Display Style:
Column Style
चित्लाङ जःखः केन्द्रविन्दु जुया भुखाय् ब्बलं
लहनान्युज | कछलाथ्व एकादशी ११४४, मंसीर ७ बिहीवाः
मकवानपुर केन्द्रविन्दु जूया थौं चान्ह्यः भुखाय् ब्बःगु दु।
मकवानपुरया चित्लाङ जःखः केन्द्रविन्दु जुया थौं चान्ह्यः १ बजे जूया १९ मिनेटय् ४.५ म्याग्निच्युडया भुखाय् ब्बःगु दु धका राष्ट्रिय भूकम्प मापन लिसे अनुसन्धान केन्द्रं धाःगु दु।
भुखाय् ब्बःगु स्वनिगलय् तक महसुस जूगु दु। राष्ट्रिय भूकम्प मापन केन्द्रं थुकिया सम्बन्धी थप विवरण अद्यावधिक जुगु मदुनि।
झोछेँ शंखधर दिवस
लहनान्युज | कछलाथ्व दशमी ११४४, मंसीर ६ बुधवाः
थौं शंखधर दिवसया लसताय् थीथी थासय् हने ज्या जुगु दु।
नेपाल संवतया प्रवर्तक शंखधर साख्वाःयात तत्कालीन प्रधानमन्त्री कृष्णप्रसाद भट्टराईया सरकारया ने.सं. ११२० कछलाथ्व दशमी कुन्हु राष्ट्रिय विभूति घोषणा याःगु लसताय् थौं कछलाथ्व दसमी बुधवाः शंखधरया झ्वाताः पलिस्था यानातःगु थीथी लागाय् शंखधर दिवस हंनेगु ज्या जुगु दु।
थौं सुथय् झोछेँ सामुदायिक समाजया ग्वसालय् झोछेँँँ न छगु ज्याझ्वःयासे शंखधर दिवस हनेगु ज्या जुगु दु।
राष्ट्रपति पौडेल व प्रधानमन्त्री प्रचण्ड दथुइ सहलह
लहनान्युज | कछलाथ्व दशमी ११४४, मंसीर ६ बुधवाः
राष्ट्रपति रामचन्द्र पौडेलनाप प्रधानमन्त्री पुष्पकमल दाहाल प्रचण्डं भेटवार्ता याःगु दु।
बुधवाः सुथय् शितल निवासय् राष्ट्रपति पौडेल व प्रधानमन्त्री प्रचण्ड दथुइ देय् या समसामयिक विषय सहलह याःगु दु धका राष्ट्रपति पौडेलया प्रेस सल्लाहकार किरण पोखरेलं जानकारी बिःगु दु।
पोखरेलया कथं राष्ट्रपति पौडेलं भूकम्प प्रभावित जिल्लाय् राहत नापं पुनर्स्थापनाया ज्याय् थप प्रभावकारी दयकेत ध्यानाकर्षण याःगु धका धाःगु दु।
रुक्साना कपाली विश्वया १०० म्ह प्रभावशाली मिसातय्गु धलखय्
लहनान्युज | कछलाथ्व दशमी ११४४, मंसीर ६ बुधवाः
बीबीसीं नकतिनि सार्वजनिक याःगु विश्वया १०० म्ह प्रभावशाली मिसापिनि धलखय् नेवाः अभियन्ता रुक्साना कपाली नं दुथ्याःगु दु ।कपाली नेपालभाषाया च्वमि लिसें नेवाः आन्दोलनया छम्ह अभियन्ता नं खः ।
सडक विस्तार, सम्पदा संरक्षण, भाषा अभियान आदि थेंज्याःगु थीथी नेवाः मुद्दाया आन्दोलनय् नं वय्कः सहभागी जुयाच्वम्ह खः। वय्कःया नेपाःया पारलैंगिक मिसाया रुपय् उगु धलखय् दुथ्याकूगु खः ।
कपालीं त्रिभुवन विश्वविद्यालयय् थःगु नां व लिंग हिलाः न्हूगु म्हसीकाया माग याःबलय् बीत अस्वीकार याःगु खःसा उकिया विरुद्ध अदालतय् कानुनी लडाइँ ल्वानादीगु खः । अथे हे परम्परांनिसें च्वना वयाच्वंगु छेँपाखें पूर्जा मदु धइगु आधारय् पितिना हःगु विरुद्ध नं वय्कलं कानुनी लडाईं ल्वानादीगु खः ।
नेवाः समुदायय् कपाली (जोगी) समुदाय गुगु छेँय् च्वनीगु खः उकियात सःतः खः धासें पूर्जा मबीगु चलन दु । थज्याःगु थीथी कानुनी लडाईं ल्वाये माःगु कारणं वय्कलं उच्चशिक्षाय् कानुन हे विषय कयाः ब्वनादीगु खः । वय्कः आः कानुन विषयय् अध्ययन याना च्वनादीगु दु।
शंखधर दिवस
लहनान्युज | कछलाथ्व दशमी ११४४, मंसीर ६ बुधवाः
थौं राष्ट्रिय विभूति शंखधर दिवस ।
शंखधर साख्वाःयात सरकारं राष्ट्रिय विभूति घोषणा याःगु दिंयात ‘शंखधर दिवस’ कथं हनेगु याना वयाच्वंगु खः । थ्व लसताय् थौं थीथी थासय् थीथी ज्याझ्वः जुइगु . ग्वसाः दु ।
सुथय् शंखधर झ्वाताय् ज्याझ्वः
थ्व लसताय् थौं पद्मरत्न लुमंति गुथिपाखें सुथय् ७ः३० बजे शंखधर उद्यानय् शंखधर दिवस न्यायेकाच्वंगु दु । उद्यान दुने च्वंगु शंखधरया झ्वाताय् स्वांमाः देछायाः थ्व दिवस हनेत्यंगु खः । शंखधर पार्कय् येँ महानगरपालिकाया पुलांम्ह मेयर विद्यासुन्दर शाक्यया पालय् शंखधरया झ्वाताः पलिस्था याःगु खः ।
लखुतिर्थय् ज्याझ्वः
लखु तिर्थय् नं शंखधर दिवस न्यायेकीगु ज्याझ्वः दु । नेपाल संवत् न्हूदँ राष्ट्रिय समारोह समितिपाखें थौं सुथय् थ्व दिवस न्यायेकाच्वंगु खः । शंखधरया जीवनीलिसे लखु तिर्थया स्वापू दु ।
प्रज्ञा भवनय् प्रमयात हना थौं शंखधर दिवसया हे लसताय् लाकाः प्रधानमन्त्री पुष्पकमल दाहालयात नं हनीगु ज्याझ्वः दु । प्रम दाहालं नेपाल संवत्यात सरकारी ज्याखँय् नं छ्यला यंकेगु धकाः निर्णय याःगुलिं वय्कःयात नेपाल संवत् न्हूदँ राष्ट्रिय समारोह समिति व थीथी नेवाः खलः पुचःतय्सं मंकाः रुपं हनेत्यंगु खः । प्रज्ञा भवनय् उगु सभा जुइ न्ह्यः येँया असनय् मुनाः बाजं सहित प्रज्ञा भवन तक ¥याली न्ह्याकेगु ज्याझ्वः दयेकातःगु दु ।
सनिलय् ज्याझ्वः
अथे हे थौं हे सनिलय् शंखधर उद्यानस्थित शंखधर साख्वाःया झ्वाताय् मेगु ज्याझ्वः नं जुइत्यंगु दु । नेपाल संवत् न्हूदँ राष्ट्रिय समारोह समितिया ग्वसालय् थ्व ज्याझ्वः जुइत्यंगु खः ।
किपुलिइ नं हनेज्या थौं किपूया प्रज्ञा दबुलिइ नेवाः देय् दबूया किपू समितिपाखें नं शंखधर दिवस हनेत्यंगु दु।
