लुँया भाः आःतकया हे अप्पो थ्यःगु दु। लुँ तोलां थौ स्वसः थहावःगु दु। लुँ तोलां स्वसः थहावना थौं १ लाख १७ हजार ७ सय रुपैयाँ न कारोवार जूगु दु धका नेपाल सुन चाँदी व्यवसायी महासङ्घं धाःगु दु।

अथेहे वहःया भाः धासा म्हिगः थे तु हे तोलाया १ हजार ५ सय रुपैयाँ न कारोबार जुगु दु।

वज्राचार्य क्लबया प्यक्वःगु तःमुँज्या व न्हय्क्वःगु दँमुँज्या क्वचाःगु दु। उगु ज्याझ्वःया मूपाहाँ उच्च अदालतया न्यायाधीश राज्यलक्ष्मी वज्राचार्यं उलेज्या यानादीगुलि क्लबया कार्यसमितिया न्हूधाः नं जूगु खः।

ज्याझ्वलय् ललितपुर उद्योग वाणिज्य संघया नायः विश्वराज वज्राचार्य व सशस्त्र प्रहरी बलया एस.पि. समेनन्द वज्राचार्यपिंत विशेष कथं हनेज्या नं याःगु खः । न्हूगु ज्यासना पुचलय् सर्जु वज्राचार्य ं नायः जुयादीगु दुसा न्वकू सृजन वज्राचार्य, छ्याञ्जे अल्बर्ट वज्राचार्य, लिउछ्याञ्जे श्रद्धा वज्राचार्य, दांभरी मोनिशमानन्द वज्राचार्य, लिउदांभरी कुशल वज्राचार्य ल्यःगु दु ।

अथे हे सजन वज्राचार्य, बिजयराज वज्राचार्य, स्नेहा वज्राचार्य, आकाश वज्राचार्य व श्रीजा वज्राचार्यपिं दुजलय् ल्यःगु दु । अथे हे वंगु पंचदान कुन्हु सामूहिक पञ्चदान ज्याझ्वःपाखें मुंगु दां १,०१,१०१ तकाया चेक क्लबया नायः सर्जु वज्राचार्यं नेवाः छेँ दयेकेत नेवाः देय् दबूया नायः पवित्र वज्राचार्ययात लःल्हागु खः ।

लसकुस न्वचु डा. मनिसरत्न वज्राचार्यंयाःगु उगु ज्याझ्वलय् वार्षिक प्रगति विवरण सृजन वज्राचार्य व आर्थिक प्रतिवेदन ज्ञानरत्न वज्राचार्यं न्ह्यब्वःगु खः । मुंज्यां वज्राचार्य क्लबया न्हूगु ज्यासना पुचः सर्वसम्मतं ल्यःगु दु ।

ज्याझ्वलय् प्रदेश सभाया सांसद शैलेन्द्रमान वज्राचार्य, न्हूदँ समारोह समितिया नायः प्रा.डा. नरेशमान वज्राचार्य, चर्यानृत्य गुरु यज्ञमानपति वज्राचार्य, प्रा.डा. हृदयरत्न वज्राचार्य लगायत थीथी ख्ययाःपिं प्रतिष्ठित वज्राचार्यपिं पाहांकथं ब्वति काःगु खः ।

सूर्यविनायक–रत्नपार्क रुट लच्छि तक चले जुगु द्रुत बस सेवा न्ह्यागू दु। हाकनं मेगु झीछगः बस थपे याना साविकया हे रुटय् थौंनिसे न्ह्यागू दु।

थौं सुथय् साढे ८ बजेनिसे हाकन न्ह्यागु दु । थ्व स्वया न्ह्यः नीन्यागः बस न्ह्यागु खः सा आः मेगु थप झीछगः याना रत्नपार्क निसे सूर्यविनायक रुटय् स्वीखुगः बस चले जुगु दु।

उगु बस थौं सुथय् साढे ८ बजेनिसे स्वगू स्वंगू मिनेटया दुने सूर्यविनायकपाखे रत्नपार्क वःगु दु । सूर्यविनायकनिसे रत्नपार्क साढे १० बजेतक चले जुइ व न्हिनय् साढे ३ बजेनिसे साढे ५ बजेतक रत्नपाकनिसे सूर्यविनायकतक चले जुइ।

थ्व स्वया न्ह्यः उगु बस रत्नपार्क व सूर्यविनायक निगु थासं न्यागू न्यागू मिनेटय् चले जुगु खःसा न्हिं सुथय् ९ बजेनिसे ११ बजेतक व न्हिनय् ४ बजेनिसे सनिलया ६ बजेतक चले जुःगु खः।

प्रज्ञा पारमितायात बुद्धवचन अनुवाद समितिं हिमाली भोट भाषा व मूल संस्कृत ग्रन्थया उगु कृतियात सामान्य धर्माबलम्बीयात तकं थुइकेत अःपुइमा धकाः खस नेपाली भासं अनुवाद याःगु दु।

बौद्ध साहित्यया छगू लख श्लोक दुगु ‘शतसह्रसिका प्रज्ञापारमिता’ ग्रन्थ न्हापांखुसी खस नेपाली भाषाय् नं अनुवाद जूगु दु । प्यदँ बिकाः जूगु थ्व अनुवादया ज्याय् थ्यंमथ्यं २ करोड ५९ लाख तका दां खर्च जूगु खँ स्वयम्भु गुम्बाया गुरु झ्याङ्चे छ्याजे गोसेक रिम्पोछें कनादीगु दु ।

वय्कःया कथं बौद्ध साहित्यय् महत्वपूर्ण तायेकीगु शून्यता दर्शनय् आधारित ज्ञानयात लिपिबद्ध यानातःगु थुगु कृतिइ गुगुं नं वस्तुया स्वतन्त्र अस्तित्व मदुगु, वस्तु व पदार्थ सहअस्तित्वय् आधारित जूगु, सत्ता व शक्ति हिलीगु सन्देश बियातःगु दु । लिसे वय्कलं विश्व शान्ति व मानव कल्याणया नितिं बौद्ध दर्शन लिसें आध्यात्मिक शिक्षाया महत्व दुगु खँ कनादिसें अज्ञानताया कारणं संसारय् युद्ध, हिंसा जुयाच्वंगु व उकियात म्हो यायेत बौद्ध दर्शन व साहित्ययात प्रवद्र्धन यायेमाःगु खँय् बः बियादिल ।

बुद्ध वचन अनुवाद समितिया अध्यक्ष लिसें बौद्ध विद्वान टिका शेर्पां च्यागूगु शताब्दीइ सम्भोट भाषाय् लिपिबद्ध यानातःगु उगु बौद्ध साहित्ययात अनुवादया माध्यमं अन्तर्राष्ट्रिय रुपय् प्रवद्र्धन यायेत थःगु संस्था क्रियाशील जुयाच्वंगु जानकारी बियादिल ।

वय्कःया कथं झिंखुगू भाग दुगु थ्व सफूया मू ६५ द्वः तका तयातःगु दु । प्रारमिता सफू नेवाः बौद्धतय्सं नं छेँय् छेँय् तयेगु व पाठ यायेगु चलन दु ।

 नेपाल संवतयात सरकारी दस्तावेजय् नं छ्यला यंकेगु धकाः नेपाल सरकारं याःगु निर्णय कार्यान्वयन यायेगु लागिं सरकारं तयारी शुरु याःगु दु ।

थ्व हे झ्वलय् थ्व संवत् गय् यानाः छ्यला यंकेगु धकाः सरकारयात सुझाव बीगु लागिं पञ्चाङ्ग निर्णायक समितिं म्हिगः सहलह यागु दु । नेपाल संवतयात सरकारी दस्तावेजय् छ्यलेगु निर्णय कार्यान्वयन यायेगु नितिं थःपिंत छ्वयाहःगु पौयात कयाः समितिं म्हिगः सरोकारवाला पक्षतनाप सहलह ब्याकूगु खः ।

पञ्चाङ्ग निर्णायक समितिया नायः पं. श्रीकृष्ण अधिकारीया उपस्थितिइ जूगु उगु सहलहय् संस्कृति मन्त्रालयं विक्रम संवत गुकथं छ्यलीगु खः, उकथं हे नेपाल संवत नं छ्यलेगु व थुकिया नितिं माःगु निर्णय यानाः छ्वयाहयेत निर्देशन ब्यूकथं थथे सहलह मुँज्या याःगु खः ।

सहलह मुँज्याय् नेवाः देय् दबूया नायः पवित्र वज्राचार्य, नेपाल संवत् न्हूदँ राष्ट्रिय समारोह समितिया सचिवालय दुजः सुजीव बज्राचार्य व मचाराजा महर्जन, नेपाल संवत तिथिपौया अभियन्ता डा. भगवानदास मानन्धर, राष्ट्रिय विभूति शंखधर प्रतिष्ठानया श्याम मानन्धर, दैवज्ञ ज्योतिष रति ज्योति श्रेष्ठलिसें थीथी ज्योतिषपिनि उपस्थिति दुगु खः । सहलह मुँज्यां नेपाल सरकारया दस्तावेजय् विक्रम संवत् गथे खः अथेहे नेपाल संवत् नं छ्यलेगु नितिं सूचना विभागपाखें नेपाल सरकारं पिथनीगु क्यालेन्डरय् गथे च्वयातःगु खः, अथेहे च्वयेगु खँय् ताःई सहलह जूगु खः ।

सरकारया दस्तावेजय् गथे ‘वि.सं. २०८० मंसीर १० गते आइतवाः’ धकाः च्वइगु खः, अथेहे ‘ने.संं. ११४४ कछलाथ्व चतुर्दशी’ च्वयेगु धकाः मुँज्यां निर्णय याःगु खः । लिसें मुँज्यां नेपाल सरकारया दस्तावेजय् नेपाल संवतया मौलिकता कथं आखलं हे तिथि च्वयेगु सुझाब बीगु निर्णय नं याःगु दु ।

वंगु ने.सं. ११४३ कौलागा अमाई ९ (कार्तिक २७ गते) सोमवाः नेपाल सरकारया मन्त्रिपरिषदं नेपाल संवतयात नं सरकारी दस्तावेजय् च्वयेगु निर्णय याःगु खः ।