जनता समाजवादी पार्टी (जसपा) या संसदीय दलया नेता उपेन्द्र यादवं राष्ट्रपति रामचन्द्र पौडेलं राष्ट्रपति कार्यालयय् दुगु नागरिकता ऐन संशोधन विधेयक तत्काल प्रमाणीकरण यायेमाः धका धाःगु दु।

थौं बुधवाः प्रतिनिधिसभाया बैठकय् न्ववायेगु झ्वलय् अथे धयादीगु खः। ‘नागरिकता विधेयक तत्काल प्रमाणीकरण याना लागू यायेमाः’ धका वयकलं धयादीगु खः।

बुधवाः च्वंगु थौंया बैठकय् नेपाली कांग्रेसया नेता नाप सांसद विमलेन्द्र निधिं नागरिकता विधेयक राष्ट्रपति रामचन्द्र पौडेलं तत्काल प्रमाणीकरण यायेमाः धका धाःगु दु।

विधेयक राष्ट्रपति पौडेलयात प्रमाणीकरण यायेगु लागि संविधान व कानुनी रुपं छु कथं न मपं धका धाःगु दु।

 जनता समाजवादी पार्टी (जसपा)या संसदीय दलया नेता उपेन्द्र यादवं राष्ट्रिय योजना आयोगया आवश्यकता मदु धका धाःगु दु।

सरकारं वइगु आगामी आर्थिक वर्षया नीति तथा कार्यक्रमय् राष्ट्रिय योजना आयोगयात पुनः संरचना यायेगु धका धाःगु दु। नीति तथा कार्यक्रमया छलफलय् ब्बति कायेगु झ्वलय् वयकलं आयोग हे खारेज यायेगु सुझाव बिःगु खः।

‘थ्व राष्ट्रिय योजना आयोगया छु न ज्या मदु। थुकियात खारेज यानाबिउगुसा ज्यू। थुकियात खारेज याना प्रधानमन्त्रीया आर्थिक सल्लाहाकार समिति निर्माण याःसा ज्यु’ अध्यक्ष यादवं धाःगु दु, ‘ज्या मदुगु संस्था तया तयेगु धइगु खर्च जक अप्पोकेगु खः। थुकिया ज्या छु न मदु।’

प्रमुख सम्पदा क्षेत्रया प्रवर्द्धन यायेगु उद्देश्यं थौं मंगलवाःनिसे येँ सम्पदा घुम्ती बस सेवा सुरु जूगु दु।

संस्कृति, पर्यटन तथा नागरिक उड्डयन मन्त्रालय व नेपाल पर्यटन बोर्डं साझा यातायातया सहकार्यय् थुगु सेवा न्ह्याकूगु खः।

विश्व सम्पदा धलखय् सूचीकृत सम्पदा यलया दरबार स्क्वायर, येँया दरबार स्क्वायर, नारायणहिटी दरबार संग्रहालय, पशुपति द्यः, बौद्ध व स्वयम्भुइ याउक वनेफइगु कथं उगु सम्पदा घुम्ती बस सेवाया परीक्षण सञ्चालन याःगु खः।

संस्कृति, पर्यटन तथा नागरिक उडडयन मन्त्री सुदन किराती व यल महानगरपालिकाया मेयर चिरिबाबु महर्जनं यलपाखे सम्पदा घुम्ती बस सेवा सुरु याःगु खः। थौंनिसे न्ह्यागु उगु सम्पदा बसय् पर्यटनमन्त्री किरातीं पूच्वोनिसे नारायणहिटी दरबार संग्रहालयतक यात्रा न याःगु खः। पर्यटन बोर्डया कथं सम्पदा घुम्ती बस सुथय् ८ः०० बजे निसे बहनि ६ः०० बजे तक चले जुइ ।

साझा यातायात, पुल्चोक टुरिष्ट बसपार्क (यल महानगरपालिका न्ह्यने), महाकां द्यः, आर्मी हस्पिटल, जमल, दरबारमार्ग ,नारायणहिटी दरबार संग्रहालय, कमलपोखरी, पशुपतिइ टुरिष्ट बसपार्क, गौशाला, चाबहिल चौक, तारागाँउ संग्रहालय जूया बौद्ध वनिइ।

उगु बस लिहावइगु इलय् तारागाँउ संग्रहालय, बौद्ध, चावहिल चोक, नारायण गोपाल चोक, गंगबु बसपार्क, स्वयम्भु भगवान पाउ, छाउनी संग्रहालय, परोपकार (कालीमाटी) कालीमाटी चोकनिसे बल्खु चोक, रिङरोड जूया एकान्तकुना, सदर चिडियाखाना, जावलाख्यः जुया साझा यातायात, पुल्चोक वनिइ धका बोर्डं जानकारी बिःगु दु।

थुगु रुटय् न्हिं न्यासः पुलां न्हिच्छियकं यात्रा यायेफइगु प्रस्ताव याःगु दु। भाडा स्वीकृत मजूतले सेवा निःशुल्क बिइगु धका साझा यातायातं धाःगु दु।

प्रधानमन्त्री पुष्पकमल दाहाल ‘प्रचण्ड’ न कृत्रिम टुटिया ग्वाहालिं विश्वया सर्वोच्च शिखर सगरमाथाया सफल आरोहण याःम्ह हरि बुढामगरयात भिंतुना बिःगु दु।

थौं मंगलवाः सिंहदरबारस्थित प्रधानमन्त्रीया कार्यालयय् नापलाना प्रधानमन्त्री प्रचण्डं कीर्तिमानी सगरमाथा आरोही बुढायात भिंतुना बिःगु खः।

प्रधानमन्त्री पुष्पकमल दाहाल प्रचण्डं अर्थतन्त्र दबावय् दुगु धका स्वीकार याःगु दु।

तर श्रीलंका जुइत्यःगु दु धका म्वाः मदुगु आतंक सिर्जना याये मज्यु धका धयादीगु खः। सरकारया नीति व कार्यक्रमय् राष्ट्रियसभा सदस्यपिन्स न्यंगु न्ह्यसःया लिसः बिइगु झ्वलय् थौं वयकलं अर्थतन्त्र दबाव व अप्ठ्याराय् दु धका धयादीगु खः।

‘संकटय् दु, तर श्रीलंकाया स्थितिइ वनिइ मखु। झीगु स्थिति अज्यागु खनेमदु,’ वयकलं धयादीगु दु, ‘म्वाः मदुुगु आतंक सिर्जना यायेगु  म्वाः मदुगु खँ सू ना नं यायेमज्यु।’