लुँया भाः थौ न्हुगु रेकर्ड कायम जूगु दु।

थौ लुँ तोलां २ हजार ९ सय थहावना १ लाख ३५ हजार ६ सय कायम जूगु दु धका नेपाल सुनचाँदी व्यवसायी महासंघं धाःगु दु।

अथेहे वहः तोलां न्यय् न्यातका थहावंगु दु। वहः तोलां न्यय् न्यातका थहावना १ हजार ६ सय ७० थ्यःगु दु धका महासंघं धाःगु दु।

थ्व हे वइगु वैशाख १५ गते जुइगु इलाम–२ या उपनिर्वाचनया लागि थीथी दल व स्वतन्त्र उम्मेदवार याना नीम्हेसिया मनोनयन दर्ता यागु दु।

थौ शनिवाः मुख्य निर्वाचन अधिकृतया कार्यालयय् वना दलपाखे १२ म्ह व स्वतन्त्र च्याम्ह याना नीम्हेसिया उम्मेदवार मनोनयन दर्ता याःगु दु।

नेपाली कांग्रेसया डम्बर खड्का, नेकपा एमालेया सुहाङ नेम्वाङ, राष्ट्रिय स्वतन्त्र पार्टीया मिलनकुमार योङयाङ लिम्बु, राप्रपाया लक्ष्मी गुरुङ, नेकपा एकीकृत समाजवादीया जीतबहादुर राई, जनमत पार्टीया प्रेमकुमार थाम्सुहाङपिन्स उम्मेदवारी दर्ता याःगु दु।

नेवाः पत्रकारा राष्ट्रिय दबूया मुदुजः नापं राष्ट्रिय समाचार समितिया फोटो पत्रकार रत्नकृष्ण श्रेष्ठया थौं छगू ज्याझ्वःया दथुइ ‘थेम्मृङ पत्रकारिता पुरस्कार’ पाखे सम्मान याःगु दु।

मध्यपुर सञ्चार समाजं मध्यपुर थिमियात कला, संस्कृतियात पत्रकारिताया माध्यमं म्हसिकेगुलि योगदान याःगु धासें अथे सम्मान याःगु खः। थौ समाजया न्याक्वःगु अधिवेशन लिसें १२ क्वःगु साधारणसभाय् मध्यपुर थिमिया सांस्कृतिक धरोहर कला, संस्कृति नृत्य लिसें वाद्यगुरु ९६ दँया श्रीगोपाल प्रजापतिं पत्रकार श्रेष्ठयात दोसल्ला न्ययेका ५ हजार तका लिसें सम्मानपत्र लःल्हागु खः।

अथे हे उगु ज्याझ्वलय् मध्यपुर थिमिया  सम्पदाया संरक्षण, संवद्र्धन व पुनः निर्माणया महत्वपूर्ण योगदान याःगु धासें वाद्यगुरु प्रजापतिं मध्यपुर थिमि नगरपालिकाया निवर्तमान नगर प्रमुख मदनसुन्दर श्रेष्ठयात नं दोसल्ला न्ययेका सम्मान याःगु खः।

इलाम क्षेत्र नम्बर–२ या उपनिर्वाचनया निति उम्मेदवारी दर्ता थौ जुगु दु । नेकपा (एमाले), नेपाली कांग्रेस, राष्ट्रिय स्वतन्त्र पार्टी (रास्वपा), नेकपा (एकीकृत समाजवादी)या पाटीपाखे उम्मेदवारी दर्ता याःगु दु।

एमालेपाखे सुहाङ नेम्वाङ, कांग्रेसया डम्बर खड्का, एकीकृत समाजवादीया जितबहादुर राई, जनमत पार्टीया प्रेमकुमार थाम्सुहाङ, नेपाल मजदुर किसान पार्टीया श्यामबहादुर दर्जी, मंगोल नेसनल अर्गनाइजेसनया मनेबहादुर लिम्बूं उमेदवारी दर्ता याःदु।

अथेह, रास्वपाया मिलन लिम्बू, स्वतन्त्र डकेन्द्रसिंह लिम्बू, स्वतन्त्र डाकप्रसाद गौतमं उमेदवारी दर्ता याःगु दु।

इलाम २ य उपनिर्वाचनया लागि राष्ट्रिय स्वतन्त्र पार्टीया उम्मेदवार मिलन लिम्बुं मनोनयनपत्र दर्ता याःगु दु। रास्वपाया उपसभापति श्रम, रोजगार लिसे सामाजिक सुरक्षामन्त्री डोलप्रसाद अर्याल, सहमहामन्त्री कविन्द्र बुर्लाकोटीपिनिगु पुचः नापं मुख्य निर्वाचन अधिकृतया कार्यालय इलामय् वना लिम्बुं मनोनयन पत्र दर्ता याःगु खः।

रास्वपाया उम्मेदवार लिम्बु स्वया न्ह्यः ११ म्हेसिया मनोनयन पत्र दर्ता याये धुकुगु दु। राष्ट्रिय प्रजातन्त्र पाटीया लक्ष्मी गुरुङ, स्वतन्त्र उम्मेदवार मनोज निरौला, नेपाल रिपब्लिक नेशनल पार्टी (एनआरएन) या उम्मेदवार धनराज राना मगरपिन्स मनोनयन दर्ता याये धुकुगु दु।