विहारया थीथी ज्याझ्वः ताःलाक्क न्ह्याकेगु नितिं श्रीवच्छ महाविहार सुधार समितिया ग्वसालय् जूगु १० न्हुया वक्तृत्व विकास व उद्घोषण प्रशिक्षण क्वचाल ।

ललितपुर महानगरपालिका, वडा नं. २० वडाया ग्वाहालिइ विहारया आःजुेछेँय् जूगु स्यनेज्याया समापन समारोहस दसिपौ लःल्हाःसें ज्याझ्वःया मूपाहाँ २० वडाया अध्यक्ष चन्द्रलाल महर्जनं वडां वडाया संस्कृति, सम्पदा, सांस्कृतिक परम्परा व भौतिक विकासय् जक ध्यान तःगु मखःसे वडाया वासिन्दापिनिगु न्वचुकला, ज्याझ्वः न्ह्याकेगु गुण, ब्यवस्थापन व ब्यक्तित्व विकासया ज्या नं सशक्त यायेकथं ज्याझ्वःत हयाच्वंगु कनादिल । वडाया सकलें सशक्त ढंगं न्ह्यांवने फय्माःगु खँ वय्कलं कनादिल । विहार सुधार समितिया नायः राजु शाक्यया अध्यक्षताय् जूगु समापन समारोहय् वडा सदस्यपिं शैलेन्द्र शाक्य, अमर डंगोल, गीता महर्जन, प्रशिक्षक सुरजवीर बज्राचार्य, झी बहुद्देश्यीय सहकारी संस्थाया नायः बुद्धिरत्न शाक्य, ज्येष्ठ नागरिक दिवा सेवा केन्द्रया कजि युवराज शाक्यं थःथःगु नुगःखँ तयादीगु खःसा प्रशिक्षार्थीपिं ज्ञानलक्ष्मी शाक्य, बसना शाक्य, सुप्रिया शाक्य, ओमरत्न शाक्य, केशवराज शाक्य, मूर्तिबहादुर शाक्य, ऋतिस शाक्य, निश्चल शाक्य, शोभालक्ष्मी शाक्यं प्रशिक्षण कयागु व उपलब्धिया विषयय् थःगु नुगःखँ तयादीगु खः । विहार सुधार समितिया सचिवनापं प्रशिक्षणया संयोजक रविन्द्र शाक्यं लसकुस न्वचु तयादीगु थुगु ज्याझ्वलय् सुभाय् न्वचु समितिया दुजः चिनिकाजी शाक्यं तयादीगु खः ।  

प्रशिक्षणय् ब्वति कयादीम्ह महेन्द्र शाक्यं ल्वःवनापुस्सेच्वंक उद्घोषण यानादीगु थुगु ज्याझ्वलय् प्रशिक्षण सुरजवीर बज्राचार्ययात सम्मानपत्र लःल्हाःसें हंगु खः । हनाज्या लिपा थःगु नुगःखँ तयेगु झ्वलय् वय्कलं “थः प्रशिक्षक जुयाः वया तर छगू परिवार लुइका” धयादिसें परिवारया सकल जःपिनिगु प्रगतिया नितिं सदां सक्रिय जुयाः ग्वाहालि यायेगु बचं नं बियादिल । ज्याझ्वलय् वडां याःगु ग्वाहालि लुमंकूसें २० वडाया नायः चन्द्रलाल महर्जनयात नं हंगु खः ।

स्यनेज्या २०८० साल वैशाख २८ गतेनिसें जेठ ७ गतेतक जूगु खः ।








 

बुगंद्यःया रथ थौं सोमवाः लगनख्यःपाखे सालां ज्यावलाख्यलय् यकिइगु जुगु दु।

रथयात थौं न्हिनय ४ बजे सालेगु तयारी दु । थौं रथ सालेगु निति म्हिगः आइतवाः बहनि न्यंकाः कुरकूगु खः।

रथ थौं ज्यावलाख्यलय् थ्यन धासा बिहीवाः भोटो क्यनिइगु जुइ।

नेपाल सरकारं लोककल्याणकारी बिज्ञापन रकम कटौती यागुलि नेवाः पत्रकार राष्ट्रिय दबूया गम्भिर ध्यानाकर्षण याःगु दु।

पत्रकार दबूया महासचिव केके मानन्धरं थौं छगु बिज्ञप्ति जारीयासे गम्भिर ध्यानाकर्षण जुगु दु धका धाःगु दु। अथेहे थौं सुथय् नेपाल पत्रकार महासंघ उपत्यका प्रदेशया ग्वसालय् विज्ञापन बोर्डया कार्यलय धर्ना ज्याझ्वः जुगु खः।

छापा सञ्चार माध्यमयात मदिक्क बियावःगु लोककल्याणकारी विज्ञापन प्रणालीयात ई कथं थप परिमार्जन व व्यवस्थित यानाः यंकेमाःगुलिइ सूचं पितबियाः सञ्चार व सञ्चारकःमितयगु अहित जुइकथं बोर्डं निर्णय याःगु ठहर याःगु दु ।

कोरोना संक्रमणलिसे ब्वलंगु देयया असहज आर्थिक अवस्थाया कारणं नेपाली भाषा व मातृभासं प्रकाशित जुयावःगु व पत्रपत्रिकात आर्थिक रुपय् समस्याय् दु । उकिसन थीथी त्वहः चिनाः विज्ञापन बोर्डं लोककल्याणकारी विज्ञापन प्रकाशन वापतया ध्यबा मबीगु निर्णयया कारणं चिचिधंगु लगानी व स्वरोजगारमूलक छापा सञ्चार माध्यम थप धरासायी जुइगु पत्रकार दबूया ठहर यागु दु धका बिज्ञप्ति धयातःगु दु।

लोककल्याणकारी विज्ञापनया सम्बन्धय् बोर्डं पितब्यूगु उल्लेखित सूचं आपत्तिजनक व छापा सञ्चार माध्यमया हित अःखः दु । अथेजुयाः छापा सञ्चार माध्यमया हित अःखःया थन्यागु निर्णय थत्थें लितकयाः लोककल्याणकारी विज्ञापनयात निरन्तरता बिइत सम्बन्धित निकायया ध्यानाकर्षण यागु दु।

बागमती प्रदेशय् नवनियुक्त मन्त्रीपिन्स पद व गोपनीयताया शपथ काःगु दु।

नवनियुक्त मन्त्रीपिन्त प्रदेश प्रमुख यादवचन्द्र शर्मा न पद व गोपनीयताया शपथ याकूगु खः। बागमती प्रदेशया मुख्यमन्त्री शालिकराम जम्कट्टेलं नेपाली कांग्रेसपाखे स्वम्ह व नेकपा एकीकृत समाजवादीपाखे निम्ह मन्त्री दुथ्याका मन्त्रिपरिषद विस्तार याःगु दु।

कांग्रेसपाखे मसिना खड्का भण्डारी वन तथा वातावरण, पुकार महर्जन पर्यटन उद्योग तथा सहकारी, उत्तम जोशी स्वास्थ्य मन्त्री जूगु दु। कांग्रेसया रामकृष्ण चित्रकार विना विभागीय मन्त्री जूगु दु।

नेकपा एकीकृत समाजवादीपाखे लक्ष्मण लम्साल श्रम, रोजगार तथा यातायात मन्त्री जुगु दु सा राजेन्द्रमान श्रेष्ठ कृषि तथा पशुपक्षी विकास मन्त्री जूगु दु।

थौं आइतवाः मन्त्री नियुक्त जुइ धुका बागमतीइ मन्त्रिपरिषद १२ सदस्यीय जुगु दु।

लुँ वहःया भाः थौं थहावंगु दु। लुँ तोलां च्यासः थहावःगु दु सा वहः तोलां झीन्यातका थहावःगु दु।

लुँ तोलां च्यासः थहावना १ लाख १० हजार रुपैयाँ न कारोवार जुगु दु धका नेपाल सुनचाँदी व्यवसायी महासंघं धाःगु दु।

अथेहे वहः तोलां झीन्यातका थहावना १ हजार ३ सय ८५ रुपैयाँ न कारोवार जुगु दु धका महासंघं धाःगु दु।