मतपत्र छापे यायेगु ज्या लिपागु चरणय् थ्यंगु दु। निर्वाचन आयोगया कथं आः स्वनिगः लिक्कया जिल्लाया निर्वाचन लागाया मतपत्र छापे यायेगु ज्या ल्यंदनि। ख्वपय् च्वंगु जनक शिक्षा सामग्री केन्द्रय् मदिक्क हे मतपत्र छापे यायेगु ज्या जुयाच्वंगु खः।

आयोगया कथं, वइगु फागुन २१ गते जुइगु प्रतिनिधिसभा दुजः निर्वाचनया निंतिं ६३ गू जिल्लाया १३३ गू निर्वाचन लागाया मतपत्र छापे यायेगु पूवंगु खः।आःतक छगू क्वति ७१ लख ६३ द्वः मतपत्र छापे यायेगु पूवंगु आयोगया सहायक प्रवक्ता प्रकाश न्यौपानें जानकारी बियादिल।आःतक डोल्पा, मुगु, जुम्ला, कालिकोट, हुम्ला, जाजरकोट, दैलेख, रुकुम (पश्चिम ब्व), सल्यान, सुर्खेत, बाजुरा, अछाम, बझाङ, डोटी, डडेल्धुराया मतपत्र छापे यायेगु पूवंगु खः।

थथेहे, दार्चुला, बैतडी, कैलाली, कञ्चनपुर, पाँचथर, इलाम, तेह्रथुम, भोजपुर, ओखलढुङ्गा, सुनसरी, ताप्लेजुङ, सङ्खुवासभा, सोलुखुम्बु, खोटाङ, धनकुटा, बागलुङ, गुल्मी, झापा, गोरखा, म्याग्दी, पर्वत, बर्दघाट सुस्तापश्चिम (नवलपरासी), मोरङया मतपत्र छापे यायेगु पूवंगु खः। अथेहे, उदयपुर, मुस्ताङ, लमजुङ, तनहुँ, स्याङ्जा, बर्दिया, रुकुमपूर्व, दाङ, बाँके, नवलपरासी (बर्दघाट सुस्तापूर्व), पाल्पा, अर्घाखाँची, प्यूठान, रुपन्देही, रोल्पा, मनाङ, रामेछाप, सिन्धुली, रसुवा, सिन्धुपाल्चोक, कास्की, कपिलवस्तु, दोलखा, नुवाकोट व काभ्रेपलाञ्चोक यानाः ६३ गू जिल्लाया मतपत्र छापे यायेगु पूवंगु खः।

आः स्वनिगलं लिक्क लाःगु १४ गू जिल्लाया जक मतपत्र छापे याये ल्यंदनि। स्वन्हुं मतपत्र छापे यायेगु क्वचाइगु अनुमान यानातःगु सहायक प्रवक्ता न्यौपानें धयादिल। छापे यायेधुंकूगु जिल्लाया मतपत्र प्याकिङ जुइधुंकूगु खः। आःतक १५ द्वः व ३७१ गः बाकस मतपत्र प्याकिङ जुइ धुंकूगु खः। थौंकन्हय् छन्हुं थ्यंमथ्यं द्वःछिगः बाकस मतपत्र प्याकिङ व ११ निसें १५ लखतक मतपत्र छापे जुयाच्वंगु खः।वंगु पुस २२ गतेनिसें मतपत्र छापे यायेगु सुरु जूगु खः। न्हापांगु चरणय् १० लख ९८ द्वः २ सः पाः नमूना मतपत्र छापे यानाः थी थी जिल्लाय् छ्वयेधुंकूगु आयोगं धाःगु खः।

निगूगु चरणय् २ क्वति ८ लख ३० द्वः पाः मतपत्र छापे यायेगु क्वचायेकाः प्याकिङ लिसें रुजु नं यानाः ढुवानीया निंतिं तयारी याये धुंकूगु आयोगं धाःगु खः। प्रत्यक्षपाखेया निर्वाचनया निंतिं २ क्वति ३ लख २३ द्वः पाः मतपत्र छापे यायेमानिगु आयोगं धाःगु खः। अथेहे छापे यायेधुंकूगु मतपत्र थनिंनिसें आयोगं कर्णाली प्रदेशया १० गू जिल्लाया १२ गू निर्वाचन लागाय् छ्वयेगु सुरु याःगु खः।

कर्णाली प्रदेशया सल्यान, रुकुमपश्चिम, डोल्पा, मुगु, हुम्ला, कालिकोट, जुम्ला, जाजरकोट, दैलेख व सुर्खेत १० गू जिल्लाया १२ गू निर्वाचन लागाय् मतपत्रया ढुवानी यायेधुंकूगु सहायक प्रवक्ता न्यौपानें जानकारी बियादिल।

 नेवाः पत्रकार राष्ट्रिय दबूया नायः नृपेन्द्रलाल श्रेष्ठयात युगलकिशोर शुक्ला अन्तर्राष्ट्रिय मातृभाषा सिरपाः लःल्हाःगु दु।

भारतया न्हापांम्ह मातृभाषी पत्रकार युगलकिशोर शुक्लाया लुमन्तिइ सार्क जर्नलिष्ट फोरम इण्डिया च्याप्टरपाखें नीस्वनातःगु थुगु सिरपाः वय्कःलिसें भारतया शशिभुषण कुमार व श्रीलंकाया जानकायात लःल्हाःगु खः। थ्वयां न्ह्यः श्रीलंकाय् स्थापना जूगु सार्क फाउन्डेशनं लोकतन्त्र, मानव अधिकार व प्रेस नाप अभिव्यक्ति स्वतन्त्रताय् योगदान याःपिं नेपाः, भारत, बंगलादेश, व श्रीलंकाः थीथी व्यक्तितय्त साउथ एसियन हिरो एवार्ड सम्मान याःगु दु।

भारतया न्हूदिल्लीस्थित होटल क्राउन प्लाजाय् वंगु शुक्रवाः ग्वसा ग्वःगु विशेष ज्याझ्वःया दथुइ वय् कःपिंत सम्मान याःगु खः। थुकथं सम्मान जुयादीपिं सार्क पत्रकार मञ्चया अन्तर्राष्ट्रिय अध्यक्ष राजु लामा (नेपाल), महासचिव मोअब्दुर रहमान (बंगलादेश), दुजः स्मीता मिश्र (भारत) यात सम्मान याःगु खः । सम्मान लिपा संक्षिप्त प्रतिक्रिया बिसें सार्क पत्रकार मञ्चया अन्तर्राष्ट्रिय अध्यक्ष लामां थज्याःगु सम्मानं पत्रकारतय्त लोकतन्त्र, मानव अधिकार व प्रेस स्वतन्त्रताया पक्षय् वकालत यायेत तिबः बीगु खँ धयादिल। वय्कलंसार्क पत्रकार मञ्चं शान्ति, लोकतन्त्र व प्रेस स्वतन्त्रताया पक्षय् वकालत याना वयाच्वंगु खँ नं कनादीगु दु।

उकथं हे ज्याझ्वलय् सार्क पत्रकार मञ्च नेपाःया अध्यक्ष रुद्र सुवेदी, सार्क जर्नालिस्ट फोरम नेपाल च्याप्टरया कार्यावाहक अध्यक्ष नृपेन्द्रलाल श्रेष्ठ, अजमत अलि सिद्दिकी, भारतया अनुरुद्ध सुधान्शु, डा. शशीभुषण कुमार, श्रीलंकाया राहुल सामन्थ लगायत छगू दर्जन स्वयां अप्वः पत्रकारतय्त साउन एसिउन हिरो–२६ पाखे सम्मानित याःगु खः ।

सार्क फाउन्डेशनया अध्यक्ष डा.अमिला मोरेमाडां दक्षिण एसियाय् लोकतन्त्र, मानव अधिकार व प्रेस तथा अभिव्यक्ति स्वतन्त्रताया निंतिं योगदान याःपिं व्यक्तितय्त वइगु न्हिं नं थःगु संस्थां सम्मान यायेगु खँ धयादिल । वय्कलं थःगु संस्थां दक्षिण एसियाय् लोकतन्त्र, मानव अधिकार प्रेस तथा अभिव्यक्ति स्वतन्त्रताया निंतिं ज्या याना वयाच्वनागु खँ कनादिल ।

अख्तियार दुरूपयोग अनुसन्धान आयोगं नेपाल समाचारपत्रया सहायक सम्पादक नाप नेवाः पत्रकार राष्ट्रिय दबूया वरिष्ठ उपाध्यक्ष सुनील महर्जनयात सुशासन सिरपा लःल्हागु दु।

आयोगं ३५ क्वःगु स्थापना दिवसया लसताय् प्रहरी प्रधान कार्यालय नक्सालय् छगु ज्याझ्वः दथुइ उगु सिरपा लःल्हागु खः। उगु ज्याझ्वलय् उपराष्ट्रपति रामसहायप्रसाद यादवं महर्जनयात हनापौ नापं नगद राशि २५ हजार लःल्हागु खः। जवाफेदही प्रशासन, भ्रष्टाचार नियन्त्रण व सुशासनया पक्षय् पत्रकारिता याना वयाच्वंगुलि उगु सिरपाः लःल्हानागु खः धका प्रमुख आयुक्त प्रेमकुमार राई न धाःगु खः।

अख्तियारं महर्जन नापं सुशासन सिरपा उकालो डटकमया दिपा दाहाल, न्यूज नेपालया खिला ढकाल, गोर्खापत्र दैनिकया मुगु संवादाता हरिकृष्ण अ‍ैंडी व दिपेश घिमिरेयात लःल्हागु खः।

भ्रष्टाचार नियन्त्रण नाप सुशासनया पक्षय् च्वया च्वपिन्त उगु सिरपाः लःल्हागु खः। उगु ज्याझ्वलय् राष्ट्रपति रामचन्द्र पौडेल, प्रधानमन्त्री सुशीला कार्की, प्रधानन्यायाधीश प्रकाशमानसिंह राउत, राष्ट्रियसभाया अध्यक्ष नारायणप्रसाद दाहाल, नेपाल सरकारया मन्त्री, संवैधानिक आयोगया प्रमुख, उच्चपदस्थ कर्मचारी व सुरक्षा निकाया प्रमुखपिनिगु ब्बति दुगु खः।

आपालं सम्मान व सिरपा त्याकादीधुंकुम्ह  साहित्यकार गीतकार श्रीराम राईया ‘छैन क्यारे मेरो लागि दुख्ने मुटु पनि’ म्येया भिडियो ओसियन म्युजिक नेपाल युट्युब च्यानलय् सार्वजनिक यागु दु।

गीतकार राईया शब्द, ओमप्रकाश राईया संगीत अलृ पेमा शेर्पा राईया सः दुथ्याना च्वंगु दु। सन्तोष प्रगाढ राईया एरेञ्ज, वीरेन्द्र भाट ‘विपिन’या इडिटिङ व गोविन्द सोनीया मिक्सिङ–मास्टरिङय् तयार जूगु खः।गीतकार राईया म्ये शिला खनालं ‘मधुमासमै मिठो साथ छुटेपछि रोएँ’ हालादीगु खःसा मनमा बी राईं व नवराज पराजुलीं ‘सञ्चो छौ कि विसञ्चो’ या सलय् पिदने धुंकल।

खोटाङया दिक्तेल रुपाकोट मझुवागढी–७, सिर्जनाकुञ्ज, दोर्पा स्थायी बासिन्दा राई १० दँ शिक्षण पेशा याना येँ वःम्ह खः। साहित्य व पत्रकारिता सक्रिय राईया ‘टोली नेता’ (२०७४) व ‘पोलेको मकै’ (२०७८) बालकथासंग्रह पिदने धुंकल। साहित्यकार राईया संयोजन व विमल भौकाजीया सम्पादनय् मंका लघुकथासंग्रह ‘बलेँसी’  पिदंगु दु।

‘शैक्षिक पैरवी’ व ‘नलिनी’ पत्रिकाया समेत सम्पादन यानादीधुंकुम्ह राईयात नेपाली भाषा व साहित्य ख्यलय् यानादीगु योगदान स्वरूप इडन ब्रिज एकेडेमी बालपत्रकारिता सम्मान (२०७६), संसाक भवानी शङ्खर लघुकथा सम्मान (२०७७), विष्णुहेम अक्षरमार्ग बालसाहित्य सम्मान (२०७९), साहित्यिक पत्रकार संघया स्वर्ण महोत्सव सम्मान (२०८०) व गोधूलि साहित्य सम्मान (२०८२) लगायत थीथी सिरपा व सम्मान  पाखें सम्मानित याये धुंकुगु खँ थनथाय् लुमंके बहजू।

नयाँ दिल्ली। श्रीलंकाय् नीस्वंगु सार्क फाउन्डेशनं लोकतन्त्र, मानवअधिकार, प्रेस व अभिव्यक्ति स्वतन्त्रताया ख्यलय् योगदान यानादीपिं नेपाः, भारत, बंगलादेस व श्रीलंकाया थीथी व्यक्तित्वपिन्त साउथ एशियन हिरो एवार्ड– २०२६ देछाःसें हंगु दु । भारतया नयाँदिल्लीइ होटल क्राउन प्लाजाय् शुक्रबवाः सनिलय् जूगु ज्याझ्वलय् वयकःपिन्त हंगु खः । थुकथं हंपिं सार्क पत्रकार मञ्चया अन्तर्राष्ट्रिय अध्यक्ष राजु लामा (नेपाल), महासचिव मो.अब्दुर रहमान (बंगलादेस), सदस्य स्मीता मिश्र (भारत) खः । हना लिपा थःगु खँ तसें सार्क पत्रकार मञ्चया अन्तराष्ट्रिय अध्यक्ष लामां थुकथंया हनां पत्रकारपिन्त लोकतन्त्र, मानवअधिकार व प्रेस स्वतन्त्रताया नितिं ज्या यायेत हःपा बीगु कनादिल । वयकलं सार्क पत्रकार मञ्चं शान्ति, लोकतन्त्र व प्रेस स्वतन्त्रताया नितिं सः तयाः वयाच्वनागु खँ कनादिल । थुकथं हे सार्क पत्रकार मञ्च नेपालया रुद्र सुवेदी, सार्क जनलिस्ट फाेरम नेपाल च्याटरया कार्यबाहक नायः नृपेन्द्र लाल श्रेष्ठ, अजमत अलि सिद्दिकी, भारतया अनुरुद्ध सुधान्शु, डा शशीभुषण कुमार, श्रीलंकाया राहुल सामन्थनाप १२ म्ह मल्याक पत्रकारपिन्त साउथ एशिएन हिरो– २०२६ पाखें हंगु जुल ।

सार्क फाउन्डेशया नायः डा अमिला मोरेमाडां दक्षिण एशियाय् लोकतन्त्र, मानवअधिकार, प्रेस व अभिव्यक्ति स्वतन्त्रताया नितिं योगदान यानादीपिन्त वइगु दिनय् नं थःगु संस्थां हनीगु खँ न्ह्यथनादिल । वयकलं थःगु संस्थां दक्षिण एशियाय् लोकतन्त्र, मानवअधिकार, प्रेस व अभिव्यक्ति स्वतन्त्रताया रक्षाया नितिं ज्या यानाः वयाच्वनागु खँ नं कनादिल ।