लुँ वहःया भाः थौं भचा कुहावःगु दु। लुँ तोलां सच्छि कुहावःगु दु । लुँ तोलां सच्छि कुहावया थौं १ लाख ७ हजार ९ सय रुपैयाँ न कारोबार जुयाच्वंगु दु धका नेपाल सुन चाँदी व्यवसायी महासङ्घं धाःगु दु।

अथेहे वहः तोलां न नीतका कुहावःगु दु। वहः तोलां नीतका कुहावया थौं १ हजार ३ सय ४० रुपैयाँ न कारोबार जूगु दु धका महासङ्घं धाःगु दु।

सहप्राध्यापक गोपाल पौडेल ‘बसन्त’ या निगु सफू सार्वजनिक जूगु दु। ‘हे देव तिमी’ नेपाली व ‘आउट अफ बक्स’ अङ्ग्रेजी भाषाया निगु सफू आध्यात्मिक चेतना व जीवन जगत् थुइकेगु काव्य पितब्बज्या जूगु खः।

त्रिभुवन विश्वविद्यालयअन्तर्गत धनकुटा क्याम्पसय् ताः ईनिसे अङ्ग्रेजी भाषा व साहित्यय् प्राध्यापन यानाच्वनादीम्ह ‘बसन्त’ या ‘हे देव तिमी’ य् गूपु ताःहाकःगु चिनाख दुथ्याका तःगु खः। पूर्वीय जीवन पद्धतिइ वयकः चिनाखय् ज्ञान व विज्ञानमध्ये ज्ञानया सत्ता हे दक्को थाय् दइगु सत्य स्थापना याःगु दु।

व स्वया बिस्कं अङ्ग्रेजीया ‘आउट अफ बक्स’ चाहिँ २२८ गु चिहाकःगु चिनाखया सङ्ग्रह खः । अनुभूति, अध्यात्म, जीवन दर्शन, प्रकृतिलगायतया विविध विषय दुथ्याका चिहाकःगु चिनाखं तसकं कलात्मक खनेदु। ‘बसन्त’या थ्व स्वया न्ह्यः स्वंगु चिनाखँया सङ्ग्रह प्रकाशन जुइ धुकुगु दु।

उकि मध्ये अङ्ग्रेजीया ‘मन’ व ‘मन व प्राण’ संयुक्त राज्य अमेरिकाया मिचिगन स्टेट युनिभर्सिटीया दक्षिण एसिया अध्ययनय् पाठ्य सामग्रीइ दुथ्याका तःगु दु।

‘आउट अफ बक्स’ न सन्दर्भ सामग्रीया कथं तःगुलि अन या प्राध्यापक डा. मारोहाङ याक्थुङया भूमिकाय् च्वया तःगु दु। निगुलि सफू सेर्गेम प्रकाशन गृह दमकं प्रकाशन याःगु खः।

सरकारं पेट्रोलियम पदार्थय् थकाःगु भाः क्वकाःगु दु। प्रधानमन्त्री पुष्पकमल दाहाल प्रचण्डं थमकासे पुलागु हे भावं मिइत निर्देशन बिःगु खः ।

आइतवाः च्वंगु मन्त्रिपरिषदया मुँज्या लिपा संचारकःमिलिसे खँल्हासें संचारमन्त्री रेखा शर्मां धाःगु दु, ‘नखःचखः वयाच्वंगु इलय् जनतायात थाकूइगु ध्यानय् तयाः प्रधानमन्त्री प्रचण्डं भाः मकासे व साविकया हे मू कायम यायेत निर्देशन बियादीगु दु ।

सम्भवतः आयल निगमं छुं ई दुने हे सुचं पिकाइगु जुइ ।’ आयल निगमं शनिवाः चान्हय् निसें लागू जुइगु कथं पेट्रोलियम पदार्थया मू थकाःगु खः ।

शनिवाः च्वंगु निगम संचालक समितिया मुँज्यां पेट्रोल लिटरं नितका, डिजल व मचिकनय् लिटरं खुतका व एलपी ग्याँस प्रतिसिलिन्डरय् २१५ तका थकायेगु निर्णय याःगु खः।

महाकवि सिद्धिदास अमात्यया १५६ क्वःगु बुन्हि थीथी ज्याझ्वः यासें हंगु दु। थ्व हे झ्वलय् म्हिगः आइतवाः सुथय् नसँचा उलेगु, सिद्धिदास सिरपाः लःल्हायेगु ज्या जूगु दु।

येँया रत्नपार्कस्थिति शान्तिबाटिकाय् च्वंगु सिद्धिदासया झ्वाताय् स्वांमाः क्वखायेकुसें नसँचा उलेगु ज्या जूगु खः। महाकवि सिद्धिदासया तस्बिरयात बग्गीलय् तयाः सैनिक बाजं, परम्परागत दाफा बाजंसहित कुमारी रथजात्रा जुइगु रुटय् चाःहिउगु खः।

ज्याझ्वलय् भाषासेवीपिं लगायत थीथी स्कूलया विद्यार्थीपिनि सहभागिता दुगु खः नसँचा उलेज्या क्वचायेवं जनबहालय् च्वंगु दबुलिइ छगू ज्याझ्वःया दथुइ सिद्धिदास सिरपाः लःल्हाःगु खः।

वरिष्ठ साहित्यकार फणीन्द्ररत्न बज्राचार्ययात सिद्धिदास सिरपाःपाखें हंगु खः। अथेहे अन्वेषक काशीनाथ तमोटयात सिद्धिदास विद्वत्वृत्रि लःल्हाःगु खः।