नेपालभाषाया आधुनिक गद्य कविताया न्ह्यलुवा, वरिष्ठ निबन्धकार कवि पूर्ण वैद्यया निदँया पुण्य तिथिइ ‘नेवाः खँग्वःया पिला’ नांया सफू पिदंगु दु।

नेपालभाषा साहित्य ख्यःया स्वम्ह नांजाःपिं मिसा साहित्यकार मोतिलक्ष्मी शाक्य, मनदेवी ताम्राकार व प्रतिसरा साय्मिं च्वयादीगु छगू उगु सफू छगू ज्याझ्वः दथुइ पिदंगु खः । नेपाल साहित्य मन्दिरया पुलांम्ह नायःलिसें नांजाःम्ह साहित्यकार तिलकप्रकाश कायस्थया सभाध्यक्षताय् न्हू बानेश्वरय् च्वंगु अल्फा हाउसय् जूगु ज्याझ्वलय् उगु सफूया पितब्वज्या जूगु खः ।

उगु ज्याझ्वःया मूपाहांकथं झायादीम्ह वरिष्ठ साहित्यकर हितकरवीर सिंह कसाःलिसें विशेष पाहांपिं नेपाल प्रज्ञा प्रतिष्ठानया उपकुलपति विमल निभाः, नेपालभाषा एकेदेमिया भाइस चान्सलर मल्ल के. सुन्दर, साहित्यकारलिसें समालोचक पूर्ण ताम्राकार, मदुम्ह कवि वैद्यया जहान मीरा वैद्यं उगु सफूया पितब्वज्या यानादीगु खः ।

ज्याझ्वलय् नवानादीपिं वक्तापिंसं छगू बिस्कं विशेषता कुबियाच्वंगु सफू कन्हय्या पुस्ताया निंतिं उपयोगी जुइगु विश्वास प्वंकादीगु दु । ज्याझ्वलय् मूपाहां हितकरवीर सिंह कसाः, विशेष पाहांपिं प्रतिष्ठानया उपकुलपति विमल निभाः, एकेदेमिया भाइस चान्सलर मल्ल के. सुन्दर, साहित्यकार सुलोचना मानन्धर, समालोचक पूर्ण ताम्राकार, साहित्यकार सुवर्णकेशरी चित्रकार, कवि वैद्यया जहान मीरा वैद्यं सफूया थीथी पक्षयात कयाः चर्चा परिचर्चा यासें थःथःगु नुगःखँ तयादीगु खः ।

कवि वैद्यया शिष्य प्रतिसरा साय्मिं न्ह्याकादीगु ज्याझ्वलय् वय्कःया मेम्ह शिष्य मोतिलक्ष्मी शाक्यं सुभाय् देछानादीगु खः ।

त्यंगः त्वाः खलःया ग्वसालय् दापा म्ये, दापा बाजं प्रशिक्षण समापन, त्वाःया न्हूम्ह दापा गुरु घोषणा व त्यंगः गणेद्यया म्ये बिमोचन ज्याझ्वः क्वचागु दु ।

त्यगः त्वाः खलःया नायः धन बहादुर “तिमिला“ महर्जनया सभाध्यक्षताय् जूगु उगु ज्याझ्वलय् पूर्व मेयर बिद्यासुन्दर शाक्य मूपाहाँ कथं झायादीगु खः। उगु ज्याझ्वलय् विशेष पाहाँ कथं ज्यापू महागुथि नेपाःया नायः सत्य नारायण डंगोल, लोककवि राजभाइ जकःमि व येँ महानगरपालिका सम्पदा लिसे पर्यटन बिभागया बिभागिय प्रमुख  अर्चना शाक्य, पाहाँ कथं ज्यापू महागुथि नेपाः येँ महानगर समितिया नायः पंच नारायण महर्जन, ज्यापू संस्कृति बिकास कोषया नायः मंगलकृष्ण सिंह, येँ महानगरपालिका वडा १८ अध्यक्ष न्हुछेकाजि महर्जन झायादीगु खः ।

ज्याझ्वलय् न्हूम्ह दापागुरू मणिकण्ठ महर्जनयात सभाध्यक्षं दोसला न्येय्का व मूपाहाँ बिद्यासुन्दर शाक्य हनापौ लःल्हानादीगु खः। दापाम्ये, दापाबाजं स्यनामिपिन्त मूपाहाँपाखेँ दसिपौ बियादीगु खः । उगु ज्याझ्वलय् त्यंगः त्वाःया नायः धन बहादुर “तिमिला“या परिकल्पना कथं लोककबि राजभाई जकःमि चिनादीगु त्यंगः गणेद्यःया म्ये मूपाहाँ शाक्यं बिमोचन नापं म्ये च्वमि लोककबि राजभाई जकःमियात हनादीगु खः।

ज्याझ्वलय् त्यंगः त्वाःया थाकुलि तिर्थ नारायण महर्जन, न्वकेलि देव नारायण महर्जन, स्वकुलि कृष्ण नारायण महर्जन, प्यकुलि पञ्च महर्जन व न्याकुलि तिर्थ रत्न महर्जनयात सम्मान यायेगु नापं त्वाःया सुलिं अनिष महर्जन, पुष्प महर्जन, राजिप डंगोल व सुवा मचाकाजि महर्जन ( बहति), मचाकाजि महर्जन (खुसिबुँ), कुलबहादुर महर्जन, नानीकाजि महर्जन, बालकृष्ण महर्जन अथेहे दापाम्ये दापाबाजं प्रशिक्षणय् ग्वाहालि यानादीपिन्त नं सम्मान यानादीगु खः 

त्वाः खलः, परम्परागत त्वाःया हनेबहपिं नायः  नापं थीथी ख्यलं ब्वतिकयादीगु उगु ज्याझ्वः नानीहिरा महर्जन व मणिकण्ठ महर्जनं न्ह्याकादीगु खः ।

श्रीघःया शाक्य सर्वसंघं निस्वनातःगु श्रीशान्तिघट बज्रधातु चैत्य महाविहार संरक्षण समितिइ न्हूधाः जूगु दु ।

समितिया च्याक्वःगु वार्षिक साधारण सभां शुभकाजी शाक्ययात न्हूम्ह नायः कथं सर्वसम्मतं ल्यःगु दु। समितिया न्वकु कमलरत्न शाक्य, छ्यान्जे पुरन शाक्य, दाँभरीं रबिन्द्र शाक्य, लिउ छ्यान्जे अनिल शाक्य, लिउ दाँभरीं रसना शाक्यपि न सर्वसम्मत कथं ल्यःगु खः। अथे दुजलय् सुरेश काजी शाक्य, अष्टरत्न शाक्य, सुरेश शाक्य पुतलीसडक ,राजेश शाक्य व दिनेश शाक्ययात ल्यःगु दु ।

संरक्षण समितिया तत्कालिन नायः शुभकाजी शाक्यया सभाध्यक्षताय् जुगु  उगु ज्याझ्वलय् येँ महानगरपालिकाया सम्पदा लिसे पर्यटन विभागया प्रमूख अर्चना श्रेष्ठ शाक्य मूपाहाँ कथं झायादीगु खः । साधारण सभाय् तत्कालिन छ्यान्जे पुरन शाक्यं समितिया वार्षिक प्रतिवेदन व तत्कालिन दाँभरीं सर्वज्ञरत्न शाक्यं आर्थिक प्रतिवेदन न्ह्यबयादीगु खः ।

वार्षिक साधारण सभाया झ्वलय् श्रीघलय् शाक्य सर्वसंघ परिवार मुना  गुंला लच्छियंक्क तुतः ब्वना क्वचागु लसता ज्याझ्वः नं हंगु खःसा थुगुसिइ एसइइ पास जूपिं सर्वसंघया मस्तयेत नं सिरपा लःल्हाय्गु ज्या जूगु खः ।

वाग्मती प्रदेशया पर्यटन सहकारी नापं उद्योगमन्त्री पुकार महर्जनं नेवाः व तामाङतय्गु भाषा आन्दोलनया उपलब्धी कथं हे प्रदेशपाखें भाषा ऐन वइ धका धकाः धयादीगु दु ।

म्हिगः शनिवाः किपुलिइ जूगु सहलह मुँज्याय् मन्त्री महर्जनं अथे धयादीगु खः । वय्कलं नेवाः व तामाङतय्गु आन्दोलनया भावना कथं प्रदेश सरकारपाखें नेवाः भाय् व तामाङ भाय्यात बाग्मती प्रदेशय् सरकारी कामकाजि भाषाया रुपय् लागू यायेगु नितिं ऐन हयेगु अन्तिम चरणय थ्यंगु दु।

नेवाः देय् दबू स्वनिगः विशेष प्रदेशया संयोजनय् जूगु उगु सहलह मुँज्याय् भाषा आयोगया दुजः नापं भाषा बैज्ञानीक अमृत योञ्जन, भाषा बैज्ञानिक प्रा. डा. ओमकारेश्वर श्रेष्ठपिन्सं नं भाषा ऐनया महत्वयात कया खँ तयादीगु खः । आः वाग्मती प्रदेशं हयेत्यंगु राष्ट्रभाषा ऐनय् दुगु खँयात देय् दबू स्वनिगः विशेष प्रदेशया नायः श्रीकृष्ण महर्जनं न्ह्यब्वयादीगु खः ।

अन भाषा ख्यःयापिं नापं थीथी ब्यक्तित्वपिनिगु सहभागी दुगु खःसा सहलहया झ्वलय् वःगु सुभाावयात कया मन्त्री महर्जनं लिसः बियादीगु खः । आः याकानं हे देय् दबू स्वनिगः विशेष प्रदेशपाखें बाग्मती प्रदेशया राजधानी हेटौडाय् हे वना प्रदेश सांसदतलिसे उगु ऐनया बारे सहलह बयाकेगु जुइ धकाः धाःगु दु ।

लुँ तोलां थौं न्यासः थहावःगु दु। लुँ तोलां न्यासः थहावना थौं १ लाख १२ हजार ३ सय रुपैयाँ कारोवार जुयाच्वंगु दु।

अथेहे, वहः तोलां न्यातका थहावंगु दु। वहः तोलां न्यातका थहावना १ हजार ४ सय रुपैयाँ थ्यःगु दु।