यल महानगरपालिकां फुटपाथ व्यवसायी तय्त व्यापार यायेगु अवसर बिइमाः धका माग तया यल महानगरपालिका कार्यालय पि दनाच्वंम्ह अभियन्ता ईः यात स्थानीय तय्सं पंगः थना बिःगु दु।

ईः न यलया लगनख्यलंनिसे मंगलबजाः तक सतकय् फुटपाथ व्यापार याके मबिइवं उमिगु व्यवसायय् समस्या वंगु धका धासे थौ मंगलवाः १०८ मिनेट दना विरोध प्रदर्शन यायेगु घोषणा याःगु खः।

मंगलबार ईः महानगरपालिका पिने दंवनेवं स्थानीय तय्स पंगः थंगु खः। स्थानीय तय्सं ‘सम्पदा मास्न पाइँदैन, फुटपाथमा व्यापार चाहिँदैन’ धका नाराबाजी यासे ईः न तःगु आन्दोलनया ब्यानर खुना बिःगु खः।

सुरक्षा अवस्थायात ध्यान तया पुल्चोकय् यक्को ल्याखं प्रहरी खटे यानातःगु खः ।

परराष्ट्रमन्त्री एनपी साउद व कतारया प्रधानमन्त्री शेख मोहम्मद बिन अब्दुल रहमान अल–थानी दथुइ शिष्टाचार भेटवार्ता जूगु दु।

थौं सोमवाः जुगु भेटवार्ताया झ्वलय् परराष्ट्रमन्त्री साउदं हमासं बन्दी दयकातःम्ह बनाइएका नेपाःया विद्यार्थी विपिन जोशीयात याकन रिहाइया लागि थप सशक्त कुतः यायेत इनाप याःगु दु धका स्वकीय सचिव दीपक जोशीं जानकारी बिःगु दु।

परराष्ट्रमन्त्री साउदं हमासनाप कतारया सम्पर्क, मध्यपूर्वया समस्याय् कतार यानाच्वंगु मध्यस्थकर्ताया भूमिका नापं कतार व नेपाः दथुइ सम्बन्धया आधारय् मानवीय मामिलाय् कतार सरकारनाप भलसा काःगु दु धका धाःगु दु।

उकिया लिसः बिइगु झ्वलय् कतारया प्रधानमन्त्री अल थानीं विपिन जोशीलगायत विदेशी बन्दीतय्त रिहाइया लागि कतार सरकारं उच्च कुतः जुयाच्वंगु दु धका धयादीगु दु।

म्हिगः आइतवाः थहावंना ’सर्किट’ लगे जुगु शेयर बजाः थौं सोमवाः हाकनं कुहावःगु दु।

न्हिच्छियकं थहाकुहावंगु शेयर बजाः परिसूचक नेप्से बन्द जुगु इलय् १५ दशमलव ४० अङ्कं कुहावया १ हजार ९ सय ४८ दशमलव ५७ विन्दुइ थ्यःगु खः। थौं निर्जीवन बीमा, माइक्रोफाइनान्स, उत्पादन तथा प्रशोधन व म्युचल फन्डबाहेक दक्को समूहया शेयर कुहावःगु दु।

विकास बैंक, जीवन बीमा, होटल तथा पर्यटन, व्यापार, फाइनान्स समूहया शेयर तसकं थहावःगु दु। अथेहे थौं दकलय् अप्पो समता घरेलु लघुवित्तया शेयर ७ प्रतिशत स्वया अप्पो कुहावःगु दु। समग्र बजाः कुहावःसां बोटलर्स नेपाल, सामुदायिक लघुवित्त व दोल्ती पावर कम्पनीया शेयर धाःसा १० प्रतिशतं थहावंगु दु। बजाः घटे जूसा कारोबार रकम धाःसा थहावंगु दु।

थौं १ करोड ८६ लाख कित्ता शेयर ४ अर्ब ८४ करोड रुपैयाँया कारोबार जूगु दु। थुगु कारोबार रकम न्याला लिपा हे दकलय् अप्पो जूगु दु। थ्व स्वया न्ह्यः असार १७ गते ५ अर्ब १ करोड रुपैयाँया शेयर कारोबार जूगु खः ।

उगु इलय् कारोबार रकम ५ अर्ब रुपैयाँ मथ्यंगु खः। दकलय् अप्पो सोनापुर मिनरल्स एन्ड आयल लिमिटेडया २५ करोड रुपैयाँया शेयर कारोवार जूगु खः।

लुँ वहःया भाः थौं कुहावःगु दु। नेपाल सुन चाँदी व्यवसायी महासङ्घया कथं थौं लुँ तोलां न्यासः कुहावःगु दु।

लुँ तोलां न्यासः कुहावया थौं १ लाख १७ हजार रुपैयाँ न कारोवार जुगु दु।

अथेहे, वहः तोलां झीन्यातका कुहावःगु दु। वहः तोलां झीन्यातका कुहावया थौं १ हजार ४ सय १० रुपैयाँ न कारोबार जुगु दु।

नेपालभाषाया कार्यकर्ता गौतम मानन्धर म्हिगः मन्त । येँया क्षेत्रपाटी च्वनादिम्ह मानन्धरयात ताःई न्ह्यः निसें प्वाःया क्यान्सर ल्वय जुयाच्वंम्ह वयकः ७२ दँय् वासः यायेगु झ्वलय् हरिसिद्धी अस्पतालय् मदुगु खः ।

नेपालभाषाया आन्दोलनय् वयकः निरन्तर न्ह्यानाच्वम्ह छम्ह ज्वमदुम्ह ब्यक्ति खः । वयकःया छम्ह ह्याय् व छम्ह काय् व जहान दी ।