नेपाली सेनां स्वयम्भु बारुद खाना (जर्मन क्वाटर) या कम्पाउण्ड दुने मू सतकनाप स्वागू सतक खुल्ला याःगु दु। जग्गा एकीकरण आयोजना सञ्चालन जूगु नीदँ तक सतक चायेके मफूगु खः। आः जर्मन क्वाटरया पूर्वपाखे सिमानाया मू सतकनाप स्वागू ६ मिटर व उत्तरपाखे ३ मिटर दुगु सतक चायकूगु दु धका आयोजना प्रमुख निर्मलराज बरालं जानकारी बिःगु दु।

नेपाली सेनां हकभोग यानाच्वंगु जग्गापाखे सतक चाय्केत येँं महानगरपालिकाया प्रमुख नाप आयोजनाया जग्गा व्यवस्थापन उपसमिति संयोजक बालेन शाहं स्थलगत निरीक्षण याना प्रधानसेनापतिनाप सहलह याःगु खः।

येँ महानगरपालिका वडा नं. १५ व १६ दुने पूवय् विष्णुमती खुसिइ, पश्चिमय् स्वयम्भु भगवान पाउ बनस्थली सतक, उत्तरय् बालाजु–बनस्थली चक्रपथ (ट्र्याक रोड) व दक्षिणय् स्वयम्भू–भगवान पाउ–बिजेश्वरी जूया शोभा भगवती द्यःया थाय् तक फैले जुगु भूगोल आयोजना क्षेत्र खः ।

आयोजना दुने करिब १ हजार ३६९ रोपनी जग्गा दु । २०६० साल वैशाख ५ गते आयोजना क्षेत्र दुने जग्गा अधिग्रहण यायेत जिल्ला प्रशाशन कार्यालय काठमाडांैपाखे सूचं जारी याःगु खः।

युवा बौद्ध समूह, येँया झिंप्यक्वःगु तःमुज्यां मदनबहादुर तुलाधरया अध्यक्षताय् झिंस्वम्हेसिया न्हूगु ज्यासना पुचः ल्यःगु दु ।

उगु न्हूगु ज्यासना पुचलय् न्वकुपि राजु शाक्य व कमलतारा तुलाधर निर्वाचित जुयादीगु दु । अथेहे, छ्याञ्जेय् नानीशोभा मानन्धर, दांभरिं कल्पना देवी तुलाधर व लिउ छ्याञ्जेय् रत्ना शाक्ययात ल्यःगु दु।

न्हुगु ज्यासना पुचःया दुजलय् युरिकाजी कंसाकार, ठूलोराजा शाक्य, रजनी ताम्राकार, अकिलशोभा ताम्राकार, दिलहेरा ताम्राकार, वसन्त महर्जन व मतिना मानन्धरयात ल्यःगु दु।

तःमुँज्याय् समूहपाखें दँय्दसं बिया वयाच्वंगु ‘पञ्चवीर सिंह सिरपाः’या दाता साहु पञ्चवीरसिंह तुलाधरं बुद्धधर्मयात जनमानसय् प्रचार यायेगु युवा बौद्ध समूहया अभियानयात च्वछासे नेपालभाषा ब्वलंकेत तिबः जुइमाः धकाः थम्हं सिरपाः लःल्हाना वयाच्वनागु खँ कनादिल ।

प्रधानमन्त्री पुष्पकमल दाहाल प्रचण्डं छगु सफू विमोचन ज्याझ्वलय् बिःगु अभिव्यक्तिइ थःगु कमजोरी जुगु दु धका स्वीकार याःगु दु।

थःत प्रधानमन्त्री दयकेत प्रितम सिंह यक्को पटक भारत वंगु धका बिःगु अभिव्यक्तिया कारण नेकपा एमाले न संसद अवरुद्ध यायेवं प्रचण्दं थौं सोमवाः स्पष्टीकरण बिःगु खः। प्रतिनिधिसभाया रोष्ट्रमय् दना वयकलं थम्हेसिया बियागु अभिव्यक्तिया सन्दर्भय् थःगु खँ तःगु खः।

थः तःधिम्ह म्ह्याय् ज्ञानु क्यान्सरया कारण जीवनमरणय् जुयाच्वंगु इलय् काय् प्रकाशं दिल्ली यकूगु व उगु झ्वलय् प्रितम सिंहया छेँय् च्वना उपचार यानागु धका प्रचण्डं धाःगु खः।

उगु झ्वलय् सरदार सिंहं प्रधानमन्त्री छि हे जुइमाः धका धया, ‘वयकलं धासां प्रधानमन्त्री जुइगु न मखु, जित प्रधानमन्त्री दयका बिउ धका धायेगु न जुइमखु।’ नकतिनि हे सिंहया विषयय् च्वया च्वया तःगु सफू विमोचनया झ्वलय् थःम्हेसिया म्ह्याय् ज्ञानु बेडय् दनाच्वंगु लुमकाःगु दु धका धयादीगु खः।

प्रधानमन्त्री पुष्पकमल दाहाल प्रचण्डं प्रमुख प्रतिपक्षी दल नेकपा एमालें थःत स्पष्टीकरणया मौका तक मबिउगु धका असन्तुष्टि प्वकूगु दु।

छगु सफू विमोचनया झ्वलय् थःत प्रधानमन्त्री दयकेत भारतीय नागरिक प्रितम सिंह यक्को पटक दिल्ली वःगु धका अभिव्यक्ति बिइवं एमाले न राजीनामा फ्वना संसद अवरुद्ध याःगु खः। थौं कांग्रेस, एमाले व माओवादीया शीर्ष नेतापि दथुइ सहमति जुइवं संसद न्ह्यागुलि प्रधानमन्त्रीं स्पष्टीकरण बिउगु खः।

उगु झ्वलय् वयकलें एमालेयात न्यःगु दु, ‘स्पष्टीकरणया मौकाय् मबिउसे राजीनामा ? छु थ्व हे खःला स्तर जिगु खःला?’ प्रचण्डं न्ह्यने न्यःगु दु, ‘छु जिं सम्मानित संसद न्ह्यने डनां धाये मदइला ? छाय् स्वन्हु संसद अवरुद्ध यात जिं थुइके मफया च्वंगु दु।’

वयकलं प्रतिपक्षं राजीनामा फ्वनेवं बिइमाःगु खःला? धका न्ह्यसः तःगु खः। ‘थ्व हे लोकतान्त्रिक विधि व परम्परा ? छु प्रतिपक्षं न्ह्यसः तयेतुं प्रधानमन्त्रीं राजीनामा बिइगु खःला?, संसदय् स्पष्टीकरणया मौका तक बिइम्वाला?’

राष्ट्रिय स्वतन्त्र पार्टीया सभापति रवि लामिछाने न संसद स्वंगु दलं बन्धक दयके ज्यू लाः धका न्ह्यसः तःगु दु। जनताया मुद्दा यथावत त्वताः नेतापिनिगु स्वार्थय् संसद रोके याये मज्यू धका आपत्ति प्वकूगु खः।

थौं प्रतिनिधिसभाय् ई कया न्ववायेगु झ्वलय् धाःगु दु, ‘थ्व संसद स्वंगु दलं बन्धक दयके ज्यु ला ? उमिसं छु यात व हे खःला ? मेपि माननीयपि सू मखु ला ?’ संसदय् थीथी कानुन विचाराधीन अवस्थाय् दु धका धासे सभापति लामिछाने न उगु कानुनय् छलफल यायेत नेताया स्वार्थय् संसदयात बन्धक दयकुगु धका धाःगु खः।

‘शीर्ष नेतापिनिगु मुड मन्तकि थुगु सदन दिउगु खःला ?’ लामिछाने न न्ह्यसः तःगु दु, ‘जनताया मुद्दाय् संसद रोके जूसा रोके जुइमाः। नेताया स्वार्थय् संसद दिउगु जिमित स्वीकार मदु।’