नेकपा एमालेया अध्यक्ष केपी शर्मा ओली कम्बोडियाय् वंगु दु। कम्बोडियाय् जुइच्यःगु निर्वाचनय् पर्यवेक्षणया लागि ओली वंगु मंगलवाः चान्ह्यः उखे पाखे वंगु खः।

ओलीया भ्रमणदलय् जहान राधिका शाक्य व उपमहासचिव विष्णु रिमालपि न वःगु खः।

कम्बोडिया वने न्ह्यः ओलीं पार्टीया कार्यवाहक अध्यक्षया जिम्मेवारी वरिष्ठ उपाध्यक्ष ईश्वर पोखरेल व उपाध्यक्ष सुवास नेम्वाङलयात बिःगु दु धका वयकःया सचिवालयं धाःगु दु।

शेयर बजाः परिसूचक नेप्से थौं मङ्गलवाः न थहावःगु दु। शेयर बजाः परिसूचक नेप्से थौं ९ दशमलव ९१ अङ्कं थहावना २ हजार १ सय ५४ दशमलव शून्य ७ विन्दुइ थ्यःगु दु।

थौं बैंकिङ, लगानी, बीमा, उत्पादन, लघुवित्त वर मेमेगु समूहया शेयर थहावःगु दु। मेगु समूहया शेयर धाःसा कुहावःगु दु। दकलय् अप्पो थौंै वीपीडब्ल्यू लघुवित्त व युनाइटेड अजोड इन्सुरेन्स कम्पनीया शेयर १० प्रतिशतं थहावःगु दु।

२५५ गु कम्पनीया ८६ लाख ७६ हजार कित्ता शेयर कारोबार थौं जूगु दु। ५६ हजार ४ सय पटक जूगु कारोबारय् ३ अर्ब ५४ करोड ८८ लाख रुपैयाँया शेयर कारोवार जूगु दु।

दकलय् अप्पो स्वालम्बन लघुवित्त कम्पनीया २१ करोड ७७ लाख रुपैयाँया शेयर कारोवार जूगु दु।

नेपाली कांग्रेसया केन्द्रीय कार्यसमितिया बैठकय् विभाग थपे यायेगु प्रस्ताव पेश याःगु दु।

पार्टी कार्यालय, सानेपाय् थौं मंगलवाः सुरु जूगु बैठकय् महामन्त्री गगनकुमार थापां आःतक कायम जूगु २८ गु विभागय् छु थप यायेगु गृहकार्य जूया च्वंगु दु धका धाःगु दु।

उगु प्रस्तावय् बैठकं थ्व हे वइगु भदौ १५ गते दुने दक्को विभाग गठन याना पूर्णता बिइगु धका धाःगु दु। नापं खुुल्लाय् छकः केन्द्रीय कार्यसमितिइ प्रगति विवरण लःल्हायेमाः।

नेपाली कांग्रेसया केन्द्रीय समिति बैठक सुरु जूगु दु। पार्टी कार्यालय सानेपाय् सुरु जूगु बैठक सामाजिक सञ्जालपाखे प्रत्यक्ष प्रशारण याःगु दु।

बैठकय् महामन्त्री गगन थापां पार्टीया एजेण्डा न्ह्यब्बयादीगु खः। वया लिपा कांग्रेसया निर्वाचन परिचालन समिति संयोजक गोपालमान श्रेष्ठं थःगु प्रतिवेदन न्ह्यब्बयादीगु खः।

नेपाली कांग्रेसया नेता गोपालमान श्रेष्ठं पार्टीया वरिष्ठ नेताय् थःगु दाबी न्ह्यब्बयादीगु दु ।

रामचन्द्र पौडेल राष्ट्रपतिइ निर्वाचित जुइ धुका सभापति शेरबहादुर देउवां वरिष्ठ नेता तोके याःगु मदुनि।

केन्द्रीय कार्यसमितिया बैठक जुइ न्ह्यः श्रेष्ठं थः वरिष्ठ नेता यायेमाः धका दबाव यानादीगु दु ।