक लिसें सांस्कृतिक सम्पदा दूगुलिं थुकियात सम्बोधन यायेगु विकल्प बारे सहलह जूगु दु।

सहलह लिपा प्रधानमन्त्री ओलीं समस्यायात ताःई तक अतः मतः क्यंकाः मतसें स्थानीयया मागयात सम्बोधन यानाः आयोजनायात फयांफक्व याकनं न्ह्याकेत निर्देशन बियादिल।

सहलहय् भौतिक यातायात लिसें पूर्वाधारमन्त्री देवेन्द्र दाहाल, रक्षामन्त्री मानवीर राई, प्रधानमन्त्रीया मू सल्लाहकार विष्णुप्रसाद रिमाल, आर्थिक विकास सल्लाहकार डा युवराज खतिवडा, प्रधानसेनापति अशोकराज सिग्देल, निगूलिं मन्त्रालयया सचिवतय्गु उपस्थिति दुगु खः।

इतुंबहालं तनाच्वंगु १५–१८ गु शताब्दीइ स्वपाः बहुमूल्य पौभा चित्र ४५ दँ लिपा उगु हे थासय् लिहावःगु दु।

उपप्रधानमन्त्री लिसे सहरी विकासमन्त्री प्रकाशमान सिंहं नेपाल राष्ट्रिय सङ्ग्रहालयया हलय् म्हिगः शनिवाः अमेरिकां लित हया उगु पौभा श्री भाष्करदेव संस्कारित केशचन्द्रकृत पारावत् महाविहार संरक्षण समाजया अध्यक्ष प्रज्ञारत्न शाक्ययात लःल्हागु दु।

श्री केशचन्द्र महाविहारया करिब ५५० दँ पुलागु चित्रकला ‘चिन्तामणि लोकेश्वर’, ‘केशचन्द आजु भैरव दर्शन यानाच्वंगु’ व ‘गगनसिं व वया निम्ह तिरिमय्जु’ या पौभा खः। उकिइ मध्ये गगनसिंया पौभा (१९१.८×१६१.९ सेमी)दलकय् तपागु खः। चिन्तामणि लोकेश्वरको आकार १६४.४×१४३.५ व केशचन्द आजु भैरव दर्शन यानाच्वंगु पौभाया आकार १६६.४ × १३९.६ सेमीया खः।२०३७ भदौ २९ गते उगु पौभा महाविहारपाखे तंगु खः।

उपप्रधानमन्त्री सिंहं जनमत सङ्ग्रह जुयाच्वंगु इलय् उगु पौभा तःगु खःसा तां ईलिपा न उगु हे थासय् थ्यःगुलि लसता प्वकादिल। वयकलं धयादीगु दु, “उगु बहुमूल्य पौभा लिहां वःगु देया निति हे लसताया खँ खः धका धयादीगु खः। आः थज्यागु अमूल्य सम्पदायात सुरक्षित तयेमाः व थुकियात सरकारं ग्वहालि याये।” धका धयादीगु खः।

समाजया अध्यक्ष प्रज्ञारत्न शाक्यंं इतुंबहाःया पौभा अमेरिकाया सिकागोय् प्रदर्शनीइ तयातःगु खँसिया उगु सम्पदा लित हयेफुगु धका धयादीगु खः।

अमेरिकाया कोलोराडोस्थित डेनभर अन्तर्राष्ट्रिय विमानस्थल शनिवाः छगः तगोगु दुर्घटना जुइगुलि बचे जुगु दु।

मिउामी वनाच्वंगु अमेरिकन एयरलाइन्सया बोइङ ७३७ म्याक्स ८ विमान ल्यान्डिङ गियर फेल जुया टेकअफ रोके जुगुलि विमानया लिपागु ब्बय् मिँ च्यागु खः।

स्थानीय ई कथं न्हिनय् २ः४५ बजे (नेपाली ई कथं चान्ह्य २ः३० बजे) या घटना खः। विमानय् १७३ यात्रु व ६ क्रु सदस्य खः।सकसित आपतकालीन स्लाइडपाखे बिमानं पित हःगु खः।

दुर्घटनाय् खुम्ह सामान्य घाःपाः जुगु खःसा छम्ह अस्पतालय् भर्ना याःगु दु। उगु घटनाया कारणं न्हिनय् २ बजेनिसे ३ बजेतक ८७ उडान प्रभावित जुगु खः।

नेपाल साहित्य मन्दिरया ग्वसालय् दँय दसं बियावया च्वंगु जरिमैंया साखः लुमन्ति सिरपा व कुमार साखः लुमन्ति हःपाः सिरपा शनिबार लःल्हाःगु दु।

नेपालभाषाया साहित्य ख्यलय् ज्वमदुगु योगदान बियावया च्वंम्ह छम्ह मिसा साहित्यकारयात बिइगु जरिमैंया साखः लुमन्ति सिरपा सुलोचना मानन्धरयात व मिजं साहित्यकारयात बिइगु कुमार साखः हःपाः सिरपा विजयरत्न असंबरेयात ब्यूगु दु।

शनिबार ख्वपया सिद्धिपोखरी पार्टी पालेसय् जूगु छगू ज्याझ्वलय् वयकःपिन्त नगद नाप हना पौ देछाःगु खः। उगु ज्याझ्वलय् नेपाल साहित्य मन्दिरया संस्थापक नांजाम्ह साहित्यकार तिलक प्रकाश कायस्थ मूपाहाँ कथं झायादीगु खः।

उगु ज्याझ्वलय् सिरपाया मू खँयाबारे ग्वसाः खलःपाखें सभानायः अगिब बनेपाली जानकारी बियादिगु खः।