सामुदायिक शैक्षिक सुधारय ज्याझ्वः सञ्चालन यायेत येँ महानगरपालिका व काठमाडौँ विश्वविद्यालयनाप नीतिगत सम्झौता याःगु दु। प्रमुख स्तरीय निर्णयकथं उपप्रमुख सुनिता डंगोल, प्रमुख प्रशासकीय अधिकृत बसन्त अधिकारी व विश्वविद्यालयया उपकुलपति डा. भोला थापाया रोहवरय् शिक्षा अधिकारी सीताराम कोइराला व विश्वविद्यालय स्कूल अफ एजुकेसनया डीन प्रा. डा. बालचन्द्र लुइँटेलं सम्झौता पत्रय् ल्हाःचिं तःगु खः।

महानगरपालिकां चालु आर्थिक दँनिसे कार्यान्वयनय् हःगु गौरव योजना ‘गरी खाने शिक्षा, महानगरको इच्छा’ यात बालाक्क व प्रभावकारी कथं सञ्चालन यायेत सहकार्य यायेगु मुख्य उद्देश्य खः। उगु ज्याझ्वः कथं शिक्षक तय्त क्षमता विकास तालिम उपलब्ध याकिइ । शिक्षकनापं शैक्षिक गुणस्तर सुधारया योगदान यो  मन दुपिन ब्बति काये फइ। थथे सञ्चालन जुइगु तालिमय् बिइगु दसिपौयात वृत्ति विकासया लागि योग्यता माने याइ।

सम्झौता कथं शिक्षाय् सिप, सफू नापं शुक्रवाः व बाल सञ्जाल गठन लिसे सशक्तिकरण, शिक्षक विद्यार्थी तयेगु प्रविधिमैत्री सिप विकास ज्याझ्वः, शिक्षण सिकाइ पेडागोजीमा सुधार, विद्यार्थीतयेगु लिच्वः सुधार यायेगु व प्रारम्भिक बाल विकास कक्षाया स्तरोन्नतिया लागि सहकार्य याइ।

ज्याझ्वः विश्वविद्यालयया स्कूल अफ एजुकेसनपाखे कार्यान्वयनय् वइ। टिचर कलेज ज्याझ्वः महानगरपालिकाया न्हुगु ज्याझ्वः खः।

येँ महानगरपालिकाया उपप्रमुख नापं अनुगमन लिसे मुल्याङ्कन समितिया संयोजक सुनिता डंगोलं, योजना अनुगमन यावने न्ह्यः दक्का् प्रक्रिया पूरा यायेत इनाप याःगु दु ।

थःगु कार्यकक्षय् च्वंगु समितिया बैठकय् वयकलं धयादीगु दु, ‘योजनाया लागत अनुमान, ड्रइङ् डिजाइन, सार्वजनिक खरिद प्रक्रियाय वने न्ह्यः सर्त, निर्माण पक्षनाप याःगु सम्झौताया बुँदातक सम्बन्धित प्रगतिया प्रारम्भिक सूचनानापं प्रतिवेदन तयार यायेमाः ।

थुकिया आधारय् प्राविधिक कया अनुगमन न्ह्यानेमाः।’ ‘योजना क्वचाय् धका याइगु  अनुगमन स्वया ज्या जुयाच्वंगु इलय् याइगु अनुगमन प्रभावकारी जुइ । उगु इलय् अनुगमनय् भचा द्धकूसा मिले यायेगु ई दइ। तसकं द्धकूगु दु सा योजना रोके याना हाकन द्धकेगुपाखे बचे जुइ फइ।’ धका वयकलं धयादीगु दु।

उगु बैठकय् प्रमुख प्रशासकीय अधिकृत बसन्त अधिकारीं, संघ लिसे प्रदेश सरकारं तर्जुमा याःगु योजना अनुगमनया सूचंयात आधार माने याना महानगर थःम्हेसिया हे सूचं दयका न्ह्यावने माः धका धयादीगु खः।

शेयर बजाः थौ मङ्गलवाः न थहावंगु दु। म्हिगः सोमवाः १५ अङ्कं घटे जूगु शेयर बजाः परिसूचक नेप्से थौं ३६ दशमलव ८६ अङ्कं थहावना १ हजार ९ सय ८५ दशमलव ४४ विन्दुइ थ्यंगु दु।

थौं दक्को समूहया शेयर थहवना बीमा, होटल लिसे पर्यटन, उत्पादन लिसे प्रशोधन, हाइड्रोपावर, विकास बैंक, व्यापार, माइक्रोफाइनान्स, फाइनान्स समूहया शेयर तसकं थहावंगु दु।

बोटलर्स नेपाल, धौलागिरि लघुवित्त, नेपाल रिपब्लिक मिडिया, सोनापुर मिनरल्स एन्ड आयल लिमिटेडया शेयर १० प्रतिशतं थहावंगु दु।

समग्र बजाः थहवनां थौ सीवाईसी नेपाल लघुवित्तया शेयर ५ प्रतिशत स्वया अप्पो कुहावःगु दु। थौ १ करोड २४ लाख कित्ता शेयर ४ अर्ब ३० करोड रुपैयाँया कारोबार जूगु दु।

दकलय् अप्पो शिवम् सिमेन्ट्सया १८ करोड रुपैयाँया शेयर कारोवार जुगु दु।

नेपाल आयल निगमया कार्यकारी निर्देशक उमेशप्रसाद थानीं थःगु पदपाखे राजीनामा बिःगु दु।

मंगलवाः वयकलं राजीनामा पौ लःल्हाःगु दु धका उद्योग वाणिज्य लिसे आपूर्ति मन्त्री रमेश रिजालं धाःगु दु। सरकारं २०७८ फागुन २६ गते निगमया कार्यकारी निर्देशकय् थानीयात स्वदँया लागि नियुक्त याःगु खः।

उद्योग, वाणिज्य तथा आपूर्ति मन्त्रालयया कार्यकारी छनोट समितिं गोरखाया चण्डिकाप्रसाद भट्ट, तेह्रथुमया जीवनप्रकाश सिटौला व सुर्खेतया थानीया नां कार्यकारी नियुक्तिया लागि मन्त्रिपरिषदं सिफारिस याःगु खः।

सिफारिसय् वःगु स्वम्ह मध्ये तत्कालीन शेरबहादुर देउवा मन्त्रिपरिषद् न थानीयात निगमया जिम्मेवारी बिःगु खः।

मध्यपहाडी लोकमार्ग केन्द्रित संकल्प यात्राय् वनाच्वंम्ह नेकपा एमालेया टोली उदयपुरया घुर्मी थ्यःगु दु।

घुर्मीइ एमाले अध्यक्ष केपी शर्मा ओलीनापं नेतातय्त पार्टी कार्यकर्ता व स्थानीयतय्सं लसकुस याःगु दु। अध्यक्ष ओलीनापं नेतातय्त लसकुस यायेत उदयपुर, ओखलढुंगा, सोलुखुम्बु व खोटाङपाखे कार्यकर्ता वंगु खः।

घुमीपाखे ओली ओखलढुंगाया हर्कपुरय् मंगलवाः जुइगु सभाय् ब्बति कायेगु निति खोटाङया हलेसी वनेगु ज्याझ्वः दु।