प्रधानमन्त्री पुष्पकमल दाहाल प्रचण्डं दार्चुलाया लिम्पियाधुरा, लिपुलेक व कालापानी नेपाःया भूमि खः धका सरकार प्रष्ट दु धका धाःगु दु।

थौं मंगलवाः राष्ट्रियसभाया बैठकय् नीति तथा कार्यक्रमय् न्यंगु न्ह्यसःया लिसः बिइगु झ्वलय् वयकलं ल्यः दुगु सीमा समस्या ऐतिहासिक सन्धी, नक्सा व तथ्य प्रमाणया आधारय् कुटनीतिक माध्यमपाखे समाधान यायेगु धका धयादीगु खः।

‘लिम्पियाधुरा, लिपुलेक व कालापानी नेपाःया भूमि खः धइगु खँय् नेपाल सरकार बडो प्रस्ट दु। ल्यः दुगु सीमा सम्बन्धी विषययात ऐतिहासिक सन्धी नक्सा तथ्य व प्रमाणया आधारय् कुटनीतिक कुतलं समाधान यायेत दृढ व प्रतिवद्ध दु धका जानकारी न माननीय सदस्यपिन्त बिइ चाहे जू’ धका वयकलं धयादीगु खः।

शेयर बजाः थौं मंगलवाः न थहावःगु दु। शेयर बजाः परिसूचक नेप्से थौं ५१ दशमलव ३२ अङ्कं थहावना १ हजार ९ सय ४२ दशमलव ६३ विन्दुइ थ्यःगु दु।

थौं दक्को समूहया शेयर थहावःगुलि बीमा, माइक्रोफाइनान्स, विकास बैंक व जलविद्युत् समूहया शेयर यक्को थहावःगु खः। बजाः नाप कारोबार रकम न यक्को सुधार जुगु दु।

२७१ गु कम्पनीया ६० लाख ६७ हजार कित्ता शेयर २ अर्ब २० करोड रुपैयाँया कारोबार जूगु खः। दकलय् अप्पो शिवम् सिमेन्टया १० करोड रुपैयाँया शेयर किनबेच जूगु खः।

खप्तड लघुवित्त, कालिका लघुवित्त, आत्मनिर्भर लघुवित्त व सामुदायिक लघुवित्तया शेयर १० प्रतिशतं थहावःगु दु। निगु कम्पनी याःगु जक थौं शेयर सामान्य घटे जूगु दु।

युगकवि सिद्धिचरण श्रेष्ठया ११२ क्वःगु बुन्हि क्वचाःगु दु। युगकवि सिद्धिचरण स्मृति गुठीया ग्वसालय् ओमबहालय् च्वंगु सिद्धिचरण चुकय् वय्कःया झ्वाताय् स्वां देछासें बुन्हि हंगु खः ।

संस्कृति, पर्यटन तथा नागरिक उड्डयनमन्त्री सुदन किराती मूपाहां कथं झाःगु उगु ज्याझ्वलय् प्रतिष्ठानया नायः वैरागी काइँला, प्रज्ञा–प्रतिष्ठानया कुलपति भुपाल राई, येँ क्षेत्र नं. ८ या सङ्घीय सांसद विराजभक्त श्रेष्ठ, प्रदेश सांसद शैलेन्द्र वज्राचार्य लिसें आपालं साहित्यकारपिनि उपस्थित दुगु खः ।

गुठीया नायः सुवर्ण शाक्यया अध्यक्षताय् जूगु उगु ज्याझ्वलय् न्ववासें मन्त्री किरातीं नेपाली राजनीतिइ हिउपाः हयेगु ज्याय् वय्कलं यानादीगु योगदानया कदर याये अझ नं मगाःनिगु खँ कनादिगु खः।

बाजुराया बिछिया केन्द्रविन्दु जूया भुखाय् ब्बःगु दु।

राष्ट्रिय भूकम्प मापन तथा अनुसन्धान केन्द्रया कथं बाजुराया बिछिया जःखः केन्द्रविन्दु जूया थौं बहनि ६ बजे जूया ५४ मिनेटय् ४.१ म्याग्निच्युडया भुखाय् ब्बःगु खः।