जनकवि दुर्गालाल श्रेष्ठयात कयाः खस भासं ‘कवि–कविताको छवि: दुर्गालाल श्रेष्ठ’ नांया सफू याकनं हे पिदनेत्यःगु दु।

जनकवि श्रेष्ठं नेपालभाषाया लिसेलिसें खसभासं नं च्वयादीगु कवितायात कयाः थुगु सफू पिदनेत्यंगु खः । सफूया च्वमि आर मानन्धर खःसा सफू या प्रकाशन एजुकेशन बुकं यायेत्यंगु खः ।

थुगु सफू छु दिं दुने पिहावइगु जुइ धका च्वमि मानन्धरं लहनान्युजयात जानकारी बियादीगु दु ।

यल चेम्वरया पुर्व केन्दिय सदस्य नाप महापाल त्वाःया अध्यक्ष सुनिल शाक्यया अबु थ्व हे सावन ८ गतेनिसे तनां च्वंगु दु।

वयकःया अबु ८० दँ दुम्ह गुणमुनि शाक्य यलया इमाडोलं महापाल वयेगु झ्वलय् तनांच्वंगु धका सुनिल शाक्यं लहनान्युजयात कनादीगु दु।

लँय् गन सूना नं खःसा न्ह्यने च्वंगु पुलिस चौकि वा सुनिल शाक्य हान्ताइया मोवाइल ९८५१०९५७२४ य् खवर यानादीत इनाय यानदीगु दु।

येँ महानगरपालिका राजश्व विभागं क्वःछिनातःगु ई दुने हे व्यवसायीक कर पुलेत इनाप याःगु दु । येँ महानगरया राजश्व विभागं छगू सुचं जारी यासें इलय् हे कर पुलकि उगु करय् छुट सुविधा कायेत धाःगु दु ।

महानगरपालिकां आः पुले ल्यंदनिगु सम्पत्ति कर, बहाल कर व व्यवसाय करय् छुट सुविधा बिःगु खः । सम्पत्ति, व्यवसाय व बहाल कर नियमित पुलाच्वंपिं वइगु पुस मसान्त दुने चालु आर्थिक दँया कर नं पुल धाःसा १० प्रतिशत छुट बीगु जुयाच्वंगु दु।

अथेहे होटल, रिसोर्ट वा हलया नामय् छेँ, जग्गा दुपिं वा बालं कयाः होटल, रिसोर्ट वा हल चले यानाच्वंपिंसं बक्यौतासहित सम्पत्ति कर पुस मसान्त तकया दुने पुल धाःसा थप ३० प्रतिशत छुट दइगु धाःगु दु । अथेहे व्यावसायिक रुपं गाडी पार्किङया निंतिं छेँ दयेकूगु खःसा अज्याःगु भवन दयेके क्वचाःगु मिति निसें पार्किङया निंतिं छ्यलीगु क्षेत्रया सम्पत्ति कर १० वर्ष तकया निंतिं छुट बीगु जुइ ।

अथेहे ‘छगू वडा छगू नमूना उद्यम’ कार्यक्रम अन्तर्गत संचालन जुयाच्वंगु उद्योग वा व्यवसाय जूसा दर्ता जूगु स्वदँ तकया निंतिं पुलेमाःगु व्यवसाय कर व दर्ता शुल्कय् ९५ प्रतिशत छुटया व्यवस्था यानातःगु दु ।

चालु आर्थिक दँ २०८०–८१ इ करया दायरा मवःपिं मिसा, जनजाति, दलित, अपांग व ३५ दँ स्वयां म्हो उमेरया ल्याय्म्हपिनिगु नामय् दर्ता जुयाः संचालन जुयाच्वंगु न्यागू लाख तकया पुँजीगत लगानी दुगु उद्योग, व्यवसाय, कम्पनी, संस्थां नं पुस मसान्त तक दुने कर पुल धाःसा ४० प्रतिशत छुट बीगु, अथेहे नियमित कर पुलाच्वंपिं करदातातय्त कर रकमय् २५ प्रतिशत छुट बीगु जुयाच्वंगु दु ।

थुकी नं येँ महानगरपालिकाय् स्थायी बसोबास यानाच्वंपिंत जूगु ५० प्रतिशत छुट जुइगु खँ धाःगु दु ।

येँया ऐतिहासिक इतुम्बहालय् दयेकेत्यंगु म्युजियम उलेज्या न्ह्यः विवादय् लाःगु दु । म्युजियम दयेकेगु लागिं अमेरिकाया न्यूयोर्कय् च्वंगु रुबिन म्युजियम अफ आर्टं २० हजार डलर दां बीत्यंगु खः ।

तर उगु म्युजियम संसारया थीथी देशं खुया हःगु, लुटे याना हःगु पुरातात्विक ज्वलं न्यानाः थःथाय् ब्वइम्ह जूगुलिं वयाके ध्यबा काये मजिउ धासें थनया थीथी सम्पदाविद्तय्सं सः तया हःगु दु ।

इतुम्बहालं खुया यंकूगु छगू ऐतिहासिक ज्वलं थ्वहे म्युजियमं दछि न्ह्यः लित बिउगु खः । तर इतुम्बहाः संरक्षण समितिं धाःसा इतुम्बहालय् वाय्त्यः फ्वाय्त्यः जुइक वांछ्वया तःगु वस्तुत सुरक्षाया लागिं छथासं तयाः म्युजियम दयेकेत्यनागु धासें उकी विरोध मयायेत इनाप याःगु दु ।

किपूयात सांस्कृतिक संरक्षित क्षेत्र घोषणा कार्यान्वन यायेगु विषयय् सम्वद्ध सरोकारवाला निकायया दथुइ सहलह जूगु दु ।

किपू नगरपालिकाया प्रमुख प्रशासकीय अधिकृत लक्ष्मीप्रसाद बास्कोटालिसे वय्कःया हे कार्यकक्षय् सांस्कृतिक क्षेत्र घोषणा ऐन, नियमावली मस्यौदा निर्माण कार्यदल, नेवाः देय् दबू किपू नगर समितिया पदाधिकारी दथुइ सहलह जूगु खः ।

किपू सांस्कृतिक संरक्षित क्षेत्र घोषणा कार्यान्वयनया निंतिं आवश्यक ऐन, कानून व नियमावली दयेकेगु विषयय् उगु सलहलह जूगु खः । प्रमुख प्रशासकीय अधिकृत बास्कोटालिसे जूगु सहलहया इलय् ऐन व नियमावलीकथं सांस्कृतिक संरक्षित क्षेत्र कार्यान्वयनया निंतिं पहल यायेगु व याकेगु विषयय् सहमति जूगु दु ।