लुँ तोलां थौं स्वसः थहावःगु दु। लुँ तोलां स्वसः थहावना थौं १ लाख ८ हजार ९ सय रुपैयाँ थ्यःगु दु धका नेपाल सुन चाँदी व्यवसायी महासङ्घं धाःग दु।

अथेहे वहः तोलां न्यातका कुहावःगु दु। वहः तोलाय् न्यातका कुहावया थौं १ हजार ३ सय ४० रुपैयाँ न कारोबार जूगु दु धका महासङ्घं धाःगु दु।

रत्नकीर्ति महाविहार अध्ययन मण्डल मखंबहाःया ग्वसालय् तिथि विवादया कारणं नखः हनेगुलिइ अलमल मजुइमा धइगु ल्याखं वंगु शनिवाः छगू ज्याझ्वः जुगु दु।

‘प्रज्ञा, ज्ञान प्राप्ति’ विषयय् उगु ज्याझ्वः जूगु खः । अध्ययन मण्डलंं हरेक लाया लिपांगु शनिवाः न्ह्याका वयाच्वंगु बैचारिक व सूचनामूलक गोष्ठि ज्याझ्वः कथं तःजिगु नखः मोहनि हनेगु खँय् अलमल मजुइमा धइगु ल्याखं उगु ज्याझ्वः याःगु खः। ज्याझ्वलय् उपप्राध्यापक मदनसेन वज्राचार्यं ‘चथाः मोहनि, स्वन्ति’ विषयय् केन्द्रीत जुयाः गोष्ठि पौ न्ह्यब्वयादीगु खः ।

उगु गोष्ठि पौ न्ह्यब्वयादिसें उपप्रा. वज्राचार्यं झीके दइगु राग, द्वेषया अन्त्य यायेगु निंतिं हे झीसं मोहनिया इलय् स्याक्वत्याक्व नखः हना वयाच्वनागु खः धयादिल । लिसें वय्कलं चन्द्रमा राग, द्वेषया प्रतीक जूगु व मोहनिया इलय् नःलास्वां पिनातःगु थासय् तइगु तु राग व पालु द्वेषया प्रतीक जूगु धासें थुकथं राग द्वेषया अन्त्य यानाः जीवन हनेत हे झीसं थ्व लिसे नखःत हना वयाच्वनागु खः धयादिल ।

मोहनिया इलय् झीसं छ्यला वयाच्वनागु थीथी वसजाःलिसें थीथी पुजा व उकिया महत्वया बारे कनादिसें वय्कलं राग, द्वेषया प्रतीकयात छेदन यायेकथं हे भुयुफसि नं पालेगु याना वयाच्वनागु खः धयादिल । थुकथं हे स्वन्तिया इलय् झीसं हनातयाम्ह लक्ष्मी द्यः, वयां कन्हय्कुन्हु म्हपुजा व अनंलि किजापुजाया महत्वयात विषयय् नं वय्कलं ध्वाथुइकादीगु खः ।

स्वन्तिया इलय् स्वन्हुयंकं जुइगु थीथी पुजाया थःथःगु महत्व दुगु नापं थुपिं स्वन्हुं दर्शनं जाःगु विषयय् नं वय्कलं कनादीगु खः । झीसं चथाः, मोहनि व स्वन्ति नखः हनेगु धइगु प्रज्ञा, ज्ञान प्राप्तिया निंतिं खः धासें थौंया इलय् नखःया महत्व मथुया वनाच्वंगु खँय् दुःख तायेकादिल । वय्कलं थौंकन्हय् नखः हनेगु धइगु हे साःसाःगु, भिंगु नसा ज्वलं नयेगुलिइ जक सीमित जुया वनाच्वंगु तर नखःया महत्वयात थुइकेगु कुतः मजूगु खँय् असन्तुष्टि प्वंकादिल । ज्याझ्वलय् नेपालभाषा केन्द्रीय विभागया उपप्रा. डा. वज्रमुनि वज्राचार्यं नेवाः संस्कृति व दर्शन विषयय् नुगःखँ तयादीगु खः ।

वय्कलं चित्तयात प्रज्ञामय यायेमाःगु खँय् बः बियादिसें राग, द्वेष, क्लेश दुम्ह मनुखं अप्वः दुःख फया च्वनेमाली धासें सुखी जीवन हनेया निंतिं राग, द्वेष, क्लेश, मोह त्याग याये फयेकेमाः धयादिल ।

अध्ययन मण्डलया जितेन्द्रविलास वज्राचार्यया सभाध्यक्षताय् जूगु उगु ज्याझ्वलय् रत्नकीर्ति महाविहार कार्य समितिया नायः विद्यामान विलास वज्राचार्यया उपस्थितिइ दुगु खःसा दुजः लजुना वज्राचार्यं लसकुस यानादीगु खः ।

हमासं याःगु आक्रमणं इजरायलया दक्षिण क्षेत्र सेदोत नेगेभं ३२ म्ह नेपाःमियात इजरायली सेनां उद्धार यानाः सुरक्षित थासय् यंकूगु दु। उमित राजधानी तेल अभिभपाखे यंकूगु खः।

सुदूरपश्चिम विश्वविद्यालयपाखें ‘लर्न एण्ड अर्न’ कार्यक्रम अन्तर्गत ४९ म्ह नेपाःमि इजरायल वंगु खः। उकी मध्ये झिम्ह हमासया आक्रमणय् लानाः सीगु खः। थ्वहे झ्वलय् सरकारं इजरायलय् ज्या यानाच्वंपिं नेपाःमि स्वदेश लिहां वये चाहे जुल धाःसा विमान चार्टर यानाः हयेगु प्रक्रिया न्ह्याकूगु दु।

म्हिगः च्वंगु मन्त्रिपरिषद् बैठकं अध्ययन लिसें मेगु ज्या यायेत इजरायलय् दुपिं नेपाःमि नेपाः वये चाहे जूसा नेपाल एयरलाइन्स व हिमालय एयरलाइन्सया विमान चार्टर यानाः नेपाः हयेगु व्यवस्था मिले यायेगु निर्णय याःगु खः। उकथं हे इजरालय् नेपाःमि विद्यार्थी स्याःगु घटनायात कयाः थौं देय्न्यंकं राष्ट्रिय शोक घोषणा याःगु दु।

थौं देय्न्यंकं सरकारी ज्याकू व विदेशस्थित कुटनीतिक नियोगय् राष्ट्रिय ध्वाँय् बछि क्वछुकेगु घोषणा याःगु खः । सरकारं आतंककारी हमलाय् लानाः सीपिनि छेँजःयात बिचाः हायेकुसें उमि छेँजःयात राहत कथं १० लाख तका बीगु निर्णय नं याःगु दु।

बंकरय् लानाच्वंपिं नेपाःमि विद्यार्थीतय्सं बंकर दुनें हे भिडियो दयेकाः थःपिंत फसे जुयाच्वना धासें सामाजिक सञ्जालय् पोष्ट यायेवं उमित मालेगु ज्या जूगु खः।

सेयर बजाः थौं न कुहावःगु दु। थौं सोमवाः शेयर बजाः नेप्सें १२.५८ अंकं घटे जूया बजाः १९०८.६६ विन्दुइ कुहावंगु दु। थुगु धयागु ०.६५ प्रतिशतं कुहावःगु खः ।

नेपाल राष्ट्र बैंकं मार्जिन प्रकृतिया धितो कर्जा १२ करोड रुपैयाँ स्वया अप्पो सीमा थकाया १५ करोड रुपैयाँ दयकूसा लगानीकर्ता तय्थ नियमपाखे उत्साहित जूगु धाःसा खनेमदु। थौं सोमवाः कुल २८७ धितोपत्रया ४८ हजार ४४४ कारोबारपाखे ४३ लाख २७ हजार १७९ कित्ता सेयर कारोबार जूगु दु।

थौं १ अर्ब १७ करोड १ लाख ७२ हजार ७२२ रुपैयाँ जक कारोबार जूगु खः। उत्पादन व प्रशोधन उपसूचक व व्यापार उपसूचक जक थहावःगु दु। मेगु दक्को उपसूचक धासा नेगेटिभ खने दुगु दु। दकलय् अप्पो निर्जीवन बीमा उपसूचक १ प्रतिशतं कुहावःगुु खः। सयपत्री हाइड्रोपावर दकलय् अप्पो (६.८८ प्रतिशत) न सेयर भाः थहावंगु दु।

थ्रीस्टार हाइड्रोपावर, हिमालयन पावर पार्टनर, इमर्जिङ नेपाल लिमिटेडसहितया धितोपत्र तक सेयर भाः थहावःगु खः। बाराही हाइड्रोपावर व हिमालयन लघुवित्तया लगानीकर्ता तय्सं यक्को कुहावःगु खः। प्रोगेसिभ फाइनान्स, सानिमा जीआईसी, पिपुल्स पावरनापं यक्को धितोपत्र तक सेयर भाः कुहावःगु दु।

प्रधानमन्त्री पुष्पकमल दाहाल प्रचण्डं इजलरायलय् च्वना च्वपि विद्यार्थीपिं नापं संवाद याःगु दु।

प्रधानमत्री प्रचण्डं सुदूरपश्चिम विश्वविद्यालयया विद्यार्थीत मध्ये छम्ह विपिन सुवेदीनापं भर्चुअल माध्यमपाखे संवाद याःगु दु। संवादया झ्वलय् वयकलं थः निरन्तर अपडेट कयाच्वपि व नेपालय् मन्त्रिपरिषद निसे सर्वदलीय बैठक सःतूगु खः।

विपिनं थःम्हेसिया याकन स्वया याकन हे उद्धार यायेत इनाप याःगु खः। लिसः बिइगु झ्वलय् प्रधानमन्त्री प्रचण्डं धाःगु दु, ‘जिमिसं दक्को तयारी यानाच्वनागु दुं।’