प्रधानमन्त्री पुष्पकमल दाहाल प्रचण्डयात नेपाल भ्रमणय् वयाच्वम्ह अमेरिकी सहायक विदेशमन्त्री डोनाल्ड लूयात नापलागु दु।

लूं प्रधानमन्त्री निवास बालुवाटारय् वना मदुम्ह सीता दाहालयात बिचाः हाय्कूगु दु। लूं सीता दाहालयात बिचाः हाय्कूसे किपातय् स्वामां देछागूगु खः।

नेपाल भ्रमणय् वयाच्वंम्ह अमेरिकी सहायक विदेशमन्त्री डोनाल्ड लू न नेकपा एमाले अध्यक्ष केपी शर्मा ओलीयात नापलागू दु। एमाले पार्टी मुख्यालय, च्यासलय् लू न एमाले अध्यक्ष केपी शर्मा ओलीयात नापलागू खः।

नापलायेगु झ्वलय् नेपाःया संसदं एमसीसी पास यागुलि सुभाय् बिःगु खः । नाप वयकलं एमसीसीयात याकन न्ह्यने यकिइगु व उगु झ्वलय् सिनियर अधिकारीपि नेपालय् वइगु जानकारी बिःगु दु धका एमाले प्रचार विभाग प्रमुख राजन भट्टराई न जानकारी बिःगु दु।

येँ महानगरपालिकाया नीति कार्यक्रम व बजेट सर्वसम्मतं पास जूगु दु। महानगरपालिकाया मेयर बालेन्द्र साह (बालेन) न नगर सभा वैठकय् निर्णयार्थ पेश यागुलि बजेट व नीति कार्यक्रम संशोधन यासे पास याःगु दु।

महानगरया १३ क्वःगु नगर सभाया न्हापागु बैठक असार ६ गते च्वःगु खः।असार १० गते नगर सभा बैठकय् उपप्रमुख सुनिता डंगोलं, आर्थिक वर्ष २०८०÷०८१ या लागि बजेट व विनियोजन विधेयक पेश याःगु खः।

महानगरपालिकां २५ अर्ब ५४ करोड ७८ लाख २० हजार रुपैयाँया बजेट हःगु खः। उकि मध्ये चालुपाखे ८ अर्ब ६१ करोड ५३ लाख २८ हजार रुपैयाँ व पुँजीगतपाख १६ अर्ब ९३ करोड २४ लाख ९२ हजार रुपैयाँ विनियोजन याःगु खः।

असार २१ गते बजेट पास यायेत सःतूगु वैठकय् नेपाली काँग्रेसपाखे निर्वाचित जनप्रतिनिधिपि नाप माक्वः सहलह मजूगु धासे ले पर्याप्त छलफल व यकति कथं बजेट विनियोजन याःगु धासे विरोध यायेवं २६ गते तक या लागि स्थगित याःगु खः।

बजेटय् वडाध्यक्ष व नगर सभा सदस्यपिन्स तःगु संशोधन यासे पारित याःगु खः।

बुद्ध एयर झापाया चन्द्रगढी ब्बयेमाःगु जहाज प्राविधिक समस्याया कारण त्रिभुवन अन्तर्राष्ट्रिय विमानस्थलय् हे लिहावया अवतरण याःगु दु।

त्रिभुवन विमानस्थल कार्यालयया कथं बुद्धया ९५५ उडान नम्बरया जहाज इण्डिकेसनय् समस्या वयेवं हे येँ लिहावःगु खः।

अमेरिकी सहायक विदशेमन्त्री डोनाल्ड लू येँ थ्यकं वःगु दु । विदेश मन्त्रालयया मध्य नाप दक्षिण एसिया सम्बन्धी मामला स्वइम्ह लू दक्षिण एसियाली देशय् भ्रमण यायेगु झ्वलय् थौं येँ थ्यकंवःगु खः।

थौं हे परराष्ट्रमन्त्री एनपी साउद नापलायेगु ज्याझ्वः दु। वया लिपा अमेरिकन चेम्बर अफ कमर्सया छगू दुजः संस्था नापलायेगु ज्याझ्वः दु।