लुँ तोलां थौं निसः थहावंगु दु। लुँ तोलां निसः थहावना थौं १ लाख १८ हजार रुपैयाँ न कारोवार जुगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां थौं न्यातका कुहावःगु दु। वहः तोलां न्यातका कुहावया थौ १ हजार ४ सय ५० रुपैयाँ न कारोबार जुगु दु धका महासङ्घं धाःगु दु।

गुठी संस्थानया प्रशासक प्रमुख किरण शाक्य व मटिहानी नगरपालिकाया मेयर हरिप्रसाद मंडल दथुइ गुठी संस्थान व मटिहानी नगरपालिका दथुइ सहकार्य यायेगुलि सहलह जूगु दु।

अथेहे प्रशासक प्रमुख शाक्यं नगरपालिका दुने बि.स. १७७५ य् निर्माण जुगु नेपाःया हे न्हापागु राजकिय संस्कृति माध्यामिक बिद्यालय व मटिहानीइ च्वंगु लक्ष्मीनारायण द्यःया अवस्थाय् छु जुयाच्वंगु दु धइगु न जानकारी कयादीगु खः।

महोत्तरी जिल्लाया मटिहानी नगरपालिका वड़ा नं.७ या मटिहानीइ मंडल(धानुक) जातीया कुलद्यः देगः सार्वजनिक दलानया शिलान्यास मटिहानी नगरपालिकाया नगर प्रमुख हरि प्रसाद मंडलं यानादीगु दु।

उगु दलानं स्थानीय तय्गु ब्याहा भ्वँय् यायेगु नापं पाहाँ तय्त तयेगु निति ग्वाहालि जुइ धका नगर प्रमुख मंडलं धयादीगु खः। उगु दलान नगर स्तरीय योजना अन्तर्गत करिब २२ लाखया लागतय् निर्माण जुइत्यःगु धका प्राविधिक दिनेश साहं जानकारी बियादीगु दु।

उगु ज्याझ्वः नगर वड़ा नं. ६, ७ व ८ या वड़ा अध्यक्षपि कलीम अंसारी, जीत नारायण माझी व रितेश साह, जिल्ला समन्वय समितिया सदस्य राम लखन पंजियार, चुल्हाइ मंडल, बिश्वनाथ मंडल, अशेश्वर मंडल, प्रताप मंडल, बेचन मंडल, शैलेन्द्र मंडल लगायतपिनिगु ब्बति दुगु खः। अथेहे मटिहानी नगरपालिका वड़ा नं.९ सिमरदहीइ निर्माण जुइगु खतवे जातीया कुल द्यः शोसिया निकोझियाया देगः छगु ज्याझ्वः दथुइ मटिहानी नगरपालिकाया नगर प्रमुख हरि प्रसाद मंडलं यानादीगु दु ।

देगलय् खतवे जातीया धार्मिक पूजा जुइगु थाय् खः।

नेवाः पत्रकार राष्ट्रिय दबू यल कचाःया दुजः नापं नेपाल टेलिभिजनया पत्रकार ईश्वर महर्जनयात “ललितपुर महानगर गौरव पुरस्कार” पाखे हंगु दु।

यल महानगरपालिकाया १०५ क्वःगु स्थापना दिवसया लसताय् पत्रकार महर्जनयात छगु लाख नगद नाप हनापौं बिया ज्याझ्वःया मूपाहाँ प्रधानमन्त्री पुष्पकमल दाहाल प्रचण्डं हंगु खः।

यल महानगरपालिकाया थीथी गतिविधि बारे प्रशारण नापं सूचना सम्प्रेषण याःगुलि महर्जनयात हंगु खः। महर्जन वंगु २४ दँनिसे नेपाल टेलिभिजनय् ज्या यानादीसे यलया सम्वाददाता कथं ज्या यानाच्वनादीगु खः।

बुद्ध धर्मया गुरु खाङ्सेर रिन्पोछेजुं च्वयाबिज्याःगु सफू ‘बलियो भएर खुसीसाथ बाँचौं’या उलेज्या स्वास्थ्य मन्त्री मोहन बहादुर बस्नेतया पाखेंजूगु दु ।

ज्याझ्वलय् नवासें मन्त्री बस्नेतं संसारय् धन कमेयायेगु मखु, सन्तुष्ट जुयाः म्वायेगु तःधंगु खँ खः अले मानसिक स्वास्थ्यं शारीरिक स्वास्थ्ययात बः बिइ धयादीगु दु । उगु ज्याझ्वलय् लुम्बिनी विश्वविद्यालयया डीन डा. माणिक रत्न शाक्यं व श्रीलंका दुतावासया प्रतिनिधि मधुशां भिंतुना न्वचु बियादिल ।

अथे हे अनुवादक मिलन शाक्यं लसकुस न्वचु बियेगु झ्वलय् उगु सफूया दुने दूगु सन्देशया महत्वया नं चर्चा यानादिल । सफूया च्वमि खाङ्सेर रिम्पोछेजुं झीगु जीवनय् मेपिन्त करुणा तयाः सकसियां भिं जुइमा धकाः मनय् तयाः म्वायेगु हे बुद्धया लँय् वनेगु खः धका धयाबिज्यात ।

उगु सफू थाङ्कार देछ्येन् छ्योलिङ् गुम्बाया ग्वसालय् थुगु सफू पिदंगु खः ।जीवनय् सकारात्मक सोचया विकास यायेगु करुणा चित्तया अभ्यास यायेगु व चिन्ता रहित जुयाः म्वायेगु स्यनेगु थ्व सफूया मूल सन्देश खः धकाः वक्तापिन्सं धाःगु दु । मूल भोट भासं पिदंगु थूगु सफू अंग्रेजी चीनियाँ लगायत मेमेगु भासं नं पिदनेधुंकल ।