प्रधानमन्त्री पुष्पकमल दाहालं युवा लिसे सामाजिक विकास विज्ञय् विश्वदीप पाण्डेयात नियुक्त याःगु दु।

वैशाख ६ गते च्वंगु मन्त्रिपरिषद् बैठकं पाण्डेयात सामाजिक विकास विज्ञ नियुक्त यागु धका प्रधानमन्त्री दाहालया प्रेस सल्लाहकार गोविन्द आचार्यं जानकारी बिःगु दु।

स्वास्थ्य नाप जनसङ्ख्या मन्त्रालयं कार्यालय इलय् थःगु कार्यकक्षमय् मन्त धासा चिकित्सक लिसे स्वास्थ्यकर्मीयात कारबाही यायेगु चेतावनी बिःगु दु। मन्त्रालयं शुक्रवाः छगु निर्देशन जारी यासे कार्यालय इलय् कार्यकक्षय् मन्त धासा चिकित्सक लिसे स्वास्थ्यकर्मीयात कारबाही यायेगु चेतावनी बिःगु खः।

अथेहे मन्त्रालयं दक्को प्रतिष्ठान, विभाग, अस्पताल व केन्द्रया चिकित्सक लिसे स्वास्थ्यकर्मीतय्त कार्यालय इलय् थःगु कार्यकक्षय् च्वना च्वनेत निर्देशन न बिःगु खः। सेवाग्राहीतयेस सेवा कायेगु इलय् कार्यालय मदइ खँ पिहावःगुलि मन्त्रालयं कार्यालय इलय् थःगु कार्यकक्षय् मदया च्वंगु अथे निर्देशन बिःगु खः।

पूर्वमुख्यसचिव तीर्थमान शाक्ययात राजकीय सम्मान कथं अन्त्येष्टि याःगु दु। वंगु बुधवाः ग्वार्कोस्थित बिएण्डबी अस्पतालय् मदुम्ह शाक्ययात बौद्ध धर्म परम्परा कथं म्हिगः शुक्रवाः न्हिनय् शंखमूलय् अन्त्येष्टि याःगु खः।

नेपाल कानुन समाजया अध्यक्ष तक जुयादीमह शाक्य क्यान्सरसम्बन्धी ल्वचं पीडित जुया च्वनादीम्ह खः। लोकसेवा आयोगया पूर्वअध्यक्ष शाक्य ८१ दँय् मदुगु खः। मदुम्ह शाक्यया निम्ह काय् व निम्ह म्ह्याय् दी।

उपप्रधान नाप स्वास्थ्य तथ जनसंख्यामन्त्री उपेन्द्र यादवं राष्ट्रिय ट्रमा सेन्टरया मेडिकल सुपरिटेन्डेन्ट (मेसु) य् ह्यूगु दु।

राष्ट्रिय ट्रमा सेन्टरया मेसु पद झीछगु तह जूसा बिहीवाः मन्त्रीस्तरीय निर्णयपाखे डा. प्रमोदकुमार यादवयात निमित्त मेसुया जिम्मेवारी बिःगु दु। डा. यादव झीगु तहया खः।

थ्व स्वया न्ह्यःया झीछगु तहया मेसु डा. बद्री रिजालयात धासा ट्रमा सेन्टरय् साविक बमोजिम हे पदय् ज्या यायेत जिम्मेवारी तोके याःगु खः।

थ्व हे वाःय् मन्त्री यादवं आयुर्वेद अस्पताल न्यतय् झीगु तहया रामदेव यादवयात निमित्त निर्देशकया जिम्मेवारी बिःगु खः।

प्रतिनिधि परिषद् बैठकय् २ हजार ४ सय ५४ म्हेसिया ब्बति काइगु जुगु दु धका नेकपा एमालें धाःगु दु।

पार्टी कार्यालय च्यासलय् पत्रकार सम्मेलन यासे एमाले परिषदया बैठक तयारी पूरा जूगु दु धका धाःगु दु। यलया सनराइज हलय् निन्हु तक न्ह्याइगु जुगु दु धका केन्द्रीय सदस्य नीरज आचार्य धाःगु खः।

पार्टीया अध्यक्ष केपी शर्मा ओलीं उलेज्या याइगु उगु बैठकय् २ हजार ७३ म्ह महाधिवेशन प्रतिनिधि, केन्द्रीय सदस्य व केन्द्रीय पदाधिकारीयाना २ हजार ४५४ म्हेसिया ब्बति काइगु जुगु दु धका धाःगु खः।

राष्ट्रिय महाधिवेशनपाखे निर्वाचित केन्द्रीय कमिटी व निकायया समग्र ज्याया समीक्षा नाप माःगु निर्देशन बिइगु निति परिषद् बैठकया ऐतिहासिक महत्त्व दु धका एमालें धाःगु दु।