लुँया भाः थौं तोलां द्धःछि थहावःगु दु।

थौं तोलां द्धःछि थहावना १ लाख ६ हजार ७ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथे हे वहः तोला न न्यातका थहावःगु दु। वहः तोलां न्यातका थहावना १ हजार ३ सय ५ रुपैयाँ न कारोबार जूगु दु धका महासङ्घं धाःगु दु।

प्रधानमन्त्री पुष्पकमल दाहाल प्रचण्डं नेपाल विश्वकप क्रिकेट छनोटय् थ्यःगु लसताये भिंतुना बिःगु दु।

बिहीबाः आईसीसी क्रिकेट विश्वकप लिग टु अन्तर्गत त्रिवि क्रिकेट मैदानय् जूगु कासाय् युएईयात डीएल मेथडय् ९ रनं बूका नेपाः विश्वकप छनोट चरणय् थ्यःगु खः।

कासा क्वचाःगु छु ई लिपा हे ट्विटरपाखे प्रचण्डं लसता प्वकूसे कासामिपिन्त भिंतुना बिःगु दु।

‘लिगया कासाय् बालाक्क म्हिता बालागु प्रदर्शन यासे नेपाःया स्वाभिमान व गौरव जुइगु कथं म्हितिगुलि नेपाली क्रिकेट टिम, प्रशिक्षक, क्यानलगायत झी सकसित भिंतुना !’ प्रचण्डं च्वंगु दु।

सरकारं २०८० सालय् ३५ दिं देयन्यक लागू जुइगु कथं सार्वजनिक विदा बिःगु दु। बिहीबाः राजपत्रय् प्रकाशित जूगु सूचं कथं थीथी नखः, दिवश व जन्मजयन्ती याना ३५ दिं बिदा बिःगु दु।

उकि मध्ये दकलय् अप्पो मोहनी कुन्हु खुन्हु व स्वन्तुया इलय् न्यान्हु बिदा बिःगु दु। सरकारं पुस २७ गते पृथ्वी जयन्ती व फागुन १ गते जनयुद्ध दिवशया विदा न बिःगु दु।

देयन्यक लागू जुइगु कथं सार्वजनिक बिदा बाहेक स्वनिगलय् सायाः, घोडेजात्रा, बुगं द्यःया भोटो क्यनिइगु  जात्रा व येँया कुन्हु सार्वजनिक बिदा बिःगु दु सा मिसा पिन्त तिज व जितिया पर्वय् न बिदा बिःगु दु।

फाल्गुनन्द जयन्ती, गुरु नानक जयन्ती व मोहम्मद जयन्तीया सम्बन्धित समुदायपिन्त बिदा बिःगु बिःगु दु।

प्रधानमन्त्री पुष्पकमल दाहाल प्रचण्ड नेपाल व यूएई दथुइ कासा स्वयेगु निति किपूया त्रिवि अन्तर्राष्ट्रिय क्रिकेट मैदानय् थ्यःगु दु।

नेपाली क्रिकेटरपिन्त हौसला थकायेगु निति प्रधानमन्त्री प्रचण्ड किपूया क्रिकेट मैदानय् वःगु खः। नेपाःया क्रिकेटरपिन्त भिंतुना बिःगु लागि प्रधानमन्त्री प्रचण्ड किपूया मैदानय् वःगु धका वयकःया प्रमुख स्वकीय सचिव रमेश मल्लं जानकारी बिःगु दु।

पूर्वप्रधानमन्त्री नाप नेकपा एमालेया अध्यक्ष केपी शर्मा ओली न आईसीसी विश्वकप लिग टुया लिपागु कासा यूएईविरुद्ध म्हितूपि कासामिपिन्त भिंतुना बिःगु दु।

ताम्रकार समाजया ग्वसालय् समाजया व्यवहार व्यवस्था उपसमितिपाखें मंकाः बाःह्राः पिथनेगु ज्या जुल ।

उपसमितिया संयोजक मनोज ताम्रकारं समाजं नियमित रुपं इहि, कय्तापुजा थें मंकाःकथं बाः¥हाः तयेगु ज्या वंगु छुं दँ न्ह्यवनिसें याना वयाच्वनागु जानकारी बियादिगु दु। लिसें वय्कलं २४ म्ह मिसा मस्तय्त छकू हे क्वथाय् तयाः बाःह्राःया महत्व, आवश्यकता, शारीरिक विकासया थीथी पक्षयातबारे जानकारी बीगु यानागु नं धका धयादीगु दु।

नेवाः मिसा मस्तय्त याइगु छगू प्रमुख संस्कारया रुपय् दुगु बाःह्राः झिंनिन्हुतक तयेगु चलन दु । तर समाजं थौंया अवस्थायात ध्यानय् तयाः प्यन्हु जक बाः¥हाः तयेगु याना वयाच्वंगु खः । थ्व अवधिइ नं मिसामस्तय् बीमाःगु व्यावहारिक पक्षयात ज्ञान व जानकारी बीगु ज्या जूगु समाजं जानकारी बिउगु दु ।

बाःह्राः तयेत हःपिं मस्तय्त स्रोत व्यक्तिपाखें व्यक्तित्व विकास, उत्प्रेरणा, सकारात्मक सोच, शारीरिक विकास, यौन दुव्र्यवहार, साइबर अपराध, स्वास्थ्य, कला, संस्कृति, सम्पदा, योगालिसें हुलाप्याखंया नं प्रशिक्षण बीगु याना वयाच्वनागु समाजं न्ह्यथंगु दु । समाजया नायः विनोद ताम्रकारं थुकथंया व्यवहार वा संस्कार व्यक्तिगत रुपं यायेबलय् गाक्कं खर्च जुइगु नापं आपालं समस्यात वयाच्वनीगुलिं समाजं मंकाःकथं ज्याझ्वःया ग्वसालं खर्चय् मितव्ययिता वइगु खँ कनादिल ।

समाजया पुलांम्ह नायः रविन्द्रराज ताम्रकारं थःपिनिगु समाजं याना वयाच्वंगु थीथी गतिविधि व क्रियाकलापमध्ये थ्व छगू आत्मसन्तुष्टि बीगु कथंया ज्या जूगु प्रतिक्रिया बियादिसें समाजं मस्तय् शारीरिक स्थितिया विकारया निंतिं अपरिहार्य जूगु विधियात मंकाःकथं ग्वसाः ग्वया वयाच्वनागु जानकारी बियादिल ।

नीप्यम्ह मिसा मस्तय्त मंकाः बाःह्राः तःगु खःसा उकिया अवलोकन यायेत यल महानगरपालिकाया उपप्रमुख मंजली शाक्य झायादीगु खः ।