नक्कली भुटानी शरणार्थी प्रकरणय् एमालेया नेता टोपबहादुर रायमाझीयात थौं अदालतय् पेस याइगु जुगु दु। म्हिगः चान्ह्यः येँया बुढानीलकण्ठय् टोपबहादुरयात ज्वःगु खः।

थौं अनुसन्धानया लागि म्याद थप यायेत काठमाडौं जिल्ला अदालतय् पेस याइगु जुगु दुु धका काठमाडौं प्रहरी परिसर स्रोतं धाःगु दु। नक्कली भुटानी शरणार्थी प्रकरणय् मुछे जुइवं रायमाझी व वया काय् सन्दीपविरुद्ध वंगु वैशाख २० गते पक्राउ पुर्जी जारी याःगु खः । तर, वयालिपा निसे टोपबहादुर फरार जुगु खः। काय्म्ह सन्दीप धाःसा थ्व स्वया न्ह्यः हे ज्वने धुकुगु दु ।

अदालतं म्याद बिइ धुका रायमाझीयात प्रहरीं थप अनुसन्धान याइ।

काठमाडौं जिल्ला अदालतं नक्कली भुटानी शरणार्थी प्रकरणय् ज्वनातःपि पूर्वगृहमन्त्री बालकृष्ण खाँणनाप झीम्हनिम्हेसित मेगु प्यन्हु हिरासतय् तयेगु अनुमति बिःगु दु।

आइतवाः थौं अदालतं हाकन अनुसन्धानया लागि प्यन्हु हिरासतय् तया अनुसन्धान यायेत म्याद थपे यानाबिःगु दु।

नक्कली भुटानी शरणार्थी प्रकरणय् खाँणनाप वया स्वकीय सचिव नरेन्द्र केसी, तत्कालीन गृहसचिव टेकनारायण पाण्डे, पूर्वगृहमन्त्री रामबहादुर थापाया सुरक्षा सल्लाहकार इन्द्रजित राईनाप झीनिम्हेसित ज्वनातःगु खः।

अथेहे एमाले सचिव टोपबहादुर रायमाझी धाःसा फरार जुयाच्वंगु दु।

वंगु २४ घण्टाया दुने देयन्यक थप झीम्हेसित कोरोना संक्रमण पुष्टि जूगु दु।

स्वास्थ्य मन्त्रालयया कथं ८४४ म्हेसिगु नमुना मध्ये २२३ म्हेसिगु पीसीआर परीक्षणय् खुम्ह व ६२१ म्हेसिगु एन्टीजेन परीक्षण यागुुलि प्यम्ह याना झीम्हेसित कोरोना पुष्टि जुगु दु।

थ्व नाप आः कोरोनाया संक्रिय संक्रमितपि १२० म्ह थ्यःगु दु ।

शेयर बजाः च्याला लिपा दकलय् अप्पो कुहावःगु दु। वंगु असोज ९ गते शेयर बजाः परिसूचक नेप्से १ हजार ८ सय १५ विन्दुइ कुहावःगु दु।

वयालिपा नेप्से १ हजार ८ सय ३० विन्दइ कुहावःगु खः। तर थौं आइतवाः नेप्से १६ दशमलव ९५ अङ्कय् कुहावया १ हजार ८ सय २१ दशमलव ६५ विन्दुइ थ्यःगु खः।

थौं लगानीबाहेक दक्को समूहया शेयर थहावःगु खः। २६३ गु कम्पनीया २७ लाख ८८ हजार कित्ता शेयर ९० करोड रुपैयाँ न कारोबार जुगु खः । दकलय् अप्पो नागरिक लगानी कोषय् ५ करोड ३५ लाख रुपैयाँया शेयर किनबेच जुगु दु।

दकलय् अप्पो राष्ट्र उत्थान लघुवित्तया शेयर ६ प्रतिशत स्वया अप्पो दोर्दी हाइड्रो व हिमालयन ऊर्जा विकास कम्पनीया शेयर साढे ५ प्रतिशत स्वया अप्पो कुहावःगु दु ।

समग्र बजाः कुहावसा थौं दकलय् अप्पो आत्मनिर्भर लघुवित्तया शेयर १० प्रतिशतं थहावःगु दु।

नक्कली भुटानी शरणार्थी प्रकरणय् ज्वनातःपिन्त थौं आइतवाः प्रहरीं जिल्ला अदालत येँय् पेश याःगु दु।

ठगी, संगठित अपराध लगायतया थीथी मुद्दाय् अनुसन्धान जुयाच्वंगुलि जिल्ला प्रहरी परिसर काठमाडौं न अनुसन्धान क्वमाचाःगु धाःसे ई थपे यायेगु अनुमति माग यासे जिल्ला अदालतय् पेश यागु दु।

जिल्ला अदालत काठमाडौया सूचना अधिकारी दीपक दाहालया कथं प्रहरीं थुगु प्रकरणय् ज्वनातःपिन्त अदालतय् पेश याःगु खः। तर म्याद थपे यायेगु निर्णय जुगु मदुनि।

थुगु प्रकरणय् पूर्वगृहमन्त्री बालकृष्ण खाँण, गृह मन्त्रालयया पूर्वसचिव टेकनारायण पाण्डे, पूर्वगृहमन्त्री रामबहादुर थापा बादलया सुरक्षा सल्लाहकार इन्द्रजित राई, केशव दुलाल, सानु भण्डारीलगायतपिन्त प्रहरीं ज्वंगु खः।

उपि दक्कोसित थप ई हिरासतय् तयेत अनुमति माग यासे प्रहरीं अदालतय् उपस्थित याःगु खः।