सरकारं थौं साउन १ गतेनिसे दक्को सशुल्क प्रसारण जुइगु विदेशी च्यानल बन्द याइगु जुगु दु।

‘आला कार्ट’ शुल्क प्रणालीया लागि सरकारं फ्वंगु कथं वितरकपिन्स च्यानलया प्याकेज उपलब्ध मयागुलि सशुल्क प्रसारण जूइगु विदेशी च्यानल बन्द जूगु धका सञ्चार नाप सूचना प्रविधि मन्त्रालय अन्तर्गतया सूचना लिसे प्रशारण विभागं धाःगु दु।

भारतीय सःशुल्क (पे) टीभी च्यानल प्रसारक संस्थापिन्स नेपाःया ‘आला कार्ट’ प्रणाली लागू यायेत ग्वाहालि मयायेगु धका धायेवं विभागया सम्बद्ध सकसित सरकारी निर्णययात ग्वाहालि यायेत इनाप याःगु दु। भारतीय च्यानलपिनिगु कुसा संगठन इण्डियन ब्रोडकास्टिङ एण्ड डिजिटल फाउन्डेसनं सूचना लिसे प्रसारण विभागयात पौ छ्वया च्यानलया भाः क्वछिइगु व बिस्क बिस्क च्यानलया बिस्कं बिस्कं भाः क्वछिइगु खँ माने जुइ फइमखु धका जानकारी बिःगु दु।

थुगु खँयात कया सरकारं विदेशी च्यानलया प्रसारण रोके यायेगु अवस्था वःगु दु धका जानकारी बिःगु खः। सोनी, जी, डिस्कभरी, स्टार, कलर्स, एचबीओ, लगायतया विदेशी च्यानलया प्याकेज बिइत उकिया भाः प्रस्ताव मयाःगु खः।

थज्यागु च्यानलया लागि नेपालय् क्वछिनातःपि प्रतिनिधिपिन्स थज्यागु च्यानलया प्याकेज थनया टेलिभिजन सेवा वितरकपिन्स मिइगु यानाच्वंगु खः। तर, उमिसं सरकारं मागयागु कथं भाः बिइत तयार मजूगुलि सरकारं दक्को सशुल्क विदेशी च्यानल रोके यायेगुलि थ्यःगु खः ।

टेलिभिजन दर्शकपिन्स आः आधारभूत प्याकेजया लागि २५० रुपैयाँ महिनाय् पुलेमाः। सशुल्क च्यानलतक थपे याना न्यासः तका लच्छिया पुलावया च्वंगु खः।

साउनया सोमवाःया दिं पशुपतिइ महाद्यःया थाय् ७ हजार ५०० रुपैयाँ स्वया कमया विशेष पूजा मयाकिइगु जूगु दु धका पशुपति क्षेत्र विकास कोषं धाःगु दु।

कोषया कथं वासुकीनाथ द्यःया थाय् ३ हजार १०० रुपैयाँ स्वया कमया विशेष पूजा मयाकिइगु जूगु दु।

पशुपति द्यःया थाय् साउनया सोमवाःया दिं १८१ निसे २५१ म्हेसित जक विशेष पूजा यायेगु व्यवस्था मिले याःगु दु धका कोषया संस्कृति संरक्षण महाशाखा प्रमुखं धाःगु दु।

नुवाकोटया ककनी व धादिङया धुनीबेंसीइ च्वपिन्स येँ न हइगु फोहोर वान्छेयेगुलि रोके याःगु दु।

थ्व स्वया न्ह्यः सरकार व येँ महानगरनाप जूगु सहमति दँच्छि दये धुकुगुसा कार्यान्वयन मजूगु धका स्थानीयपिन्स फोहोर वान्छ्यत रोके याःगु दु ।

थौं सुथय् फोहोर ज्वना वःगु ल्याण्डफिल्ड साइटय् वनाच्वंगु गाडी स्थानीयपिन्स अवरोध यःगु कारण बन्चरेडाँडा व सिसडोलया दथुइ रोके याःगु खः।

फोहोर ज्वना वःगु ५० गः गाडी स्थानीयपिन्स रोके याःगु धका येँ महानगरपालिकाया ल्याण्डफिल्ड साइट इन्चार्ज सरकारदीप श्रेष्ठं जानकारी बिःगु दु।

स्थानीयपिन्स सहमतिया नामय् थःपिन्त पटक–पटक ध्वं लाःगु धका द्धपः बिगु दु।

बालमैत्री शिक्षा नेपालं मस्तय्त सांस्कृतिक नापा ऐतिहासिक सय्केगु निति विश्व सम्पदा धलखय् लानाच्वंगु हनुमानध्वाकाय् च्वंगु संग्राहलय दुने थीथी दुने भण्डारखाल, गद्दि बैठक, कोटपर्व जूगु थाय्, बसन्तपुरय् कुमारी द्यः लिसे जुद्ध बारुण यन्त्र बिपद सम्बन्धी जानकारी बिइगु निति सचेतना भ्रमणया ज्याझ्वः जूगु दु।

उगु ज्याझ्वःया निति हनुमानध्वाका दरबार हेरचाह अड्डां सहजिकरण याःगु खःसा सहकार्य शार्दुल जङ्ग गुल्मया सेनानी गुल्मपती पुर्ण प्रजापती यानादीगु खः।

अथेहे, दमकल समन्वय प्रकाश पण्डित व कुमारी छेँय् समन्वय गौतम शाक्य यानादीगु खः ।

नेवाः देय् दबूया थःगु हे छेँया जग स्वनेज्या जुगु दुगु दु । येँ महानगरपालिका १५ वडा चःमतिइ जग स्वने ज्या जूगु दु ।

लुम्बिनी विश्व–विद्यालयया पुलांम्ह कुलपति प्रा.डा. नरेशमान वज्राचार्यं मूल पुजारी जुयाः पूजा यानादीगु खः। ज्याझ्वलय् नुँगः तयेगु झ्वलय् देय् दबूया नायः पवित्र वज्राचार्यं नेवाःतय्गु राष्ट्रिय संस्थाया थःगु हे छेँ नेवाः भूमिइ हे दनेत्यंगु लसताया खँ खः धासें थ्व छेँ धस्वाकेगु लागिं ग्वाहालि यानादीत सकसितं इनाप यानादिल ।

उगु ज्याझ्वलय् नेपालभाषा मंकाः खलःया नायः जनकवि दुर्गालाल श्रेष्ठ, देय् दबूया संरक्षक मल्ल के. सुन्दर, समाजसेवी पञ्चवीरसिंह तुलाधर, पुलांम्ह उपप्रधानमन्त्री प्रकाशमान सिंह, पुलांम्ह मन्त्री राजेन्द्र श्रेष्ठ, जीवनराम श्रेष्ठ, पुलांम्ह मेयर विद्यासुन्दर शाक्य, बागमती प्रदेशया सांसद शैलेन्द्र वज्राचार्य, येँ मनपाया उपमेयर सुनिता डंगोल, पुलांम्ह उपमेयर हरिप्रभा खड्गी श्रेष्ठ लिसें येँ मनपाया थीथी वडाया वडा अध्यक्षपिं, देय् दबूया पदाधिकारीपिं लगायत भाषा ख्यःया आपालं न्ह्यलुवा व कार्यकर्तापिनि तःधंगु उपस्थिति दुगु खः ।