ह्यगृब भैरबनाथ व ३२ पानेजु संघं थुगु पालय् किपूया प्यंगःथामय् स्वां तय्मयकिगु जूगु दु। प्यंगःथामय् बुगंद्यःया प्रतिमूर्ति व याकः मिसाया मूर्ति दयकूगु विरोधय् अथे घोषणा याःगु दु।

किपूया सुखी गःछें समाज टोल समितिं २०७९ मंसिर १५ गते मूर्ति पलिस्था यागुलि ह्यगृब भैरबनाथ व ३२ पानेजु संघं लिखित असहमति याःगु खः। पानेजु संघया लिखित सहमति मदुगु न्हापानिसे उगु थासय् छु न मूर्ति मदुगुलि बुगंद्यःया प्रतिनिधिपात्र जलपानेजुपिन्स दँय् दँसं थतित्वालय् खालि तुतिइ न्यासिवना याकःमिसायात स्वां बिइ यकेगु जीवित परम्पराया विरुद्ध मूर्ति स्थापना यागुलि थुगुसिनिसे स्वां तये यकिइमखु धका संघया अध्यक्ष यज्ञरत्न शाक्यं जानकारी बिःगु दु।

संघं वंगु पुस २ गते बैठक च्वना किपूया प्यंगःथामय् बुगंद्यःया प्रतिमूर्ति व याकः मिसाया मूर्ति दतलय् स्वां तवनिइ निर्णय याःगु खः। सुखी गःछें समाज टोल समितियात पुरातत्व विभागं निकः तकः पौं च्वया मूर्ति चिइकेत धाःगु खः। अय्न मूर्ति हटे मयागुलि स्वां तवनिइ मखु धका शाक्यं धाःगु दु। बुगंद्यःया भोतो जात्रा न्ह्यः यलया मंगलबजार सोह्रखुट्टे फल्चाय् साइत स्वया पिहावंगु साइतया प्यन्हु न्ह्इः बुगंद्यःया प्रतिनिधि कथं जल पानेजुं खालि तुतिइ न्यासि वना किपूया याकःमिसायात बुगंद्यःया स्वां बिइयकिइगु जीवित परम्परा जुयावया च्वंगु खः ।

संघया अध्यक्ष शाक्यया कथं बुगंद्यःया नित्य पूजा कर्म यायेत गुठी संस्थानं  वंशजया आधारय् २४ म्ह शाक्य थरया व न्ह्यम्ह बज्राचार्य थरया पुजारीपिन्त नियुक्त याना धार्मिक नाप ऐतिहासिक परम्परा दु। शाक्यया कथं किपूया मूर्ति स्थापनाया विरोधय् दक्को पुजारीपि एकमत जुगु दु।

सेयर बजार परिसूचक नेप्स थौं दोहोरो अंकं थहावःगु दु। थौं मंगलबाः बजाः परिसूचक नेप्से १७.३६ अंकं थहावना १९०५.६८ अंकय् बन्द जूगु दु।

मंगलबाः म्युचुअल फण्ड बाहेक दक्को उपसूचक थहावंगु दु सा कारोबार रकम न थहावंगु दु। बजाःयात लिड याइगु बैंकिङ उपसूचक न ०.९९ प्रतिशतं थहावंगु दु सा होटल नाप पर्यटन उपसूचक दकलय् अप्पो १.९२ प्रतिशत व उत्पादनमूलक उपसूचक १.८२ प्रतिशतं थहावंगु दु।

शिवम् सिमेन्ट दकलय् अप्पो ७ करोड ९ लाखया कारोबार जुगुलि कालिञ्चोक दर्शन लिमिटेडया ३ करोड १ लाख व नबिल बैंकया करिब २ करोड ७० लाख रुपैयाँया कारोबार जूगु दु। सेयर बजारय् कुल २१७ गु कम्पनीया सेयर कारोबार जूगुलि १६८ कम्पनीया सेयर भाः थहावःगु दु।

अथेहे ४४ गु कम्पनीया सेयर भाः कुहावःगु दु सा न्याःगु कम्पनीया सेयर भाः स्थिर जूगु दु। तारागाउँ रिजेन्सी होटलया सेयर भाः दकलय् अप्पो ८ प्रतिशतं थहावःगुलि खप्तड लघुवित्तया सेयर भाः ७.८५ प्रतिशत व सिद्धार्थ प्रिमियम इन्स्योरेन्स कम्पनीया सेयर भाः ४.५१ प्रतिशतं थहावःगु दु।

वंगु २४ घण्टाया दुने देयन्यक थप १३६ म्हेसित कोरोना संक्रमण पुष्टि जूगु दु । स्वास्थ्य मन्त्रालयया कथं १ हजार ५९१ म्हेसिगु नमुना परिक्षण यागु खः।

उकि मध्ये १०१९ म्हेसिगु पीसीआर परीक्षण यागुलि ९२ म्ह व ५७२ म्हेसिगु एन्टीजने परीक्षण यागुलि ४२ म्ह याना १३६ म्हेसित कोरोना खनेदुगु दु।

थ्व नाप आःतक कोरोना सक्रिय संक्रमितपि ३९० म्ह थ्यःगु दु।

समावेशी शिक्षाया अवधारणा कार्यान्वयनया लागि प्यंगु प्रदेशया ३९ गु विद्यालयया प्राथमिक तहया विद्यार्थीपिन्त ब्वकेगुनिति ९६ म्ह शिक्षकपिन्त तालिम बिःगु दु।

नेपाल अपाङ्ग महिला सङ्घं विश्व शिक्षालगायत अपाङ्गताया ख्यलय् ज्या याना वयाच्वंगु सङ्घ संस्था नाप सहकार्यय् मधेस प्रदेश, कर्णाली प्रदेश, गण्डकी व वागमती प्रदेशया १७ गु स्थानीय तहया विद्यालयय् शिक्षकपिन्त तालिम बिःगु दु।

सङ्घं येँ छगु ज्याझ्वःयासे प्रदेश स्तरीय समिक्षायासे प्रतिनिधी सभा सदस्य प्रतिमा गौतमं समावेशी शिक्षा नीतिया पूर्ण कार्यान्वयनया लागि भौतिक पहुँच थकायेगु नाप समाजं अपाङ्गता जूपि मनूतयेत याइगु व्यवहार हिलेमाः धका धयादीगु खः। अथेहे शिक्षा नाप मानव स्रोत विकास केन्द्रया निर्देशक डा.दिव्या दवाडीं सयकाःगु हलियकं खनेदुगु भौतिक पूर्वाधार निर्माण यासे दक्को मस्तय्त छगु हे विद्यालय थःथःगु क्षमता कथं शिक्षा बिइमाः धका धयादीगु खः।

सङ्घया उपाध्यक्ष मिना पौडेलं न्ह्यब्बःगु कार्यपत्रय् विद्यालय अध्यापन याइपि शिक्षक, विद्यार्थी, विद्यालय व्यवस्थापन समितिया पदाधिकारी, अभिभावकपिन्त अभिमुखिकरण तालिम व विद्यालययात प्रविधिमैत्री दयकेत १४ गु विद्यालयय् इन्टरनेट, प्रोजेक्टर व ल्यापटप नाप मेगु २१ प्रकारया सामग्री न लल्हाःगु खः।

बुगंद्यःया रथ म्हिगः सोमबाःनिसे सालेगु सुरू जूगु दु ।

बुगंद्यः रथय् तःगु प्यन्हुलिपा रथ सालेगु परम्परा कथं म्हिगः ४ बजे जुया ४५ मिनेटय् रथ सालेगु सुरु याःगु खः। यलया पुच्वोःनिसे सालां गाःबहाल यकिइ याइ।

वैशाख महिनाया पारुनिसे निला तक जात्रा यायेगु याइ।