बाग्मती प्रदेशया संस्कृति, पर्यटन लिसे सहकारीमन्त्री पुकार महर्जनं प्रदेशय् नेपालभाषा व तामाङ भाषायात सरकारी कामकाजि भाषाया कथं लागू यायेगु नितिं दयेकूगु राष्ट्रभाषा सम्वन्धि विधेयक संसदय् प्रस्तुत यानादीगु २४ घण्टाया दुने हे प्रदेशया राजधानी हेटौंडाय् वना नेवाः व तामाङतसें प्रदेश सांसद व मन्त्रीतलिसे सहलह यानादीगु दु ।

नेवाः देय् दबू स्वनिगः विशेष प्रदेश, नेपाल तामाङ घेदुङ बाग्मती प्रदेश, देय् दबू बागमती प्रदेश व राष्ट्रिय आदिवासी जनजाति महिला मञ्चया मंकाः ग्वसलाय् मंगलवाः असोज १६ गते ग्वसाः ग्वःगु खः । ज्याझ्वलय् संस्कृति पर्यटन लिसे सहकारी मन्त्री महर्जनं संसदय् प्रस्तूत जूगु विधेयकय् दुगु खँ नापं आः तकया दुने यानागु ज्याया बारे जानकारी बियादीगु खः ।

उगु ज्याझ्वलय् ब्वति कयादीपिं बागमती प्रदेशया मन्त्रीपिं उद्योग भूमि प्रशासन मन्त्री रामकृष्ण चित्रकार, अर्थमन्त्री बहादुर सिंह तामाङ, खानेपानी सिचाई उर्जा मन्त्री तिर्थ लामा, सामाजि विकास मन्त्री कुमारी मोक्तान, वन लिसे वातावरण मन्त्री मसिना खत्री व पुलांम्ह उपसभामुख राधिका तामाङं भाषा सम्वन्धी उगु विधेयकयात ब्यापक सहलह ब्याका माःगु कथंया संशोधन याना छगू मत जुया पारित यायेमाः धकाः धयादीगु खः।

हेटौंडाय् जूगु उगु सहलह ज्याझ्वलय् भाषा बैज्ञानीक नापं भाषा आयोगया सदस्य अमृत योञ्जन, भाषा बैज्ञानीक प्रा.डा.ओमकारेश्वर श्रेष्ठ, पुर्व महान्याधिवक्ता मुक्ति प्रधान, अधिवक्तापिं शंकर लिम्बु, दिनेश घले, नरेश श्रेष्ठ व अभियन्ता श्रीकृष्ण महर्जनं मंकाः कथं तयार यानादीगु विधेयक संसोधनया प्रस्तावयात कया न्ह्यब्वयेगु ज्या जूगु खःसा सांसदपिंलिसे सहलह तकं जूगु खः ।

सांसदपिन्सं तयादीगु न्ह्यसःया लिसः अमृत योञ्जन, प्रा. डा. ओकारेश्वर श्रेष्ठ व शंकर लिम्बुं स्पष्ट यानादीगु खः । मूल रुपं मेमेगु भाषा धकाः नेपालभाषा व तामाङ भाषायात तयातःगु थासय् प्रदेशया राष्ट्रभाषा धायेमाःगु, लिपिया सवालय् नेवाः व तामाङतय्गु लिपियात प्रदेश सरकारया राजपत्रय्, सरकारया लेटर हेडय् नापं मेमेगु थासय् छ्यले माःगु, विज्ञ समुह धाःगु थासं राष्ट्रभाषा विकास प्रतिष्ठन गठन यायेमाःगु नापं भाषिक आधारय् विभेद याइपिन्त दण्ड सजायया व्यवस्था यायेमाःगु खँ दुथ्याका स्वंगू महल दयेका अन प्रस्तूत यायेगु ज्या जूगु खः ।

ज्याझ्वलय् न्वंवानादीपिं फुक्क सांसद व मन्त्रीपिन्सं विधेयक छगू मतं पारित यायेमाःगु नापनापं मेमेगु प्रदेशया नितिं नं भाषा विधेयक नमुना जुइगु कथंया भूमिका म्हितेत थःपिं तयार दु धयादिसें प्रदेशय् न्ह्यब्वःगु व न्हापा पारित जुइ धुंकूगु गुलि नं विधेयक दु, अज्वःगु विधेयकत मध्ये दक्ले अप्वः सांसदतसें सहलह ब्याकेगु ज्या याःगु नापं समुदाय नं तकं सरोकार क्यंगु धइगु भाषा विधेयक हे जूगु खँ न्ह्यथनादीगु खः ।

राष्ट्रिय आदिवासी जनजाति महिला मञ्चया नायः सुनी लामाया सभाध्यक्षता जूगु उगु ज्याझ्वलय् नेपाल तामाङ घेदुङ बागमती प्रदेशया नायः लिला कुमार तामाङं लसकुस न्वचू बियादीगु खः। देय् दबू बागमती प्रदेशया नायः विष्णु गोपाल महर्जनं सुभाय् न्वचू बियादीगु उगु ज्याझ्वः देय् दबू स्वनिगः विशेष प्रदेशया नायः श्रीकृष्ण महर्जनं न्ह्याकादीगु खः ।

भारती मानन्धरं माइतीघर मण्डलाय् थौंनिसे अनशन सुरू याःगु दु।

थः भातं चेतन मानन्धरयात स्यागू द्धपनय् जेलय् च्वनाच्वम्ह बाँकेया योगराज ढकाल (रिगल) यात वंगु असोज ३ गते सरकारया सिफारिसय् राष्ट्रपति रामचन्द्र पौडेलं आममाफी बिउगु बिरोधय् माइतीघरय् थौंनिसे अनशन सुरू याःगु दु।

भारतीया भात चेतनयात स्यागू द्धपनय् रिगलयात सर्वस्वसहित जन्मकैदया सजाय बिःगु खः। रिगल जेलय् वयागु चालचलन बालागु धासे सरकारं आममाफीया लागि राष्ट्रपतियात सिफारिस याःगु खः।

राष्ट्रपती पौडेलं आममाफी बिःगु खः।

गायिका दिलमाया खाती ८४ दँय् वयकःया छेँय् थौं चान्ह्यः मन्त । मदुम्ह खातीयाः सलय् ‘विछोडको पीडा नसकी खप्न दसैंको बेलामा’, ‘खोलाको दुई किनार’, ‘सम्हाल पछ्यौरी’, ‘सम्झे है बुझे है यो मेरो जोवन’ लगायत यक्को हे नेपाली म्ये लोकह्वाः।

खातीया जन्म दार्जिलिङया घुम पहाडय् विसं १९९६ साउन २३ गते बूगु खः। दार्जिलिङय् जन्मय् जूसा वयकलं नेपालय् च्वना हे ज्या यानाच्वनादीगु खः।

बझाङय् भुखाय् ब्बया आःतक १३ म्ह घाःपाः जुगु दु्। जिल्लाया थीथी स्थानीय तहय् याना १३ म्ह घाःपाः जुगु विवरण वंगु दु धका जिल्ला प्रहरी प्रमुख डीएसपी भरतबहादुर शाह न जानकारी बिःगु दु।

उमिगु अवस्था सामान्य दु व स्थानीय स्वास्थ्य संस्थाय् हे वासः याका च्वंगु दु धका धाःगु दु। भुखाय् ब्बया जिल्लाया नीगुलि मल्याकं संरचना दूगु दु धका न धाःगु दु।

बझाङय् केन्द्रविन्दु जूया थौं न्हिनय् २ बजे जूया ४० मिनेटय् ५.३ रेक्टर स्केलया भुखाय् ब्बःगु खः।

बझाङ केन्द्रविन्दु जूया थौं तकः मच्छि भुखाय् ब्बःगु दु।

राष्ट्रिय भूकम्प मापन लिसे अनुसन्धान केन्द्रया कथं दकलय् तधःगु कथं न्हिनय् ३ बजे जूया ६ मिनेटय् ६.३ रेक्टर स्केलया भुखाय् ब्बःगु खः। व स्वया न्ह्यः २ बजे जूया ४० मिनेटय् ५.३ रेक्टर स्केलया भुखाय् ब्बःगु खः।

‘३ बजे जुया ६ मिनेटय् ४ रेक्टरया स्वकः प्यकः परकम्प जुगु दु,’ केन्द्रया भूकम्पविदं धाःगु दु, ‘४ रेक्टर स्वया अप्पो तकः मच्छि ब्बःगु दु।’

केन्द्रया कथं ३ बजे जुया ४५ मिनेटय् व ४ बजे जूया २८ मिनेटय् ४.१ रेक्टर स्केलया लिसे ४ बजे जूया ३१ मिनेटय् ४.३ रेक्टर स्केल व बहनि ५ बजे जूया १९ मिनेटय् ५ रेक्टरया भुखाय् ब्बःगु दु।