प्रधानन्यायाधीश हरिकृष्ण कार्कीं सर्वोच्च अदालतया वार्षिक प्रतिवेदन राष्ट्रपति रामचन्द्र पौडेलयात लःल्हाःगु दु। वयकलं आर्थिक वर्ष २०७८÷७९ या वार्षिक प्रतिवेदन लःल्हाःगु खः।

२०७९ असार मसान्त तकया अदालतय् जूगु ज्या विवरण दुथ्याःगु प्रतिवेदन राष्ट्रपतियात लःल्हाःगु खः।

प्रतिवेदन लःल्हायेगु निति प्रधानन्यायाधीश कार्की नाप सर्वोच्च अदालतया बरिष्ठतम न्यायाधीश विश्वम्भरप्रसाद श्रेष्ठ, मुख्यरजिष्ट्रार लालबहादुर कुँवर लगायत सर्वोच्च अदालतया बरिष्ठ अधिकारीपिनिगु उपस्थित दुगु खःसा राष्ट्रपतिया कानूनी सल्लाहकार बाबुराम कुँवर, राष्ट्रपति कार्यालयया सचिव लगायतया उपस्थिती दुगु खः।

नेपाल आयल निगमं पेट्रोलिपय पदार्थया भाः स्वचालित मूल्य प्रणाली लागू यायेगु निर्णय याःगु दु।

निगम सञ्चालक समितिं थौं आइतवाः चान्ह्यःनिसे लागू जुइगु कथं स्वचालित मूल्य प्रणाली लागू यायेगु निर्णय याःगु दु। थुगु प्रणाली कथं निगमं डिजेलय् नितका व पेट्रोलय् २.५ प्रतिशत नाफा तया भाः क्वछिइगु याइ ।

अथेहे एलपी ग्याँसया भाः निगमं नाफा मकायेगु निर्णय याःगु दु। निगमया कथं थुगु पटक पेट्रोल, डिजेल, मचिकं व एलपी ग्याँसया भाः कुहावःगु दु। पेट्रोल लिटरं खुतका, डिजेल व मचिकनय् प्यतका प्यतका कुहावःगु दु सा ग्याँस सिलिण्डरय् झीतका कुहावःगु दु।

आः स्वनिगलय् पेट्रोल लिटरं १६४ रुपैयाँ जुइगु दु सा तराईया जिल्लाय् १६१ रुपैयाँ ५० पैसा व भित्री मधेशय् १६३ रुपैयाँ भाः क्वछिगु दु। हवाई इन्धनय् धाःसा स्वचालित भाः लागु जुइ मखुनि।

यलय् थौं गथामुगः चह्रे कुन्हु पिहावइगु मिँप्वाः लाखे प्याखं सुरू जूगु दु।

थीथी लाखे प्याखं मध्ये मिप्वाः लाखे बिस्क पहःया प्याखंया खः।

धर्मकीर्ति विहारया सीघःया प्रमुख श्रद्धेय अनागारिका धम्मावति गुरुमांया प्रतिमूर्ति दयेकाः पिथनीगु जूगु दु।

वसपोल प्रमुख जुयाच्वनाबिज्याःगु धर्मकीर्ति विहारं वसपोलया धम्मावति गुरुमांया प्रतिमूर्ति दयेकाः पिथनेत्यंगु खः । वंगु गुरुपुन्हि कुन्हु ९० दँय् क्यनाबिज्याःम्ह शासनधज धम्माचरिय अग्गमहागन्थवाचक पण्डित भाषा थुवाः श्रद्धेय अनागारिका धम्मावति गुरुमांया बुन्हिया लसताय् वसपोलाय प्रतिमूर्ति पिथनेत्यंगु खः ।

नेपाःया थेरवाद बुद्ध शासनिक ख्यलय् ज्वःमदुगु योगदान बियाबिज्याःम्ह वसपोलया ९० दँ बुन्हिया लसताय् वंगु छुं दिं न्ह्यः जक नागरिकस्तरं हनेज्या याःगु खः ।

अथे हे वसपोलया ९० दँ बुन्हिया हे लसताय् थेरवाद, महायान व वज्रयान भिक्षु लामा गुरुपिंपाखें धर्मकीर्ति विहारय् छवाःयंकं अभिधम्म पाठ याःगु खः। अथेहे झ्वलय् वंगु सोमवाः सीघःस्थित श्रीघः ज्ञानमाला भजन खलकं नं वसपोलयात हनेज्या याःगु खः ।

सीघःया चैत्य परिक्रमा याकाः हनापौ देछासे हनेज्या याःगु ज्याझ्वलय् भजन खलःपाखें ज्ञानमाला भजन नं न्ह्यब्वःगु खः।

सरकारं वइगु साउन १ गतेनिसे दक्को सशुल्क प्रसारण जुइगु विदेशी च्यानल बन्द जुइगु अवस्थाय् दु धका धाःगु दु।

सूचना तथा प्रशारण विभागं छगू विज्ञप्ति जारी यासे ‘अला कार्ट’ शुल्क प्रणालीया लागि सरकारं फ्वंगु बथं बुके (च्यानलया प्याकेज) मवंगुलि थज्यागु अवस्था सिर्जना जूगु दु धका धाःगु दु।

भारतीय सःशुल्क (पे) टीभी च्यानल प्रसारक संस्थापिन्स नेपालय् ‘अला कार्ट’ प्रणाली लागू यायेत ग्वाहालि मयायेगु धका धाःगुलि विभागं सम्बद्ध सकसित सरकारी निर्णययात दृढतापूर्वक ग्वाहालि यायेत इनाप याःगु खः।

भारतीय च्यानल पिनिगु कूसा संगठन इण्डियन ब्रोडकास्टिङ एण्ड डिजिटल फाउन्डेसनं सूचना लिसे प्रसारण विभागयात पौ छ्वयाहसे च्यानलपिनिगु बुके दय्का भाः क्वछिइगु व प्रत्येक च्यानलया बिस्क बिस्क भाः क्वछिइगु खँ माने जुइ मखु धका जानकारी बिःगु खः।

थुगु खँ स्वया सरकारं विदेशी च्यानलय् प्रसारण दिइ फइगु अवस्था दु धका जानकारी बिःगु दु। विभागया प्रवक्ता सुदीप भट्टराई न जारी याःगु विज्ञप्तिइ सरकारं फ्वंगु कथ बुके व शुल्क बुझे मयागुलि अला कार्ट प्रणाली लागु यायेत मछिगु खँ न्ह्यथ्यःगु दु।

सरकारं असार २८ गते विदेशं ध्यवा पूला न्यायेगु विदेशी च्यानलपिन्स बुके व अज्यागु बुकेय् दइगु च्यानलं बिस्क बिस्क च्यानलं बिस्कं बिस्कया भाः बुझे याये मःगु नियम दय्कूलि सू नं तयार मजूगु खः।

सोनी, जी, डिस्कभरी, स्टार, कलर्स, एचबीओ, लगायतया विदेशी च्यानलया प्याकेज बिइपिन्स बुकेपि, उकिया भाः व बुकेय् दइगु च्यानलय् भाःया प्रस्ताव मयागु दु । थज्यागु च्यानलं नेपालया प्रतिनिधिपिन्स हे भाः क्वछिइ।

उमिसं थज्यागु च्यानलया प्याकेज थना या टेलिभिजन सेवा वितरकपिन्स हे मिइ।