येँ महानगरपालिकां फुटपाथ व चिधःपि व्यापारीपिनिगु ज्यादती याःगु धासे विरोध प्रदर्शन याःगु दु।

महानगरपालिकाया ज्याकू न्ह्यने स्वतन्त्र युवा समूहपिन्स ‘गरिखान देऊ’ धका विरोध याःगु दु।

उमिसं महानगरपालिकया मेयर बालेन्द्र साह (बालेन) न चुनाव न्ह्यने हाःगु म्ये ‘गरिबया चमेली सू मदु’ धका म्ये हालां विरोध याःगु खः।

महानगरपालिकाया नगर प्रहरीपिन्स फुटपाथ खाली यायेगु नामय् म्वाये हे थाकुगुलि विरोध यानागु धका बिरोध यायेगु निति वःपिन्स धाःगु दु।

वाः वयाच्वसां महानगरया ज्याकू न्ह्यने मदिक्क प्रदर्शन यानाच्वंगु दु।

प्रधानमन्त्री पुष्पकमल दाहाल प्रचण्डया जहान सीम्ह सीता दाहालयात श्रद्धाञ्जलीया लागि पार्टी कार्यालय पेरिसडाँडाय् तयातःगु दु। सीता दाहाल थौं सुथय् ८ः३३ बजेय् ६९ दँय् नर्भिक अस्पतालय् मदुगु खः।

थौं न्हिनय् १ बजे तक सीम्ह पार्टी केन्द्रीय कार्यालयया पेरिसडाँडाय् श्रद्धाञ्जली तया तःगु खः।

श्रद्धाञ्जली धुका थौं हे न्हिनय् २ बजे पशुपति आर्यघाटय अन्त्येष्टि याइगु धका माओवादी केन्द्रया महासचिव देव गुरुङं जानकारी बिःगु दु।

प्रधानमन्त्री प्रचण्डया जहान सीता दाहालयात थौं पशुपति आर्यघाटय् अन्त्येष्टि याइगु जुगु दु।

व स्वया न्ह्यः सीम्ह पार्टी केन्द्रीय कार्यालय पेरिसडाँडाय् श्रद्धाञ्जलीया लागि तइगु जुगु दु। थौं सुथय् ११ बजेनिसे न्हिनय् १ बजे तक पार्टी केन्द्रीय कार्यालय पेरिसडाँडाय् श्रद्धाञ्जलीया लागि तइगु जुगु दु।

अथेहे २ बजे पशुपति आर्यघाटय् अन्त्येष्टि याइगु धका माओवादी केन्द्रया केन्द्रीय सदस्य रामप्रसाद सापकोटा (दीपशिखा) न जानकारी बिःगु दु।

प्रधानमन्त्री पुष्पकमल दाहाल प्रचण्डया जहान सीता दाहाल मन्त। वयकः थौं सुथय् नर्भिक अस्पतालय् मदुगु खः।

प्रधानमन्त्री प्रचण्डया निजी चिकित्सक प्रा. डा. युवराज शर्मां थौं सुथय् ८ः३३ बजे सीता दाहाल मदुगु धका जानकारी बिःगु खः। पार्किन्सनया समस्या नाप ‘प्रोग्रेसिभ सुपरान्युक्लियर पाल्सी (पी.एस.पी.)’ पाखे न पीडित जुया च्वःगु खः।

आः दाहालयात हृदयाघात जुगु धका धाःगु दु। स्वास्थ्य अवस्था गम्भीर जुइवं थौं सुथय् ८ बजे अस्पतालय् यकूगु खः। आकस्मिक कक्षय् सीपीआर लगायतया विधिपाखे उपचार याःगु खः ।

अय्न सुधार मजुइवं सुथय् ८ बजे जुया ३३ मिनेटय् मदुगु घोषणा याना अस्पतालं पत्रकार सम्मेलन याना जानकारी बिःगु खः।

नेवाः देय् दबूया थःगु हे छेँ धस्वाइगु जूगु दु । थ्व हे वइगु शुक्रवाः छगू ज्याझ्वःया दथुइ छेँया जग स्वनीगु जूगु दु ।

देय् दबुलिं येँ मनपा १५ वडाय् चःमति लागाय् छेँ दनिइगु जुगु दु। येँ महानगर चःमति जग्गा एकीकरण आयोजनायाके थ्व जग्गा न्याना काःगु खः । जग्गाया क्षेत्रफल १२६ वर्ग मिटर (करिब ४ आना) दु । थुकिया मू १ करोड ७६ लाख ५४ हजार १०८ तका तूगु खः ।

जग्गा न्यायेत माःगु दां नेपाः दुने व पिने च्वंपिं भाषाह्यमि साहु लिसें थीथी नेवाःतय् व्यक्तितपाखें ग्वाहालि कथं मुंकूगु खः । महानगरपालिका लिसें चःमतिइ च्वपिन्स न ग्वाहालि याना जग्गा न्यायेफुगु खः । देय् दबूया थ्व छेँ दनेगु लागिं नं येँ महानगरं ३ करोड ५० लाख तका खर्च जुइगु प्रारम्भिक अनुमान जूगु दु ।

थ्वहे बजेटय् ध्यबा छुटे याकेगु लागिं येँ महानगरया उपमेयर सुनिता डंगोलं विशेष कुतः यागु खः। जग्गा न्यायेगु निति थीथी मनूतयेस आर्थिक ग्वाहालि याःगु खः।