धादिङ केन्द्रविन्दु जूया भुखाय् ब्बःगु दु । थौं सुथय् ८ बजे जुया २३ मिनेटय् ४.२ म्याग्निच्युडया भुखाय् ब्बःगु खः। धादिङया जःखः तकं महशुस जुगु धका खानी तथा राष्ट्रिय भूकम्प मापन केन्द्रं धाःगु दु।

भुखाय् ब्बया गुलि क्षति धका धाःसा सिइमदनि।

बागमती प्रदेशया संस्कृति, पर्यटन नापं सहकारी मन्त्री पुकार महर्जनयात शनिवाः मंसीर २३ गते किपू नगरय् तःजिक सांस्कृतिक बाजं थाना सुभाय् ¥याली तकं याना २३ गू हे खलः पुचःतपाखें मंकाः कथं सुभाय् पौ लःल्हाःगु दु।

मन्त्री महर्जनया पांगाय् च्वंगु छेँय्निसें हे सांस्कृतिक बाजं थाना ¥याली याना पांगाया लाछिइ थ्यंकाः खेँ सगं, धौ सगं बिया बेतलिं तकं चिकाः सम्मान याःगु खः । अनं लिपा सुभाय् ¥याली पांगाया ध्वाकासि जुया सल्यांचा, खासी बजाः, कुतुझ्वः, चाफः जुया बाघभैरव लागाय् थ्यंकाः छगू सभायासें हाकनं बेतलिं चिकेगु, सगं बिइगु ज्या तकं याःगु खः ।

उगु इलय् थाय् थासय् नं किपूया थीथी खलः पुचः व जनतातसें लसकुस यायेगु नापं सगं बिइगु ज्या तकं याःगु खः । उगु ज्याझ्वलय् नेवाः देय् दबू स्वनिगः विशेष प्रदेशया नायः श्रीकृष्ण महर्जनं बागमती प्रदेशय् भाषा विधेयक संसदय् न्ह्यब्वयेगु नापं पारित यायेगु नितिं मन्त्री महर्जनं यक्व योगदान यानादीगु नापं भाषा विधेयकं सच्छिदँ न्ह्यःनिसेंया नेवाःतय्गु भाषा आन्दोलनया छुं छु पूवंगुलिं वय्कःयात सुभाय् देछायेमाःगु खः धयकादिगु खः।

अथे हे किपू नगरपालिकाया उपप्रमुख शुभलक्ष्मी शाक्य  भिंतुना न्वचू बियादिसें आःया अवस्थाय् भाषा विधेयकयात कार्यान्वयनया नितिं नेवाःत हे सचेत जुया न्ह्याः वनेमाःगु खँय् बः बियादिल। अथे हे बागमती प्रदेशया संस्कृति पर्यटन नापं सहकारी मन्त्री पुकार महर्जनं भाषा विधेयक हयेगु नितिं जूगु ज्या न्ह्यथसें उकियात कार्यान्वयनया नितिं हाथ्या नं दु धासें याकनं हे नियमावली दयेकेगु नितिं ज्या जुइ धकाः धयादिल ।

उगु ज्याझ्वः ग्वसाः ग्वःगु नीस्वंगू नेवाः खलः पुचः, गुथि, विहार नापं संघ संस्थां उगु ज्याझ्वः याःगु खः।

पशुपति क्षेत्र विकास कोषं बालाचःह्रेया दक्को तयारी पूरा जूगु दु धका धाःगु दु।

पशुपति द्यःया थाय् कन्ह्यः चान्ह्यःनिसे सुरु जुइगु बालां ह्वलेगु निति दक्को तयारी पूरा जुइ धुकुगु दु धका कोषया सदस्यसचिव राजुकुमार खत्रीं जानकारी बिःगु दु ।

वयकःया कथं कोषं बालाचःह्रे कुन्हु मत च्याकेगु निति ‘कोर’ क्षेत्र दुने शतबीज ह्वलेगु व्यवस्था मिले याःगु दु धका धाःगु दु। थःथीति मदुपिनिगु लुमन्तिइ चःछि मत च्याकेगु याइ व कन्ह्यः कुन्हु शतबीज ह्वलेगु जुगुलि उमिगु लागिु माःगु सुरक्षानिसे याउक ज्या क्वचायेकेत तक व्यवस्था कोषं मिले याःगु दु धका कार्यकारी निर्देशक डा घनश्याम खतिवडां धाःगु दु ।

अथेहे पशुपतिइ मङ्सिर २४ गते चान्ह्यः निसे बालाचतुर्दशी कुन्हु यः यः थे शतबीज मह्वलेत पशुपति क्षेत्र विकास कोषं इनाप याःगु खः। कोषं कैलाश चौरय् पाल तया मत च्याके मदइगु व तर शतबीज धाःसा ह्वले दइ धका धाःगु दु ।

मत च्याकेगु निति कैलाशया फेदी, पशुपति द्यःया जःखः, पशुपति कोरक्षेत्र, हंशमण्डप, चौरनापं खुसि सिथय् च्याकेगु व्यवस्था मिले याःगु दु धका धाःगु दु।

लःसा पासा पुचः थसिया क्वचालय् नीखुक्वःगु बुसादँ व ने.सं.११४४ न्हू दँया लसताय स्वक्वःगु नेपाल भाषा न्ह्यसःलिसः धेंधेंबल्ला कासा जूगु दु ।

उगु कासाय् मुक्कं गुगुं खलकं ब्वति काःगु खः। न्ह्यसःलिसः धेंधेंबल्ला कासाय् तःखा छें दाफा खलः न्हाप, कोपिला इङलिस सेकेण्डरी स्कुल ल्यू, सामुदायिक बिकास कोष लियांल्यू लाःगु खः। अथेहे रञ्जना लिपि स्यनेज्याय मुक्कं नीन्याम्ह ब्वनामीपिन्सं ब्वतीकाःगुलि बिजय महर्जन न्हाप, अञ्जली श्रेष्ठ महर्जन ल्यू व न्ह्युजल महर्जन लियांल्यू लाःगु खः।

ज्याझ्वलय् महालक्ष्मी नगरपालिकाया नगर प्रमुख हरिगोबिन्द श्रेष्ठ मूपाहाँ कथं झायादीगुलि उप प्रमुखु लक्ष्मी महर्जन विशेष पाहाँ, वडा नं.६ या नायः धर्म महर्जन, वडा दुजः शोभा महर्जन, नेपाल लिपि गुथिया नायः अनिल स्थापितपि पाहाँ कथं झायादीगु खः।

उगु ज्याझ्वलय् सल्लाहकारपि कृष्ण कुमार महर्जन, महन्त महर्जन, सुदेन कुमार महर्जन, राजेन्द्र महर्जन व ध्रुबमान प्रधानपिन्त हनापौ लल्हाःगु खः। पुचःया नायः महेन्द्र कुमार महर्जनया सभाध्यक्षताय् जुगु उगु ज्याझ्वलय् छ्याञ्जे राकेश महर्जनं यानादीगु खः।

शेयर बजाः थौं न थहावंगु दु। म्हिगः ३ अङ्कं थहावंगु शेयर बजाः परिसूचक नेप्से थौं ११ दशमलव ७३ अङ्कं थहावना १ हजार ८ सय ५२ दशमलव ७३ विन्दुइ थ्यःगु दु।

थौं व्यापारबाहेक दक्को समूहया शेयर थहावंगु दु। बीमा, होटल व पर्यटन, उत्पादन व प्रशोधन, विकास बैंक नापं जलविद्युत् समूहया शेयर यक्को अङ्कं थहावंगु दु।

अथेहे थौं दकलय् अप्पो त्रिशूली जलविद्युत् कम्पनीया शेयर १० प्रतिशत लिसे समाज लघुवित्त र सीवाईसी नेपाल लघुवित्त शेण्यर झन्डै १० प्रतिशतं थहावंगु दु।

समग्र बजाः थहावंसा थौं ग्लोबल आईएमई लघुवित्तया शेयर साढे ७ प्रतिशत स्वया अप्पो कुहावंगु दु। ९५ लाख कित्ता शेयर २ अर्ब ७९ करोड रुपैयाँया कारोबार जुगु दु।

दकलय् नेपाल रिइन्सुरेन्स कम्पनीया ८६ करोड ८३ लाख रुपैयाँया शेयर किनबेच जूगु खः।