प्रधानमन्त्री पुष्पकमल दाहाल प्रचण्डया जहान सीता दाहाल मन्त। वयकः थौं सुथय् नर्भिक अस्पतालय् मदुगु खः।

प्रधानमन्त्री प्रचण्डया निजी चिकित्सक प्रा. डा. युवराज शर्मां थौं सुथय् ८ः३३ बजे सीता दाहाल मदुगु धका जानकारी बिःगु खः। पार्किन्सनया समस्या नाप ‘प्रोग्रेसिभ सुपरान्युक्लियर पाल्सी (पी.एस.पी.)’ पाखे न पीडित जुया च्वःगु खः।

आः दाहालयात हृदयाघात जुगु धका धाःगु दु। स्वास्थ्य अवस्था गम्भीर जुइवं थौं सुथय् ८ बजे अस्पतालय् यकूगु खः। आकस्मिक कक्षय् सीपीआर लगायतया विधिपाखे उपचार याःगु खः ।

अय्न सुधार मजुइवं सुथय् ८ बजे जुया ३३ मिनेटय् मदुगु घोषणा याना अस्पतालं पत्रकार सम्मेलन याना जानकारी बिःगु खः।

नेवाः देय् दबूया थःगु हे छेँ धस्वाइगु जूगु दु । थ्व हे वइगु शुक्रवाः छगू ज्याझ्वःया दथुइ छेँया जग स्वनीगु जूगु दु ।

देय् दबुलिं येँ मनपा १५ वडाय् चःमति लागाय् छेँ दनिइगु जुगु दु। येँ महानगर चःमति जग्गा एकीकरण आयोजनायाके थ्व जग्गा न्याना काःगु खः । जग्गाया क्षेत्रफल १२६ वर्ग मिटर (करिब ४ आना) दु । थुकिया मू १ करोड ७६ लाख ५४ हजार १०८ तका तूगु खः ।

जग्गा न्यायेत माःगु दां नेपाः दुने व पिने च्वंपिं भाषाह्यमि साहु लिसें थीथी नेवाःतय् व्यक्तितपाखें ग्वाहालि कथं मुंकूगु खः । महानगरपालिका लिसें चःमतिइ च्वपिन्स न ग्वाहालि याना जग्गा न्यायेफुगु खः । देय् दबूया थ्व छेँ दनेगु लागिं नं येँ महानगरं ३ करोड ५० लाख तका खर्च जुइगु प्रारम्भिक अनुमान जूगु दु ।

थ्वहे बजेटय् ध्यबा छुटे याकेगु लागिं येँ महानगरया उपमेयर सुनिता डंगोलं विशेष कुतः यागु खः। जग्गा न्यायेगु निति थीथी मनूतयेस आर्थिक ग्वाहालि याःगु खः।

श्री पचलि भैरवया झिंनिदँ जात्रा खड्ग सिद्धि जात्रा (गथु प्याखं) थुगुसि पिकाइगु जूगु दु । थुगु प्याखंया लागिं माःगु जुइधुंकूगु दु धका गुथिया नायः भरत माली लहनान्युजया जानकारी बिःगु दु।

थुगु जात्राया लागि औपचारिक कथं कन्हय् एकादशी कुन्हुंनिसें न्ह्याइगु जूगु दु । कन्ह्यः प्याखं पिकायेगु लागिं कामिका एकादशि कुन्हु हनुमानध्वाखाय् ग्वय्दां तयेगु ज्या जुइ धका नायः माली लहनान्युजयात धाःगु दु ।

ग्वय्दां तयेगु धकाः हनुमानध्वाखाय् वनाः अन तयातःगु खड्गय् पुज्यानाः ग्वय्दां तइगु खः । थुकिया लागिं कन्हय् सुथय् थनया ज्याबहालय् च्वंगु द्यःछेँ (वडा नंं. २१ वडाया ज्याकू दुगु छेँ) य् मुनाः अनंनिसें बाजं थानाः ग्वय्दां तः वनेगु तयारी जुयाच्वंगु दु । ग्वय्दां तयेधुंकल कि प्याखं पिहां वइगु निश्चित जुइ । वयांलि गथांमुगःनिसें पचलीइ हे प्याखं स्यनेगु ज्या जुइ ।

थ्व प्याखनय् मोहनि कुन्हु जुजुलिसे खड्ग हिले माःगु परम्परा दु ।

शेयर बजाः थौं मंगलवाः सामान्य कुहावःगु दु। शेयर बजाः परिसूचक नेप्से थौं ४ दशमलव ७३ अङ्कं कुहावया २ हजार ७२ दशमलव २४ विन्दुइ कुहावःगु दु।

थौं विकास बैंक, फाइनान्स, उत्पादन व म्युचल फन्डया शेयर सामान्य थहावःगु दु सा मेमेगु समूहया शेयर कुहावःगु दु। दकलय् अप्पो सिङ्गटी हाइड्रोया शेयर ६ प्रतिशत व श्वेतगंगा हाइड्रोपावर कम्पनीया शेयर साढे ५ प्रतिशतं कुहवःगु दु।

समग्र बजाः घटे जूसा दकलय् अप्पो हिमालयन पावर पार्टनर, रावा इनर्जी व एनआईबीएल समृद्धि फन्डया शेयर १० प्रतिशतं थहावःगु दु ।

थौं २ सय ८३ गु कम्पनीया ७९ लाख ८८ हजार कित्ता शेयर कारोबार जूगु खः। म्हिगः सोमवाः ३ अर्ब ७९ करोड रुपैयाँया शेयर कारोबार जूगुलि थौं २ अर्ब ८५ करोड ९४ लाख रुपैयाँया शेयर कारोवार जूगु दु।

हिमालयन लाइफ इन्सुरेन्सया थौं दकलय् अप्पो १२ करोड ७८ लाख रुपैयाँया शेयर कारोबार जूगु खः।

सोलुखुम्बुइ हेलिकप्टर दुर्घटनाय् खुम्हेसिगु ज्यान वंगु दु। हेलिकप्टरय् च्वनावपि खुम्हसिगु शव लुगु दु धका सोलुखुम्बुया प्रमुख जिल्ला अधिकारी वसन्त भट्टराई न जानकारी बिःगु दु। न्याम्ह सीम्ह व छम्ह सीम्ह टुक्रा जूगु धका धाःगु दु।

सोलुखुम्बुपाखे येँया लागि ब्बया वःगु मनाङ एअरया हेलिकप्टर सोलुखुम्बुया लिखुपिके गाउँपालिकाय् लामोजुरा क्षेत्रय् दुर्घटना जूगु खः। हेलिकप्टरय् छम्ह पाइलट व न्याम्ह यात्रुपि च्वना वःगु खः।

पाइलट नेपाली नागरिक खःसा यात्रुपि दक्कों मेक्सिकाया नागरिकपि खः धका त्रिभुवन अन्तर्राष्ट्रिय विमानस्थलया प्रवक्ता टेकनाथ सिटौलां जानकारी बिःगु दु। यात्रुमध्ये स्वम्ह मिसा व निम्ह मिजंपि खः।

दुर्घटनाय् सीपि पाइलट चेतबहादुर गुरुङनाप मेक्सिकन यात्रुपि सिफुएन्टेस जी फर्नाडो, रिङ्कोन इस्माइन, सिफुएन्टेस जी मारिया होजे, गोन्जालेज ओलासियो लुज व गोन्जालेस एब्रिकपि खः। हेलिकप्टर सिमाय् न्यांगु खःगु धका सोलुखुम्बुया प्रमुख जिल्ला अधिकारी भट्टराई न धाःगु दु।