नेपाल आयल निगमं पेट्रोलियम पर्दाथया भाः क्वःकाःगु दु। आइतवाः चान्ह्यः १२ बजेनिसे लागु जुइगु कथं निगमं पेट्रोल लिटरं झींछतका व डिजल लिटरय् न्यातका कुकाःगु दु।

भारतीय आयल कर्पोरेसन (आईओसी) पाखे घटे जूया न्हुगु भाः वयेवं भाः समायोजन यानागु धका निगमं धाःगु दु। न्हुगु भाः कथं आः स्वनिगलय् पेट्रोल लिटरं १७३ रुपैयाँय् कुहावःगु दु सा डिजल लिटरं १६८ रुपैयाँ जूगु दु।

नेपालभाषा केन्द्रीय विभागया ब्वमिपिनिगु ‘लुमन्ति दबू’या झिंछक्वःगु ज्यासना पुचःया पदस्थापन जूगु दु ।

न्हूगु ज्यासना पुचलय् नायः– रामेश्वर श्रेष्ठ ‘ह्याउँनिभाः’, न्वकू सकुन्तला महर्जन, छ्याञ्जे– पञ्चलाल महर्जन, दांभरी–संगीता महर्जन च्वनादीगु दुसा मू दुजलय् प्रकाश प्रधान, सुदिप महर्जन, हसना महर्जन, पुण्यकुमारी शाक्य, एलिना शाक्य, रमिना शाक्य व राजेन्द्रकुमार महर्जन च्वनादीगु दु । ज्याझ्वलय् शैक्षिक सत्र २०७६÷७७ दँया नेपालभाषा एम.ए. ब्वँमिपिंत बिदाइ नापं मोहनी, स्वन्ति व न्हूदँ ११४४ या लसताय् भिन्तुना कालबिल ज्याझ्वः नं जुल ।

ज्याझ्वलय् ब्वमि जेष्ठ नागरिक श्रीकृष्ण महर्जनपाखें सिन्हः तिकाः निवर्तमान नायः अनिल स्थापितपाखें कोखाबियाः न्हू ज्यासना पुचःयात लसकुस याःगु खःसा मूपाहां कथं झायादीम्ह नेपालभाषा केन्द्रीय विभागया प्रमुख सह प्राध्यापक डा. राजनलाल जोशीं शैक्षिक सत्र २०७६।७७ या ब्वमिपिंत लुमन्ति चिं लःल्हानादीगु खः ।

भिंतुना बीगु झ्वलय् वय्कलं लुमन्ति दबूपाखें निरन्तर रुपं ज्याझ्वः न्ह्याकाः वने फयेमा नापं भाषा साहित्य ख्यलय् नं सृजनशील जुयाः न्ह्याः वनेफयेमा धकाः मनंतुंसे थज्याःगु ज्याय् विभागं माःकथं ग्वाहालि यायेगु बचं नं बियादिल । लुमन्ति दबूया दांभरी संगिता महर्जनं लसकुस यानाः न्ह्याःगु ज्याझ्वलय् निगूगु सेमेष्टरपाखें देवानन्द महर्जन, प्यंगूगु सेमेष्टरपाखें श्रीकृष्ण महर्जन, एम.फिल.या ब्वमिपाखें दानदास श्रेष्ठं थःथःगु भिंतुना न्वचु तयादीगु खः ।

ज्याझ्वः ताःलाकेत ग्वाहाली यानादीपिं सकसितं दबूया न्वकू सकुन्तला महर्जनं सुभाय् देछाःगु खःसा ज्याझ्वः लुमन्ति दबूया छ्याञ्जे पञ्चलाल महर्जनं न्ह्याकादीगु खः ।

थौं अक्टोवर १५ तारिख असोज २८ गते आइतवाः ग्लोबल नेवाः सम्मेलन किपुलिइ जूगु दु। गैर आवसीय नेपाली संघया चुनाव जूवनाच्वंगु इलय् गैर आवसीय नेवाःतय्त छगू हे थासय् मुंकाः चुनावय् नेवाःत त्याकेगु आज्जु तया उगु कथं ग्लोबल नेवाः सम्मेलन याःगु खः ।

थुगु सम्मेलन किपूया ससः त्वालय् जूगु खः। येँय् जुइगु एनआरएन सम्मेलनय् ब्वति कायेत हलिन्यकं वयेत्यंपिं नेवाःतय्त छथाय् तयेगु कथं थथे सम्मेलन याःगु खः। उगु सम्मेलनाया मूपाहां पुलांम्ह रक्षामन्त्री भिमसेन प्रधान जुयादीगु खःसा अथे हे विशेष पाहां बागमती प्रदेशया सांसद हरिप्रभा खड्गी जुयादीगु खः।

उगु हे कथं थीथी मुलुकय् वनाच्वंपिं नेवाःत अले नेवाः देय् दबू स्वनिगः विशेष प्रदेशया नायः श्रीकृष्ण महर्जन नं पाहां कथं ब्वति कयादीगु खः । उगु ज्याझ्वलय् मूपाहां विशेष पाहांनिसें स्वनिगः विशेष प्रदेशया नायः श्रीकृष्ण महर्जन, अभियन्ता सुजिप बज्राचार्य लगायतपिन्सं भिंतुना न्वचू बियादिसें नेवाःत न्ह्यथाय् वंसां छप्पँ जुइमाःगु खँय् बः बियादीगु खः।

एनआरएन सम्मेलन अक्टोवर १७ निसें २० तारिखतक येँय् जुइत्यंगु खः । एनआरएन दुने मुक्कं भोट ४२२७ दुसा उकी निसः भोट नेवाःतय्गु दु ।

नेवाः देय् दबू स्वनिगः विशेष प्रदेशं आवंनिसे जेठ १८ गतेयात हाकूगु न्हि कथं महनिइगु जूगु दु । असोज २७ गते थौं तोखाय् च्वंगु स्वनिगः विशेष प्रदेशया मुँज्यां अथे निर्णय याःगु खः।

अथे हे बागमती प्रदेशसभाय् सर्वसम्मत कथं नेपालभाषा व तामाङ भाषायात प्रदेशया सरकारी कामकाजि भाषा कथं लागू यायेगु नितिं विधेयक पारित याःगु दिं असोज २२ गतेयात दँय् दसं नेपालभाषा लसता दिं कथं हनेगु धकाः नं निर्णय याःगु खः ।

स्थानीय सरकारय् स्थानीय भाषा कथं नेवाःतय्गु लागाय् नेपालभाषा लागू यानाच्वंगु अवस्था अले प्रदेशं तकं भाषा विधेयक पारित याःगुलि जेठ १८ यात हाकूगु न्हि कथं हनेगु आवश्यकता मदुगु महसूसयासें अज्यागु निर्णय याःगु खः । देय् दबू स्वनिगः विशेष प्रदेशया नायः श्रीकृष्ण महर्जनया नायःसुइ जूगु उगु मुँज्याय् मूछ्याञ्जे गणेशमान श्रेष्ठं आः तक देय् दबू स्वनिगः विशेष प्रदेशं याना वयाच्वंगु गतिविधि व दांभरी जीवनदेवी बज्राचार्यं आर्थिक ल्याःचाः न्ह्यब्वयादीगु खः ।

अथे हे नायः श्रीकृष्ण महर्जनं देय् दबू स्वनिगः विशेष प्रदेशपाखें आः यायेगु ज्या कथं बागमती प्रदेशसभां पारित याःगु भाषा विधेयकयात कार्यान्वयनया नितिं माःगु कथं पहल यायेगु, नेपालभाषायात सरकारी कामकाजि भाषाया रुपय् लागू यायेत अःपुकेगु नितिं नेपालभाषाया मानविकरणया नितिं माःगु भूमिका म्हितेगु, संघीय भाषा ऐन दयेकेगु नितिं व स्थानीय सरकारपाखें पालिकाया भाषा ऐन दयेके बिइगु नितिं माःगु कथं भूमिका म्हितेगु धकाः नं प्रस्ताव तयादीगुयात मुँज्यां पारित याःगु खः ।

उगु हे कथं स्वनिगःयंकं नेवाः वस्तीइ सांस्कृतिक संरक्षित क्षेत्र घोषणा याकेगु अभियान न्ह्याकेगु, स्वनिगःया थाय् बाय्या नापं पुलांगु हे प्राचिन नां तयेकेगु नितिं अभियान न्ह्याकेगु, संविधानया धारा ५६ या ५ य् दुगु स्वायत्त, संरक्षित व विशेष क्षेत्रया सवालय् तत्कालीन आयोगं पूमवंकूगु ज्यायात न्ह्याकेगु धकाः तकं भावि योजना तयार याःगु दु।

मनाङ एयरया ९एन–एएनजे कलसाइन हेलिकप्टर दुर्घटना जूगु दु। रुम्झाटारपाखे लोबुचे (सोलुखुम्बु) ब्बया च्वंगु हेलिकप्टर दुर्घटना जूया मनाङ एयरया निर्देशक राजु न्यौपाने न पुष्टि याःगु दु।

हाइ अल्टिच्युडय् लानाच्वंम्ह यात्रुयात हय्त थौं सुथय् ७ः१३ बजे ब्बःगु हेलिकप्टर दुर्घटना जूगु खः। उगु हेलिकप्टरय् पाइलट जक च्वना वःगु खः। पाइटल पिके सेढाइ सुरक्षित दु धका निर्देशक न्यौपाने न जानकारी बिःगु दु।