यल महानगरपालिका दुने थीथी थासय् लागाय् फुटपाथ पसः निषेधित क्षेत्र याःगु दु । मंगलवाः महानगर प्रहरी बलं सूचं तिका मंसिर २४ गते निसें मंगलबजार लगनख्यः लागाय् फुटपाथ पसः निषेधित क्षेत्र जुइगु ब्यूगु दु।

मंसिर २४ गते निसें उगु लागाय् फुटपाथ पसः तयेक मबिगइगु निर्णय जुगुलिं न्ह्यः हे सूचं बियाः सूचित याःगु खः । वइगु आइतवाः निसें मंगलः तक लगख्यः बसपार्कय् फुटपाथ पसः मत्यकूगु तर सुथय् ८ बजे तरकारी पसः धाःसा तयेकिगु जुगु दु।

फुटपाथ व्यापारीया ल्याः अप्वः जुयाः सुरक्षा व्यवस्थापन यायेत थाकुगुलिं बाध्य जुयाः महानगरपालिकां उगु निर्णय यानाःगु खँ धाःगु दु।

प्रधानलिसें गृहमन्त्री नारायणकाजी श्रेष्ठयात न्यान्हु तक अस्पतालय् च्वनेमाललिइगु जुगु दु।

मुटुइ समस्या वयेवं गंगालाल राष्ट्रिय हृदय रोग केन्द्र बाँसबारीइ एन्जियोप्लास्टी सर्जरी क्वचाये धुंकाः चिकित्सकपिन्सं मन्त्री श्रेष्ठयात न्यान्हुतक अस्पतालय् हे तइगु जूगु दु । आः सघन उपचार कक्षय् च्वनाच्वंम्ह मन्त्री श्रेष्ठयात स्वन्हुनिसें न्यान्हुतक अस्पतालय् हे तयेमाःगु सल्लाह ब्यूगु उपप्रधानमन्त्री श्रेष्ठया सचिवालयं जानकारी ब्यूगु दु ।

असोजया लिपांगु वाः मन्त्री श्रेष्ठ मित्रराष्ट्र गणतन्त्र चीनया भ्रमणय् वंगु इलय् नुगःचुइ एक्युट मायोकार्डियल इन्फार्कसनु जूगु व चीनया पेकिङ युनियन मेडिकल कलेज अस्पतालय् आकस्मिक कोरोनरी एन्जियोग्राफी याःबलय् ओन्टस मार्जिनल शाखाय् अवरोध खनेदूगु खः । वासः यायेगु झ्वलय् याःगु स्वास्थ्य परीक्षणय् मुटुइ मेगु पाखे धमनीइ तकं छुं अवरोध खनेदूगु जानकारीइ वःगु खः ।

नुगःचुइ हल्का असहज महसुस जुइधुंकाः उपप्रधानमन्त्री श्रेष्ठ वंगु बहनी अस्पताल भर्ना जूगु खः । गंगालाल हृदय केन्द्रय् डा. अरुण मास्केलिसेंया चिकित्सक पुचलं छुं अवरोध दुगु भागय् बहनी हे एन्जियो प्लास्टी सर्जरी याःगु खः । आः मन्त्री श्रेष्ठया स्वास्थ्य अवस्था सामान्य लिसें स्थिर जूगु अस्पतालं जानकारी ब्यूगु दु ।

प्रधानमन्त्री पुष्पकमल दाहाल प्रचण्डं सुथय् हे अस्पताल थ्यंकाः उपप्रधानलिसें गृहमन्त्री श्रेष्ठया स्वास्थ्य अवस्थाबारे जानकारी काःगु खः ।

नेपालभाषा एकेदेमिया पुलांम्ह चान्सलर व न्हूदँ नेपाल सम्बत राष्ट्रिय समारोह समितिया पुलांम्ह नायः चित्तरन्जन नेपालीयात लुमंकाः छगू लुमन्ति मुँज्या जूगु दु ।

एकेदेमिया चान्सलर यज्ञरत्न धाख्वाःया सभापतित्वय् जूगु उगु ज्याझ्वलय् ब्वति कयादीपिं सकसिनं दिवंगत नेपालीया सुगतिया कामना यासें वय्कःया किपा न्ह्यःने देवा छप्वाः छप्वाः च्याकादीगु खः ।

अथेहे वय्कःया आत्माया चिरशान्ति कामना यासें थीथी धार्मिक परम्परा कथं पाठ नं याःगु खः । ज्याझ्वलय् न्हूदँ समारोह समितिया सल्लाहकार व एकेदेमिया दुजः प्रा. प्रेमशान्ति तुलाधर, एकेदमिया पुलांम्ह दुजः समालोचक प्रा डा चन्द्रमान बज्राचार्य, मदुम्ह चित्तरन्जनया काय् मनोज राजभण्डारी, परिवारया मेम्ह दुजः मन्जुर राजभण्डारी व नेपालभाषा एकेडेमीया भाइस चान्सलर नेवाः न्ह्यलुवा मल्ल के सुन्दरं चित्तरन्जन नेपालीया गुण लुमंकादीगु खः ।

एकेदेमिया प्राज्ञ दुजः विजयरत्न असंबरें न्ह्याकादीगु ज्याझ्वलय् न्हूदँ राष्ट्रिय समारोह समितिया सचिवालय दुजः सुजिव बज्राचार्यं सुभाय् देछायादीगु खः ।

नेपाल आयल निगमं इन्धनया भाः घटे याःगु दु। बिहीवाः चान्ह्यः १ बजेनिसे लागू जुइगु कथं डिजेल, मचिकं व पेट्रेलय् भाः घटे याःगु दु।

पेट्रोल लिटरय् नितका व डिजेल नापं मचिकनय् लिटरं प्यतका घटे याःगु दु। एलपी ग्यासया भाः धाःसा यथावत याःगु दु।

न्हुगु भाः कथं चारआली, विराटनगर, जनकपुर, अमलेखगञ्ज, भलवारी, नेपालगञ्ज, धनगढी व वीरगञ्ज डिपोया १५ किलोमिटर क्षेत्रय् पेट्रोल लिटरं १६७ रुपैयाँ ५० पैसा याःगु दु। सुर्खेत व दाङ क्षेत्रय् १६९ रुपैयाँ व स्वनिगः, पोखरा व दिपालय डिपोया १५ किलोमिटर क्षेत्रय् पेट्रोल लिटरं १७० रुपैयाँ कायम याःगु दु।

डिजेल व मचिकंया भाः न १५७ रुपैयाँ ५० पैसा, १५९ रुपैयाँ १६० रुपैयाँ याइगु दु।

एलपी ग्यासया भाः देयन्यकं सिलिण्डरं १८९५ रुपैयाँ हे कायम याःगु दु धका निगमं धाःगु दु।

थौं ३६ क्वःगु विश्व एड्स दिवस । ‘समुदायया नेतृत्वय् एड्सयात अन्त्य याये’ धइगु नारा ज्वना देय्न्यकं चेतनामूलक ज्याझ्वः यायेत्यःगु दु।

एचआईभी व एड्ससम्बन्धी प्रभावकारी रोकथाम, हेरचाह, ग्वहालि लिसे उपचार सेवाया लागि विश्वव्यापी ध्यानाकर्षण यायेगु जनचेतना हयेगु निति दँय् दँसं डिसेम्बर १ तारिखय् थुगु दिवस हनिइगु याइ। स्वास्थ्य लिसे जनसङ्ख्या मन्त्रालय अन्तर्गतया राष्ट्रिय एड्स लिसे यौन रोग नियन्त्रण केन्द्रं दिवसया लसताय् थीथी चेतना व सन्देशमूलक ज्याझ्वः यायेत्यःगु दु।

केन्द्रया कथं नेपालय् सन् २०२२ या लिपां तक ३० हजार मनू तय्त एचआईभी सङ्क्रमण जुगु अनुमान दु। सन् १९८१ य् न्हापां एचआईभी सङ्क्रमित लुइवं सन् २०२२ या अन्त्य तक हलियकं ८ करोड ५६ लाख म्हेसित सङ्क्रमण जुइ धुकुगु दु।

सङ्क्रमणया कारण ४ करोड ४ लाख म्हेसियागु ज्यान वने धुकुगु तथ्याङ्कय् दु । हलिमयय् न्हिन्हि ३ हजार ६ सय मनूत एचआईभी सङ्क्रमित जुयाच्वंगु दु।