बागमती प्रदेशया मुख्यमन्त्री शालिकराम जम्कट्टेलं विश्वासया मत कायेत ताः लागु दु।

म्हिगः सोमवाः बागमती प्रदेश सभा बैठकय् जम्कट्टेलं थःत प्रदेश सभाया विश्वास दु धका तःगु प्रस्तावाया पक्षय् ५६ म्हेसिया मतदान याःगु खः।

बिश्वासया मतय् दल माओवादी केन्द्रया २१, नेकपा एमालेया २७, नेकपा एकीकृत समाजवादीया ७ व हाम्रो नेपाली पार्टीया छम्हेसिया मत बिगु खः।

नेपाली कांग्रेस व नेपाल मजदुर किसान पार्टीं विपक्षय् मतदान याःगु खःसा राप्रपा तटस्थ च्वंगु खः। प्रदेश सभाय् १०८ म्ह सदस्यपिन्स ब्बति काःगु खः।

विश्वास मतया विपक्षय् ३७ मत लागु खःसा १५ म्ह सांसद तटस्थ च्वंगु खः।

बरिष्ठ सिनेपत्रकार बिजयरत्न असंबरे म्हमफया गंगालाल हस्पिटलय् भर्ना जुयादीगु दु।

वयकःयात म्हिगः ११ बजे स्वास्थ्यय् समस्या वया पाटन हस्पिटलय् इमरजेन्सीइ यकूगु खःसा अन रिफरयाना गंगालाल यकूगु धका संचारकःमि सुरजबीर बज्राचार्य धयादीगु दु।

नेपाल आयल निगमं पेट्रालय् लिटरं प्यतका थकाउगु दु। थौ आइतवाः चान्ह्यःनिसे लागू जुइगु कथै पेट्रोल लिटरं प्यतका थकागु दु।

थ्व नाप आः स्वनिगः नाप पोखरा व दिपालयय् पेट्रोल लिटरं १७५ रुपैयाँ जुगु दु।

सुर्खेत व दाङय् १७४ नाप चारआली, विराटनगर, जनकपुर, अमलेखगञ्ज, भलबारी, नेपालगञ्ज व वीरगञ्जय् पेट्रोल लिटरं १७२ रुपैयाँ ५० पैसा थ्यःगु दु।

नेपाल आदिवासी जनजाती पत्रकार महासंघ (फोनिज) या महासचिव मिलन लिम्बुयात राष्ट्रिय स्वतन्त्र पार्टी न इलाम–२ य् उम्मेदवारी दयकेगु घोषणा याये धुकुगु दु।

अय्त, लिम्बुं फोनिजय् थःम्हेगु महासचिव पदं राजीनामा बिउगु मदुनि। थ्व हे विषययात कया फोनिजं असन्तुष्टि प्वकूसे लिम्बुयात पदबाट राजीनामा बिइत निर्देशन बिउगु खः।

थौ आइतवाः अध्यक्ष गजुरधन राईया अध्यक्षताय् येँ च्वंगु आकस्मिक सचिवालय बैठकं उगु निर्णययासे सचिव समीर बलामीं जारी याःगु विज्ञप्तिइ उल्लेख याःगु दु। संघीयता विरोधी पार्टीया उम्मेदवार जूगु धासे पहिचानवादीपाखे आलोचना जुयावयाच्वंम्ह लिम्बूयात महासचिव पदं राजिनामा बिइत निर्देशन बिउगु धका फोनिज सचिवालयं धाःगु दु।

थौ आइतवाः येँ च्वंगु फोनिज सचिवालयया आकस्मिक बैठकं मिलन लिम्बूया थासय् समीर बलामीयात कार्यवाहकया जिम्मेवारी बिउगु खः।

यलया गोदावरी लागाय् न्ह्यक्वःगु हलिं नेवाः दिवस नापं नेवाः देय् दबू महालक्ष्मी नगर समितिया प्यक्वःगु बुसादँ हंगु दु।

देय् दबूया केन्द्रीय नायः पवित्र बज्राचार्यया मूपाहांसुइ जूगु उगु ज्याझ्वलय् प्यम्हेसित हनेज्या याःगु खः। बागमती प्रदेशय् नेपालभाषायात सरकारी कामकाजि भाषाया रुपय् लागू याकेगु नितिं ऐन निर्माणया नितिं जनस्तरपाखें भूमिका म्हितादीम्ह दबूया स्वनिगः विशेष प्रदेशया नायः नापं पत्रकार श्रीकृष्ण महर्जन, नेपाल स्वयंसेवी रक्तदाता समाजया केन्द्रीय नायः नापं आः तकया दुने दक्ले अप्वः १७७ क्वः हि दान यानादीम्ह प्रेमसागर कर्माचार्य, समाजसेवी चन्द्रबहादुर/सुभद्र श्रेष्ठ नापं समाजसेवी रविन्द्रप्रसाद नेमकुलयात हनापौ लःल्हाःगु खः।

देय् दबू महालक्ष्मी नगर समितिया नायः विजय महर्जनया सभाध्यक्षताय् जूगु उगु ज्याझ्वलय् देय् दबू स्वनिगः विशेष प्रदेशया नायः श्रीकृष्ण महर्जन, हि दान यानादीम्ह प्रेमसागर प्रजापति, कानुन व्यवसायी नरेश श्रेष्ठ लगायतपिन्सं नेवाः तय्गु समस्यानिसें नेवाः तय्गु थीथी सवालयात कया नुगः खः तयादीगु खः।