जहान मदुगु शोकय् लानाच्वम्ह प्रधानमन्त्री पुष्पकमल दाहाल प्रचण्डया औपचारिक ज्याझ्वः स्वन्हुया लागि स्थगित याःगु दु।

म्हिगः बुधवाः जहान सीता मदुगुलि शोकय् लानाच्वम्ह प्रधानमन्त्री प्रचण्ड असार ३० गते तक छु न औपचारिक गतिविधिइ सहभागी मजुइगु जूगु दु।

‘स्वन्हु तक दक्को औपचारिक ज्याझ्वः स्थगित याःगु दु’ धका प्रधानमन्त्रीया प्रेस सल्लाहकार गोविन्द आचार्यं धाःगु दु।

वयकःया कथं, बिचा हाय्केगु निति सुथय् ८ निसे ११ व बहनि ४ निसे ६ बजे तक ई बियातःगु दु।

हुम्लाया कालिका जःखः केन्द्रबिन्दु जूया भुखाय् ब्बःगु दु।

राष्ट्रिय भूकम्पमापन नाप अनुसन्धान केन्द्र लैनचौरया कथं थौं सुथय् ११ बजे जूया १७ मिनेटय् हुम्लाया कालिका जःखः केन्द्रबिन्दु जूया ४.६ म्याग्निच्यूडया भुखाय् ब्बःगु दु।

लुँया भाः तोलां च्यासः थहावःगु दु। लुँ तोलां च्यासः थहावना १ लाख १२ हजार ४ सय रुपैयाँ थ्यःगु दु धका नेपाल सुन चाँदी व्यवसायी महासङ्घं धाःगु दु।

अथेहे वहः तोलां पीतका थहावःगु दु। वहः तोलां पीतका थहावना १ हजार ४ सय ४० रुपैयाँ न कारोवार जूगु दु धका महासङ्घं धाःगु दु ।

श्री पचलि भैरवया झिंनिदँ जात्रा खड्ग सिद्धि जात्रा (गथु प्याखं) औपचारिक कथं थौं निस सुरु जूगु दु।

थौं हनुमानध्वाका दुने अन च्वंगु खड्गय् ग्वय्दां तयेगु ज्या जूगु खः। थौं सुथय् द्यः छेँय् गुथियारपिन्स पूजा ज्वना बाजं थानां हनुमानध्वाकाय् वना ग्वय्दां तयेगुनिति वःगु खः।

आः गथांमुगःनिसें पचलीइ हे प्याखं स्यनेगु ज्या जुइ । थुगु प्याखं मोहनिया चालं कुन्हु पिहावइ।

शेयर बजाः थौं बुधवाः थहावःगु दु। शेयर बजाः परिसूचक नेप्से थौं २५ दशमलव ३१ अङ्कं थहावना २ हजार ९७ दशमलव ५५ विन्दुइ थ्यःगु दु।

थौं फाइनान्स व होटलबाहेक मेगु दक्को समूहया शेयर थहावःगुलि जलविद्युत् समूहया शेयर यक्को तहावःगु दु।

शिवश्री हाइड्रो, सीवाईसी नेपाल लघुवित्त, रिभर फल्स पावर, शुभम् पावर, लक्ष्मी इक्युटी फन्ड व एनआईसी एसिया फन्डया शेयर १० प्रतिशतं थहावःगु दु।

समग्र बजाः थहावःगुलि रावा इनर्जी कम्पनीया शेयर १० प्रतिशतं कुहावःगु दु। म्हिगः २ अर्ब ८५ करोड रुपैयाँया शेयर कारोबार जूगुलि थौं ८५ लाख ४ हजार कित्ता शेयर ३ अर्ब १८ करोड ७६ लाख रुपैयाँया कारोवार जूगु खः।

दकलय् अप्पो शिवम् सिमेन्टया ३३ करोड ९३ लाख रुपैयाँया शेयर कारोवार जूगु खः।