प्रधानमन्त्री पुष्पकमल दाहाल प्रचण्डं नेपालय् पुँजी परिचालन यायेत संयुक्त अरब इमिरेट्स (यूएई) या लगानीकर्ता तय्त इनाप यानादीगु दु।

जलवायु परिवर्तनसम्बन्धी संयुक्त राष्ट्रसङ्घीय सम्मेलन कोप–२८ य् ब्बति कायेगु झ्वलय् म्हिगः बिहीवाः अबुधाबी थ्यःगु खः। प्रधानमन्त्रीं नेपाल–दुबई व्यापार मञ्चयात सम्बोधन यायेगु झ्वलय् नेपालय् पुँजी प्रवाह यासे उकिया प्रतिफल कायेत इनाप यानादीगु खः ।

दुबई उद्योग वाणिज्य सङ्घनाप सहकार्यय् अवुधाबीइ नेपाली राजदूतावास व नेपाल उद्योग वाणिज्य महासङ्घया मंकाः ग्वसालय् जुगु ज्याझ्वलय् प्रधानमन्त्री प्रचण्डं वैदेशिक लगानी दुकायेत नेपाल सरकारं अवलम्बन याःगु नीतिगत सुधारबारे जानकारी बियादीगु खः।

यूएईया अर्थराज्यमन्त्री अब्दुल्लाह अहमद मोहम्मद अल सालेहं यूएई व नेपाः दथुइ आर्थिक सम्बन्धयात अझ क्वातूकं यकेत सहकारी नापं साझेदारी अपरिहार्य दु धका धयादीगु खः।

बिहीवाःनिसे कोप–२८ दुबईलय् शुरु जुगु खः।

प्रधानमन्त्री पुष्पकमल दाहाल प्रचण्डयात कया दुबई वनेगु झ्वलय् म्हिगः बुधवाः छुटे जूपि ३१ म्ह यात्रुयात ज्वना नेपाल वायु सेवा निगम (नेपाल एअरलाइन्स) या जहाज थौं बिहीवाः वनिइगु जुगु दु ।

यात्रु तय्त जूगु असुविधाप्रति क्षमायाचना यासे निगमं थौं वैकल्पिक उडानपाखे दक्को यात्रुतय्त गन्तव्यय् थ्यकिइगु प्रबन्ध मिले यागु दु धका जानकारी बिःगु दु।

म्हिगः चान्ह्यः ११ बजेया तालिका दुगु खःसा बहनि साढे ९ बजे ब्बकूगुलि यात्रुतय्गु उपलब्ध मजुगु इमेल, फोन नम्बर व ट्राभल एजेन्सीपाखे जानकारी याकगुलि छू यात्रुत छुटे जूगु धका निगमं धाःगु खः।

निगमं वंगु चान्ह्यः प्रधानमन्त्री प्रचण्डयात ज्वना दुबई वनेगु झ्वलय् ३१ म्ह यात्रु छुटे जूगु खः।

नेकपा एमालेया अध्यक्ष केपी शर्मा ओलीं हाकनं रैती जुइत थःपि तयार मदु धका धाःगु दु।

झुलाघाट–चिवाभञ्ज्याङ समृद्धिया लागि संकल्प यात्राया न्हापागु दिं बैतडीया गोठालापानीइ जूगु आमसभायात सम्बोधनयासे ओलीं सरकार कमजोर जुगुलि प्रतिगामी शक्ति तय्स छ्यं ल्ह्वना वःगु धका धयादीगु खः।

गणतन्त्रया विरोध यायेगु दुस्साहसी ज्या जुगु धका धयादीसे ओली न्ह्यने धाःगु दु, ‘उगु इलय् राजतन्त्र दु, उगु राजतन्त्रया आः सालिक दय्का श्री ५ महाराजाधिराज धका च्वया तमासा यायेगु असंवैधानिक ज्या जुयाच्वंगु दु।’

एमाले अध्यक्ष ओलीं हाकन लिफः स्वया लिहावनेगु व रैती हजुइत थःपि तयार मदु धका धयादीगु खः ।

स्वनिगः नाप थौं पहाडी क्षेत्रया मौसम सुपाचँ भुना च्वंगु दु। भारतया राजस्थान जःखःया प्रभावया न्यून चापीय प्रणालीनापं पश्चिमी वायुया प्रभाव नेपालय् न लागूलि वाः वये फू धका मौसमविद्तय्सं धाःगु दु।

थौं न्हिनय् स्वनिगलय् फाट्टफुट्ट व भचा वाः वयेफु धका धाःगु दु। मौसमविद्या कथं थौं कोशी, बाग्मती, गण्डकी व लुम्बिनी प्रदेशया पूर्वी क्षेत्रय् वाः वये फू धका धाःगु दु।

प्रधानमन्त्री पुष्पकमल दाहाल प्रचण्ड जलवायु परिवर्तनसम्बन्धी संयुक्त राष्ट्रसङ्घीय सम्मेलन कोप–२८ य् ब्बति कायेगु निति नेपाली प्रतिनिधिमण्डलया नेतृत्व यासे वःगु चान्ह्यः संयुक्त अरब इमिरेट्स (यूएई) वंगु दु।

नेपाल एअरलाइन्सया नियमित उडानपाखे वयकःया नेतृत्वय् दुबईलय् वःगु दु। दुबईलय् थौंनिसे सम्मेलन शुरु जुइत्यःगु खः । जलवायु परिवर्तनसम्बन्धी संयुक्त राष्ट्र सङ्घीय फ्रेमवर्क कन्भेन्सनया पक्षराष्ट्र तयेगु सम्मेलनया २८ क्वःगु संस्करणय् प्रधानमन्त्री प्रचण्डं नेपाःपाखे सम्बोधन याइगु जूगु दु।

उगु सम्मेलनय् नेपाःया मू एजेन्डा जलवायु परिवर्तन व उकिइ हिमालय क्षेत्रय् लाःगु लिच्वः व उकिया न्यूनीकरणया खँ जुइत्यःगु खः। प्रधानमन्त्री प्रचण्ड कन्ह्यः व कसं ‘विश्व जलवायु शिखर सम्मेलन’ या उच्चस्तरीय सत्रय् ब्बति काइगु जुगु दु। वयकलं कसं १६ गते सम्मेलनय् सम्बोधन याइगु ज्याझ्वः दु धका परराष्ट्र मन्त्रालयं धाःगु दु।

प्रधानमन्त्री प्रचण्ड मङ्सिर १७ गते स्वदेश लिहावइगु ज्याझ्वः दु। कोप–२८ सम्मेलन मंसिर २६ गते तक न्ह्याइ।