डा. अन्जान शाक्य राष्ट्रियसभा सदस्यय् मनोनीत जुगु दु। राष्ट्रपति रामचन्द्र पौडेलं शाक्ययात थौ बिहीवाः राष्ट्रियसभा सदस्यय् नियुक्त यागु खः।

राष्ट्रपति पौडेलं नेपाःया संविधानया धारा ८६ या उपधारा (२) या खण्ड (ख) बमोजिम नेपाल सरकारया सिफारिसय् शाक्ययात नियुक्त यागु दु धका राष्ट्रपति कार्यालयया प्रवक्ता शैलजा रेग्मी भट्टराई न जारी याःगु विज्ञप्तिइ उल्लेख याःगु दु।

शाक्ययात वंगु २०७९ चैत ३० गते च्वंगु मन्त्रिपरिषद् बैठकं मनोनयया लागि राष्ट्रपतियात सिफारिस यायेगु निर्णय याःगु खः।

सकारात्मक सोचया अभियानया न्ह्यलुवाः पर्यटन व्यवसायी कर्ण शाक्यं च्वयादीगु “सोच” नांयागु सफू पिहावःगु दु।

नेपालभाषां भाय् हिला बुधवाः राम नवमिया दिनय् पितब्वज्या जूगु खः। च्वमि शाक्यया बुदिंया लसताय् छगू ज्याझ्वः याना नेपालभाषां पिदंगु उगु “सोच“  सफूया प्रेमहिरा तुलाधरं नेपालभाषा अनुवाद यानादीगु खःसा नेवाः न्ह्यलुवा नेपालभाषा एकेडेमीया भाइस चान्सलर मल्ल के सुन्दर भुइजःसि पितब्बज्या यानादीगु खः।

दिव्यतारा तुलाधरं न्ह्याकादीगु उगु ज्याझ्वलय् नेवाः न्ह्यलुवा मल्ल के सुन्दर, फिल्म निर्देशक प्रकाश सायमि, भाय् हिलामि सह प्रा. प्रेमहिरा तुलाधर, श्री दिगुख्यः गुथिया नायः तारावीरसिंह तुलाधर व सोच सफूया च्वमि कर्ण शाक्यपिन्सं थःथःगु नुगः खँ प्वंकादीगु खः।

जनबहाः द्यःया रथजात्रा थौ असन सालां हनुमानध्वाकाय् थ्यकूगु दु। म्हिगः मंगलवाः तीनधारा पाठशालां सुरु याना असनय् थ्यकूगु खः।

अथेहे कन्ह्यः हनुमानध्वाकां रथ सालां लगनय् यकिइ।

युगकवि सिद्धिचरण प्रतिष्ठानं युगकवि सिद्धिचरण सिरपा २०८१ प्राध्यापक डाक्टर उषा ठाकुरयात लःल्हाइगु जुगु दु। अथेहे युगकवि सिद्धिचरण युवा पत्रकारिता सिरपा पत्रकार नवराज कार्कीयात लःल्हाइगु जुगु दु।

प्रतिष्ठानया अध्यक्ष वैरागी काइँलाया अध्यक्षताय् च्वंगु उगु बैठकं युगकवि सिद्धिचरण श्रेष्ठया ११३ क्वःगु जन्मजयन्तीया लसताय् वइगु जेठ ९ गते विशेष ज्याझ्वः दथुइ उगु सिरपा बिइगु जुगु दु।

प्रतिष्ठानं छगु विज्ञप्ति जारी यासे स्वंगु दशकनिसे युगकविया कृतित्व व व्यक्तित्वया बारेय् अध्ययन लिसे अनुसन्धान याना च्वंगुलि प्रा. डा. ठाकुरलयात युगकवि सिद्धिचरण सिरपा २०८१ बिइत्यःगु खः।

सरकारं डीआईजी उमेशराज जोशी व भिमप्रसाद ढकालयात एआईजीइ बढुवा सिफारिस याःगु दु।

गृह सचिव अध्यक्ष जुगु बढुवा सिफारिस समितिइ म्हिगः सोमवाः च्वंगु बैठकं निम्हेसित बढुवा सिफारिस याःगु खः।

जोशी आः राष्ट्रिय प्रहरी प्रशिक्षण प्रतिष्ठान महाराजगन्ज व ढकाल प्रहरी प्रधान कार्यालय प्रहरी महानिरीक्षकया सचिवालयय् च्वना च्वंगु दु।

अथेहे मन्त्रालयं डा. देउती गुरूङ व ईन्जिनियर नबिन्द्र अर्यालयात डीआईजीइ बढुवा सिफारिस याःगु खः। अर्याल साइबर ब्युरोय् ज्या यानाच्वंगु दु सा गुरुङ प्रहरी प्रधान कार्यालय केनाइन शाखाया प्रमुख खः।