महाकवि सिद्धिदास अमात्यया १५६ क्वःगु बुन्हि थीथी ज्याझ्वः यासें हंगु दु। थ्व हे झ्वलय् म्हिगः आइतवाः सुथय् नसँचा उलेगु, सिद्धिदास सिरपाः लःल्हायेगु ज्या जूगु दु।

येँया रत्नपार्कस्थिति शान्तिबाटिकाय् च्वंगु सिद्धिदासया झ्वाताय् स्वांमाः क्वखायेकुसें नसँचा उलेगु ज्या जूगु खः। महाकवि सिद्धिदासया तस्बिरयात बग्गीलय् तयाः सैनिक बाजं, परम्परागत दाफा बाजंसहित कुमारी रथजात्रा जुइगु रुटय् चाःहिउगु खः।

ज्याझ्वलय् भाषासेवीपिं लगायत थीथी स्कूलया विद्यार्थीपिनि सहभागिता दुगु खः नसँचा उलेज्या क्वचायेवं जनबहालय् च्वंगु दबुलिइ छगू ज्याझ्वःया दथुइ सिद्धिदास सिरपाः लःल्हाःगु खः।

वरिष्ठ साहित्यकार फणीन्द्ररत्न बज्राचार्ययात सिद्धिदास सिरपाःपाखें हंगु खः। अथेहे अन्वेषक काशीनाथ तमोटयात सिद्धिदास विद्वत्वृत्रि लःल्हाःगु खः।

नेपाल आयल निगमं पेट्रोलियम पदार्थया भाः थकाःगु दु। म्हिगः शनिवाः च्वंगु निगम सञ्चालक समितिया बैठकं पेट्रोल लिटरं नितका, डिजेल व मचिकय् खुतका थकाःगु दु ।

अथेहे ग्यास सिलिण्डरय् २१५ रुपैयाँ थकायेगु निर्णय याःगु दु। हवाइ इन्धन आन्तरिक व अन्तर्राष्ट्रिय निगुलि हे लिटरय् च्यातका थकाःगु दु। आः न्हुगु भाः कथं ग्यास सिलिण्डरं २११० रुपैयाँ थ्यःगु दु।

प्रधानमन्त्री प्रचण्ड चीन भ्रमण क्वचाय्का थौं स्वदेश लिहावःगु दु। संयुक्त राष्ट्र संघया महासभाय् ब्बति कायेगु निति न्युयोर्क वःम्ह प्रधानमन्त्री प्रचण्ड उखेपाखे हे वंगु असोज ६ गते चीनय् वःगु खः।

प्रचण्ड थौं छेन्दुपाखे थौं लिहावःगु खः। असोज ६ गते हान्झाउय् चिनियाँ राष्ट्रपति सी जिनफिङयात नापलाना वयकः कन्ह्यः कुन्हु हे समकक्षी ली छ्याङयात नापलानादीगु खः।

निगु पक्षीय नाप लायेधुका थीथी सहमति व सम्झौताय् ल्हाःचिं तःगु खः। वया लिपा प्रचण्ड चीनया थीथी थासय् चाःहिला थौं स्वदेश लिहावःगु खः।

त्रिभुवन विमानस्थलय् प्रधानमन्त्रीयात उपप्रधान मन्त्रीपि पूर्णबहादुर खड्का व नारायणकाजी श्रेष्ठ, सभामुख देवराज घिमिरे, राष्ट्रियसभा अध्यक्ष गणेश तिमिल्सिना, पर्यटनमन्त्री सुदन किराती लगायतपिन्स लसकुस याःगु खः ।

आर्थिक लेनदेन विवादय् फिल्म ‘रावायण’ या निर्माता याःगु उजुरी वयेवं ज्वना तम्ह अभिनेता अनमोल केसी नर्भिक अस्पतालय् भर्ना जूगु दु।

छातीइ समस्या वयेवं शुक्रवाः चान्ह्यः हे अस्पताल भर्ना जूगु जानकारी वयकःयांगु दु निकट छम्ह फिल्म निर्मातां धाःगु दु। ख्वपया साँगाय् बहनि ज्वंगु प्रहरीं केसीयात अपराध महाशाखा बानेश्वरय् हःगु खः ।

रावायण फिल्मपाखे निर्मात्रा सुप्रिया कटुवालं १० लाख रुपैयाँ पेश्की कया न अनमोलं फिल्म मम्हितीगु धका धासे प्रहरीयात आपराधिक विश्वासघातया उजुरी बिःगु खः ।

उगु उजुरीया आधारय् प्रहरीं पक्राउ पूर्जी जारी यासे ज्वंगु खः। प्रहरीं कन्ह्यः आइतवाः अनमोलयात अदालतय् उपस्थित याकेगु तयारी यानाच्व ।