सेयर बजाः परिसूचक नेप्से १४.४४ अंकं कुहावया थौं बुधवाः १९३८.६२ अंकय् बन्द जूगु दु। व्यापार बाहेक मेगु उपसूचक कुहावया नेप्से ०.७४ प्रतिशतं कुहावःगु खः।

लघुवित्त उपसूचक सर्वाधिक १.८६ प्रतिशतं कुहावया खःसा बजाः लिड याइगु बैंकिङ उपसूचक न ०.७८ प्रतिशतं कुहावःगु दु। नेप्से कुहावंसा मंगलबाः स्वया थौं बुधबाः कारोबार रकम छु भचा थहावंगु दु। म्हिगः मंगलबाः करिब १ अर्ब १४ करोडया कारोबार जूगु खः।

अथे हे, थौं बुधबाः नेप्सेय् २५ हजार ४९१ गु कारोबारपाखे ३७ लाख १६ हजार ६८४ कित्ता सूचीकृत धितोपत्र खरिदबिक्री जुगु खः। उगु कारोवारपाखे १ अर्ब २० करोड २१ लाख रुपैयाँया कारोबार जूगु खः। उकि मध्ये एनआईशी एशिया बैंकया दकलय् अप्पो १२० करोड ३५ लाखया कारोबार जुगु खः।

सानिमा माइ हाइड्रोपावरया ७ करोड १६ लाख रुपैयाँ व नबिल बैंकया ४ करोड २९ लाखया कारोबार जूगु खः। बुधबाः बजारय् कुल २१४ कम्पनीया सेयर कारोबार जूगुलि १४९ कम्पनीया सेयर भाः कुहावःगु खः। अथेहे ५१ कम्पनीया सेयर भाः थहावंगु दु सा १४ गु कम्पनीया सेयर भाः स्थिर जूगु दु।

उकि मध्ये युनिक नेपाल लघुवित्त व शुभम् पावरया सेयर भाः ९.९९ प्रतिशतं थहावना सकारात्मक सर्किटय् बन्द जुगुलि विद्यवासिनी हाइड्रोपावरया सेयर भाः ६.४२ प्रतिशतं थहावःगु दु। किसान लघुवित्तया सेयर भाः दकलय् अप्पो ५.९ प्रतिशतं कुहावःगुलि बाराही हाइड्रोपावरया सेयर भाः ५.२२ प्रतिशत व स्वरोजगार लघुवित्तया सेयर भाः न ३.९८ प्रतिशतं कुहावःगु दु।

राष्ट्रिय प्रजातन्त्र पार्टी (राप्रपा) न कन्ह्यः शुक्रबाः जुइगु उपराष्ट्रपति निर्वाचनय् तटस्थ च्वनेगु निर्णय याःगु दु।

वंगु बिहीबाः जूगु राष्ट्रपति निर्वाचनय् न तटस्थ च्वंगु राप्रपां शुक्रबाः जुइगु निर्वाचनय् सूयात न मत मबिइगु निर्णय याःगु दु।

निर्वाचनय् प्यम्हेसिगु उम्मेदवार दुगु खः। नेपाली कांग्रेस, नेकपा माओवादी केन्द्र व एकीकृत समाजवादीं जनता समाजवादीया उम्मेदवार रामसहायप्रसाद यादवयात ग्वाहालि याये धका धाये धुकुगु दु।

एमाले न उपाध्यक्ष अष्टलक्ष्मी शाक्ययात उम्मेदवार दयकूगु खः। जनमत पार्टीया उम्मेदवार ममता झायात लोसपा व नागरिक उन्मुक्तिं ग्वाहालि याइगु जुगु दु। जसपाया प्रमिलाकुमारी यादव न उम्मेदवार जुगु दु।

शुक्रबाः जुइत्यःगु उपराष्ट्रपति पदया निर्वाचन लागि वंगु चान्ह्यःनिसे मौन अवधि सुरु जूगु दु।

मौन अवधि सुरु जुइ धुका निर्वाचन क्वमचातले उम्मेदवारपिन्स मत फ्वनेगु व प्रचार प्रसार याये दइ मखु।

चैत ३ गते जुइत्यःगु उपराष्ट्रपति पदय निर्वाचनया लागि सत्ता गठबन्धनपाखे जसपाया रामसहाय प्रसाद यादव, नेकपा एमालेया अष्टलक्ष्मी शाक्य व जनमत पार्टीया ममता झा उम्मेदवार जूगु दु।

जसपाया हे प्रमिला कुमारी यादव धाःसा थःगु उम्मेदवारी निष्कृय जूगु घोषणा याःगु दु।

लुँया भाः थौं तोलां १६ सय थहावन।

थौं लुँ तोलां १६ सय रुपैयाँ थहावना १ लाख ५ हजार ७ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।

अथे हे, वहः न तोलां पीन्यातका थहावःगु दु। वहः तोलां पीन्यातका थहावना १ हजार ३ सय रुपैयाँ थ्यःगु दु महासङ्घं धाःगु दु।

नेवाः पत्रकार राष्ट्रिय दबूया झिंछक्वःगु स्थापना दिवस छगु ज्याझ्वः याना हंगु दु । स्थापना दिवसया झ्वलय् दबूया संस्थापक नायः श्रीकृष्ण महर्जनयात छगु ज्याझ्वः दथुइ हंगु खः।

अथे हे दबूया केन्द्रीय दुजः व केन्द्रीय सल्लाहकार समितिइ मनोनितपिंत दसिपौ लःल्हाःगु खः। दबूया केन्द्रीय दुजलय् विकास माली, भाइकाजी महर्जन, राजेश वज्राचार्य, प्रेरणा शाक्य, कविता श्रेष्ठ व रवि महर्जनयात मनोनित याःगु खः ।

अथेहे सल्लाहकारय् वरिष्ठ पत्रकारपिं सुरेश मानन्धर, पुष्करभक्त माथेमा, मोहन दुवाल, नरेशवीर शाक्य, ईश्वर जोशी, विजयरत्न असंबरेयात मनोनित याःगु दुसा कानुनी सल्लाहकारय् किरण शाक्ययात मनोनित याःगु खः । मनोनित जूपिं केन्द्रीय दुजःपिंत दबूया नायः नृपेन्द्रलाल श्रेष्ठं शपथ ग्रहण याकूगु खः ।अथेहे दबूया प्यक्वःगु कार्यसमिति नीस्वनेधुंकाः दबूपाखें जूगु थीथी ज्याझ्वःया संयोजन यानादीपिंत सुभाय् पौ नं लःल्हाःगु खः ।

नेपाःया न्हापांम्ह मातृभाषी पत्रकार धर्मादित्य धर्माचार्य व नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठया किपाय् खादा क्वखायेकाः हंगु स्थापना दिवसया ज्याझ्वलय् दबूया वरिष्ठ न्वकु सुनिल महर्जन, निर्वतमान नायः सुरजवीर वज्राचार्य, सल्लाहकार विजयरत्न असंबरे, संस्थापक नायः श्रीकृष्ण महर्जन व नायः नृपेन्द्रलाल श्रेष्ठपिंसं दबुलिं यायेधुंकूगु ज्या व दबुलिं यायेत्यंगु ज्याया बारे न्ववानादीगु खः। चिल्लागा सप्तमी ११४३, फागुन ३० मंगलवाः