नेपालभाषा एकेदेमि व येँ महानगरपालिकाया ग्वसालय् जूगु नेवाः सांस्कृतिक ज्ञानकोष तयारीया प्रगति विवरण न्ह्यब्वयेगु निंतिं जूगु सहलह ज्याझ्वलय् न्ववानादीसे येँ महानगरपालिकाया उपमेयर सुनिता डंगोलं नेपालभाषा एकेदेमिं तयार याना वयाच्वंगु नेवाः सांस्कृतिक ज्ञानकोषयात डिजिटलाइजेशन यायेगु निंतिं महानगरपालिका ग्वाहालि यायेत तयार दुगु खँ धयादीगु दु ।

उपमेयर डंगोलं नेवाः संस्कृति, नेवाः सभ्यता, नेवाः बारे न्हू पुस्तां छुं हे मसिया वनेधुंकूगुलिं थुकियात डिजिटलाइजेशन याये हथाय् जुइधुंकूगु खँ धासें नेवाः सांस्कृतिक ज्ञानकोषयात थीथी भासं अनुवाद यानाः डिजिटलाइजेशन यायेगु निंतिं येँ महानगरपालिकां माःगु ग्वाहालि जुइगु बचं बियादिल ।

ज्याझ्वलय् येँ महानगरपालिकाया ग्वाहालि दयेकाच्वंगु ज्ञानकोष प्रगति विवरण न्ह्यब्वसें नेपालभाषा एकेदेमिया भाइस चान्सलर व परियोजना संयोजक मल्ल के सुन्दरं नेवाः अमूर्त सांस्कृतिक सम्पदा; नेवाः नाट्य, संगीत व चलचित्रमूर्त; सांस्कृतिक सम्पदा भाषा, साहित्य, खँग्वःधुकू, ब्याकरण, लिपि; शिल्प व ज्ञान; नेवाः म्हसीका, आन्दोलन व नगरीय सभ्यता यानाः न्यागू थीथी विषयय् स्वद्व पृष्ठया सफू पिथनीगु जानकारी बियादिल । थ्व झ्वलय् वय्कलं थ्व ज्ञानकोष झिद्वः खँग्वःया विस्तृत विवरण दइगु व न्याद्वः किपा दइगु नं जानकारी बियादिल ।

ज्ञानकोषया निंतिं आःतक न्हय्द्वलं मल्याक खँग्वः संकलन जुयाः विवरण च्वयेसिधःगु जानकारी नं बिउगु खः ।

ज्याझ्वलय् न्ववानादिसें भाजु मल्लं आःतक नेपाल सरकारं करोडौं दां बियाः न्ह्याकातःगु नेपाल प्रज्ञाप्रतिष्ठानं तकं ज्ञानकोष दयेकेगु आँट यायेमफुनिगु अवस्थाय् नेवाःतय्सं आँट यानाः थ्व ज्या न्ह्याकूगु दु धासें थ्व ज्ञानकोषं भावी पुस्तायात नेवाः सभ्यता, नेवाः तजिलजि, नेवाः साहित्य, थनया नगर, जात्रापर्वबारे पूवंक जानकारी कायेफइगु खँ धयादिल । ज्ञानकोषयात अझ वृहद् रुपं न्यंकायंकेगु निंतिं थुकिया अनुवाद यायेमाःगु, डिजिटलाइजेशन यायेमाःगु प्रस्ताव वय्कलं तयादीगु खः ।

ज्याझ्वलय् परियोजना व्यवस्थापक अनिल स्थापितं परियोजना गुकथं न्ह्यानाच्वंगु धयागु बारे जानकारी बियादीगु खः । येँ महानगरपालिका सम्पदा विभागया प्रमुख अर्चना शाक्यं लसकुस यानाः न्ह्याःगु ज्याझ्वलय् येँ महानगरपालिकाया प्रवक्ता नवीन मानन्धरं गुलि फु उलि याकनं ज्ञानकोष तयार यायेमाःगु खँय् बः बियादिसें थुकियात अडियो भिडियोसहित डिजिटलाइज यायेगु निंतिं येँ महानगरपालिकाया वइगु बजेटय् हे थ्व परियोजनायात दुथ्याकेफइगु खँ धयादीगु खः ।

बाँकेया नेपालगन्जय् बिहीवाः चिइकूगु कर्फ्यु थौंनिसे हाकनं तःगु दु। हिन्दू मुस्लिम समुदाय दथुइ विवाद समाधान मजुगु हाकनं विवाद जुइवं हाकनं कर्फ्यु तयेमाःगु धका स्थानीय प्रशासनं धाःगु दु।

शुक्रवाः सुथय् हे जिल्ला प्रशासन कार्यालय बाँके न छगू सूचं जारी यासे कर्फ्यु तयागु जानकारी बिःगु दु।

प्रधानमन्त्री पुष्पकमल दाहाल प्रचण्ड थौं भुखाय् ब्बया प्रभावित जूगु बझाङ जिल्ला वनिइगु जूगु दु।

वयकः थौं सुथय् साढे १० बजे लिपा नेपाली सेनाया हेलिकप्टरं बझाङ वनिइगु ज्याझ्वः दु।

वयकलं भुखाय् ब्बया क्षति जूगु थासय् अवलोकन यायेगु व जिल्ला विपद व्यवस्थापन समितिनाप अन्तक्ररिया यायेगु ज्याझ्वः तयातःगु दु।

अधिवेशन थौंनिसे येँ न्ह्याइगु जुगु दु। एमाले याःगु यक्को थासय् भौगोलिक प्रदेश कमिटीया अधिवेशन क्वचाय् धुकुगु दु सा पूर्वनिर्धारित तालिका कथं गैह्रभौगोलिक व बुद्धिजीवी–कर्मचारी क्षेत्रया सदस्य आबद्ध प्रदेश कमिटीया अधिवेशन जुइ त्यःगु खः।

अधिवेशनया तयारी पूरा जुइ धुकुगु दु व अधिवेशनया एमाले अध्यक्ष नाप पूर्वप्रधानमन्त्री केपी शर्मा ओलीं राष्ट्रिय सभागृहय् उलेज्या याइगु ज्याझ्वः दु।

कुल ३०४ प्रतिनिधि दुगु उगु अधिवेशनय् ७५ म्ह सदस्यीय न्हुगु नेतृत्व ल्यइगु ज्याझ्वः दु। थुगु प्रदेश कमिटी मातहत बुद्धिजीवी विशेष, मजदुर, विद्यार्थी व उद्योग–व्यावसय याना प्यंगु जिल्ला कमिटी व ५८ इलाका कमिटी दु।

बाग्मती प्रदेशया संस्कृति, पर्यटन लिसे सहकारीमन्त्री पुकार महर्जनं प्रदेशय् नेपालभाषा व तामाङ भाषायात सरकारी कामकाजि भाषाया कथं लागू यायेगु नितिं दयेकूगु राष्ट्रभाषा सम्वन्धि विधेयक संसदय् प्रस्तुत यानादीगु २४ घण्टाया दुने हे प्रदेशया राजधानी हेटौंडाय् वना नेवाः व तामाङतसें प्रदेश सांसद व मन्त्रीतलिसे सहलह यानादीगु दु ।

नेवाः देय् दबू स्वनिगः विशेष प्रदेश, नेपाल तामाङ घेदुङ बाग्मती प्रदेश, देय् दबू बागमती प्रदेश व राष्ट्रिय आदिवासी जनजाति महिला मञ्चया मंकाः ग्वसलाय् मंगलवाः असोज १६ गते ग्वसाः ग्वःगु खः । ज्याझ्वलय् संस्कृति पर्यटन लिसे सहकारी मन्त्री महर्जनं संसदय् प्रस्तूत जूगु विधेयकय् दुगु खँ नापं आः तकया दुने यानागु ज्याया बारे जानकारी बियादीगु खः ।

उगु ज्याझ्वलय् ब्वति कयादीपिं बागमती प्रदेशया मन्त्रीपिं उद्योग भूमि प्रशासन मन्त्री रामकृष्ण चित्रकार, अर्थमन्त्री बहादुर सिंह तामाङ, खानेपानी सिचाई उर्जा मन्त्री तिर्थ लामा, सामाजि विकास मन्त्री कुमारी मोक्तान, वन लिसे वातावरण मन्त्री मसिना खत्री व पुलांम्ह उपसभामुख राधिका तामाङं भाषा सम्वन्धी उगु विधेयकयात ब्यापक सहलह ब्याका माःगु कथंया संशोधन याना छगू मत जुया पारित यायेमाः धकाः धयादीगु खः।

हेटौंडाय् जूगु उगु सहलह ज्याझ्वलय् भाषा बैज्ञानीक नापं भाषा आयोगया सदस्य अमृत योञ्जन, भाषा बैज्ञानीक प्रा.डा.ओमकारेश्वर श्रेष्ठ, पुर्व महान्याधिवक्ता मुक्ति प्रधान, अधिवक्तापिं शंकर लिम्बु, दिनेश घले, नरेश श्रेष्ठ व अभियन्ता श्रीकृष्ण महर्जनं मंकाः कथं तयार यानादीगु विधेयक संसोधनया प्रस्तावयात कया न्ह्यब्वयेगु ज्या जूगु खःसा सांसदपिंलिसे सहलह तकं जूगु खः ।

सांसदपिन्सं तयादीगु न्ह्यसःया लिसः अमृत योञ्जन, प्रा. डा. ओकारेश्वर श्रेष्ठ व शंकर लिम्बुं स्पष्ट यानादीगु खः । मूल रुपं मेमेगु भाषा धकाः नेपालभाषा व तामाङ भाषायात तयातःगु थासय् प्रदेशया राष्ट्रभाषा धायेमाःगु, लिपिया सवालय् नेवाः व तामाङतय्गु लिपियात प्रदेश सरकारया राजपत्रय्, सरकारया लेटर हेडय् नापं मेमेगु थासय् छ्यले माःगु, विज्ञ समुह धाःगु थासं राष्ट्रभाषा विकास प्रतिष्ठन गठन यायेमाःगु नापं भाषिक आधारय् विभेद याइपिन्त दण्ड सजायया व्यवस्था यायेमाःगु खँ दुथ्याका स्वंगू महल दयेका अन प्रस्तूत यायेगु ज्या जूगु खः ।

ज्याझ्वलय् न्वंवानादीपिं फुक्क सांसद व मन्त्रीपिन्सं विधेयक छगू मतं पारित यायेमाःगु नापनापं मेमेगु प्रदेशया नितिं नं भाषा विधेयक नमुना जुइगु कथंया भूमिका म्हितेत थःपिं तयार दु धयादिसें प्रदेशय् न्ह्यब्वःगु व न्हापा पारित जुइ धुंकूगु गुलि नं विधेयक दु, अज्वःगु विधेयकत मध्ये दक्ले अप्वः सांसदतसें सहलह ब्याकेगु ज्या याःगु नापं समुदाय नं तकं सरोकार क्यंगु धइगु भाषा विधेयक हे जूगु खँ न्ह्यथनादीगु खः ।

राष्ट्रिय आदिवासी जनजाति महिला मञ्चया नायः सुनी लामाया सभाध्यक्षता जूगु उगु ज्याझ्वलय् नेपाल तामाङ घेदुङ बागमती प्रदेशया नायः लिला कुमार तामाङं लसकुस न्वचू बियादीगु खः। देय् दबू बागमती प्रदेशया नायः विष्णु गोपाल महर्जनं सुभाय् न्वचू बियादीगु उगु ज्याझ्वः देय् दबू स्वनिगः विशेष प्रदेशया नायः श्रीकृष्ण महर्जनं न्ह्याकादीगु खः ।