सञ्चार तथा सूचना प्रविधि मन्त्री रेखा शर्मां गणतन्त्रया विकल्प पश्चगमन जुइफइ मखु धका धाःगु दु।

बिहीवाः राष्ट्रिय समाचार समितिं गणतन्त्र दिवसया लसताय् जुगु ‘झिगु संस्कृति ः झीगु सम्पदा’ नां किपा ब्बज्याय् न्ववायेगु झ्वलय् मन्त्री शर्मां गणतन्त्र व लोकतन्त्रया विकल्प पश्चगमन जुइ फइमखु धका धाःगु खः।

‘बालागुयात बालागु, बामलागु यात बामलागु धाये फुगु धइगु गणतन्त्रं जक सम्भव दु। यदि गणतन्त्र, लोकतन्त्र मदुुगु खःसा, झिसं थथे न्ववायेगुलि स्वतन्त्रता दइमखु धयादीसे झिगु शासक, सत्ता सञ्चालकपिनिगु कमजोरी व गल्तीयात झिसंपिने न्ववायेफइ मखु जुइ,’

वयकलं धयादीगु दु, ‘थुगु कारणं थज्यागु समस्यायात सुधार यायेफइगु धइगु हे गणतन्त्र दया हे खः। लोकतन्त्रं हे खः। गणतन्त्र, लोकतन्त्रया विकल्प हाकन पश्चगमन जुइ फइमखु। लिहावनेगु खँ जुइ हे मखु।’ वयकलं धयादीगु दु लोकतन्त्र व गणतन्त्र मदुगु इलय् न्ववायेगु स्वतन्त्रता तक मदु धका धयादीसे गणतन्त्रया विकल्पय् हाकन लिहावनेगु जुइ मखु धका स्पष्ट यानादील।

ज्यावलाख्यलय् थौं भोटो क्यःगु दु। राष्ट्रपति रामचन्द्र पौडेलया उपस्थितिइ रथय् च्वना उगु भोटो क्यःगु खः।

उगु भोटो जात्राय् थौं उपराष्ट्रपति रामसहाय प्रसाद यादव, प्रधानमन्त्री पुष्पकमल दाहाल प्रचण्ड, सभामुख देवराज घिमिरे, मन्त्रीपि, सांसद लगायत सरकारया उच्च पदस्थ मनूतयेगु उपस्थिति दुगु खः।

सिथि नखः कुन्हु थौं नेवाः तयेस थःगु त्वालय् च्वंगु सार्वजनिक तुँ, ल्वँहिति, बुँगाः व पूखु सूचुपिचू यायेगु याइ।

जेष्ठ शुक्लपक्षया षष्ठी तिथिइ थःगु त्वालय् च्वंगु तुँ, ल्वँहिति, बुँगाः व पूखु सूचुपिचू यायेगु नेवाः तयेगु न्हापानिसे परम्परा दुगु खः ।

थौं जावलाख्यलय् भोटो क्यनीगु जात्रा थौं जुइगु दु । थौं बुंगद्यःया रथय् भोटो क्यने धुंकाः जात्रा नं क्वचाइ ।

थौं जात्राया झ्वलय् स्वनिगलय् सार्वजनिक बिदा नं बियातःगु दु । भोटो क्यने क्वचायेवं बुंगद्यःयात रथं क्वकयाः खतय् तयाः बुंगय् तुं लित यंकी ।

नापं जात्रा याइम्ह चाकबहाःद्यःया रथ धाःसा चाकबहाः तक हे सालाः द्यः क्वकाइ ।

नेकपा एमालेया नेता रघुवीर महासेठं विदेशय् वःपि गुलि न उच्च पदस्थ मनूत हे गणतन्त्रया विरोध याना वयाच्वंगु थःम्हेसिया न्यनगु दु धका सरकारया ध्यानाकर्षण याःगु दु।

बुधवाः प्रतिनिधिसभाया बैठकय् न्ववायेगु झ्वलय् वयकलं धयादीगु खः गणतन्त्रया विरोधय् विदेशीपि नाप छलफल याइपिन्त कारबाही यायेत माग याःगु खः।

‘‘सू भीभीआईपीपिं गणतन्त्रया विरुद्धय्, व्यवस्थाया विरुद्धय् विदेशी भूमिइ वना, विदेशीपि नाप छलफल यानाच्वंगु दु। यदि थ्व खँ खःगु खःसा सरकारयात इनाप याये चाहे जू– अज्यापि भीभीआईपीपिन्त गणतन्त्रया विरुद्धय् विदेशय् वना षड्यन्त्र यानाच्वंगु दु सा अज्यापि भीभीआईपीपिनिगु सुविधा लाःकायेमाः।’