नेपाल आयल निगमं डिजेल, पेट्रोल, मचिकं व ग्याँसया भाः थकाःगु दु। निगम सञ्चालक समितिया म्हिगः बहनि च्वंगु बैठकं अथे भाः थकायेगु निर्णय याःगु खः। डिजेल व पेट्रोलय् लिटरं प्यतका मचिकनय् लिटरं नितका थकाःगु दु।

अथेहे ग्याँस सिलिण्डरय् झींन्यातका थकानागु दु नेपाल आयल निगमं धाःगु दु। निगमया कथं उगु भाः थकाःगु थौ चान्ह्यःनिसे लागू जुइ धका धाःगु  दु।

शेयर बजाः परिसूचक नेप्से थौ २१ दशमलव ६७ अङ्कं कुहावया २ हजार ९७ दशमलव ९३ अङ्कय् थ्यःगु दु। स्वन्हु तक लगातार थहावंगु शेयर बजाः थौ धाःसा यक्को हे कुहावःगु दु।

थौ उत्पादनबाहेक दक्को समूहया शेयर कुहावगुलि मेन्छ्याम हाइड्रोसनापं प्यंगू कम्पनीया शेयर ५ प्रतिशत स्वया अप्पो कुहावःगु दु। समग्र बजाः कुहावंसा थौ साम्लिङ पावर कम्पनी व मन्दाकिनी हाइड्रोया शेयर झन्डै १० प्रतिशत स्वया अप्पो थहावःगु दु।

१ करोड ४७ लाख कित्ता शेयर ५ अर्ब २९ करोड रुपैयाँया कारोबार जूगु दु। दकलय् अप्पो हिमालयन रिइन्सुरेन्सया ६३ करोड रुपैयाँ बराबरया शेयर कारोवार जुगु दु।

लुँ तोलां थौं सच्छि थहावःगु दु।

लुँ तोलां सच्छि थहावना थौ १ लाख १८ हजार ७ सय रुपैयाँ न कारोवार जूगु दु धका नेपाल सुनचाँदी व्यवसायी महासंघं धाःगु दु।

अथेहे वहःया भाः धाःसा थौ स्थिर जूगु दु।

गोरखापत्र न्हिपौया उपसम्पादक शेषकान्त पण्डित मन्त। वयकः ४७ दँय् उपचार यायेगु झ्वलय् थौं बुधवाः सुथय् ३ बजेय् यलया मेडीसिटी अस्पतालय् मदुगु खः।

वयकः ताः ईनिसे क्यान्सर जुयाच्वंगु खः। वयकःयात थौं हे पशुपतिइ आर्यघाट अन्त्येष्टि याःगु खः। भानु नगरपालिका १२ तनहुँइ २०३३ सालय् जन्मय् जुयादीगु खः।

वयकःया छम्ह जहान, छम्ह काय् व छम्ह म्ह्याय् दी।

धर्मभक्त माथेमा स्मृति गुथिया ग्वसालय् येँ महानगरपालिका २३ वडाय् च्वंगु सहिद धर्मभक्त माथेमाया झ्वाताय् स्वां देछासें सहिद दिवस हंने ज्या जुगु दु।

गुथिया अध्यक्ष पवित्र वज्राचार्यया सभाध्यक्षताय् जूगु उगु ज्याझ्वलय् मूपाहाँ कथं झाःम्ह येँ महानगरपालिकाया उपमेयर सुनिता डंगोलं सालिकय् स्वांमा देछायादीगु खः।