मुगुया भिई केन्द्रबिन्दु जूया भुखाय् ब्बःगु दु। राष्ट्रिय भूकम्प मापन नाप अनुसन्धान केन्द्र लैनचौरया कथं मुगुया भिई केन्द्रबिन्दु जूया थौं सुथय् ९ बजे जूया ५१ मिनेटय् ४ दशमलव ५ रेक्टर स्केलय् भुखाय् ब्बःगु खः।

भुखाय् ब्बःगु सुदूरपश्चिमया थीथी जिल्लाय् न महसुस जूगु खः।

वरिष्ठ रेडियोकःमि कृष्णा ताम्राकार मन्त। वयकः ८६ दँय् वःगु चान्ह्यः न्युरो अस्पतालय् उपचार यायेगु झ्वलय् मदुगु खः।

विसं २०१८ सालनिसे रेडियो नेपालय् ज्या यानादीगु खः। वयकःया दाहसंस्कार थौं याइगु जुगु दु।

शेयर बजाः थौं बिहीवाः हाकन दोहोरो अङ्कं कुहावःगु दु। कारोबार जुइगु थौं लिपागु दिं शेयर बजार परिसूचक नेप्से १८ दशमलव १५ अङ्कं कुहावया १ हजार ९ सय १५ दशमलव १५ विन्दुइ कुहावःगु खः।

दक्को समूहया शेयर कुहावंसा जलविद्युत्, माइक्रोफाइनान्स व बीमा समूहया शेयर थहावंगु दु। २५९ गु कम्पनीया ४३ लाख ४० हजार कित्ता शेयर १ अर्ब ४१ करोड ३१ लाख रुपैयाँया कारोबार जुगु दु।

थौं दकलय् अप्पो एनआईसी एसिया बैंकया २१ करोड ७४ लाख रुपैयाँया शेयर किनबेच जूगु दु। युनिक नेपाल लघुवित्त कम्पनीया शेयर साढे ७ प्रतिशत व सृजनशील लघुवित्तया शेयर झन्डै ७ प्रतिशतं कुहावःगु दु।

समग्र बजार कुहावंसा दकलय् अप्पो मायाखोला जलविद्युत्, एसियन हाइड्रोपावर व नेपाल इन्भेस्टमेन्ट मेगा बैंकया प्रमोटर शेयर १० प्रतिशतं थहावंगु दु।

प्रहरी अतिरिक्त महानिरीक्षक (एआईजी) किरण बज्राचार्य नेपाल प्रहरीया महानिरीक्षक (आईजीपी) पदय् न्हापां मिसाम्ह प्रतिस्पर्धी जुगु दु।

सरकारं वंगु सोमबाः बज्राचार्य नाप मेपि प्यम्ह प्रहरी नायब महानिरीक्षक (डीआईजी) पाखे एआईजीइ बढुवा यागुलि भावी आईजीपीइ न्हापाम्ह मिसाम्ह प्रतिस्पर्धी जूगु दु। सोमबाः च्वंगु मन्त्रिपरिषद बैठकं डीआईजीइ वसन्तबहादुर कुँवर, टेकप्रसाद राई, दीपक थापा, श्यामलाल ज्ञवाली व किरण बज्राचार्ययात एआईजीइ बढुवा यायेगु निर्णय याःगु खः।

३० दँया सेवा अवधिया कारण आःयाम्ह आईजीपी धीरजप्रताप सिंह चैत्र ११ गतेनिसे अवकाश कायेत्यःगु खः। थ्व नाप बढुवा जूपि न्याम्ह एआईजीमध्येपाखे छम्ह मिसाम्ह आईजीपी जुइगु सम्भावना दुगु खः।

वर्ल्ड नेवाः अर्गनाइजेशन (हलिं नेवाः दबू) न खुक्वःगु हलिं नेवाः दिं तजिक हनिइगु जुगु दु।

सांस्केतिक प्रवद्र्धनया निंतिं हलिं नेवाः दिवस धइगु नारां बिया थुगुसि येँया बसन्तपुरय् प्रधानमन्त्री पुष्पकमल दाहाल प्रचण्दया मूपाहाँसूइ न्याकिइगु जुइ धका थौं छगु पत्रकार सम्मेलनयाना जानकारी बिःगु खः।

थौं जूगु पत्रकार सम्मेलनय् खुक्वःगु हलिं नेवाः दिं ज्याझ्वःया कजि रमेश मुनिकार व हलिं नेवाः दबू नेपाः च्याप्टरया नायः सुरेन्द्रभक्त श्रेष्ठं ल्हाःचिंतया पिथंगु वक्तव्यय् न्ह्यथनातः कथं थुगुसिइ पूर्व न्यायाधीश कल्याण श्रेष्ठ, पूर्व आईजीपि सिंह बहादुर श्रेष्ठ, न्हपांगु संकिपाया अभिनेत्री चैत्यदवी सिंह, समाजसेवी व साहित्यकार सुवर्णकेशरी चित्रकार, संस्कृति व इतिहासविद् प्रा.डा. त्रिरत्न मानन्धर, हस्तकला कलाकार चिनकाजी ताम्रकार, उद्योग व्यवसायी रुपज्योति कसाः, बरिष्ठ फोटो पत्रकार नातिकाजी महर्जन, गणितज्ञ व ज्योतिष देवनारायण महर्जन, अन्तर्राष्ट्रिय कुश्तीबाज मिसा मुना श्रेष्ठ, पर्यटन व्यवसायी व सकारात्मक सोचया न्ह्यलुवाः कर्ण शाक्य, बरिष्ठ साहित्यकार मथुरा सायमि, पूर्वराजदूत केदारभक्त माथेमा व कास्की नेवाः खलःयात विशेष हनिइ ज्याझ्वः दुगु धका पत्रकार सम्मलेनपाखे जानकारि बियादीगु खः।

अथेहे नांजाःम्ह म्येहालामि रमेश ताम्राकारया नामं नीस्वनातःगु रमेश ताम्राकार संगीत सिरपाः लोकंह्वाःम्ह म्येहालामि प्रवेशमान शाक्ययात लःल्हाइगु खँ पत्रकार सम्मेलनय् जानकारी बिउगु दु ।

अथेतु, जनकबि दुर्गालाल श्रेष्ठयात न हलिं नेवाः बिशेष हनाः ज्याझ्वः याइगु जुगु दु।