बागमती प्रदेशय् नेपालभाषा व तामाङ भाषायात प्रदेशया सरकारी कामकाजि भाषाया रुपय् लागू यायेगु नितिं थःम्हं माःगु कथं फुक्क ज्या यायेगु जुइ धकाः बागमती प्रदेशया संस्कृति पर्यटन लिसे सहकारी मन्त्री शैलेन्द्रमान बज्राचार्यं धयादीगु दु ।

थौं विहिवाः नेवाः देय् दबू स्वनिगः विशेष प्रदेशपाखें वय्कःयात भिंतुना देछायेगु निति व भाषा ऐन लागू यायेगुबारे जूगु सहलह ज्याझ्वलय् मन्त्री बज्राचार्यं अथे धयादीगु खः। वय्कलं नेपालभाषा व तामाङ भाषायात सरकारी कामकाजि भाषा ऐन कथं लागू यायेगु नितिं हे थः मन्त्री जुयागु खः धकाः तकं धयादिगु खः।

उगु सहलह मुँज्याय् बागमती प्रदेशया राष्ट्रभाषा ऐन निर्माणया नितिं ज्वःमदुगु योगदान यानादीम्ह निर्वतमान प्रदेशया मन्त्री पुकार महर्जनं थुगु ऐन लागू यायेगु नितिं लिबाके मज्यूगु खँ कनादिसें म्हिगःया दिनय् थःम्हं उगु मन्त्रालयया नेतृत्वया ज्या यानागुया अनुभावयात कया कनादीगु खः। अथे हे भाषा आयोगया पुलांम्ह दुजः नापं प्रदेशं भाषा ऐन दयेकेगु नितिं निर्माण याःगु कार्यदलय् च्वना ज्या यानादीम्ह भाषाविद् अमृत योञ्जनं प्रदेशय् भाषा लागू यायेगु नितिं आः याकनं हे विज्ञ समुह गठन याना न्ह्याः वनेमाःगु खँय् बः बियादिल।

अथे हे कार्यदलया दुजः जुया ज्या यानादीम्ह प्रा. डा. ओमकारेश्वर श्रेष्ठं नं विज्ञ समुह गठन याना हे न्ह्याः वनेमाःगु खँय् बः बियादीगु खः। अथे हे नेवाः देय् दबू स्वनिगः विशेष प्रदेशया नायः श्रीकृष्ण महर्जनं भाषा ऐन हयेगु नितिं म्हिगः गुगु कथं भूमिका म्हितागु खः थौं लागू यायेगु नितिं नं उगु हे कथं भूमिका म्हिता ग्वहालि यायेत तयार दु धकाः धयादीगु खः।

सहलह ज्याझ्वलय् देय् दबू स्वनिगः विशेष प्रदेशया बरिष्ठ न्वकू नविन थेच्वमि, छ्याञ्जे गंगादेवी महर्जन, सचिवालय् दुजः अधिवक्ता नरेश श्रेष्ठ, भाषिक अभियन्ता अनुपसिंह सुवालं नं भाषा ऐन लागू यायेमाःगु खँय् बः बियादिसें थःगु बिचाः प्वंकादीगु खः।

शेयर बजाः थौ न निगु ल्याखं कुहावःगु दु। म्हिगः थहावंगु शेयर बजाः परिसूचक नेप्से थौ १० दशमलव ७१ अङ्कं कुहावया २ हजार २५ दशमलव ३० विन्दुइ थ्यःगु दु।

थौ उत्पादन व व्यापारबाहेक दक्को समूहया शेयर कुहावःगुलि बीमा, होटल, फाइनान्स, विकास बैंक, माइक्रोफाइनान्स समूहया शेयर थहावःगु दु।

सिङ्गटी हाइड्रो इनर्जी कम्पनीया शेयर १० प्रतिशतं कुहावःगु दु सा मान्डु हाइड्रोपावर कम्पनीया शेयर दकलय् अप्पो साढे ९ प्रतिशत स्वया अप्पो थहावःगु दु। बजाः कुहावःगु दिं ३ सय ८ गु कम्पनीया ८६ लाख ९६ हजार कित्ता शेयर ३ अर्ब ४८ करोड रुपैयाँ न कारोबार जूगु दु।

थौ दकलय् अप्पो हिमालयन रिइन्सुरेन्स कम्पनीया १२ करोड ५४ लाख रुपैयाँया शेयर कारोवार जुगु दु।

लुँया भाः थौ तोलां न्यासः थहावना हाकनं न्हुगु रेकर्ड कायम जूगु दु। लुँ तोला न्यासः थहावना थौ १ लाख ३६ हजार ८ सय थ्यंगु दु धका नेपाल सुनचाँदी व्यवसायी महासङं धाःगु दु।

अथेहे वहः तोलां न झिन्यातका थहावःगु दु। वहः तोलां झिन्यातका थहावना १ हजार ७ सय न कारोबार जुगु दु धका महासङ्घं धागु दु।

राष्ट्रिय सभा उपाध्यक्ष बिमला घिमिरें पद व गोपनीयताया शपथ काःगु दु।

राष्ट्रिय सभाय् थौ बुधवाः जूगु निर्वाचनय् सत्ता गठबन्धनया उम्मेदवार घिमिरे निर्वाचित जूगु खः। वया लिपा हे राष्ट्रपति कार्यालय, शीतल निवासय् जूगु छगु ज्याझ्वः दथुइ नकतिनि निर्वाचित जुयादीम्ह उपाध्यक्ष घिमिरें राष्ट्रिय सभा अध्यक्ष नारायण दाहालपाखे पद व गोपनीयताया शपथ कयादीगु खः।

शपथ ग्रहण ज्याझ्वलय् उपराष्ट्रपति रामसहायप्रसाद यादव, सभामुख देवराज घिमिरेपिनिगु न ब्बति दुगु खः।

राष्ट्रिय सभाया उपाध्यक्षय् नेकपा एमालेया विमला घिमिरे निर्वाचित जूगु दु।

प्रमुख प्रतिपक्षी दल नेपाली कांग्रेसया विष्णुदेवी पुडासैनीयात बूका राष्ट्रिय सभा उपाध्यक्षय् निर्वाचित जूगु खः। उगु बैठकय् ५५म्ह सदस्यपिनिगु ब्बति दुगुलि घिमिरेया पक्षय् ३९ मत वःगु खः।

पुडासैनीया पक्षय् १६ व विपक्षय् ३९ मत वःगु खः। थ्व स्वया न्ह्यः नेकपा माओवादी केन्द्रया राष्ट्रिय सभा उपाध्यक्ष जूयादीम्ह उर्मिला अर्यालं वंगु चैत १५ गते राजीनामा बिउगुलि उगु पद खालि जुगु खः।